ئەڤرۆ نيوز:
سەرۆکێ کوتلا برایەتی و پێکڤەژیانێ ل جڤاتا پارێزگەھا نەینەوا دیار کر کو لژنەک بۆ ئاشکراکرنا چارەنڤیسێ مووچێ کارمەندێن ساخلەمیا نەینەوا ژ جڤاتا پاریزگەھێ و ساخلەمیا نەینەوا ھاتە پێکئینان، رێڤەبەرێ ساخلەمیا نەینەوا د. خالد ئەلبەیاتی سەرا دیار نەبوونا مووچێ کارمەندێن ساخلەمیێ یێن دو ھەیڤێن ئەڤ سالە ھاتە دەستەسەرکرن و نوکە ل بەغدا ڤەکۆلین ل گەل دھێتەکرن.
سەیدۆ چەتۆ، سەرۆکێ کوتلا برایەتی و پێکڤەژیانێ ل جڤاتا پارێزگەھا نەینەوا ئاشکرا کر کو د. خالد ئەلبەیاتی ژ بەر دیارنەبوونا مووچێ ساخلەمیا نەینەوا ھاتیە دەستەسەرکرن چوونکو ئیمزا د. خالدی سەر چەکێ مووچێ کارمەندێن ساخلەمیێ بوو، و گۆت: “ڤەکۆلین ل سەر دوسەیا دیارنەبوونا مووچێ ساخلەمیێ یا بەردەوامە و ھێشتا دادگەھا فیدرالی چو بریارێن دووماھیێ ل سەر چارەنڤیسێ مووچێ کارمەندێن ساخلەمیێ نەدایە”.
ناڤبری ئەو ژی دیار کر کو پشتی ڤەکۆلین ل سەر دیار نەبوونا مووچێ ساخلەمیێ ھاتیەکرن شەش ملیار دینار ل بەنکا رەشید ل بەغدا ئاشکرا بووینە و ھێشتا کۆژمێ پتر ژ پێنج ملیار دیناران دیار نینن، حوکمەتا عیراقێ ب رێیا کۆمپانیەکێ کۆژمێ 11 ملیار و 400 ملیۆن دیناران مووچێ کارمەندێن ساخلەمیا نەینەوا رەوانەی ھەرێمێ کربوون، لێ ئەو کۆمپانیا ئەڤ کۆژمێ پارەی ئینای دیار نەبوو، و ب ڤی رەنگی مووچێ کارمەندێن ساخلەمیێ یێن ھەیڤا ئیک و دو ژ ئەڤ سالە بەرزە بوویە.
سەیدۆ جەتۆ گۆت: “بۆ دووڤچوونا ڤی بابەتی لژنەک ژ جڤاتا پارێزگەھا نەینەوا و ساخلەمیا نەینەوا ھاتیەپێکئینان بۆ دروستکرنا گڤاشتنێ ل سەر بەغدا بۆ ب دەستڤەئینانا مووچێ کارمەندێن ساخلەمیێ، لێ ھیشتا چو بریارێن دووماھیێ ل سەر ئاشکرابوونا چارەنڤیسێ مووچێ ھەیڤا ئیک و دو یێن بەرزەبووین نەھاتینەدان و بزاڤێن ساخلەمیا نەینەوا و جڤاتا پارێزگەھا نەینەوا ل گەل د. فارس بریفکانی سەرۆکێ لژنا ساخلەمیێ و ژینگەھا پەرلەمانێ عیراقێ بەردەوامن بۆ دیتنا رێیێن چارەسەریێ بۆ ب دەستڤەئینانا مووچێ کارمەندێن ساخلەمیێ”.
گۆتژی: “ئەم ھەموو کارمەندێن خوە پشتراست دکەین، ئەو مووچێ ھاتیە دزین دێ بۆ ھێتە ڤەگەراندن”.
ئەڤرۆ نيوز:
دوگیانیا ژنان دبیتە ئەگەرێ گەلەک گوھۆڕینان د لاشی دا، ژ ئەگەرێ کارێ ھۆرمۆنان و گەشەیا کۆرپەلێ، ئێک ژوان کاران ئەگەرێ ئێشا پشتێ یە.
ب گۆرەی نووچەکێ نوشداری یێ مالپەرێ ” ounousa” پێدڤیە ژنێن دوگیان ئاگەھداری ڤان رێنمایان بن دا کو ئێشا پشتێ کێم ببیت، ژ ئەگەرێ زێدەبوون و کرژبوونا زەبلەکان تووش دبنێ.
