ئەڤرۆ نیوز:
ل گۆر راپۆرتەکا مالپەرێ ئیلکە خەبەر یێ تورکیا چەند رۆژێن دی دێ کۆنگرێ نەئاسایی یێ پارتیا دیموکراتیک یا گەلان HDP ھێتە گێران و ھەکە سەلاحەدین دەمیرتاش خوە بۆ ھەڤسەرۆکاتیا HDP بەربژار نەکەت دێ ئۆسمان بایدەمیر سەرۆکێ بەرێ یێ باژێرڤانیا مەزن یا ئامەدێ و ئەندامێ نھا یێ پەرلەمانێ تورکیا خوە بۆ ھەڤسەرۆکاتیا HDP بەربژار کەت.
ئەڤرۆ نیوز:
وەزیرێ دەرڤە یێ ئەمریکا جۆن کێرێ د داخۆیانیەکێ دا راگەھاند کو ھەکە عەرەبستانا سعوودی بزاڤا دروست کرنا چەکێن ئەتۆمی بکەت یا بەری چەند سالان ھاتیە سەرێ ئیرانێ دێ ھێتە سەرێ سعوودیێ ژی و ژ بەر ھندێ دڤێت بەرپرسێن سعوودیێ چو ھزرێن وەسا شاش نەکەن، چونکو ئەمریکا ب چو رەنگەکێ رێ نادەت ھندەک وەلاتێن دەڤەرێ ب رێیا چێکرنا چەکێن ئەتۆمی مەترسیێ بۆ پاشەرۆژا رۆژھەلاتا ناڤین دروست بکەن.
ئەڤرۆ نیوز:
ئەحمەد ئاکسو ئەندامێ سەرکردایەتیا پارتیا ھەرێمێن دیموکراتیک ل ئامەدێ بۆ رۆژناما ئەڤرۆ دیار کر کو شەرێ ل باکورێ کوردستانێ ب دژواری بەردەوام دکەت و ل باژێرکێ سورێ و جزیرێ رۆژانە چەندین وەلاتیێن سڤیل ژ ئالیێ ھێزێن ئێمناھیێن تورکیا ڤە دھێنە کوشتن و ئەندامێن PKK ژی ل باژێران دەست ب چالاکیان ل دژی ھێزێن تورکیا دکەن و ژ ھەر دو ئالیان گەلەک کەس ھاتنە کوشتن و گۆت: (مخابن شەرێ نھا کو ل باژێران برێڤە دچیت زیانەکا گەلەک مەزن گەھاندیە خەلکێ مەدەنی، رۆژانە ژن و زارۆ دبنە قوربانیا شەری و ھەرچەندە گەلەک بزاڤ د دەمێن بۆری دا بۆ راگرتنا شەری ھاتنە کرن ژی یێ نەگەھشتنە چو ئەنجامان و چەند رۆژن ھێزێن تایبەت یێن تورکیا ل سورێ و جزیرێ بنەجە بووینە و ئەو یەک ژی نیشا ددەت کو دێ شەرێ نھا ل باژێران ب دژواری بەردەوام بیت).
ناڤھاتی د بەردەوامیا ئاخڤتنا خوە دا ئەو یەک ژی نەڤەشارت کو وەزارەتا ناڤخوە یا تورکیا راپۆرتەکا بەرفرەە سەبارەت ب رەوشا باکورێ کوردستانێ ئامادە کریە و د کۆمبوونا بلند یا دەولەتێ دا بەحسێ رەوشا دووماھیێ یا باکورێ کوردستانێ ھاتیە کرن و بریار ھاتیە دان کو ژ بۆ رێگرتن ژ چالاکیێن چەکداری و سەرھلدانا خەلکی دەست ب چێکرنا بنگەھێن نوو یێن سەربازی د ناڤ باژێران دا بھێتە کرن و بریارە ل سورێ چەندین بنگەھێن نوو بھێنە ئاڤاکرن و گۆت: (براستی ژی ئاڤاکرنا بنگەھێن نوو یێن سەربازی دھێتە واتەیا ھندێ کو حوکمەتا تورکیا ھێشتا ژی دخوازیت ب عەقلێ سەربازی پرسا کوردی چارە بکەت و ئەو یەک دێ رەوشا نھا ل تورکیا ئالۆزتر لێ کەت، چونکو پتر ژ سیە سالانە حوکمەتێن تورکیا ب ھەموو ھێزا خوە یا سەربازی بزاڤا ژناڤبرنا ئیرادا خەلکێ کورد ل باکورێ کوردستان کرینە، لێ د سەرکەڤتی نەبوون و ژ بەر ھندێ ژی ب ئاڤاکرنا بنگەھێن نوو ل باژێرێن باکورێ کوردستانێ پرسا کوردی ناھێتە چارەکرن و دێ رەوشا تورکیا خرابتر لێ ھێت).
