ئه‌ڤرۆنیۆز، سالار دۆسكى:
هشیار گولى ئه‌ندامێ لژنا ساخله‌میێ ل ئه‌نجوومه‌نێ جڤاتا پارێزگه‌هێ بۆ ئه‌ڤرۆ نیۆز دیاركر كو كلینیكێن ئێڤاریان ئه‌وێن حوكمه‌تێ بۆ هاریكاریا وه‌لاتیان ڤه‌كرین به‌ر ب گرتنێ دچن و ل زاخۆ ئێك هاتیه‌گرتن و ئه‌ڤه ژ به‌ر كو حوكمه‌تێ پێ چ نابیت ده‌رمانان بۆ بكریت.
ناڤبرى گۆت: دو كلینیكێن نوشدارى ل زاخۆ ڤه‌بوون(سه‌ید سالح یوسفى و خابوور) یا شه‌هید سالح یوسفى هاتیه‌گرتن چونكه ئه‌و نوشدارێن ئه‌وان جهان كاردكرن هه‌موویان ب خوه بنگه‌ه ڤه‌كرن و ده‌ستیردان وه‌رگرتن، نوشدار نه‌مان، دیسان بهایێ ده‌رمانان نیڤه‌ك خه‌لكى دا و نیڤه‌ك حوكمه‌تێ و ئێدى حوكمه‌تێ ژى پێ چ نه‌بوو بهایى بده‌ت هه‌موو كه‌ته سه‌ر خه‌لكى و هه‌كه بڤى ره‌نگى بیت دێ هێنه گرتن.
ئه‌ڤرۆ نيوز، ره‌وان نهێلى:
د.ئيبراهيم سمو سه‌رۆكێ لژنا په‌روه‌رده و خواندنا بلند ل په‌رله‌مانێ كوردستانێ بۆ ئه‌ڤرۆ نيوز دياركر كو وانا د حه‌فتيا چوويى دا كومبوونا خوه يا ئه‌نجامداى و ب رێيا سه‌رۆكايه‌تيا په‌رله‌مانى داخواز كريه كو داخواز ژ ئه‌نجومه‌نێ وه‌زيران بهێته كرن كو داخواز ژ وه‌زاره‌تا خواندنا بلند بهێته كرن كو كرێيا خواندنا ئێڤاران ل زانكۆ و په‌يمانگه‌هێن حكومى ب ڤى ره‌نگى كێم ببيت: پشكێن زانستى ژ مليونێك و 500 هزار ديناران زێده‌تر نه‌بيت و بۆ زانستێن مروڤايه‌تى ژ 800 هزار ديناران زێده‌تر نه‌بيت و په‌يمانگه‌هان ژ 500 هزار ديناران زێده‌تر نه‌بيت .
د.ڕێبوار کەریم به‌رپرسێ په‌يوه‌نديێن ده‌رڤه يێن زانكۆيا گه‌شه‌پێدانا مروڤى راگه‌هاندبوو: برياره رۆژا دوشه‌مبى 1 شوبانێ، كومبوونا وه‌زاره‌تا خواندنا بلند ل گه‌ل سه‌رۆك زانكۆيان بهێته ئه‌نجامدان و ل سه‌ر كرێيا خواندنێ رێكبكه‌ڤن.
دینارته ، نه‌وزاد زاده هلۆرى:
ئێڤاریا ئه‌ڤرۆ رۆژا شه‌مبى ژ ئه‌نجامێ روودانه‌كا ترافیكێ چار كه‌س بریندار دبن.
