ئه‌ڤرۆ نيوز:
رێڤەبەرێ باژێرڤانیان ل پارێزگەھا دھۆکێ ئاشکرا کر، بەرھەڤی بۆ دانا ئەردی بۆ شەھیدێن شه‌رێ دژى داعش ھاتیەکرن و ل دووڤ راسپاردێن پارێزگەرێ دھۆک جھەکێ ژ ھەژی خێزان و کەس و کارێن شەھیدان دێ بۆ ھێتە دابینکرن و پێشبینی دھێتەکرن ئەو جە ئێک ژ دەڤەرێن سێمێلێ یان کۆمەلگەھا تەناھی بیت.
ئەندازیار ھەڤال ئەحمەد حسێن رێڤەبەرێ گستیێ باژێرڤانیان ل پارێزگەھا دھۆک بۆ رۆژناما ئەڤرۆ ئاشکراکر کو ل دووڤ رەشنڤیسەکێ وەزارەتا باژێرڤانی و گەشت و گوزارێ ڤە و د بیست و پێنچ خالان دا کو وەک پێشنیار بۆ ئەنجوومەنێ وەزیران ھاتینە بلندکرن و ئەنجوومەنێ وەزیران بریارێ ل سەر ئەوان خالان بدەت، وەزارەتا باژێرڤانی و گەشت و گوزار ل گەل ڤێ چەندێ فۆرم ل سەر ھەموو وەزارەتان و فەرمانگەھان دابەشکرینە و زانیاری ژ فەرمانبەران دھێنە وەرگرتن و بەرھەڤکرن و ھەر دەمێ بریار دەرچوو ژ ئەنجوومەنێ وەزیران دا کار ل سەر بھێتەکرن، پتر گرنگی ل سەر سالێن خزمەتێ و بارێ خێزانی دھێتەکرن.
ئەندازیار ھەڤال رێڤەبەرێ باژێرڤانیان ل پارێزگەھا دھۆک نەڤەشارت گۆت ژی: نوکە ئەرد بۆ بەلاڤەکرنێ وەک باژێرڤانی ل پارێزگەھا دھۆکێ یێ بەرھەفکری نینە، مە ھندەک ئەرد باژێرڤانیا فەیدیێ ھەیە ئەو ژی رێژەکا گەلەک کێمە و پێشتر ژی رازیبوون ل سەر گەلەک کەسان کو نێزیکی 21 ھزار وەلاتیان ھەیە، لێ ژ نەبوونا ئەردی ئەم نەشیاینە ئەردی بدەینێ.
ئەندازیار ھەڤال ل سەر بەرھەڤیێن رێڤەبەریا باژێرڤانیان ل پارێزگەھا دھۆکێ ژی بۆ دابینکرنا ئەردی بۆ بەلاڤەکرنێ گۆت: ھەکە بریار ژ ئەنجوومەنێ وەزیران ل سەر بەلاڤەکرنێ دەرچوو، وەک وەزارەتا باژێرڤانی ل گەل ھەر دو وەزارەتێن دارایی و چاندنێ و باراپتر ئەرد ل سەر ناڤێ وانە و د دەستێ وەلاتیان دایە و ھەر ئەردەکێ بھێتە دابینکرن ئەو خەلک دھێتە قەرەبووکرن.
ناڤبری گۆت ژی: ھەتا نوکە 21 ھزار وەلاتی ماف ھەیە ئەردی وەربگرن و ناڤ د کومپیوتەری دانە و ئەڤە پتر یێن سالێن 2011 و ھێرڤەنە و ھەر فەرمانەکا بەلاڤەکرنێ دەربچیت ژ ئەنجوومەنێ وەزیران ل سەر بەلاڤەکرنا پارچێن ئەردی ئەڤ ناڤێن کومپیوتەری دا دێ مفادارێن ئێکێ بن و ئەڤە ل دەف وەک حوکمەتا دھۆکێ، لێ ھەکە بریارەک ژ ئەنجوومەنێ وەزیران ھات ئەو دێ بابەتەکێ دی بیت.
ھەمبەر دابینکرنا پارچێن ئەردی بۆ شەھیدێن شەرێ دژى داعش، ئەندازیار ھەڤال گۆت: بریار ھاتیە ژ وەزارەتا باژێرڤانی و گەشت و گوزار کو پارچێن ئەردی بدەنە شەھیدێن شەرێ داعش، لێ ھێشتا ناڤ و لیستە ژ وەزارەتا شەھیدان و ئەنفالکریان نە گەھشتینە مە و ھەر دەمێ بگەھیتە مە دبەرھەڤین ب زووترین دەم ھەر خێزانەکا شەھیدی پارچەکا ئەردی بدەینێ و ھەموو دێ جھەکی بیت و ل دووڤ راسپاردێن پارێزگەرێ دھۆکێ جھەکێ ژ ھەژی دێ بۆ ھێتە دابینکرن و پتر پێشبینی بەر ب ھندێ دچن ئەو جە ل سێمێلێ یان کۆمەلگەھا تەناھی بۆ بھێتە دابینکرن.
ل دۆر دەمێ دیاری بۆ دابینکرنا ئەردی بۆ فەرمانبەران، ئەندازیار ھەڤال گۆت: ئاریشێن ئەردی گەلەکن و ئەو دەمێن ل سەر رازیکرنا خودانێن ئەردی و دیسان رازیبوونا وەزارەتێن چاند و دارایی ل سەر وی ئەردی، گەلەک جاران وەزارەتا چاندنێ رێگرە و دبێژیت قەبوول ناکەین ئەردێ چاندنێ بۆ پارچە زەڤیان و ئاڤاکرنێ بھێتە بکارئینان و گەلەک جاران ھاریکار ژی بوویە، ھەر چەندە ل دووڤ ماستەر پلانێ دچین و ئەم ژی حەس دکەین ئەردێ سەخەری بیت لێ تێرا خەلکی ناکەت، ئانکو ھەتا دبینە خودانێن ئەردی دڤێت ژبلی جوتیاران رازیبوونا ھەر دو وەزارەتێن چاند و دارایی بھێتە وەرگرتن و ئەڤە قۆناغن و ل دووڤ دا پێدڤی ب نەخشا دبین و ئەڤە ل دووڤ نەخشا پارچە ئەردی دھێتە بەلاڤەکرن.
ھەمبەر دابیکرنا خزمەت گوزاریان بۆ جھێن ئەرد پێشتر ھاتیە بەلاڤەکرن یا ب دھۆکا نوو ھاتیە ناڤکرن، ئەندازیار ھەڤال گۆت: وەک پێدڤی خزمەت گوزاری نەگەھشتینە ڤان دەڤەران و مە گەلەک چێکرینە لێ ھێشتا ماینە و ئەگەر ژی ڤەگەریت بۆ برینا بۆدجێ ژلایێ حوکمەتا عیراقێ ڤە، شەرێ تیرۆرستێن داعش، نزمبوونا بھایێ پەترۆلێ.