ئه‌ڤرۆ نيوز:

خودانێ سەرشوویەکێ ل دھۆکێ ئاشکەرا کر، نوکە گەلەک کار کێم بوویە ژبەر ڤان کاودانا و ھەروەسا باراپتر کارێ سەرشوویان ل وەرزێ زڤستانێ ھەیە و ل وەرزێ ھاڤینێ گەلەک کارناکەین. بەرامبەر خودانێ سەرشویەکا دی دبێژیت: پشتی مە بھایێ سەرشویشتێ کریە شەش ھزار کار ھەروەکو خوەیە چو قازانچ ناکەین.

زێبار سلێمان شکری، خودانێ سەرشویا حەجی عادل بۆ ئەڤرۆ دیار کر، ھندەک کەس دھێن زارۆیێن وان یێن ل گەل وان و دھێلین ل گەل ئێک سەرێ خوە بشون، ھەروەسا ھندەک کەسان ب دزی ڤە ڤەخوارنێن کەحولی دئینانە د سەرشوویا ڤە و ڤەدخوارن، بەلێ ئەم ل سەر وێ چەندێ ھاتینە ئاگەھدارکرن.
گۆت ژی: ھەموو کەس دھێن ڤەستا سەرشویێ دکەن دا کو سەرێ خوە بشون، لێ نوکە گەلەک کار کێم بوویە ژبەر ڤان کاودانا و ھەروەسا باراپتر کارێ سەرشوویان ل وەرزێ زڤستانێ ھەیە و ل وەرزێ ھاڤینێ گەلەک کارناکەین، ل سالا بۆری ھەیڤا چار بۆ ماوێ سێ ھەیڤا مە سەرشو دائێخست و نوکە ئەم چو قازانچ ناکەین.
نەوزاد موسا بێسفکی خودانێ سەرشویا بەھدینان گۆت: ئەڤە بۆ ماوێ دو ھەیڤە مە بھایێ سەرشویشتنێ گران کریە و کریە شەش ھزار دینار، چونکو بەری نوکە حوکمەتێ گاز دا مە، بەلێ نوکە ژ مە ھاتیە برین، پشتی مە بھایێ سەرشووشتنێ کریە شەش ھزار کار ھەر وەکو خویە چو قازانچ ناکەین.
ھشیار فەریق سەرۆکێ لیژنا ساخلەمیێ ل جڤاتا پارێزگەھا دھۆکێ گۆت: ھەر جھەکێ دھێتە دانان وەکو سەرتراش و سەرشوو و بنگەھێن مەساجێ دڤێت ئەو مەرجێن ساخلەمیێ دڤێت ل بەرچاڤ بھێنە وەرگرتن و چاڤدێریا وان لیژنا دکەین، چونکو ئەو دەستھەلاتا جێبەجێ کارن و ئەم دەستھەلاتا جێبەجێ کرنی و ئەم چاڤدێریا وان لیژنا دکەین، ھەر جھەکێ خزمەتگۆزاری مەرجێن خوە یێن ساخلەمیێ ھەنە و دڤێت ئەڤ مەرجە بھێنە پاراستن.
ناڤبری گۆت ژی: د بەرنامێ جڤاتا پارێزگەھێ دایە وان ھەموو لایەنێن پەیوەندیدار ل جڤاتا پارێزگەھا دھۆکێ مێھڤان بکەت، چونکو نوکە پێدڤی ب ھندێینە پشتی پاشخستنا مۆچێ فەرمانبەران بازار دابەزیت، ئەڤ چەندە نە ب دلی مە بیت و ھەر لیژنەک ل دووڤ تایبەتمەندیا خوە پەیوەندیێ ب لایەنێن پەیوەندیدارکەت بۆ گرانبوونا کریا بھایێن وان.