ئه‌ڤرۆ نيوز، فاتما مزوورى:
ل ئێك ژ كه‌نالێن وه‌لاتێ مه‌غرب و د په‌خشێ ئێكسه‌ر دا، كچه‌ك ژ ئه‌گه‌رێ ته‌نورێ خوه يێ كورت تووشى كاودانه‌كێ شه‌رمزاركه‌ر بوو، ئه‌ڤه ژى پشتى وێ چه‌ندێ كو دايكا وێ په‌چنتى دا كو لاشێ وێ يێ رووت ده‌رنه‌كه‌ڤيت.
ژ ئه‌گه‌رێ وێ روودانێ ژى گرنژينه‌ك كه‌فته سه‌ر لێڤێن پێشكێشكارا به‌رنامه‌ى و بۆ جهێ شه‌رمزاريێ بۆ كچێ.
چالاكڤانێن مه‌ده‌نى يێن وى وه‌لاتى ژى راگه‌هاند كو ئه‌ڤ ره‌فتارا دايكێ زێده‌تر ئه‌ڤ كچه تووشى شه‌رمزاريێ كريه.
ئه‌ڤرۆ نيوز، فاتما مزوورى:
ل تۆڕا جڤاكيا تويته‌رى، ده‌نگويێ شكاندن و جه‌يلبرێككرنا دووماهى ڤێرژنێ ئاى ئۆ ئێس يێ نوو هاته به‌لاڤكرن وه‌كو نووچه‌كێ خۆش بوو ب بكارئنيه‌رێن خودانێن ئايفونان.
ل ده‌سپێكا ڤێ هه‌يڤێ كۆمپانيا ئه‌پل گه‌شه‌پێده‌رى سيسته‌مێ ئاى ئۆ ئێس دووماهى ڤێرژنێ خوه خسته به‌ر ده‌ستێ ب كارئينه‌ران كو 9.3.2 بوو، به‌لێ هه‌ر زوو ژ لايێ گرۆپێ تۆدێسكۆ ل تويته‌رى ده‌نگويێ شكاندنا سيسته‌مى هاته به‌لاڤكرن و ڤيديۆ خسته به‌ر چاڤێن ب كارئينه‌ران.
ئەڤرۆ نیوز:
رێجیما ماستی و قەسپان باشترین رێجیما بلەزە، کو ھەر حەفتیێ دێ سێ ھەتا چار کیلۆیان ژ تە کێم کەت، بەلێ یا باش ئەوە ڤی جۆرێ رێجیمی ژ ھەیڤەکێ زێدەتر پەیرەو نەکەن.
مفایێن ماست و قەسپان:
قەسپێ رەگەزێن تمام یێن خوارنێ د ناڤ دا ھەنە وەکو ڤیتامین و کانزا و تڕشاتی و ریشال و شرینێن خوەرستی، لەورا دبیتە دانەکێ خوارنێ یێ تمام.
ماستی ژی کالسیۆم و پرۆتین و مەھاندنێن خوەرستی د ناڤ دا ھەنە یێن ب ئاوایەکێ ساخلەم خوارنێ دھەرێسن، ھەروەسا ھەستا تێربوونێ ددەنە مرۆڤی و ناھێلیت زوو دلێ مرۆڤی بچیتە خورانێ.
رێجیما ماست و قەسپان:
حەفتیا ئێکێ: فتارە و پاشیڤان ماست و قەسپان بخۆ، تو دشێی ماستی یان شیری ڤەخۆی.
حەفتیا دویێ: ماستی د گەل ھژمارەکا کت یا قەسپان بخۆ بەری فتارێ بخۆی، پاشی نیڤ سەعەتێ خوە بگرە، پاشی پرتەکا نانێ جەھێ بخۆ د گەل گوشتێ سپی وەکو سینگێ مریشکێ.
حەفتیا سیێ: ماستێ و قەسپان ل گەل پرتەکا ستیکا مریشکێ یێ براژتی بخۆ، د گەل ھندەک فێقی د گەل فتارێ، ھەروەسا تو دشێی ھندەیک فێقی و نانی د گەل پاشیڤێ ژی بخۆی.