رێكه‌فت زاهێر به‌رپرسێ راگه‌هاندنا هاتن و چوونا ئاكرێ بۆ ئه‌ڤرۆ نیوز گۆت : ( ئێڤاریا ئه‌ڤرۆ ل ده‌مژمێر 1:45 خوله‌ك رودانه‌كا ترافێكى ژ جورێ وه‌رگه‌ریان ل دوریانا گوندێ گربیش یا سه‌ر ب ناحیا دینارته‌ڤه درۆست بوو و د ئه‌نجام دا چوار كه‌س برینداربون ، و ئه‌و ترومبێلا وه‌رگه‌ریایى ژ جورێ هوندا ئه‌لنترا تایبه‌ت ب ره‌نگێ سپى بو)
زێده‌تر گۆت : ( بریندارێن روودانى َبو نه‌خوشخانا هه‌وارهاتنا ئاكرێ هاتنه ره‌وانه‌كرن داكو چاره‌سه‌ریا وان بهێته‌كرن ، و دیسان زیانێ، ماددێ، زور به‌ر ترومبێلێ كه‌فتینه )
ئه‌ڤرو نیوز ، نه‌وزاد زاده هلۆرى:
هه‌یڤا داهاتى دێ ده‌ست ب ئاڤاكرنا ژێرخانا غازا سرۆشتى یا كوردستانێ هێته‌كرن و په‌رله‌مان ژى ئاشكرادكه‌ت كو هه‌رێما كوردستانێ یه‌ده‌كه‌كێ زور یێ غازێ هه‌یه كو دشیاندایه ل ئاینده پێدڤیێن ئه‌وروپا دابین بكه‌ت.
دلشاد شه‌عبان جێگرێ سه‌رۆكێ لیژنا سامانێن سرۆشتى ل په‌رله‌مانێ كوردستانێ تایبه‌ت بو باس دیاركر كو ل گوره‌ى زانیاریێن كو وان ل وه‌زاره‌تا سامانێن سرۆشتى ده‌ست ئێخستینه ل هه‌یڤا شوباتێ دا ئه‌و كومپانیا كو رێكه‌تن ل گه‌ل هاتیه‌كرن دێ ده‌ست ب ئاڤاكرن و دامه‌زراندنا ژێرخانا به‌رهه‌مێ غازا سرۆشتى ل كوردستانێ كه‌ت )
دلشاد شه‌عبان-ى ناڤێ كومپانیێ ئاشكرا نه‌كر به‌لێ ئه‌و یه‌ك دیاركر كو كومپانیێن نافخویى ئه‌و شیان نینن ڤێ یه‌كێ بكه‌ت ژبه‌رڤێ كومپانیه‌كا بیانى دێ ڤێ یه‌كێ كه‌ت و گۆت : ( ل گوره‌ى راگه‌یاندنا ئه‌وێ كومپانیێ ئه‌و دكارن دماه‌یێ 270 رۆژان دا ژێرخانه‌یێ درۆست بكه‌ن ئانكو ئه‌گه‌ر بو ده‌ما نیڤ هه‌یڤێ ئه‌ڤ كاره بهێته‌كرن ئه‌ڤه رامانه كو دێ ل ده‌ستپێكا سالا 2017 دێ ژێرخانه‌یا ئه‌ڤى سامانێ سرۆشتى هێته ئاڤاكرن و دوڤدا قوناغا وێ یه‌كێ هێت كا چه‌وا ئه‌ڤ یه‌ك دێ ب بوریان ڤه بهێته‌گرێدان و غازێ فرێكه‌ن ده‌رڤه ، و لگوره‌ى مه‌زنده‌كرنا مه ئه‌گه‌ر چوو ئاریشه‌یێن سیاسى و ئه‌منى و ئاریشه‌یێن دن درۆست نه‌بن وه‌كو سه‌رهه‌لدانا هه‌ره‌شه‌یێن داعش ئه‌م دكارین ل ناڤه‌راستا سالا 2017 دا غازێ فرێبكه‌ین و پێشبینى دهێته‌كرن تا سالا 2019 هه‌رێم ب ته‌مامى ببیته خودانا هنارتنا غازا سرۆشتى.
