ئەڤرۆ نیوز:
زانکۆیا دھۆک پشت بەستن ل سەر رێنمایێن وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ رێنمایی بۆ وەرگرتنا راستەوخۆ یا قوتابیان بۆ پێنج پشکێن زانستی دوھی 27/7/2016 بەلاڤکرن و دووماھی ژڤان بۆ پێشکێشکرنێ رۆژا 24/8/2016 یە.
د نڤیسارەکێ دا کو بۆ ھەموو کۆلیژێن ب سەر زانکۆیا دھۆک ڤە ھاتیە ھنارتن تێدا ھاتیە دیارکرن کو ل ھەر ئێک ژ کۆلیژێن (پەروەردا وەرزشی، زانستێن مرۆڤایەتی – پشکێن کۆمەلناسی، دراما، شێوەکاری، سیاسەتێن گشتی) دێ راستەوخۆ دەرچوویێن پۆلا 12 ئامادەیی وەرگرن و ھەر ل کۆلیژان بخۆ دێ فۆرما پێشکێشکرنێ پرکەن.
د رێنمایان دا ھاتیە، کو د پلانا کۆلیژان دا دڤێت رێژەک بھێتە تەرخانکرن بۆ خواندنا پارالێل کو ب رێژا (20%) کێمتر نەبیت ژ پلانا وەرگرتنێ، ھەروەسا دێ دەرچویێن ئامادەیی یێن ھەرێما کوردستانێ یێن سالا خواندنێ (2015 – 2016) پێشکێش کەن بۆ ھەڤرکیێ ب مەرجەکی تێکرایێ ئامادەیی ژ (60%) کێمتر نەبیت و ژیێ پێشکێشکاری ژ 30 سالان پتر نەبیت.
ھەروەسا بۆ دەرچوویێن سالا خواندنێ (2014 – 2015) ئەوێن ل چو زانکۆیێن حکومی نەھاتینە وەرگرتن مافێ پێشکێش کرنێ یێ ھەی ب مەرجەکی تێکرایێ وان یێ ئامادەیی ژ (60%) کێمتر نەبیت و ژیێ پێشکێشکاری ژ 30 سالان پتر نەبیت، ھەروەسا بۆ دەرچوویێن ئامادەیێن پیشەیی ژی دشێن بچنە ھەڤرکیێ بۆ وان پشکێن مافێ پێشکێشکرنێ ھەی ب ھەمان مەرجێن ژی و تێکرای، بۆ پێشکێشکرنا راستەوخۆ ژی داخوازکاری ب تنێ مافێ پێشکێشکرنێ بۆ ئێک زانکۆ و ژ ئێک زانکۆ ژی بۆ ئێک پشکا زانستی دێ ھەبیت.
بۆ پێشکێشکرنا پارالێل ژی بۆ دەرچوویێن سالێن پێشتر یێن ئامادەیی یێن ھەرێمێ و عیراقێ ل گەل بەرچاڤ وەرگرتنا رێنمایێن پارالێل د تێکرایی و ژی دا، بۆ ھەر پشکەکێ ژی دێ کریا خواندنێ ھێتە دیارکرن.
پێشکێشکرن ژی ھەتا رۆژا 24/8/2016 دێ یا بەردەوام بیت و راستەوخۆ دێ پێشکێشی تۆمارێن کۆلیژان کەن، بۆ وان بسپۆریێن کو شیانێن ھۆنەری و تەکنیکی پێدڤی ب دکیومێنتێن فەرمی بیت دێ ب رێژا 10% نمرێن تاقیکرنێ ل سەر وان شیانان بیت ل دووڤ گرنگیا وێ دکیومێنتێ.
ھەروەسا ئەو قوتابیێن ب ڤی سیستەمێ پێشکێشکرنا راستەوخۆ دھێنە وەرگرتن مافێ پێشکێشکرنێ ب رێیا زانکۆلاین نامینیت.