حەفتیا چارێ: ماستی د گەل وان خورانان بخۆ یێن بێ روون و شرینی.
ئەڤرۆ نیوز:
دەمی ژن یا ب دوگیان بیت یا پێدڤیە کوئەندامێ خوە یێ بەرھنگاریێ ب ھێز بێخیت دا تووشی نەخۆشیێن سەرمایێ و ئەنفلەوەنزایێ نەبیت.
خوارنێن ساخلەم و ھەڤسەنگ بخۆ و گەلەک جۆرێن فێقی و کەسکاتی بخۆ، ئەو جۆرێن خوارنێ دێ کۆمەکا کانزا و ڤیتامین و کەرستێن دژی گیرھەبوونێ ددەتە تە، ناھێلن ژی تو تووشی ھەودانان ببی.
گەلەک تەڕاتیان ڤەخۆ، ئاڤێ و چایا گیایان و دۆشاڤا فێقی ڤەخۆ، ئەو ڤەخوارن دێ لەشێ تە ژتافیل کەن و کانزا و ڤیتامینان د لەشێ دا زێدە کەن، بزاڤێ بکە ڤەخوارنێن کافیین تێدا وەکو قەھوێ و خڤەخوارنێن گەلەک شەکر تێدا ڤەنەخۆ.
دەمێ تو پێدڤی دبی دەمەکێ باش بێھنا خوە ڤەدە، بزاڤێ بکە دەمارێن خوە تەنا بکە.
ھندەک راھێنانێن وەرزشی بکە دا زڤرینا خوینێ د لەشێ تەدا باش بکەت، ھەروەسا دا ھاریکاریا تە بکەن بەرھنگاریا ھەودانان بکەی، خوە فێری وان راھێنان بکە یێن بۆ قۆناغا دوگیانیێ د باش بن.
ھەکو تو جگاران بکێشی، پێدڤیە تو دەست ژێ بەردەی چونک دێ بۆ زارۆیی تە یا خراب بیت، دیسان زیانێ دگەھینیتە کوئەندامێ بەرھنگاریێ.
ئەڤرۆ: چنار مزویری:
سترانبێژ ئاڤان جەمال، بۆدەمێ چەند سالانە دەست ب گۆتنا سترانێ کریە و ھەتا نوکە چەندین ستران و بەرھەم بەلاڤکرینە، کو ئێکە ژوان سترانبێژێن ھژمارەک ستران ب شێوەزارێ بەھدینی بەلاڤکریە و شیایە بدەنگێ خوە جەماوەرەکێ باش پەیدابکەت، ل ھەلبژارتنێن سالا 2013ێ خوە بەربژێرکریە بۆ جڤاتا پارێزگەھا سلێمانیێ و کارێن خوە یێن ھونەری راگرتینە.
ئاڤان جەمال لدۆر کارێن خوە یێن ھونەری بۆ رۆژناما ئەڤرۆ گۆت” پشتی ئەز بۆ جڤاتا پارێزگەھا سلێمانیێ ھاتیمە ھەلبژارتن، من چو کارێن ھونەری ئەنجام نەداینە، تنێ من خوە بۆ رێڤەبرنا جڤاتا پارێزگەھێ ئێکلاکریە و کار لسەر گۆتنا سترانێ نەکریە، دگەل ڤێ چەندێ من کار مایە لسەر چەند کلیپا بکەم و سترانێن من پێدڤی ب کلیپ کرنێ ھەیە، ئەگەر دەلیڤە ھەبیت ئەڤە دێ کار بۆ ئەڤان سترانێن نوو کەم.
ئاڤانێ زێدەتر گۆت” دگەل کارێ ئیداری لجڤاتا پارێزگەھێ من کارێ شێوەکاریژی ھەیە و ھەرڤێ حەفتیێ ل ئاڤاھیێ موزەخانا سلێمانیێ کو ب ئەمنا سۆر یا سلێمانیێ بەرنیاسە، من ب چەند تابلۆیەکا پشکداری د پیشەنگەھەکا ھەڤبەش دگەل شێوەکارێن باژێڕێ سلێمانیێ کر.