ئەحمەدی داخواز ژ سەرۆک کۆمار و سەرۆک وەزیرێن تورکیا ژی کر کو ل جھێ بنگەھێن نوو یێن سەربازی د ناڤ باژێرێن کوردان دا ئاڤا دکەن بلا دەست ب دانوستاندنان ل گەل نوونەرێن کوردان بکەن و شەری بدەنە راگرتن، چونکو ھەتا شەرێ نھا ل باکورێ کوردستانێ بەردەوام بیت دێ رەوشا تورکیا ب گشتی یا ئالۆز بیت و ئەو یەک د بەرژەوەندیا تورکیا دا نینە، کوردان ژی نەڤێت شەر ل باژێرێن وان بەردەوام بیت و دڤێت شەر بھێتە راگرتن، ھەکە ئەردۆگان و داوود ئوگلۆ بەحسێ براتیا ل گەل کوردان دکەن وی دەمی بلا شەرێ برا ل گەل برایی بدەنە راگرتن و گۆت: (زوو یان ژی درەنگ حوکمەت نەچارە شەرێ نھا ل باکوری بدەتە راگرتن، چونکو ب شەری تورکیا نەشێت ھەموو کوردان ژناڤ ببەت و دێ دووماھیێ ھەر نەچار بیت بۆ چارەکرنا پرسا کوردی دەست ب قۆناغا ئاشتیێ و دانوستاندانان بکەت، ئەم ژی دبێژن بەری کو گەلەک خوین بھێتە رێتن بلا ھەر دو ئالی ڤەگەرنە ڤە سەر مێزا دانوستاندنان).
ئەڤرۆ نیوز:
رۆژنامەکا بریتانی د راپۆرتەکێ دا دیار دکەت کو ھێزێن پێشمەرگێن کوردستانێ وەک ھێزا سەرەکی یا شەرێ ل دژی داعشێ شیا کو دربێن مەزن ل وێ رێکخراوا تیرۆستی بدەت و نھا ئەمریکا و وەلاتێن رۆژئاڤا گەلەک داخوازیان ژ کوردان دکەن، لێ مخابن ل ھەمبەر وێ یەکێ چ بۆ وان ناھێتە کرن.
رۆژناما گاردیان یا بریتانی د راپۆرتەکێ دا دیار دکەت کو نھا ئەمریکا و وەلاتێن ئورۆپا کوردان وەک ھەڤپەیمانێ خوە یێ سراتیژی دبینن و گەلەک جاران ژی بەرپرسێن وەلاتێن رۆژئاڤا دیار کرینە کو پێشمەرگە ل سەر ناڤێ ھەموو جیھانێ شەرێ داعشێ دکەن، بێگومان پێشمەرگێن کوردستانێ شیان ھیما و ترسا کو داعشێ ل سەر خەلکی دروست کربوو ژناڤ ببەن و گەلەک دەڤەرێن ستراتیژی ژ دەستێ وێ رێکخراوا تیرۆرستی دەرخستن، کو شنگال ئێک ژ وان جھێن ستراتیژی بوو کو پێشمەرگەی شیا د ماوەیەکێ کورت دا ژ دەستێ تیرۆرستان ئازاد بکەت.
د بەردەوامیا راپۆرتێ دا ھاتیە دیار کرن کو نھا ئەمریکا و ھەتا حوکمەتا ناڤەندی یا عیراقێ دخوازن پێشمەرگە د ئازادکرنا مووسلێ دا پشکدار بن، دخوازن پێشمەرگێن کوردستانێ بەنداڤا مووسلێ بۆ وان بپارێزن، لێ ئەو یەک د دەمەکێ دایە کو حوکمەتا ناڤەندی یا عیراقێ ھەتا نھا ئێک مووچە نەدایە پێشمەرگێن کوردستانێ و ئەو چەک و ھاریکاریێن کو ژ ئالیێ وەلاتێن رۆژئاڤای ڤە بۆ پێشمەرگەی دھێنە ھنارتن ژی گەلەک جاران ژ ئالیێ بە‌غدایێ ڤە دھێنە راگرتن و ناگەھنە دەستێ وان ژ بەر ھندێ ژی چاوا بەغدا داخوازا ھاریکاریێ ژ پێشمەرگەی دکەت؟
د راپۆرتێ دا ئاماژە ب ڤێ یەکێ ژی ھاتیە کرن کو بریتانیا دبێژیت پێشمەرگە ھێزا مە یا ئەردی یە و شەرێ تیرۆرستان دکەت، لێ بۆچی بریتانیا وەک پێدڤی ھاریکاریا کوردان و ب تایبەتی ژی یا پێشمەرگەی ناکەت؟ چونکو ھەتا نھا ١٣٠٠ پێشمەرگێن کوردستانێ د شەرێ ل دژی داعشێ دا شەھید بووینە و گەلەک ژی بریندارن و پێدڤی ھاریکاریێ نە و یا دیار ھەتا نھا ژی وەک پێدڤی ھاریکاریا وان نەھاتیە کرن و ژ بەر ھندێ دڤێت وەلاتێن رۆژئاڤا پێداچوونەکا مەزن د سیاسەتا خوە یا ل ھەمبەر کوردان بکەن و دڤێت وەک پێنگاڤا یەکێ ژی ھاریکاریا پێشمەرگەی بھێتە کرن، چونکو یا پێشمەرگەی ب چەکێن کەڤن و سڤک کری لەشکرێ دو وەلاتێن وەک سووریا و عیراقێ ب ھەموو شیانێن خوە نەشیانە بکەن.
