ل رۆژا 16/1/2013 گرێبەستا چێکرنا رووبارێ ھشکەرۆ ب بەرھەڤبوونا پارێزگەرێ بەرێ یێ دھۆکێ و رێڤەبەرێ سۆلینان و سەرۆکێ باژێرڤانیا دھۆکێ و رێڤەبەرێ کۆمپانیا (کورباغ گرۆپ) ب گۆژمێ 82 ملیۆن و 900 ھزار دۆلاران ھاتبوو ئیمزاکرن.
رۆژناما ئەڤرۆ یا ھژمار 1106 ل 17/1/2013 ێ، داخۆیانیەکا (تەمەر رەمەزان) پارێزگەرێ بەرێ یێ دھۆکێ ددەمێ ئیمزاکرنا گرێبەستێ دا بەلاڤکربوو کو تێدا دبێژیت” پشتی دانوستاندنێن درێژ، باژێرڤانیا دھۆکێ و رێڤەبەریێن دی یێن پەیوەندیدار مژوولی چارەکرنا ئاریشێن دکەڤنە درێیا بجھئینانا ڤی پرۆژەی دا کرین کو نەوەکو پرۆژێن دی یە و دڤیا گەلەک کێشە بھێنە چارەکرن، ل دووماھیێ گرێبەست ل گەل کۆمپانیا ناڤھاتی ھاتە ئیمزاکرن”.
ل دووڤ وێ گرێبەستێ، دڤێت د 40 رۆژێن بھێت دا دەست ب پرۆژەی بھێتە کرن ( ئانکو ل 25/2/2013 ێ).
ھەر ل دووڤ وێ دەنگوباسێ راگەھاندنا پارێزگەھا دھۆکێ د رۆژناما ئەڤرۆ دا بەلاڤکری ھاتیە کو “درێژیا پرۆژێ رووبارێ ھشکەرۆ نێزیکی 19 کیلۆمەترانە کو ژ ئێتیتێ دەست پێ دکەت ھەتا دگەھیتە گوندێ دولبێ و تێدا دێ پتر ژ 29 جھێن کەسکاتی و یاریێن زارۆیان و بێھنڤەدانێ تێدا ھێنە دروستکرن و ھەردو لایێن رووباری بۆ ئاڤا گران و پیس دێ ھێنە چێکرن و د قۆناغا ددووڤدا ویستگەھەکا پارزنینا ئاڤا پیس ل دولپێ ھێتە دانان بۆ پاقژکرنا ئاڤا گران و پیس دا جارەکا دی بھێتە بکارئینان”.
بەلێ (زیاد محەمەد) رێڤەبەرێ بەرێ یێ سۆلینان د داخۆیانیەکێ دا بۆ بەرپەرێ دووفچوون یێ رۆژناما ئەڤرۆ یا ھژمار 953 ل 29-5-2012 (ئانکو بەری ئیمزاکرنا گرێبەستا دروستکرنا پرۆژەی ب ھەشت ھەیڤان) ئاماژێ ددەت کو (نەخشە بۆ پرۆژێ رووبارێ ھشکەرۆی یێ ھاتیە دانان و تنێ پارە ماینە کو بھێنە دان) . رێڤەبەرێ بەرێ یێ سۆلینان د داخۆیانیا خوەدا دیارکربوو کو پرۆژێ نەخشە بۆ ھاتیە دانان تنێ ھەشت کیلۆمەترن و چو ئاماژە نەدابوون کو 19 کیلۆمەترن وەکو د دەنگوباسێ راگەھاندنا پارێزگەھا دھۆکێ دا ھاتی.
وەلاتیەکە مالا وی دکەڤیتە سەر رووبارێ ھشکەرۆی، بۆ رۆژناما ئەڤرۆ دبێژیت” من ب چاڤێن خوە یا دیتی ل سیکا عەسری دەمێ ئاڤ رابووی، ھندەک خانی خرابکرن، دیسا ل تاخێ خەبات ژی ھندەک مال خرابکرن، ھەرچەندە ناڤێن وان یێن ھاتینە نڤیسین، بەلێ ھەتا نوکە کەس ژوان نەھاتیە قەرەبووکرن”.
مەسعود وەلاتیەکە مالا وی دکەڤیتە سەر رووباری ل تاخێ خەبات، بۆ ئەڤرۆ گۆت” ئەم نەشێین موبەریدێن خوە ببەینە ژدەرڤە چونکێ بێھنەکا پیس ل گەل خوە دئینیت، لەوما نەچارین موبەریدێن خوە د ژۆران ڤە ددەینە کاری”.
گۆت ژی” ئەڤە 12 سالە دبێژنە مە دێ ڤی رووباری چێکەین و ھەر وەکو خوەیە، یا گۆتیە مە کو خانیێن ھەوە دێ کەڤنە بەر پرۆژێ چێکرنا رووباری و ناڤێن مە ژی یێن ھاتینە نڤیسین بۆ وەرگرتنا قەرەبووکرنێ”.
وەلاتیەکێ دی کو مالا وی دکەڤیتە سەر رووبارێ ھشکەرۆی بۆ رۆژناما ئەڤرۆ گۆت” ل ھەموو وەرزێن ھاتنا بارانان ئەم د مەترسیێ داینە و ھەر دەمێ باران گەلەک بھێت، ئاڤا رووبارێ ھشکەرۆی رادبیت و جارەکێ ئاڤێ دا دسەر مالەکا نێزیکی مە، د لەھیەکا ھشکەرۆی دا مالا دبن مالا من دا لەھیێ چو بۆ نەھێلا و ب بھایێ دو ملیۆن و 500 ھزاران ئاڤا لەھیێ کەلوپەلێن من ل گەل خوە بربوون”.