وه‌زیرێ سامانێن سرۆشتى دیاركر كو ئه‌وان دڤێت سالانه 10 ملیار مه‌ترێن سێجا یا غازا سرۆشتى فرێبكه‌ن بو ده‌رڤه كو ده‌ستپێكێ دێ ب رێیا توركیا هێته هنارتن.
سه‌رۆكێ لیژنا سامانێن سرۆشتى ل په‌رله‌مانێ كوردستان ته‌كه‌ست لسه‌ر وێ یه‌كى َكر كو هه‌رێما كوردستانێ یه‌ده‌كا زور یا غازا سرۆشتى هه‌یه كو ل گوره‌ى داتاێن وه‌زاره‌تا سامانێن سرۆشتى 5 ترلیون و 200 ملیار مه‌ترێن چوار گوشه‌یه.
ب باوه‌ریا ناڤبرى ب بازاركرنا غازا سرۆشتى پیچه‌ك یا ب زه‌حمه‌ته و گوت ژى : ( د غازا سرۆشتى دا روسیا پله‌یا ئێكێ دهێت ژ به‌رهه‌مئینان و فروتنا وێ دا و 40% ژ پێدڤیێن ئه‌وروپا دابین دكه‌ت ، و روسیا ل گه‌ل ئه‌وروپا ئاریشه‌یێن هه‌یى و غاز وه‌كو كارته‌كا فشارێ به‌رامبه‌ر ئه‌وروپا بكاردئینیت و ئه‌وروپا ژى ژبلى روسیا هزرێ ل جهگره‌كێ دن دكه‌ت و روسیا شكه‌ست ب پرۆژه‌یێ نابوكو ئینایه ، و هه‌روه‌سا شكه‌ست ب پرۆژه‌كێ دن یێ بوریا غازێ ئینایه ژبه‌رڤێ پرسگرێك پتر یا سیاسى یه و ژبه‌رڤێ یا ب ساناهى نینه كو غازا كوردستانێ بهێته هنارتن به‌لێ ئه‌ڤ كاره دێ هێته‌كرنو ئاسویه‌كێ رون هه‌یه.
دلشاد شه‌عبان ته‌كه‌ست لسه‌ر وێ یه‌كى َكر كو ده‌ستپێكێ پلانانا حكومه‌تێ دێ ئه‌و بیت كو غازێ بو دابینكرنا پێدڤیێن نافخوه بكاربینیت و گۆت ژى : ( بو وێستگه‌هێن كاره‌بێ كو سالانه 2 بو 3ملیار دولار بتنێ بو غازێ دهێته ته‌رخانكرن و ئه‌ڤ یه‌ك ژى دێ ژ حكومه‌تا هه‌رێمێ ڤه‌بیت ، و هه‌روه‌سا بو ژیانا رۆژانه‌یا وه‌لاتیان دێ هێته بكارئینان ب تایبه‌تى دناڤ مالان دا )
په‌رله‌مانتارێ ناڤبرى دیاركر ژى كو هه‌رده‌ما ده‌لیڤه هه‌بوو حكومه‌تا هه‌رێما كوردستانێ دێ غازا خوه فرێكه‌تن ده‌رڤه ب تایبه‌تى بۆ توركیا.
ئه‌ڤه د ده‌مه‌كێ دایه كو مالپه‌را ( یه‌نى شه‌فه‌ق ) یا توركى لسه‌ر زارێ كومپانیا بوتاشه به‌لاڤكریه كو پرۆژه‌یێ راكێشانا بوریێ ب درێژاهیا 185 كیلومه‌تر و پانیا 40 ئینج كار تێدا دهێته‌كرن داكو غازا سرۆشتى یا هه‌رێما كوردستانێ بگه‌هیته توركیا و ب تورا غازا توركیاڤه بهێته گرێدان ، به‌لێ ئه‌نجومه‌نا هه‌رێما په‌ترول و غازا كوردستانێ ل 21/1/2016 د راگه‌یاندنه‌كێ دا ره‌تكریه كو د نهادا بوریا غازا كوردستان و توركیا كار پێ بهێته‌كرن.