ئه‌ڤرۆ نيوز:

بەرپرسێ پەیوەندی و ڕاگەھاندنێ ل رێڤەبەریا گشتی یا ھاتنوچوونا دھۆکێ دیار کر کو بڕیار ھاتیە دان باجێن زانیاریان بۆ ھەموو ترۆمبێلێن تابلۆیێن وان ژ دەرڤەی ھەرێمێ بھێنە دروستکرن، لێ دڤێت رازیبوونا دەزگەھێن ئەمنی ل سەر بیت.
رائیدێ مافپەروەر ئازاد تاھا، بەرپرسێ پەیوەندی و ڕاگەھاندنێ ل رێڤەبەریا گشتی یا ھاتنوچوونا دھۆکێ ئاشکرا کر، نوکە دەرگەھێ دروستکرنا باجێن زانیاریان بۆ ترۆمبێلێن تابلۆیێن وان ژ دەرڤەی ھەرێما کوردستانێ ھاتیە ڤەکرن و بۆ رۆژناما ئەڤرۆ گۆت: “ئەم داخوازێ ژ ھەموو شۆفێرێن پەنابەر ل سنوورێ پارێزگەھا دھۆکێ دکەین، سەرەدانا رێڤەبەریا ھاتنوچوونا دھۆکێ بکەن، دا کو باجێ بۆ ترۆمبێلێن خوە دروست بکەن”.
ئازادی ئاماژە ب وێ چەندێ ژی کر، ھەر شۆفێرەکێ قەستا رێڤەبەریا وان بکەت بۆ دەرئێخستنا باجا زانیاریان بۆ ترۆمبێلا خوە، دڤێت رازیبوونا دەزگەھێن ئەمنی ل سەر بیت، ھەروەسا نڤیسارەکا فەرمی ژ لژنا کۆچ و کۆچبەران ل گەل خوە بینیت بۆ دروستکرنا باجا ترۆمبێلێ.

ئەڤرۆ نیوز:
ئۆلدارێ ئێزدی و کەسایەتیێ ئاینێ ناڤدارێ ئێزدیخانێ بابە چاویش، ل پەرستگەھا لالشێ ددیدارەکێ دا بۆ رۆژنامەیا ئەڤرۆ دیارکر، ھەر ژ کەڤندا ژی ئەم ل دژی ڤان کاران بووین ، چونکی ھەر کەسێ ئاینی و ساسیەتێ تێکەلی ئێک بکەت دێ شکەستنێ ئینت .و گۆت: ل گۆرەی دیتنا من ھەر کەسەک ئاینی و سیاسەتێ تیکەلی ئێک بکەت دێ شکەستنەکا مەزن ل دووڤ خۆ ھێلت ژبەرکوو سیاسەت تشتەکە و ئاین تشتەکی دی یە .
ئۆلداری ئاینی گۆتژی : پەرستگەھا لالش کۆکا ئاینێ ئێزدیایە و چ تشت مەزنتر ژ لالشێ نینن نە وەک مەزارگەھەکیە نە وەک زیارەتگەھەکا بچووکە و دڤێت لالش بمینت وەک ناڤێ خۆ “لال” و “ھش” ئانکو بێدەنگی لێ بھێتە پاراستن ، گەلەگ جاران ھندەک کەس ھندەک ئاڵایان دئیننە پەرستگەھا لالشێ ئەڤەژی خوسارتیە نە سەرکەفتنە و دێ زیانێ ب پەرستگەھێ گەھینن .
و گۆت : نابت چ ئاڵا یێن کیژ حزب و ئاینی بن نابت بھێنە بلندکرن دپەرستگەھێ دا ژ بەرکوو پەرستگەە ژ ھەموو ئالایان پیرۆژزترە چونکی چو ئاڵا وسیاسەت و کەس نەبوو پەرستگەھا لالش ھەر ھەبوو ، و چێنابیت چو ئاڵا ل لالشێ بھێتە بلندکرن. و ل گۆری دیتنا من نە تشتەکی راست و دروستە ئاڵا ل جھێن ئاینی بھێنە بلندکرن. و ب ھەر رەنگەکی ھەبیت دڤێت پەرستگەە بمینت پیرۆز.
و دیار ژی کر، دەرگەھێ لالشێ بۆ ھەر کەسەکی یێ ڤەکریە یێ قەستا پەرستگەھا لالشێ بکەت ، مە رێگری ل چ کەس و مللەتان نەکریە کو بھینە لالشێ ، ھەر کەسێ بھێت ژی ئەم دێ خزمەتا وی کەین ، لێ ئەم ناخوازین چو کەس و لایەنەک سیاسەتێ د پەرستگەھا لالشێ دا بکەت . ژ بەرکو پەرستگەھا مە پیرۆزیەکە مەزن یا ھەی و ئەم نە دژی ھیچ لایەنەکینە .
دیار ژی کر ، کو بۆمە قوب و پەرستگەھا مە ژ ھەر ئالا و حزبەکێ مەزنترە ، و ئەم نە دژی چ حزب و ئاڵا و کەسان و مرۆڤایەتیێ نە و ئاینێ مە رێزێ ل ھەموو کەسان دگریت .