ئەڤرۆ نيوز:
ژ بەر ھەیڤا رەمەزانا پیرۆز و ب مەرەما پاراستنا پیرۆزیا وێ، پارێزگەھا دھۆێ چەند رێنما دەرخستن و ئاشکرا کریە کو ھەر کەس و جھەکێ پێگیریێ ب وان بڕیاران نەکەت دێ ھێتە سزادان.
پارێزگەھا دھۆکێ د نڤیسارەکێ دا کو دانەک بۆ رۆژناما ئەڤرۆ ھنارتیە تێدا دیار کریە کو پێدڤیە ھەموو کەس رێزێ ل ھەیڤا رەمەزانا پیرۆز بگرن و نابیت ب چ رەنگان رۆژی شکاندن ب ئاشکرایی ل جھێن گشتی بھێتە کرن، ھەروەسا فرۆتنا ڤەخوارنێن کحۆلی ل دکان، یانە و ئۆتێل و خوارنگان د ڤێ ھەیڤێ دا قەدەغەیە.
د رێنمایێنپارێزگەھێ دا ھاتیە: “د ھەیڤا رەمەزانێ دا، نابیت ب چ رەنگان خوارن و ڤەخوارن ل دام و دەزگەھێن حکومی بھێنە پێشکێشکرن، دیسا نابیت د ھەیڤا رەمەزانێ دا گازینۆ و قەھوەخانە ب رۆژێ بھێنە ڤەکرن، لێ خوارنگەە و جھێن خوارنێن سڤک یێن ڤەکری د ھەیڤا رەمەزانێ دا دڤێن بھێنە پەردەپۆشکرن و خوارن ھەر ب بھایێ بەری ھەیڤا رەمەزانێ بیت، لێ نابیت سەرپێچی ل سەر رەسیفان بھێتە کرن”.
ژ لایەکێ دیڤە پارێزگەھێ خویا کریە، دڤێت خوارنگەە و جھێن خوارنێن سڤک، ل ھەر سێ رۆژێن جەنێ دڤەکری بن و بۆ ڤێ مەرەمێ ژی پێدڤیە سۆزنامەکێ پێشکێشی قایمقامیا پەیوەندیدار بکەن، بەرۆڤاژی یێ پێگیریێ پێ نەکەت دێ ھێتە سزادان و خارنگەە بۆ دەمێ ھەیڤەکێ دێ ھێتە دائێخستن.
د وێ نڤیسارێ دا ھاتیە: “خودانێ ھەر خوارنگەھەکێ سەرپێچیێ د ھەیڤا رەمەزانێ دا بکەت یان ھەر کەسەکێ پێگیریێ ب رێنمایان نەکەت دێ ھێتە سزادان”.
پارێزگەھێ دیار کریە کو ئەڤ رێنمایە ژ ئۆتێلێن پێنج ستێر و بلندتر ناگریت.
ئه‌ڤرۆ نيوز:
سەرۆکێ لژنا پەروەردێ و خواندنا بلند ل پەرلەمانێ کوردستانێ بۆ ئەڤرۆ ئاشکرا کر، ژ ئەنجامێ ئەو 15% یا لژنا وان ژ قستێن قوتابیێن 13 زانکۆیێن ئەھلی ل کوردستانێ بڕین و بۆ قوتابیێن زارۆیێن شەھیدان بوویە بێ بەرامبەر، پتری چار ملیار دینار بۆ قوتابیێن زانکۆیێن ئەھلی ھاتینە ڤەگەڕاندن.
د. ئیبراھیم سمۆ، سەرۆکێ لژنا پەروەردێ و خواندنا بلند ل پەرلەمانێ کوردستانێ دیار کر، دوھی 30/5/2016 لژنا وان سەرەدانا زانکۆیا نەوروز ل دھۆکێ کر، چونکو ھەتا نوکە ھندەک قوتابیێن زانکۆیا نەوروز قستێن خواندنێ نەداینە و زانکۆیێ دەلیڤە نەدابوویێ بچنە د ئەزموونا دووماھیا سالێ دا و گۆت: “پشتی مە سەرەدانا وان کری مە رێ بۆ قوتابیان خۆشکر بچنە د ئەزموونێ دا و بۆ ئەزموونا بھێت قستێن خوە یێن خواندنێ بدەن”.
