ئەڤرۆ نيوز:

ڕۆژناما (الشرق الاوسط) یا چاپا لەندەن ئاشکراکر کو ئیرانێ فشار یا خستیە سەر حوکمەتا عیراقێ بۆ وێ چەندێ کو حەشد شەعبی پشکداری شەڕێ ئازادکرنا مووسلێ بکەت، ئاماژێ ددەت کو ئیران ب ڕێیا بزاڤکرنێ بۆ پەرەپێدانا دەستھەلاتا خوە ل مووسلێ ، ل دووڤ بدەستڤەئینانا چەندین ئارمانجان دگەرھیت و ژ گرنگترین وان ئارمانجان، دروستکرنا گەفان ل سەر ھەولێرێ.

ژێدەرەکی ژ ھەرێما کوردستانێ بۆ ڕۆژناما ناڤبری دیارکر کو ئیرانێ فشار یا خستیە سەر حەیدەر عەبادی سەرۆک وەزیرێن عیراقێ ھەتاکو ل ئۆپەراسیۆنا ئازادکرنا مووسلێ، ھێزێن میلیشیێن حەشد شەعبی پشکداریێ پێ بکەت و ئیران دخوازیت ب وێ ڕێ دەستھەلاتا خوە ل سەر دەڤەرێ ب سەپینیت و ل پاشەرۆژێ دژی ھەولێرێ مفای ژ وێ دەستھەلاتێ وەرگریت.

ب دیتنا وی ژێدەری بۆ (الشرق الاوسط) ئاخڤتی، ئیران ل پەرەپێدانا دەستھەلاتا خوە ل مووسلێ، ل دووڤ بدەستڤەئینانا چەندین ئارمانجان دگەرھیت و ژ گرنگترین وان ئارمانجان، دروستکرنا گەفانە ل سەر ھەولێرێ، چونکی مەسعود بارزانی سەرۆکێ ھەرێما کوردستانێ ب توندی دژی ھەر جۆرە دەستھەلاتەکا ئیرانی یە ل دەڤەرێ.
ڕۆژا شەمبیا بۆری، حەیدەر عەبادی سەرۆک وەزیرێن عیراقێ، گۆتارەک ل جڤاتا نوونەران پێشکێشکر و تێدا داخوازکر حەشد شەعبی پشکداریێ د شەڕێ ئازادکرنا مووسلێ دا بکەت، بەلێ ئەو داخوازیا وی ببو جھێ نەرازیبوونا توند یا سەرکردێن سونەیێن عیراقێ.
ئەسیل نوجێفی فەرماندێ ھێزێن حەشدا نیشتمانی کو ژ خەلکێ مووسلێ پێکھاتیە بۆ (الشرق الاسوط) دیارکر کو ھێزێن وان دشێن داعشێ بشکێنن و ئەو ب خوە ب شێوازەکێ تایبەت دێ ھێرشێ کەنە سەر داعشێ دناڤ مووسلێ دا، دیسا ئەو داخوازیا عەبادی ب نەعاقلانە ھژمارت و دیارکر کو نابیت ڕەوشا دەڤەرێ ل بەرچاڤ نەھێتە وەرگرتن و ھزر د ئەنجامێن وێ داخوازیێ دا نەھێتە کرن.
ھەڤدەم محی الدین مزووری کو بەرپرسەکێ پارتی ل دەڤەرا مووسلێ ب وێ ڕۆژنامێ راگەھاندیە کو پتریا ئاکنجیێن مووسلێ دژی پشکداریا حەشد شەعبی نە د شەڕێ ئازادکرنا مووسلێ دا و ھەکە عەبادی یێ ڕاستگۆ بیت، بلا فەرماندێن پۆلیسێن نەینەوا بھنێریت بۆ وێ چەندێ پشکداریێ بکەن د ھێرشا دژی داعشێ دا ل مووسلێ و ھاریکاریا پێشمەرگەی و حەشدا نیشتمانی ل دەڤەرێ بکەت.
بەری چەند ڕۆژان ھەڤپەیمانیا ھێزێن عیراقی یا سونی، پشتی ئەنجامدانا کۆمبوونەکێ بەیاننامەک دەرکر و تێدا نەرازیبوونا خوە دیارکر ل دۆر پشکداریا میلیشیێن حەشد شەعبی یێن شیعی د پرۆسا ئازادکرنا مووسلێ دا خویاکر کو ب چو شێوەکی ئەو قەبوول ناکەن حەشد شەعبی پشکداریێ د ئازادکرنا وی باژێری دا بکەن و ھوشداریا وێ چەندێ دا ھەکە حەشد شەعبی پشکداریێ بکەت، دێ شەڕەکێ تائیفی ل وی باژێرێ دروست بیت، ھەر د وێ بەیاننامێ ژی دا ھاتبوو کو ھێزێن حەشد نیشتمانی یێن کو ژ پێکھاتێن جودا جودا یێن باژێرێ مووسل پێکدھێن و ھێزێن پێشمەرگەی و ھەڤپەیمانیا نێڤدەولەتی دێ پشکداریێ د شەڕێ ئازادکرنا مووسلێ دا کەن و ئەو دێ شێن وی باژێرێ ژ دەستێ تیرۆرستێن داعشێ ئازاد کەن.