ئه‌ڤرۆ نيوز:

پرسا پارێزگه‌هبوونا هه‌ردو باژێركێن گه‌ڤه‌ر و جزيرێ ل په‌رله‌مانێ توركيا ب پتريا ده‌نگێن په‌رله‌مانتاران په‌سه‌ندكر و ب ئيمزايا سه‌رۆك كۆمارێ توركيا دێ ئه‌ڤ بڕياره‌ كه‌ڤيته‌ د وارێ بجهكرنێ دا.

ئێڤاريا رۆژا ئه‌ينى 12ى ته‌باخا 2016ێ په‌رله‌مانێ توركيا پرۆژێ پارێزگه‌هبوونا هه‌ردو باژێركێن گه‌ڤه‌ر و جزيرێ ل جهێ شرناخ و جۆله‌مێرگ په‌سه‌ندكر و هه‌موو رێكارێن كارگێرى و قانوونى خستنه‌ به‌ر به‌حس و ڤه‌كولين ب پتريا ده‌نگێن په‌رله‌مانتاران هاته‌ په‌سه‌ندكرن، نوكه‌ ژى پرۆژێ قانوونێ چاڤه‌رێ ئيمزا ره‌جه‌ب ته‌يب ئه‌ردوگان يێ سه‌رۆك كۆماره‌.

پشتى په‌سه‌ندكرنا پرۆژێ قانوونێ ناڤێن هه‌ردو پارێزگه‌هان دێ هێنه‌ گوهۆڕين و گه‌ڤه‌ر دێ بيته‌ جۆله‌مێرگ و ب ناڤێ وێ يێ كه‌ڤن و ره‌سه‌نێ كوردى بكارهێت و ل جهێ جزيرێ ژى دێ ناڤێ نوح ب كارهێت.

ئەڤرۆ نيوز:
پشتی کو جەمیل بایک ئێک ژ سەرکردێن پەکەکێ ب توندی سیاسەتا پارتیا دیموکراتیک یا گەلان رەخنە کری و دیار کری کو دێ شەرێ خوە ل باژێرێن تورکیا بەرفرەھتر لێ کەین و سیاسەتا پارتیا ئێکەتیا دیموکراتیک ژی شاشە و وان شاشیێن مەزن کرن. سەلاحەدین دەمیرتاش ھەڤسەرۆکێ ھەدەپێ ب توندی بەرسڤا بایکی دا.
سەلاحەدین دەمیرتاش ھەڤسەرۆکێ پارتیا دیموکراتیک یا گەلان د بۆ رۆژناما جمھوریەت یا تورکیا دیار کر کو تشتێن بایکی گۆتی ئەم ب توندی رەد دکەین. نھا دەمێ ‌ھندێ نینە کو پەکەکێ شەری ل باژێران بەرفرەھتر لێ کەت، بەلکو مە دڤێت پەکەکێ ب ھەموو شیانێن خوە ھاریکار بیت دا ئەم جارەکا دی بزاڤێ بکەین پرسا کوردی دوور ژ شەری و ب رێیێن ئاشتیانە چارە بکەین و رەخنێن بایکی یێن ل سەر پارتیا مە ل گەل راستیا نھا ناگونجیت و ئەم قەبوول ناکەین.
سەلاحەدین دەمیرتاش ھەروەسا سەبارەت ب رەوشا نھا یا تورکیا و بزاڤێن ئاکپارتیێ ژی راگەھاند کو ئەردۆگان بزاڤەکا مەزن دکەت کو ل سالا ٢٠١٧ ھەلبژارتنێن پێشوەخت ل تورکیا بھێنە کرن. ئەوە ژی پیلانا ئەردۆگانی یە دا کو بشێت پرانیا دەنگێ وەلاتیان بدەستڤە بینیت و مفایێ ژ ئالۆزیێن نھا وەربگریت و سیستەمێ سەرۆکاتیێ ل تورکیا بجە بکەت و گۆت: (نھا تورکیا تووشی قەیرانەکا مەزن یا ھاتی. ژ بەر ھندێ ژی دڤێت ئەردۆگان جارەکا دی دەست ب قۆناغا ئاشتیێ و چارەکرنا پرسا کوردی بکەت، ئەو ژی باش دزانیت ھەتا کو پرسا کوردی ل تورکیا چارە نەبیت ئالۆزیێن ناڤخوەیی دێ بەردەوام بیت، کورد چ دەمەکێ مەترسی نینن بۆ تورکیا، بەلکو ھەکە پرسا کوردی چارە بیت دێ دەرگەھێ چارەکرنا ھەموو پرسێن دی یێن تورکیا ژی ھێنە ڤەکرن).