ناڤبری ئاشکرا کر کو قستێن زانکۆیا نەوروز ب پێنج قووناغان دھاتنە دان، بەلێ ئەڤە سالا خواندنێ وەختە ب دووماھیک ژی بھێت و ھێشتا نەھاتبوو دان، لەوما سەرۆکاتیا زانکۆیا نەوروز پێرابوون ل گەل وان قوتابیان وەرگرت بوون و دەلیڤە پێ نەدابوو بچنە د ئەزموونان دا، بەلێ پشتی لژنا مە سەرەدانا زانکۆیێ کری، ئەڤ ئاریشە ھاتە چارەسەرکرن.
سەرۆکێ لژنا پەروەردێ و خواندنا بلند ل پەرلەمانێ کوردستانێ ئەو یەک ژی دا زانین کو پشتی بزاڤێن مەزن ژ لایێ لژنا وان ڤە ھاتینە کرن کو ژ بەر قەیرانا دارایی بھایێ خواندنێ ل زانکۆییێن ئەھلی بھێتە خوار، بریار ھاتبوو دان ھەر زانکۆیەک 15% ژ بھایێ خۆ بینیتە خوار و بۆ قوتابیێن زارۆیێن شەھیدان ژی بێ بەرامبەر بیت و ھەر 13 زانکۆیا ئەڤ بریارە ب جھئینایە.
سمۆ ئەو چەندە ژی نە ڤەشارت کو ھەکە بۆ نموونە ھەر زانکۆیەک سالانە ژ بەر وێ بریارا 15% و بێ بەرامبەر بۆ زارۆیێن شەھیدان 300 ملیۆن دیناران بھێلن و ئەو 300 ملیۆنە لێکدانی 13 زانکۆیان ببیت، واتە لژنا وان شیایە پتری چار ملیار دیناران بۆ قوتابیێن زانکۆیێن ئەھلی ب ڤەگەرینیت.
د. ئیبراھیم خویا ژی کر کو د سەرەدانا وان دا بۆ زانکۆیا نەوروز ئاشکرا بوو کو ژ بریارا وان زانکۆیا نەوروز ئەڤ سالە 552 ملیۆن دینار بۆ قوتابیان بجە ھێلاینە و ئەڤە ژی بەرھەمێ بریارا وان یا 15% یە و بۆ قوتابیێن زارۆیێن شەھیدان بێ بەرامبەر بوویە.
ئه‌ڤرۆ نيوز:
بەرپرسێ ڕاگەھاندنا بنگەھێ پۆلیسێن قەزا زاخۆ بۆ رۆژناما ئەڤرۆ دیار کر کو ژنەکا 35 سالی کو خەلکا زاخۆیە ب وەریسی خوە خەندقاندیە و دووماھی ب ژیانا خوە ئینا.
نەقیب نەھشەت سەلمان، بەرپرسێ ڕاگەھاندنا پۆلیسێن قەزا زاخۆ ئاشکرا کر، ل رۆژا ئێکشەمبی 29/5/2016 و ل دەمژمێر حەفتی ئێڤاری بنگەھێ پۆلیسێن زاخۆ ھاتنە ئاگەھدار کرن کو ژنەکا 35 سالی ل تاخی ئازادی ل قەزا زاخۆ بناڤی (ز. ا. ک) خوە پارچەکا وەریسی خەندقاندیە و گۆت: “پشتی مەفرەزێن پۆلیسان گەھشتینە جھێ روودانێ و دیت کو دووماھی ب ژیانا خوە ئینایە، پاشی تەرمێ وێ بۆ نۆشداریا داد ھاتە ڤەگوھاستن”.
ل دۆر ئەگەرێن روودانێ ژی نەقیب نەھشەت سەلمان گۆت: “ھەتا نوکە دیار نەبوویە کانێ ئەگەر چ بووینە، لێ ڤەکۆلین د روودانێ دا یا بەردەوامە بۆ زانینا راستیا روودانێ، ھەروەسا ئەڤ روودانە ل بنگەھێ پۆلیسێن قەزا زاخۆ ھاتیە تۆمارکرن”.