ئه‌نجومه‌نا ناڤبرى دیاركر كو هه‌تا سالا 2019 غازا كوردستانێ ناهێته ڤه‌گوهاستن بو ده‌رڤه.
پێشتر په‌رله‌منتارێ كوردستانێ گۆران ئازاد كو زانیارى ل وه‌زیرێ سامانێن سرۆشتى وه‌رگرتینه بو باس دیاركربو كو رۆژانه هه‌رێما كوردستانێ 330 ملیون مه‌ترێن سێجا یا غازا سرۆشتى به‌رهه‌م دئینیت و گۆت : ( كومپانیا دانا غاز كارێ به‌رهه‌مئینانا غازا سرۆشتى یا كوردستانێ دكه‌ت به‌لێ نها حكومه‌تا هه‌رێما كوردستانێ ل گه‌ل دانا غازێ ئاریشه‌یێن زورێن هه‌یى ، و پشتى بو مه ده‌ركه‌فتى كو د بنه‌ره‌ت دا رێكه‌فتن دناڤبه‌را حكومه‌تا هه‌رێما كوردستانێ و كومپانیا دانا غاز د چارچوڤێ چه‌ند بنه‌مایه‌كان دا بویه و نه‌كریه گرێبه‌سته‌كا ته‌مام )
دحه‌فته‌مین كوربه‌ندا ئابوورى و وزه‌یێ ل ئیسته‌نبولێ ئاشتى هه‌ورامى وه‌زیرێ سامانێن سرۆشتى یا حكومه‌تا هه‌رێما كوردستانێ دیاركر كو ل سالا داهاتى هه‌رێما كوردستانێ دێ ده‌ست ب هنارتنا غازا سرۆشتى كه‌تن و گۆت : ( هه‌تا چوار سالێن دن دكارین هنارتنا غازێ بگه‌هینینه 20 ملیار مه‌ترێن سێجا )
ئاشتى هه‌وارمى ئه‌و یه‌ك ژى رونكر كو وه‌سا بریاره هه‌تا سالا 2019 هه‌رێما كوردستانێ رۆژانه 20 ملیار مه‌ترێن سێجا یا غازا سرۆشتى فرێبكه‌تن ده‌رڤه.
دلشاد شه‌عبان ته‌كه‌ست لسه‌ر وێ یه‌كێ كر كو ل گوره‌ى زاناریێن وه‌زاره‌تا سامانێن سرۆشتى هه‌رێما كوردستانێ وه‌كو پێگوركه‌ك 30% یا پێدڤیێن غازا ئه‌وروپا دێ دابین كه‌ت.
ئه‌ڤرۆ نيوز:
نه‌وزاد عومه‌ر، جێگرێ سه‌رۆكێ لقێ هه‌ولێر يێ ئێكه‌تيا ماموستايێن كوردستانێ راگه‌هاند كو پشتوان سادق وه‌زيرێ په‌روه‌ردێ ل گه‌ل رابه‌ر سه‌ديق بريكارێ وه‌زاره‌تا دارايى و ئابوورى يا حكومه‌تا هه‌رێمێ ئاخفتيه و سوز دايێ كو رۆژانێن سێ شه‌مبى و چوار شه‌مبى 2 و 3 شوبانێ نيڤ موچه‌يێ دى يێ ماموستايان بهێته به‌لاڤكرن.
ئه‌ڤرۆ نيوز:
ژماره‌كا زانايێن بريتانى پشتى ئه‌نجام دانا ڤه‌كوۆلينه‌كێ ل سه‌ر 800 كه‌سان باشترين ده‌م بۆ هێلانا جگارێ دياركر.
