ئه‌ڤرۆ نيوز:

شرین شنگالی، کچەکا رزگاربوویا دەستێ داعشێ یە ژیی َوێ 20 سالە ددیدارەکێ دا بۆ رۆژنامەیا ئەڤرۆ چیرۆکا خوە یا ل ژێر دەستھەلاتا داعشێ دبێژیت: ل 3 /8/2014 تەمەنێ من 17 ساڵ بوو، داعشێ ب سەر گوندێ مە دا گرت بابێ من ل دھوکێ کار دکر، ئەم ھەموو گرتین کچ و ژن ڤەگوھاستن بۆ قوتابخانەکا تەلەعفەر و زەلام ژ مە جودا کرن، داعشا گۆتە مە ئاینێ خوە بگۆھۆڕن و ببنە موسلمان، لێ مە رەت کرن. پاشان ئەم ڤەگوھاستین بۆ زیندانا “بادۆش”، دەە رۆژان د وێ زێندانێ دا ماین ، داعشا پیرەژن و زارۆ ژ مە جودا کرن ئەم ژی ڤەگوھاستینە قوتابخانەیەکا دی یا تلەعفەر ل بەر دەرگەھێ قوتابخانێ کچک ژناڤ دگرتن و دبرن، من دەستێ خۆشکا خوە یا بچووک گرتبوو و من گۆتە وان ئەڤە کچا منە دا من نەبەن گۆتە من راست بێژە ئەڤە کچا تەیە ! من گۆتێ: بەلێ. ئەز گەل وان نەبرم.
شرینێ گۆتژی: پاشان ئەمیرەک ھاتە دەڤ من دارەک ددەستی دا بوو ل سەرێ من دا گۆتە من رابە! تو دەرەوا دکەی تە خێزان پێک نە ئینایە، ل پاسێ سیار کرم و ئەز برمە قوتابخانەیەکا تلەعفەر کو 25 کچێن دی ل وێرێ بوون، ھەروەسا ئەز ب سۆندا ئەشکەنجە دام، ئەمیرێن داعش ئەو کچ رۆژانە ل سەر خوە دابەش دکرن .
ھەروەسا گۆت : رۆژا پاشتر گروپەکێ داعشا ھاتن ئەز و 4 کچێن دی ل گەل خوە برین وان ژی ئەم برینە ماڵا (دکتۆر ماجد) ھەر وێ شەڤێ دا ھەموو ئەمیران کریارا سکسی ل گەل وان کچان کرن، لێ چەند ڤیا خوە نێزیکی من بکەت ئەمیرەکێ من ھەر بەرگری ژ خوە کر و من نەھێلا، من نەزانی ئەو ھیزە چاوا بۆ من چێبوو ناڤێ وی ئەمیری “نەسر” بوو، ھەڤالێن نەسری ھەموویان یاری پێ دکرن دگۆتێ تو نەشێیە کچەکێ.
شیرنێ ب گریڤە گۆت: من بزاڤ کر خوە بکوژم ، بەس دا کریارا سکسی ل گەل من نەکەت لێ وی ژ نشکەکێ ڤە ئەز خلاس کرم و فریًکرمە دەڤ ھەڤژینا خوە ل تلەعفەر، ھەڤژینا وی گۆت ھەکە تو ببیە کۆیلە و نڤیژان بکەی و قورئانێ بخوونی ئەز ناھێلم ھەڤژینێ من دەست درێژیا سکسی ل سەر تە بکەت، من نڤێژ دکر و قورئان دخواند من دگۆت شەرەف مەزنترە ژ ھەر تشتی ، ئەز 5 ھەیڤان ل وێرێ مام نەسر ھاتە کوشتن ، کەسەک ب ناڤێ ئەیمەن ھات ئەز برمە جھێ لەشڤرۆشان کو ھەموو کچ و ژنێن ئێزدی بوون بۆ ماوێ ھەیڤەکێ ل وێرێ بووم، لێ کەس نەشیا کریارا سکسی ل گەل من بکەت ، ئەبو سالح ھات کچەک ل گەل وی بوو دژیێ 12 سالیێ دا ئەم پێک گوھارتین .