نەراوەستیانا زۆر ل سەر پێیان، چونکو دبیتە ئەگەرێ ئێشتا پشتێ و ھەر چنە بیت پێیەکێ خوە ل سەر جھەکی بدانن یان ژی پێت خوە ب ڤەکری ب ھلێن، دا زیان نەگەھنە پشتا ھەوە و ئێشا وێ کێمتر بیت.
کرنە پێیا پێلاڤێن بن فلات و جلکێن گۆنجای، چونکو ئەو ژی ئێکن ژ پەیدابوونا ئێشا پشتێ.
دەما بەرێ خوە د زڤرینێ لاشێ خوە ب تەمامی ل گەل وەربگێرە دا زیان نەگەھیتە پشتا تە، بزاڤێ بکە ھەردەم خوە نەچەمینی و ھەکە نەچار بووی ب روونە پاشان خوە بچەمینە و ئەو تشتێ تە بڤێت راکە.
بالیفکێ ب رەنگەکێ گۆنجای بدانە بن سەرێ خوە، چونکو سەرێ خودانانە سەر بالیفکێ ل سەر پشتێ دبیتە ئەگەرێ گەھاندنا ئێشێ ب پشتێ و دەمێ دکەڤیە سەر لاشێ خوە، بزاڤێ بکە بالیفکەکێ بکە د ناڤبەرا رانێن خوە دا.
بزاڤێ بکە ب رێیا راھێنەرێن شارەزا، حەفتیانە چەند جاران راھێنان بکەن وەکو مەلەڤانی و چوون ب پیان.
ئەڤرۆ نيوز:
ل ھەرێما کوردستانێ فەرمانا دەستەسەرکرنێ بۆ دو ھزار و 273 کەسان دەرکەفتیە، لێ ژ بەر ئەگەرێن جودا جودا نەھاتینە دەستەسەرکرن، رێکخراوەکا مافێ مرۆڤی ژی ھێزێن ئێمناھیێ د ڤی واری دا ب خەمسار ددەتە دیارکرن.
رێڤەبەرێ گشتی یێ پۆلیسێن ھەرێما کوردستانێ، دەربارەی دەستەسەرنەکرنا وان گۆت: “پتریا ئەو کەسێن فەرمانا دەستەسەرکرنا وان دەرکەفتی و ھەتا نوکە نەھاتینە دەستەسەرکرن، خوە ڤەشارتینە یان چووینە دەرڤەی ھەرێما کوردستانێ”.
ل دووڤ ئامارەکا رێڤەبەریا گشتی یا پۆلیسێن ھەرێما کوردستانێ، ب تنێ د چار ھەیڤێن ئێکێ یێن ئەڤ سالە دا، ل سەر ئارێشێن جودا جودا یێن مەز و بچووک، فەرمانا دەستەسەرکرنێ بۆ پێنج ھزار و 63 کەسان دەرکەفتیە، لێ ژ وان ب تنێ دو ھزار و 790 کەس ھاتینە دەستەسەرکرن و دو ھزار و 273 کەس ژی سەرەرای دەرکەفتنا فەرمانا دەستەسەرکرنا وان، لێ ھەتا نوکە نەھاتینە دەستەسەرکرن.
د ڤی واری دا، لیوا عەبدوللا خەیلانی، رێڤەبەرێ گشتی یێ پۆلیسێن ھەرێما کوردستانێ بۆ رووداو ئاشکرا کر، بۆ دەستەسەرکرنا وان کەسێن ھەتا نوکە نەھاتینە دەستەسەرکرن، بزاڤێن وان دبەردەوامن و گۆت: “پتریا ئەوێن ھەتا نوکە نەھاتینە دەستەسەرکرن، خوە ڤەشارتینە یان چووینە دەرڤەی ھەرێما کوردستانێ، لێ ئەم ل سەر دەستەسەرکرنا وان دبەردەوامین”.
محەمەد مەعروف، ژ رێکخراوا گەشەپێدانا دیموکراسیێ و مافێ مرۆڤی خویا کر، ئامارا دەستەسەرنەکرنا تۆمەتباران سال بۆ سالێ بەر ب زێدەبوونێ دچیت ل ھەرێما کوردستانێ.
ئەڤرۆ نيوز:
ئەندامەکێ لژنا باژێرڤانیان ل پەرلەمانێ کوردستانێ ئاشکرا کر ناڤێن وەجبا ئێکێ یا فەرمانبەران دگەل لیستا ناڤێن کۆمەلا بارەڤانیکەر ژ مافێن کرێچیان ل جڤاتا وەزیران بۆ وەزارەتا باژێرڤانیان ھاتینە رەوانەکرن و گۆت: “بۆ ڤی بابەتی لژنەک دێ ژ چار وەزیران ھێتە پێکئینان”.
