ئەڤرۆ نيوز:
بەرپرسەکێ بلندێ وەزارەتا پێشمەرگەی یا حوکمەتا ھەرێما کوردستانێ راگەھاند کو ئەو ژ لایێ وەزارەتا دارایی و ئابووری یا حوکمەتا ھەرێما کوردستانێ ب نڤیسارەکا فەرمی فەرمی ھاتینە ئاگەھدارکرن کو دەرمالێن باوەرنامێ بۆ پێشمەرگەی و کارمەندێن دیوانا وەزارەتا پێشمەرگەی و لیوایێن سەر ب وەزارەتا ناڤھاتی ڤە دێ ھێنە خەرجکرن.
ل دووڤ نڤیسارا ژمارە (5484) کو ل 6ی حوزەیرەنا 2016ێ دەرچوویە و ئیمزایا رابەر سەدیق، بریکارێ وەزارەتا دارایی و ئابووری یا حوکمەتا ھەرێما کوردستانێ ل سەرە، رازەمەندی ل سەر خەرجکرنا دەرمالێن باوەرنامێ بۆ پێشمەرگەی و کارمەندێن دیوانا وەزارەتا پێشمەرگەی و لیوایێن سەر ب وەزارەتا ناڤھاتی ڤە دایە.
پشتی وەزارەتا دارایی رازەمەندی ل سەر خەرجکرنا دەرمالێن پێشمەرگەی کری، کەریم شنگالی، وەزیرێ پێشمەرگەی ب وەکالەت ب نڤیسارا ھژمارە (4891) کو ل 26 حوزەیرانا 2016ێ دەرچوویە، داخواز ژ ھەموو رێڤەبەریێن ب سەر وەزارەتا پێشمەرگەی ڤە کریە کو ناڤەرۆکا نڤیسارا وەزارەتا دارایی و ئابووری یا حوکمەتا ھەرێما کوردستانێ پەیرەو بکەن و دەرمالێن باوەرنامێ بۆ پێشمەرگەی خەرج بکەن.
لیوا قارەمان شێخ کەمال، جێگرێ سەرۆک ئەرکان بۆ ئۆپەراسیۆنان ل وەزارەتا پێشمەرگەی ئاشکرا کر کو ئەڤ دەرمالە دێ بۆ وان پێشمەرگە و کارمەندێن سەر ب دیوانا وەزارەتا پێشمەرگەی ڤە ھێتە خەرجکرن، بەلێ دەرمالێن باوەرنامێ ژ وان ھێزێن ژ دەرڤەی وەزارەتا پێشمەرگەی ناگریت و بۆ دوارۆژ گۆت: “وەزارەتا دارایی داخواز کریە کو ھەر سێ دەرمالێن (باوەرنامە و ھەڤژینی و زارۆیان) خەرج بکەن، بەلێ بەری نوکە وەزارەتا پێشمەرگەی دەرمالێن ھەڤژینیێ و زارۆیان خەرجکرینە ژبەر ڤێ چەندێ نوکە بتنێ دێ دەرمالا باوەرنامێ ھێتە خەرجکرن”.
ناڤھاتی ئاماژە دا وێ چەندێ کو لژنەک ژ لایێ وەزارەتا پێشمەرگەی ڤە ھاتیە پێکئینان و داخواز ژ ھەموو پێشمەرگە و کارمەندێن وەزارەتێ کریە کو باوەرنامێن خوە بینن و نوکە کومەکا باوەرنامان د قووناغا ھویربینێ دانە و پشتی ڤێ قووناغێ دەرمالە دێ ھێنە خەرجکرن و گۆت: “ئەڤ دەرمالە دێ ب ھەمان شێوێ وەزارەتێن دی بیت، باوەرناما قووناغا سێیێ بنەرەت 15% و باوەرناما دوازدێ ئامادەیی 25% و باوەرناما پەیمانگەھێ 35% و باوەرناما بەکالۆریۆس 45% و باوەرناما ماستەرێ 65% و باوەرناما دکتۆرایێ 75%”.

ئه‌ڤرۆ نيوز:

رێڤەبەرێ خانەنشینا دھۆکێ راگەھاند، ھەتا سالا 1991 ڤەگوھاستنا مۆچێ خانەنشینیێ ژ پارێزگەھێن دی یێن عیراقێ بۆ بانکێن ھەرێما کوردستانێ تشتەکێ نۆرمال بوو و ل وی دەمی نێزیکی سێ ھزار خانەنشینێن عیراقی مۆچێن خوە بۆ بانکێن ھەرێمێ رەوانەکربوون و ژ وی دەمی وەرە مۆچێن خوە یێن خانەنشینیێ ل سەر کیستێ ھەرێما کوردستانێ وەردگرن و گۆت: “پشتی وی دەمی دو ھزارێن دی ژی زێدەبووینە و نوکە پێنج ھزار خانەنشینێن عیراقی مۆچێ خوە ل ھەرێما کوردستانێ وەردگرن”.
ئاراز محەمەد مەمدوح، رێڤەبەرێ خانەنشینا دھۆکێ بۆ ئەڤرۆ دیار کر کو ئەڤە 15 سالە ئەو خانەنشینە مووچێ خوە ل سەر حیسابا ھەرێمێ وەردگرن، چونکی ھەتا سالا 2005 حوکمەتا عیراقێ مۆچێن وان یێن خانەنشینیێ فرێ دکرنە ھەرێمێ، بەلێ پشتی سالا دیارکری و دەستنیشانکرنا بۆدجا ھەرێما کوردستانێ ل سەر 17%، ئەو مۆچە بۆ ھەرێما نەدھاتن و ژ وی دەمی وەرە وەرە ھەرێم ل سەر کیستێ خوە خانەنشینێن وان دمەزێخن.
ناڤبری خویا کر کو نوکە پتر ژ 18 ھزار فەرمانبەرێن پارێزگەھا دھۆکێ مۆچێ خانەنشینیێ ل پارێزگەھا دھۆکێ وەردگرن و نێزیکی پێنچ ھزار خانەنشینێن ئاوارە یێن عیراقێ و مادێ 140 مۆچێ خوە ل دھۆکێ وەردگرن، ھەروەسا 120 ھزار خێزانێن ئاوارە ب رێیا کارتا زیرەک مۆچەکێ ئاوارەبوونێ ل دھۆکێ وەردگرن.