گۆت” ل ھاڤینێ بێھنەکا گەلەک پیس ژ رووباری دھێتە مە و گەلەک شەڤان ئەم نەشێین بنڤین ژبەر بێھنا پیس”.
وەلاتیەکێ مالا وی نێزیکی رووباری بۆ (ئەڤرۆ) دبێژیت” ل دەمێ ئاڤا رووبارێ ھشکەرۆی رادبیت، من گەلەک جاران یا دیتی موجەمیدە و سەلاجێن خەلکی ب ئاڤێ دا دھێنە خوار و دەمێ بارانێن بوش دھێن، گەلەک وەلاتی خانیێن خوە ل سەر لێڤا رووباری بجە دھێلن و ژێ دەردکەڤن، ئاڤا رووباری دەمێ رادبیت دگەھیتە ئاستێ جادێ و ئەو پرێن ل سەر رووباری ھەین ئەم نەشێن تێدا ھاتنوچوونێ بکەین ژبەر ئاستێ ئاڤێ، ئەو پرا بچووک ئەو ل سەر رووباری ل نێزیک بنگەھێ پۆلیسێن سەرھلدان ژ دەپێن داری ھاتبوو چێکرن، بەلێ ھندەک کەسان ب خێرا خوە یا چێکری و سەب کری، دیسا ژبەر پیساتیا ڤی رووباری ژی، ل ھاڤینان پێشی گەلەک ل مالێن مە مشە دبن”.
ل دۆر قەرەبووکرنا کەلوپەلێن وان ژلایێ حوکمەتێ ڤە، ناڤبری گۆت” ھەر چەندە ناڤێ مە یێ ھاتیە نڤیسین، بەلێ مە چ قەرەبوو وەرنەگرتیە و ب دیتنا من قەرەبووکرن ب تنێ ناڤە و چو بۆ نینە”.
سوبحی محەمەد سدیق رێڤەبەرێ سولینان ل پارێزگەھا دھۆکێ ئاماژێ ب ھەبوونا ئاریشەکێ د ناڤبەرا وەزارەتا باژێرڤانیان و پارێزگەھا دھۆکێ دا دکەت وبۆ ئەڤرۆ دبێژیت” پارێ ھاتیە تەرخانکرن بۆ پرۆژەی یێ وەزارەتا باژێرڤانیان بوو، پاشی وەزیری پرۆژە راوەستاند و گۆت ئەز پارەی نادەم، لەوما پارێ پرۆژەی ھاتە ڤەگوھاستن بۆ بودجا پارێزگەھا دھۆکێ یا گەشەپێدانا ھەرێمان و د رۆژەکێ و دو رۆژان دا ئەو ڤەگەھاستن ناھێتە کرن و پشتی دەست ب جھئینانا پرۆژەی ھاتیە کرن، لەھیا ئاڤێ رابوو و دیزاین یا کارا نەبوو و پشتی ھینگێ مە دیزاینەکا دی یا بوو بری و یا بەرھەڤە، بەلێ قونتەرچی کار ناکەت ژبەر نەبوونا پارەی”.
رێڤەبەرێ سولینان دیارکر ژی” 150 ملیۆن دۆلارێن وی قونتەرچی یێن ل سەر حوکمەتێ ماین ژبەر وی بەری نوکە پرۆژێ ئاڤا دھۆکێ و ئاڤا دیانا و چەند پرۆژێن دی دروست کربوو و چەند پرۆژێن دی و نوکە 10 ملیۆن دۆلارێن وی یێن ل سەر مە ژی یێن ھەمان پرۆژەی (ھشکەرۆ)، نوکە ھەموو تشت د بەرھەڤن، بەلێ حوکمەتێ پارە نینن کو ئەو قونتەرچی کاربکەت”.
ناڤبری خۆیاکر” ئەو مالێن دکەڤنە سەر پرۆژێ چێکرنا رووبارێ ھشکەرووی، دڤێت بھێنە قەرەبووکرن کو ھندەک ژوان ب گۆژمەکێ پارەی و ھندەکێن دی ژی ب پارچەکێ ئەردی و ھژمارەکا وان وەلاتیان یێن وەرگرتین و ھندەکێن دی وەرنەگرتینە و لژنەکا باژێرڤانیێ تەخمینا قەرەبووکرنا وەلاتیان ب پارەی کربوو کو ڤێ پرۆسێ 15 ملیۆن دۆلار بۆ دڤێن و وێ لژنێ کارێ خوە ژی ب دووماھی ئینابوو، تنێ یا مای قەرەبووکرن و چەکێ بەنکێ، بەلێ نوکە پارە نینن، لەوما قەرەبووکرن یا ھاتیە راوەستاندن”.
رێڤەبەرێ سۆلینێن دھۆکێ گۆت ژی” مە گەلەک پرۆژە یێن ڤەکێشاین، بەلێ ئەڤ پرۆژە یێ مای و نەھاتیە ڤەکێشان، ژبەر کو پرۆژەکێ ستراتیژیێ باژێرێ دھۆکێ یە و وەکو رێڤەبریا سۆلینان و کارگێریا پارێزگەھێ دێ ھەموو شیانان مەزێخین کو ئەڤ پرۆژە نەھێتە ڤەکێشان و ھەلوەشاندن ھەرچەندە ل دووڤ نڤیسارا جڤاتا وەزیران قونتەرچی مافێ ھەی خوە ڤەکێشیت، بەلێ نە مە پرۆژە ڤەکێشایە، نە قونتەرچی ژی خوە ڤەکێشایە”.