شرینێ ھیشتا گۆت: ئەبو سالح ئەز برمە گوندێ وەردیێ و ھاڤێتمە د خانیەکێ تاری ڤە و چلێ زڤستانێ بوو من گەلەگ ساربوو و خوارن و ئاڤ نەدانە من ، لەشێ من گەلەگ بێ ھێز بوو ، گەلەک جارا بزاڤ کر کریارا سیکسی ل گەل من ئەنجام بدەت لێ من نەھێلا، جارەکێ ئەز ب دارا گەلەگ قوتام ، پێنەک ل پشتا من دا ئەز بێ روح مام ، پشتی چەند دەمژمێرەکا روح ھاتە لەشێ من، من دیت ئەز کەڤتبوومە د گەرا خوینێ دا و نەزیف بۆ من چێبوو پشتی ڤێ نەخوشیێ چەندین جارێن دی ژی کریارا سکسی ل گەل من کر و ئەز برمە دەڤ ئەیمەنی ڤە ، ئەیمەن ئەز فرۆتمە مستەفای پازدە رۆژان ل دەڤ وی مام ، وی ژی ئەز فرۆتمەڤە عیسام ھەیڤەکێ لنک یێ دژی مام، پشتی ھنگی ئەز فرۆتمە ” رەمزی ” دەە رۆژان ل دەڤ وی مام ، وی ئەز فروتمە دکتور” ئەبو حیسام ” والیێ تلەعفەر بوو ، وی ژی ئەز فرۆتمە سوریا .
شرینێ ئەو چەندە ژی گۆت: ئەز سێ شەڤان ل سوریا مام ، ناڤێ ئێکی مەروان بوو ئەز کڕیم و برمە رەقە وی ژی گەلەگ جاران کریارا سکسی ل گەل من کر، پشتی ھنگی کەسەکی ژ حەویجە ئەز کڕیم بناڤێ” وەقاس” من ھەست دکر کو ئەزا ب دو گیانم لەوا ب ھەر رێکا ھەیی من ئەو زارۆ ژبەر خوە بر، پاش وەقاس ھات و ئەز برمە حەویجە و ئەز برمە مالا خوە و مالا وان پێشوازیا من کر و گۆت دێ تە رزگار کەین پشتی چەند گەلەگ کەیفا من ھات وەقاسی ئەز برمە ئەنبار و حسیبە و ب قاچاخی برمە کەربەلا ل ناڤ شیعەیان پشتی ھنگی ئەز برمە بەغدایێ ، ژ بەغدایێ ڤەگوھاستم بۆ کەرکووک و پێشمەرگە ھاتنە دووڤ من را و ئەز رزگار کرم و ھاتمە دھۆکێ دەڤ بابێ خوە و پشتی ھنگی چوومە پەرستگەھا لالش من خوە جارەکا دی مۆر کر ئیزدیبوونا خوە دیار کرەڤە و من جارەکا دی دەست ب کاری کر ل گەل رێکخراوەکا ئەڵمانی مافێ مرۆڤی.
پشتی ئەز چۆیمە ئەڵمانیا و ڤەکۆلین ل گەل من کرین و ژیانا من زانی پەرتووکەک ل سەر ژیانا من چێکر بناڤێ ” ئەز دێ ھەر مینم کچا رۆژێ” نھا ئەز خوە سەربلند دبینم دناڤ جڤاکێ خوە دا.

ئەڤرۆ نیوز:

پشتی ھاتنا چەکدارێن داعشێ دەست ب سەر قەزایا شنگالێ دا گرتین، ب ھزارەھا کەس گرتن و کوشتن و چەندین کەس رەڤاندن و ھەتا نھا ژی ھندەک د دەستێ وان دانە و چەندین کەس ژی ب رێیێن جیاواز ھاتینە دەستەسەرکرن. ھەتا نھا ژی مالباتەک ب تمامی کو نێزیکی 100 کەسانە دناڤ دەستێن داعش دانە.