ئەڤرۆ نیوز:
سەبارەت راسپاردنا سەرۆکێ دیوانا سەرۆکاتیا ھەرێما کوردستانێ فۆئاد حسێنی ژ لایێ سەرۆکێ ھەرێما کوردستانێ ڤە کو دانوستاندنێ دگەل پارتێن کوردی بکەت ژبۆ شاندنا وەفدەکێ بۆ بەغدا ژ پێخەمەتی گەنگەشەکرنا ریفراندۆم و سەربەخۆیا کوردستانێ دکتۆر ھەوار بەلۆ ماموستایێ زانکۆیا دھوکێ بۆ ئەڤرۆ دبێژیت: بێی رێککەفتن نابیت چو وەفد بھێنە شاندن بۆ بەغدا، چونکی بریارەکا ھوسا نابیت یا ئێک لایەنی بیت، ھەر چەندە زۆر یا بزەحمەتە لایەنێن کوردی ل سەر ڤێ چەندێ ھەڤرابن، لەورا رەوش گەلەک یا بەر ب نازکیێ ڤە دچیت دناڤبەرا پارتێن کوردی دا و ھەڤرابوون یا قۆرستر لێ دھێت، ھەر چەندە حوکمەتا بەغدا ژی تێرا خوە ئاریشە ھەنە،وەکی ئاریشێن ناڤخۆیی یێن جۆر ب جۆر و ڤەکرنا دوسەیێن نوو یێن گەندەلیێ،لێ دێ ھەر ب خەمساری سەرەدەری دگەل داخوازیێن شاندێ کوردی ھێتەکرن، ھەکە ھات و چوونە بەغدا، لەورا بەغدا ب ساناھی ل سەر سەربەخۆیا کوردستانێ رازی نابیت،ناڤھاتی ھێشتا گۆت:ئاریشا مە دگەل سەربەخۆبوونا کوردستانێ ئەوە کو ئەڤ سەرخۆبوونە نە ل سەر بریارا مە مایە، لەورا ھەکە بریار ل سەر مە مابیت، دبیت مە ژمێژە ئەڤ چەندە راگەھاندبا،لێ کۆمەکا فاکتەران کونترۆلا ڤێ بریارێ دکەن و فاکتەرێ ژ ھەمیان گرنگتر گەرەنتیکرنا ئەمریکا و دەولەتێن دەردورێن مەنە،لەوما ھەر بریارەکا ل دووری بەرچاڤکرنا ڤێ چەندێ بیت،دێ بیتە جۆرەکێ دینبوونا سیاسی.
سەبارەت ھەلویستێ بەغدا ل سەر ریفراندۆم و سەربەخۆیا کوردستانێ د.ھەوار بەلۆ دبێژیت: ئەز نە ھندێ گەشبینم کو بەغدا رازی ببیت، چونکی ھەتا نوکە مە نە دیتییە لایەنێن سیاسی ل بەغدا پێشوازی ل ھزرا ریفراندۆمێ کربیت، نەمازە گەرموگۆرەکا باش ل راگەھاندنێ ژی ھەیە ل دۆر ڤی بابەتی و چو دەنگڤەدانا نەرێنی ل بەغدا مە نە دیتیە،دەربارەی ھەکە پارتێن کوردستانی نەگەھشتنە چو رێککەفتن و ئەنجامان دگەل ئێک ماموستایێ زانکۆیێ دبێژیت: ھەکە کومبوونا لایەنێن سیاسی سەرنەگرت، دێ تەنازۆلات ھێنەکرن ژ لایێ پارتێن کوردی و دێ نەچار بن دگەل ئێک روونەخار، لەورا چارەسەری ھەر روونشتن و ھەڤگرتنە، ھەر چەندە لایەنێن کوردی ل کوردستانێ ھەڤرا نابن ل سەر ریفراندۆمێ، چونکی پارتیا دیمۆکراتا کوردستانێ ھەردەم ئارامییا رەوشا ناڤخویی ب گرنگی زانییە و باوەریا مللەتی ب خوە نە تێکدایە، لەوما دێ پارتی ملکەچی ئەنجامێن ڤان کومبوونان بیت و رەفتارەکا ئێکلایەنی ناکەت.
سەبارەت سەرەدانا فۆئاد حسێنی بۆ دەف لایەنێن سیاسی سەرکردەیەکێ ئێکەتیێ گۆتیە مە باوەری ب شیانێن وی نینە،د.ھەوار دبێژیت: ئەڤ چەندە رەشبینیەکێ دیار دکەت،ژ گۆتنا وی دیارە ئەو دێ بنە رێگر بەرامبەر ریفراندۆمێ و ئەو ناھێلن ئەڤ پرۆژە سەر بگریت، ھەروەسا ئەڤ دەمێ ئەم تێدا ژی یێ نازکە و نەیێ گونجایە،ژبەرکو رەوشا دارایی جۆرە بێزاریەک لدەف خەلکێ پەیداکریە بۆ ریفراندۆمێ، ھەروەسا ھێشتا لایەنێن سیاسی ژی پێکنەکریە، لێ ھەکە کورد پێکھاتن و ب رازیبوونەکا ناڤخۆیی چوونە بەغدا کێشێن ناڤخۆیی ئالۆز نابن و مەزنر لێ ناھێن.