ئەڤرۆ نيوز:
نوونەرێ تایبەت یێ ئەمریکا د ھەڤپەیمانیا نێڤدەولەتی دا ل ئوردنێ بۆ رۆژنامەڤانان راگەھاند کو ئۆپەراسیۆنێن وان یێن تایبەت بۆ کوشتنا فەرماندە و بەرپرسێن داعشێ ل عیراقێ و سووریێ بەردەوام دکەت و ئاشکرا ژی کر کو بۆ ئازادکرنا موسلێ و رەقایێ دێ د دەمەکی نێزیک دا پێنگاڤێن گەلەک مەزن ب ھاڤێژین.
بریت ماکگورک نوونەرێ تایبەت یێ ئەمریکا د ھەڤپەیمانیا نێڤدەولەتی دا د چارچۆڤێ سەرەدانا خوە دا ل ئوردنێ کۆمبوونەک بۆ رۆژنامەڤانان سازکر و تێدا ل سەر شەرێ ل دژی تیرۆرستێن داعشێ و قاعیدە راوەستیا و راگەھاند کو ئەمریکا و ھەڤپەیمانیا نێڤدەولەتی رژدە د ژ ناڤبرنا داعشێ دا و گۆت: (ئۆپەراسیۆنێن ھەڤپەیمانان بۆ کوشتن و ژناڤبرنا فەرماندە و بەرپرسێن تیرۆرستان بەردەوام دکەت و د ڤێ چارچۆڤێ دا ل ھەر دو باژێرێن د بن کۆنترۆلا داعشێ دا ھژمارەک زێدە بەرپرسێن داعشێ ھاتنە کوشتن و ھەر بزاڤەکا وان کەڤتیە د بن کۆنترۆلا ھەڤپەیمانان دا و بۆ ڤێ چەندێ ترسەکا مەزن بۆ بەرپرسێن تیرۆرستان دروست بوویە).
بریت ماکگورک ھەروەسا راگەھاند ژی کو ئۆپیراسیۆنا ئازادکرنا موسلێ ھێشتا ب تەمامی دەستپێ نەکریە و ئارمانجا وان ژ ھۆلێ راکرنا ھەموو کێماسیانە و گۆت: (ئەم دخوازن ب ھەوالگیریەکا گەلەک باش ھەموو ئارمانجان دیار بکەین و پاشی ب دربێن مەزن رێکخستنا تیرۆرست ژناڤ ببەین و موسلێ رزگار بکەین و د ئۆپەراسیۆنان دا دێ ھێزێن عیراقێ و پێشمەرگەیێن کورد دێ پشکداریێ کەن، ھەروەسا بۆ ئازادکرنا باژێرێن رەققا، جەرابلوس و ھندەک تاخێن حەلەبێ ژی ب ھەماھەنگیا ل گەل روسیا بەرھەڤیێن باش بۆ ژناڤبرنا تیرۆرستێن قاعیدە و داعشێ دھێنە کرن و ئۆپەراسیۆنێن کو ھەتا نھا ھاتنە ئەنجام دان بۆ کوشتن و ژناڤبرنا بەرپرسێن تیرۆرستان بوویە و ھەتا نھا ئەنجامێن سەرکەڤتی بدەستڤە ھاتینە و ھژمارەک زێدە بەرپرسێن تیرۆرستان ھاتنە کوشتن).
نيشاندان