سەبارەت ھاتنا شاندەکێ پەرلەمانێن عێراقێ بۆ دانوستاندنێ دگەل فراکسیۆنێن کوردستانی ل ھەولێرا پایتەخت و ھەلویستێ کوردان بەرامبەر وی شاندی سەرحان سلێڤانەیی ئەندامێ پەرلەمانێ عێراقێ ژ لیستا پارتی دیمۆکراتی کوردستان بۆ رۆژناما ئەڤرۆ دبێژیت: ھاتنا وی شاندێ پەرلەمانێن عێراقی بۆ ھەرێما کوردستانێ بۆ ھندێ یە، کو جارەکادی داخوازێ ژ فراکسیۆنێن کوردستانی بکەن کو پشتەڤانیێ ل سەلیم جبۆری سەرۆکێ پەرلەمانێ عێراقێ بکەن، لەورا ژ ئەنجامێ وان ئالۆزیێن پەیدابووین ل ھەیڤا نیسانێ پەرلەمانتارێن مانگرتی یێن پەرلەمانێ عێراقێ ڤیا سەرۆکێ پەرلەمانی و جێگرێن وی لادەن،ھەر چەندە سەلیم جبۆری ب ھەڤھاتن(تەوافوق) بوویە سەرۆکێ پەرلەمانی،لەورا ھاتنا وی شاندێ سەلیم جبۆری ھنارتی بۆ کوردستانێ بۆ ھندێ بوویە کو کوردان رازی بکەت،کو جارەکادی پەرلەمان ئەکتیف ببیتەڤە و ھەروەسا مەرەما وان ئەوە کو پەرلەمانتارێن کورد ئامادەبن ل روونشتنێن پەرلەمانی ب مەرەما ھندێ کو سەلیم جبۆری بریاران دەربکەت و خۆ وەک سەرۆکێ یاسایی یێ پەرلەمانی بدەتە خۆیاکرن و گۆت ژی:ب بەرزەیی و ب ئاشکرایی ژی شیعەیان دڤێت سەلیم جبۆری لادەن،ھەکە کورد پشتەڤانیێ ل سەرۆکێ پەرلەمانی نەکەن،کۆتلێن دی یێن پەرلەمانی دێ وی لادەن،جبۆری دزانیت ھێز و سەنگا فراکسیۆنێن کوردی چەندە ل بەغدا،ژبەر ھندێ وان قەستا ھەرێما کوردستانێ کریە و داخواز دکەت کو ئەم کورد پشتەڤانیێ لێ بکەین.
دەربارەی زڤرینا کوردان بۆ بەغدا ناڤھاتی دبێژیت: پشتی ئەو کومبوونا ڤێ دووماھیێ یا فراکسیۆنێن کوردستانی ل پەرلەمانێ عێراقێ ل سلێمانیێ ھاتیەکرن، ھەر پێنج فراکسیۆنان ب ئێک ھەلویست دیارکریە،کو ئەو ئالۆزیێن ل بەغدا رووداین دڤێت بھێنە چارەکرن و کی بوون ھوکارێن وان ئالۆزیان، ھەروەسا پێدڤیە کۆتلێن سیاسی دگەل ئێک کومببن ل سەر ڤێ رەوشا عێراق نوکە تێدا دبوریت و ب گەھنە ئەنجامەکێ گرنگ، ژنوو ئەم وەک کورد دێ چینە روونشتنێن پەرلەمانی، ھەروەسا مە وەک پەرلەمانتارێن کورد داخواز ژ وەزیرێ بەرگریێ و فەرماندێ گشتی یێ ھێزێن چەکدارکریە کو ب ئەرکێ خۆیێ تمام رابن، داکو تەناھی ل بەغدا پەیدا بیت، چونکی ھەکە ئەو روودانێن بەری نوکە دوبارە ببن، دێ ژیانا مە وەک پەرلەمانتارێن کورد دێ کەڤیتە دمەترسیێ دا ل بەغدا و خۆنیشاندەر دێ تۆلھەلدانێ ژمەکەن، ھەروەسا دوێ کومبۆنێ دا مە وەسا دیارکریە کو ئەم دگەل داخوازێن خەلکێ عێراقێ ینە، بەلێ دڤێت ئەو داخوازی د شەرعی و دستۆری بن، نە بۆ ژناڤبرنا سامانێ گشتی یێ دەولەتا فیدرالی بیت، ھەروەسا سەرۆک وەزیرێن عێراقێ حەیدەر عەبادی گەلەک ھەولدان کو ل ھەڤھاتنەکێ پەیدا بکەت، کو پەرلەمان دەست بکاربیتە ڤە، ژ پێخەمەت دەنگدان ل سەر کابینا نوو یا حوکمەتا تەکنۆکرات بھێتەدان، ئەو ژی دیارکریە:کو مە وەک کورد داخواز ژ حوکمەتا عێراقێ کریە کو ب زووترین دەم ئەو سۆزنامەیا ل سالا 2014 ھاتیە ئیمزاکرن بھێتە بکارئینان بۆ کوردستانێ کو مووچە و پێدڤیێن پێشمەرگەی بھێنەدان، چونکی پێشمەرگە پشکەکە ژ ھێزا بەرگریا عێراقێ.
سەرحانی ئەوژی گۆت:مە ئێدی باوەری ب حوکمەتا عێراقێ نەمایە، چونکی ھەتا نوکە حەیدەر عەبادی چو پێنگاڤ نەھاڤێتینە،کو پێنگاڤێن ئەرێنی بن و دخزمەتا خەلکێ کوردستانێ دابن، چونکی ھەتا نوکە ھێش عەبادی مووچە و ھاریکاری بۆ خەلکێ کوردستانێ نەھنارتینە و حوکمەتا عێراقێ ھەتا نوکە ب چاڤەکێ نزم و کێم تەماشەی خەلکێ کوردستانێ دکەن، ھەروەسا دەولەتا قانوونێ لۆبیەک یێ ھەی یێ گرێدایە ب نۆری مالکی ڤە،کو ھەردەم ھەول ددەن، وان پەیوەندیێن د ناڤبەرا حوکمەتا عێراقێ و ھەرێمێ دا ب ھەلوەشینن، ژ پێخەمەت بۆ جادا خۆ یا شیعی دیارکەن، کو عەبادی نە کەسەکێ خۆدان شیانە وەک مالکی، لەورا وان ڤیایە کو ھەرێما کوردستانێ ژ ھەموو تشتان بێ بار بکەن، ھەروەسا حوکمەتا عێراقێ ڤان مەرجێن فراکسیۆنێن کوردستانی دیارکرین بجە نائینیت، وەکو دیار ئەڤە دو سالە بۆدجە و مووچە بۆ کوردستانێ نە ھنارتیە، ھەر چەندە مە چەندین بزاڤکرینە، لێ بێ مفا بوویە، لەورا من باوەری ب حوکمەتا عەبادی ژی نینە.
ل دووماھیێ ناڤبری زێدەتر دیارکر:ھەکە ئەم پەرلەمانتارێن کورد نەچینە بەغدا رێژەیا قانوونی یا پەرلەمانی تمام نابیت، روونشتنێن پەرلەمانی ژی ناھێنە ئەنجامدان،چونکی عەرەب دزانن کو کۆتلەیا کوردستانی سەنگەکێ مەزن ھەیە د ناڤ پەرلەمانێ عێراقێ دا و بێی وان پەرلەمان ناھێتە ئەکتیفکرن.