د. سیراج خەیلانی، ئەندامێ لژنا باژێرڤانیان ل پەرلەمانێ کوردستانێ ئاشکرا کر کو ئەو ناڤێن واجبا ئێکێ یێن بۆ وەزارەتا باژێرڤانیێ ب مەرەما پێدانا پارچە زەڤیان ھاتینە رەوانەکرن ھەروەسا ئەو ناڤێن ژ لایێ کۆمەلا بارەڤانیکەر ژ مافێن کرێچیان ژی ڤە بۆ وەزارەتا ناڤھاتی ھاتینە رەوانەکرن ھەموو یێن گەھشتینە دەستێ لژنا تایبەتمەندا وەزارەتا باژێرڤانیێ و ھاتینە ڤاڤارتن و بۆ مالپەرێ فەرمی یێ پارتی دیمۆکراتی کوردستان گۆت: “لیستە ھاتینە ئامادەکرن و نوکە د گەل 25 رێنمایان بۆ سەرۆکاتیا جڤاتا وەزیران ھاتینە رەوانەکرن داکو بڕیارێ ل سەر بھێتەدان”.
ناڤبری ئاماژە دا وێ چەندێ کو گەلەک دەم بۆ ڤاڤارتنا ناڤان دڤێت دا کو بزانن کا رێنما ژێ دگرن یان نە، بەلێ سەرەرایی ڤێ چەندێ پێنگاڤێن باش ھاتینە ھاڤێتن.
ئه‌ڤرۆ نیوز:
سه‌نته‌رێ لاڤ د رێورسمه‌كى دا ئه‌ڤرۆ ل دهۆكێ هاته ڤه‌كرن و رێڤه‌به‌را سه‌نته‌رى بۆ ئه‌ڤرۆ دیاركر ئه‌و دێ زارۆیێن شه‌هیدان بێ به‌رامبه‌ر وه‌رگرن.
سوزان به‌روارى رێڤه‌به‌را سه‌نته‌رێ لاڤ یێ فێركرنا زمانى بۆ ئه‌ڤرۆ دیاركر كو مه‌ره‌م ژ دامه‌زراندنا ڤى سه‌نته‌رى، پێشخستنا هز و بیرێن جڤاكى یه ل كوردستانێ و گۆت” ڤى سه‌نته‌رى بشێوه‌كێ نووده‌م و مودێرن په‌یره‌و و سیسته‌مێ خوه ب هاریكاریا ئالیێ بسپورێن زمانى و ڤه‌كوله‌رێن جڤاكى ڤه چه‌سپاندى یه كو خواندنا ل ڤى سه‌نته‌رى ببیته بناغه بۆ به‌ره‌ڤ پێشچوونا جڤاكى”.
سوزان به‌روارى ئاماژه ب وێ یه‌كێ ژى كر كو خزمه‌تكرنا خولێن زمانى بۆ زارۆیێن شه‌هیدا بێ به‌رامبه‌ره، ژبه‌ر كو ب سایا وان شه‌هیدان ئه‌ڤرۆ كوردستان یا د ره‌وشه‌كا ئارام دا دژیت.
سوزانێ دیاركر كو ئه‌و دێ بزاڤێ كه‌ن، بنگه‌هێن خوه ل كه‌مپێن ئاواران ژى ڤه‌كه‌ن داكو خزمه‌تا په‌نابه‌ر و ئاواران ژى بهێته كرن و چه‌ندین رێكخراوا پشته‌ڤانیا خوه دیاركری.
عه‌بد یوسف رێڤه‌به‌رێ گشتى یێ په‌روه‌ردا دهۆك د په‌یڤه‌كێ دا ده‌ستخووشى ل ڤه‌بوونا ڤى سه‌نته‌رى كر و هه‌موو ئه‌و ئاخفتنه ره‌تكرن كو دبێژن قوتابى ل ناڤه‌ندێن په‌روه‌ردێ باش فێرنابن له‌وما قه‌ستا یێن ئه‌هلى دكه‌ن و گۆت” سالانه چه‌ندین قوتابى یێن هه‌ین كو ل سه‌ر ئاستێ كوردستانێ یێن ئێكێ ده‌رچووینه و رێژا 100% نمره ئیناینه، هه‌ر ل قوتابخانێن په‌روه‌ردێ خواندینه و فێربووینه”.