ناڤبری خویا ژی کر، ئەو ژنە خێزاندارە و خودان زارۆیە و ل تاخێ ئازادی یێ قەزا زاخۆ ئاکنجی بوو.
ئەڤرۆ نیوز:
ئەنداما جڤاتا نوونەرێن عیراقێ بۆ رۆژناما ئەڤرۆ دیار کر کو بریارە ئەڤرۆ 31/5/2016 روونشتنا جڤاتا نوونەرێن عیراقێ دەست پێ بکەت، لێ 107 ئەندامێن جڤاتێ نەرازیبوونا خوە دیارکرینە و رازی نابن روونشتنا جڤاتێ ب سەرۆکاتیا (سەلیم جبۆری) سەرۆکێ نوکە یێ جڤاتێ بھێتەکرن.
نەجیبا نەجیب، ئەنداما جڤاتا نوونەرێن عیراقێ ئاشکرا کر کو ئەندامێن مانگرتی درژدن کۆمبوونا 31/5 یا جڤاتا نوونەرێن عیراقێ نەھێتە ئەنجامدان و گۆت: “ئەندامێن مانگرتی داخواز دکەن سەلیم جبۆری و ھەر دو جێگرێن وی سەرۆکاتیا روونشتنا جڤاتێ نەکەن، د بەرامبەر دا ئەندامێن دی دێ بزاڤان کەن ئەو روونشتن ب سەرۆکاتیا سەلیم جبۆری و ھەر دو جیگیرێن وی بھێتەکرن، لێ ھەتا نوکە نەگەھشتنیە چو ریککەفتنا بۆ روونشتنا جڤاتا نوونەرێن عیراقێ”.
نەجیبا خانێ ئاماژە ب وێ چەندێ ژی کر، ئەو دبینن کو گەلەک یا ب زەحمەتە جڤاتا نوونەرێن عیراقێ بشێت روونشتنا خوە ئەنجام بدەت و گۆت: “پێدڤیە میکانزمەک بھێتە دیتن و دادگەھا فیدرالی ل 8/6/2016 بڕیار خوە یا دووماھیێ ل سەر شەرعی بوون و شەرعی نەبوونا پەرلەمانێ عیراقێ ب سەرۆکاتیا سەلیم جبۆری بدەت، ئەز دبینم ھەتا دادگەە بریارێ نەدەت کۆمبوونا جڤاتا نوونەرێن عیراقێ دێ یا ب زەحمەت بیت، ھەر چەندە پیدڤی بوو د ڤی دەمێ بۆری دا پەرلەمانێ عیراقێ ب کێماسی پێنج روونشتن ئەنجام دابانە، ب تایبەتی ژی د ڤێ رەوشا نوکە عیراق تێدا دبۆریت”.
ئەڤرۆ نیوز:
سەرۆک وەزیرێن عیراقێ دو لیژنە بۆ دانوستاندنان ل سەر کێشێن د ناڤبەرا ھەولێر و بەغدا دا پێکئینان و ھەرێما کوردستانێ ژی دێ لیژنەکێ بۆ ڤێ مەرەمێ پێک ئینیت.
ئەشواق جاف ئەنداما پەرلەمانێ عیراقێ ل سەر فراکسیۆنا پارتی دیمۆکراتی کوردستان راگەھاند، بۆ چارەکرنا کێشێن ھەولێر و بەغدا، حەیدەر عەبادی دێ دو شاندێن حزبی و حکومی پێکئینیت و گۆت: (ئەو پێشنیاز ل گەل فراکسیۆنێن کوردی ھاتییە بەحسکرن و شاندێ حکومی ژی دێ ل گەل ئالیێن حکومەتێ و شاندێن حزبی ژی ل گەل یێن حزبی دانوستاندنان کەن و ھەرێما کوردستانێ دێ شاندەکێ حزبی و حکومی یێ ھەڤپشک دروست کەت و ل گەل ھەر دو شاندێن عیراقێ دێ دانوستاندنان کەن).
نيشاندان