زانا د ده‌رئه‌نجامێ ڤه‌كۆلينه‌كێ دا ل سه‌ر 800 كه‌سان گه‌هشتنه وێ راستيێ كو مرۆڤ ل ده‌مێ “ڤه‌گۆهاستنا مالا خوه” يان ژى گوهۆڕينا “كارێ خوه” دشێت جگارێ ژى بهێليت.
ئه‌و زانايێن زانكۆيا “Bath” ئه‌گه‌رێن گه‌هشتنه ب ڤان ئه‌نجامان بۆ وێ چه‌ندێ ڤه‌گه‌راندن كو ده‌مێ مرۆڤ ل مال پتر هزر دكه‌ت و بۆچوونێن نوو وه‌ردگريت، چونكو گورانكاريه‌كا مه‌زن ل جهێ ژيانا مرۆڤى په‌يدا دبيت.
ئه‌ڤرۆ نيوز:
به‌له‌مه‌كا دى يا ب 100 كۆچبه‌ر ل ده‌ريا ئيجه به‌رزه بوو و فيدراسيۆنا كۆچبه‌ران ژى گۆمان يا هه‌يى كو ئه‌و به‌له‌م نقۆم ببيت.
ب گۆره‌ى پێزانينان د ئه‌وێ به‌له‌مێ دا وه‌لاتيێن باشوورى و رۆژئاڤايێ كوردستانێ ل گه‌ل هنده‌ك وه‌لاتيێن سورى يێن تێدا.
فيدراسيۆنا كۆچبه‌ران ژى ده‌رباره‌ى چاره‌نڤيسێ به‌له‌مێ راگه‌هاند: گۆمان دهێته كرن كو ئه‌و به‌له‌م بن ئاڤ ببيت.
پۆليسێن ده‌رياى يێن يونا ژى ده‌ست ب گه‌ريا ل دووڤ به‌له‌ما به‌رزه دا كريه، به‌لێ هه‌تا نوكه نه‌شياينه وێ به‌له‌مێ ببينن.
ئەڤرۆ نیوز، بارزان مزووری:
باقر جەبر زوبەیدی، وەزیرێ ڤەگوھاستنا عیراقێ د رێورەسمێ سال یادا 70ێ یا دەمەزراندنا ھێلا ئاسمانی یا عیراقێ ل بەغدا راگەھاند: گرێبەستا وەرگرتنا فرۆکا د گەل کۆمپانیا “بوینگ” ل سالا 2008 ھات بوو ئیمزا کرن، ژڤان بوو کو ئەڤ سالە بگەھنە عیراقێ، بەلێ ژبەر کەڤنیا مودێلا وان ل سالا 2017 جورێ نووتر دێ گەھنە عیراقێ.
ناڤبری دیار کر کو کۆمپانیا “بوینگ” رەزامەندیا خوە دیار کریە کو ل سەر گورینا گرێبەستێ ئەو فروکە د سالا 2016 دا نەگەھنە عیراقێ چونکو ئەوێن د گرێبەستێ دا ئیمزا کرین مودێلا وان دکەڤن بوون، ئەوێن ل سالا 2017 بگەھن ژبەر کو فروکێن نووتر ژ وی جوری بۆ عیرقێ فرێ کەن.
ناڤبری گۆت: ” ئەو فروکەیێن دێ فرێ دکەت ژ جورەکێ نوو یە، وان فروکا ئامیرەک تێدایە ژینگەھی د پارێزیت، ژبلی ژمارا کورسیان پتری یێن مودێلا کەڤنن ژمارا وان 60 کورسی نە”.
مێژوویا دامەزراندنا ھێلا ئاسمانی یا عیراقێ بۆ 18 ئادارا 1938 د ڤەگەریت دەمێ فروکەڤانێن عیراقێ رێنما دان بۆ کرینا سێ فروکەیێن ژ جورێ “دارکن رابید” ئەو فروکە ل 1 تەشرینا ئێکێ 1938 گەھشتنە بەغدا.
نيشاندان