سه‌نته‌رێ لاڤ ژ سێ پشكان پێك دهێت، به‌شێ زارۆیێن بچووك ( داینگه‌ه) ژبۆ زارۆیێن 3 هه‌تا 5 سالى، و به‌شێ زارۆ و سنێلا ل 6 تا 12 سالى و به‌شێ گه‌نجان ل ژیێ 12 سالیێ و به‌ره‌ڤ سه‌رى.
ئه‌ڤرۆ نیوز:
بێگه‌رد تاله‌بانى ئه‌نداما سه‌ركردایه‌تیا ئێكه‌تیێ و سه‌رۆكا فراكسیونا وێ حزبێ ل په‌رله‌مانێ كوردستانێ دیاركر كو ئێكه‌م سه‌ره‌دانا گۆڕان و ئێكه‌تیێ دێ بۆ لایێ پارتى بیت و گۆت: ره‌نگڤه‌دانا پارتى ل دۆر رێككه‌فتنا بزاڤا گۆران و ئێكه‌تیا نیشتمانیا كوردستان یا دژوار و بله‌ز بوو، ژبه‌ر كو مه‌ره‌م ژ رێككه‌فتنا ئێكه‌تیێ ل گه‌ل گۆران ئه‌و بوویه كو ره‌وشا هه‌لاویستى یا سیاسى یا هه‌رێما كوردستانێ چاره ببیت”.
ئه‌ڤرۆ نیوز:
فوئاد مه‌عسوم سه‌رۆك كۆمارێ عیراقێ راگه‌هاند كو چوونا ناڤ ئاڤاهیێ جڤاتا وه‌زیران ژ ئالیێ خونیشاده‌ران ڤه ل به‌غدا خزمه‌تا خونیشاده‌ران ناكه‌ت و داخواز ژ حكومه‌تێ كر كو پێدڤیه دانوستاندن ل گه‌ل خونیشاده‌ران بهێته كرن و گۆت” ئه‌م دخوازین خونیشادان ب ئاشتیانه برێڤه بچن داكو ره‌وشا تێكنه‌چیت و گرۆپێن تیرورستى بۆ خوه ب ده‌لیڤه نه‌بینن كارێن تێكده‌ر و ته‌قینان ئه‌نجام بده‌ن”.
ئه‌ڤرۆ نيوز:
به‌هائه‌دین جه‌لال سه‌رپه‌رشتیارى رێكخراوا گه‌نجانى بوێر بۆ ئه‌ڤرۆ نيوز دیاركر كو ل سه‌رانسه‌رێ كوردستانێ وان 10 هزار ئیمزا بۆ كاراكرنا په‌رله‌مان و و خورتكرن و ڤه‌ژاندن و به‌رفره‌هكرنا لژنا دستوورێ هه‌رێما كوردستانێ خرڤه‌كرینه و گۆت” مه‌ره‌م ژ خرڤه‌كرنا ڤان ئیمزایان ئه‌وه فشاره‌كا مه‌ده‌نى ل سه‌ر لایه‌نێن سیاسى یێن هه‌رێما كوردستانێ دروست بكه‌ین كو په‌رله‌مان بهێته كاراكرن كو مه‌زنترین جهێ یاسادانایێ یه و هاتیه ژ كارئێخستن”.
به‌هائه‌دین جه‌لال ئاماژه ب وێ یه‌كێ دا كو ئه‌كتیڤ نه‌بوونا په‌رله‌مانى بوویه ئه‌گه‌ر كو حوكمه‌ت گه‌له‌ك كارێن نه‌یاسایى بكه‌ت، باشترین نموونه‌ژى ده‌ست برن بۆ پاشخستنا مووچێ فه‌رمانبه‌ران و هه‌موو پرۆژێن هه‌رێمێ راوه‌ستاندینه و گۆت” مه ل به‌ره ڤێ حه‌فتێ ڤان ئیمزایان د كۆنگره‌یه‌كێ رۆژنامه‌ڤانى دا ل هه‌ولێرێ یان هه‌له‌بجه یان سلێمانیێ رابگه‌هینین و راده‌ستى په‌رله‌مان و حكومه‌تا هه‌رێمێ بكه‌ین، دیسا راده‌ستى هه‌ر سێ مه‌كته‌بێن سیاسى یێن پارتى دیموكراتى كوردستان و ئێكه‌تیا نیشتمانیا كوردستان”.
به‌هائه‌دین جه‌لال ئاماژه ب وێ یه‌كێ كر كو ئه‌و هیڤى نه لایه‌نێن سیاسى یێن هه‌رێما كوردستانێ ل سه‌ر به‌رژه‌وه‌ندیێن خه‌لكى ئێگ بگرن.
نيشاندان