زیاد خەلەڤ ، خەلکێ گۆندێ وەردیێ یە د دیدارەکآ دا بۆ رۆژناما ئەڤرۆ دیارکر، پتری سەد کەسان ژ مالباتا من کەڤتینە د بن دەستێ داعشێ و ھەتا نھا ژی د دەستێ وان دانە، ژ وێ رۆژ کو ھاتینە رەڤاندن من سۆز دایە ئەز بچم ناڤ رێزێن شەڕی و ل دژی وان شەڕی بکەم، ھەتا ئەم تۆلا خوە ژ وان ھۆڤێن داعش ڤەدکەین و گۆت: نھا ئەز پێشمەرگەمە ل سەر فەرماندەیا شنگالێ.
ناڤھاتی دیار ژی کر، ئەگەر کەسەک ھاریکاریا ماددی بکەت دێ ھەموو کەسێن مالباتا من ئێنە رزگارکرن، ھەتا نھا ئێک کەس ژ مالباتا من ھاتیە رزگارکرن، ئەو ژی ب پارە بوو کو پێشمەرگەھێن ل گەل من دەوام دکرن وان ھاریکاریا ماددی کۆمکرینە و ئەو کەسە رزگارکرینە.
دیار ژی کر، بەری نھا داعش ژ من دخوازیت ھەر کەسەکی 10 ھەزار دۆلاران بۆ ھەر کەسی بدەم ھەتا مالباتا من رزگاربکەن، نھا داعش داخوازی حەفت ھەزار دۆلاران دکەت بۆ ھەر کەسەکی، بەلێ مخابن ئەڤ کوژمێ مەزنێ پارەی من نینە، من چەندین داخوازی ژ چەندین جھان کرینە کو ھاریکاریا ماددی ب من دابا دا کو جارەکا دی ل گەل خێزانا خوە شاد بامەڤە و چو کەسی ھاریکاری نەکر و چەندین جھان سۆز دایە و کەسی سۆزا خوە ب جە نەئینایە.
ل دووڤ دا گۆت: “من سۆزدایە ئەز ل شنگالێ شەڕی بکەم ھەتا شنگال ب تەمامی رزگاربیت و ل پێشیا ھەموو شەڕان بم، چو شەرێ ل ھەمبەری ڤێ رێکخراوا تیروری یا ب ناڤێ داعش بھێتە کرن، ئەز ئێکەم کەس بم پشکداریێ د وی شەڕێ ل دژی ڤان دا بکەم”.
گۆت ژی :”ئەز داخوازێ ژ حکومەت ھەرێمی و نڤیسینگەھا کاروبارێن رەڤاندیێن دەستێ داعشێ و سەرۆک بارزانی و ھەموو وەڵاتێن جیھانێ دکەم ب زووترین دەم ڤان کەسان رزگاربکەن. وەک چاوان ئۆپەراسیۆنێن تایبەت دئێنە کرن ھیڤیا مە ئەوە ژ ئاسایش و ھێزێن ھەڤپەیمانان ڤان ئۆپەراسیونێ ژی بۆ ڤان کچ و ژنێن ئێزدی ژی بکەن، چونکو یێ د نەخۆشترین رۆژێن ژیانا خوە ل ژێر دەستھەلاتا وان دا دبەن و ھەر رۆژ کڕین و فرۆتنێ پێ دکەن” .
مەیسەر ئادانی بەرپرسێ راگەھاندنا نڤیسنگەھا کاروبارێن رەڤاندیان ل پارێزگەھا دھۆکێ بۆ ئەڤرۆ راگەھاند، ھژمارا گرتیان د دەستێ داعشێ دا 6404 کەس بوون، ژ وان ژی 3538 کەس رەگەز مێ بوون، (2866) رەگەزێ نێر بوون، ئەو کەسێن ھاتینە ئازادکرن ژ دەستێ تیرۆرستێن داعشێ (2640) کەسن، ژ وان ژی (953) ئافرەتن، (328) زەلامن، (675) زاروکێن کچن، (684) زاروکێن کوڕن. ھەروەسا ژمارەیا د دەستێ وان دا مای ژی (3770) کەسن.
مەیسەری دیار ژی کر، ھژمارا جانگۆری یێن کارەساتێ ژی (1293) کەسن، گۆرێن ب کۆمەڵ یێن ھەتا نھا ھاتینە دیتن 30 گۆرێن ب کۆمەڵن، و ژمارەیا مەزارگەە و نیشانگەھن ھاتینە پەقاندن و ژناڤبرن (44) مەزارگەە و نیشانگەھن.