ئەڤرۆ نیوز:
ل گەل دەستپێکرنا وەرزێ ھاڤینێ پرسیارێن خەلکی ل دۆر نەخۆشیێن گەرمێ مشە دبن و دیسا ھندەک ھزرێن شاش ل دەڤ خەلکی پەیداببن و ھزر دکەن کو گەرماتی و ھشکبوونێ پەیوەندی ڤێکرا نینە، یان وان پێدڤی ب خوپاراستنێ ژ گەرمێ نابیت و ئەڤ ھزرێن شاش ل دەڤ پەیدادبن:
* ھەکە گەلەک خوھدان مرۆڤی بدەت گەرماتیا لەشی دێ ھەڤسەنگ بیت ھەتا دونیا یا گەرم ژی بیت
ب راستی ھەموو دەمان خوھدانێ شیان نینن بۆ ئارامکرنا گەرماتیا لەشی، ھەکە شەە و گەرماتی د بلند بن، دێ ھێدیانە بیتە ھلم و ئەو خوھدان دێ بیتە ئەگەر بۆ تەزاندنا لەشی، شەھا بلند دێ رادەیەکی بۆ ئارامکرنا گەرماتیا لەشی د خوھدانێ دا دانیت، ھەروەسان ھەکە شلەمەنی دکێم بن د لەشیدا یان مرۆڤ گەلەک جلکان ل بەر خۆ بکەت، دێ خوھدان ژی یا کێم بیت و دبنە رێگر د خوھدانێ دا.
* ھەکە مرۆڤ تێھنی نەبیت مرۆڤ تووشی ھشکبوونێ نابیت:
ژ بەد بەختیێ ھەموو دەمان تێھنی بوون نە نیشانا وێ چەندێ یە کا مرۆڤی پێدڤی ب چەند ئاڤێ ھەیە، ب تایبەت ل دەڤ زارۆ و سنێلەیان، رەنگێ دەستئاڤێ باشترین نیشانە بۆ ڤێ چەندێ و ھەکە رەنگێ دەستئاڤێ یێ ڤەبووی بیت ئەو نیشانا باشیێ یە، ھەکە رەنگێ وێ یێ زەر بیت یان سەر ب سۆری ڤە بیت ئەو نیشانا ھشکبوونێ یە.
* ل رۆژێن ئەور بیت مرۆڤ پێدڤی ب خوپاراستنێ ژ رۆژێ نابیت
ھەتا ھەکە دونیا عەور بیت ژی، تیرێژێن رۆژێ دگەھنە ل سەر ئەردی، لەورا گەلەک یا پێدڤیە رۆژانە مرۆڤ خۆ بپارێزیت و ھەر دو دەمژمێرا جارەکێ بھێتە نووکرن. بلا ل ھزرا تە بیت کو ب کارئینانا کەرستێن جوانکاریێ جھێ دەرمانێن خوپاراستنێ ژ تیشکا رۆژێ ناگرن، و ھەکە تو وێ چەندێ بکەی پێدڤیە تو ژ 14-15 جاران پتر میکیاژی بدانن ھەتا جھێ وێ دگرن و ئەڤە ل سەر کریم ئەساسی ژی دھێتە چەسپاندن، لەورا باشترە کو ل گەل کەرستێن جوانکاریێ خوپاراستن ژی ھەبیت.

ئەڤرۆ نیوز:
ل ڤێ دووماھیێ گەلەک خەلک قەستا کلینیکێن جوانکاریێ دکەن بۆ ئەنجامدانا کریارێن جوانکاریێ و رەنگە خەلکی ژنوو ئاگەە ژێ ھەیە کو جوانکاری زانستەکە د وارێ پزیشکیێ دا و ھەبوونا کەنالێن سەتەلایتێ یێن جودا جودا فاکتەرن بۆ ئەنجامدانا کریارێن جوانکاریێ، ھندەک بۆ دەمێن درێژ ڤەدکێشن و ھندەک ژی بۆ دەمەکێ دەستنیشانکری.
د. تەلال رەشید شنگالی، نوشدارێ شارەزایێ پیستی بۆ رۆژنامەیا ئەڤرۆ دیارکر ئەو کریارێن ب رێکا دانانا دەرزیک و تیشکا لێزەرێ ئەنجام ددەن، ھەموو بێی نشتەرگەری دھێنە ئەنجامدان و دیارکر ژی کو پتریا جوانکاریێن نوکە خەلک حەز ژێ دکەن، جوانکاریێن لێڤ و روو و راکرنا پنی و قورمچینا دێمی نە و ھندەک جوانکاری بۆ دەمێ سالەکێ دمینن و ھندەک ژی بۆ دەمێ پتر ژ پێنج سالان دمینن و ھندەک ژی ب شێوەیەکێ بەردەوام دمینن، بەلێ پتریا خەلکی حەزدکەن جوانکاریێن دومکورت ئەنجام بدەن و رەنگە ئەڤەژی بۆ وێ چەندێ بیت کو ل دەمەکێ نێزیک جوانکاری ببیتە مودێل و خەلک گەلەک کریارێن نشتەرگەری د ماوەیەکێ کورت دا ئەنجام بدەن.
د.تەلال دیارکر ژی کو بەری نوکە رەنگە ئەڤ کریارە ب رێکا ھندەک ملحەم و کریمان ھەبووینە، بەلێ ژبەرکو ملحەم و کریمان دەمەکێ درێژ ژبۆ دڤیا ھەتا مفا ل نەخوشی کربایە، و دبیت ژی نەخۆشی گەلەک مفا و کار ژ رێنمایێن وان نەدکر لەورا ب زەحمەت بوو ھەتا خو ئامادە دکر و ئەڤەژی د بو ئەگەر نەخوشی دەم نەبوو خۆ بەرھەڤ بکەت و مفا ژێ نەددیت.
ھەروەسان گوتژی بۆ ئەنجامدانا ڤان کریاران ھندەک نەخوش پێدڤی ب پتر روونشتنەکێ یان دەرزیکەکێ دبن و ئەو ل سەر بڕیارا نوشدارێ چارەسەر دمینیت. لەورا پێدڤیە نەخوش پێگیریێ ب رێنمایێن نوشداری بکەت و نوشدار ژی بۆ وی دیاربکەت کا چ جورێ جوانکاریێ یە و چ سەربارک دێ ژێ پەیدابن. چونکو نوکە گەلەک نەخوش ھزر دکەن ب رونشتنەکێ یان ب دەرزیکەکێ دێ ھەموو جھێ وی بڤێت ھێتە گوھارتن و ئەڤ ھزرە یا شاشە و دبیت ئەم داخوازێ ژ نەخوشی بکەین بۆ دو ھەتا سێ جاران ژی بھێت.
دەربارەی سەربارکان ژی، د.تەلال گۆت: ئەو جھێ ئەم دەرزیکا بۆ ددانین، رەنگە بۆ دەمەکێ کێم شین ببن یان ب وەرمن و پشتی دەمەکێ کێم دێ ڤەگەرنەڤە بۆ سروشتێ خۆ یێ بەرێ. و سەرکەفتنا کریارا جوانکاریێ ئەوە کو دەوروبەرێن وی دزانن تشتەک یێ روودای بەلێ نزانن کا ئەو تشت چاوا ھاتیە گوھۆرین و پەیدابوویە و دبیت ئەو ھزر بکەن تشتەک سروشتی پەیدابوویە.
نوشدارێ شارەزایێ پیستی گوت: ھەکە دەرزیکا بوتوکس ھاتە دانان ب خەلەتی ژ جھێ خۆ بوری، رەنگە کرێتیەکێ ل دووڤ خۆ بھێلیت، لەورا نوشداری خواست کو نەخوش ژلایێ نوشدارێن تایبەتمەند ب ڤان کریاران ڤە ئەنجام بدەن و دکتور ژی بەری ھینگی ھندەک پسیاران ل دۆر چەند نەخوشیان ژێ بکەت.
ژلایەکێ دیڤە دکتوری گوت: دبیت گەلەک کەس ھەبن پێدڤی ب کریارێن جوانکاریێ نەبن، و دبیت کەسەک بھێت و حەز بکەت تشتەکی بۆ بکەین، بەلێ دەمێ ئەم بەرێخودانێ لێ دکەین دێ دیاربیت نە یێ پێدڤی یە، لەورا نابیت کریارێن جوانکاریێ ل دووڤ حەزا نەخوشی بھێنە کرن و باشترە پشتی نوشدار بۆ نەخوشی شێوازێ کریارێ دیاردکەت، نەخوش ژی ھزرێن خۆ بکەت بەری بریارا خۆ بدەت.