د راپۆرتا رۆژناما گاردیان دا بەحسێ ھندێ ژی ھاتیە کرن کو ژ بەر داکەڤتنا بھایێ پەترۆلێ ل بازارێن جیھانێ نھا ھەرێما کوردستانێ تووشی قەیرانەکا مەزن یا ئابووری بوویە، لێ زێدەباری وێ قەیرانێ دیسان شەرێ داعشێ دکەن و نھا پتر ژ دو ملیۆن ئاوارێن عیراقی و سووری ل ھەرێما کوردستانێ بنەجە بووینە و د رەوشا نھا یا خراب دا دیسان حوکمەتا کوردستانێ ھاریکاریا وان دکەت، لێ دڤێت ئێدی وەلاتێن رۆژئاڤا ژی بارێ ھەرێما کوردستانێ زێدەتر گران نەکەن و دەم ھاتیە کو د بیاڤێ مادی و چەکی دا ھاریکاریا کوردان بھێتە کرن، چونکو ھەکە وەک پێدڤی ھاریکاریا کوردان نەھێتە کرن داعش دێ جارەکا دی خوە ب ھێز کەت، چونکو لەشکرێ عیراقێ ئەو شیان نینن کو بشێن داعشێ ژناڤ ببەن، ئەزموونا ل رومادی و ئەنبارێ ئەو راستی بۆ ھەموو جیھانێ ئاشکرا کریە.
د دووماھیا راپۆرتێ دا ئەو یەک ژی ھاتیە دیار کرن کو پێشمەرگەی فیداکاریەکا گەلەک مەزن کریە و ئەڤرۆکە ژی یا پێدڤی یێ دکەن و خەلکێ دپارێزن، لێ دڤێت ئەمریکا و وەلاتێن ئێکەتیا ئورۆپا ژی ب ئەرکێ خوە رابن و ھاریکاریا کوردان بکەن، چونکو تشتێ نھا دیار دبیت رۆژئاڤا گەلەک داخوازیان ژ پێشمەرگەی و حوکمەتا ھەرێما کوردستانێ دکەت و مخابن ھەتا نھا وەک پێدڤی ھاریکاریا وان نەھاتیە کرن و نھا ژ بەر قەیرانا دارایی رەوشا ھەرێما کوردستانێ خرابتر بوویە و ئەرکێ ئەمریکا و وەلاتێن رۆژئاڤایی کو د ڤێ رەوشا ئالۆز دا کوردان و ب تایبەتی ژی ھێزێن پێشمەرگەی ب تنێ نەھێلن.
ئه‌ڤرۆ نيوز:
فاتح مه‌وله‌وى رێڤه‌به‌رێ راگه‌هاندنا وه‌زاره‌تا په‌روه‌ردێ راگه‌هاند: كه‌ناله‌كێ په‌روه‌رده‌يێ دێ هێته ڤه‌كرن ل كوردستانێ كو كوالێتيا وێ hd يه و تێچوويا وێ دێ گه‌هته نێزيكى 100 هزار دولاران.
ئه‌ڤرۆ نيوز:
جڤاتا وه‌زيرێن هه‌رێما كوردستانێ ل سه‌ر پرۆژێ چاكسازيێ، مووچێ فه‌رمانبه‌ران و چه‌ند پرسێن دى ئه‌ڤرۆ دێ كوم بيت و پارێزگه‌رێن هه‌رێمێ ژى دێ پشداربن.
برياره ئه‌ڤرۆ جڤاتا وه‌زيرێن هه‌رێمێ كوم ببيت كو كێمكرنا خه‌رجيان، پرۆژێ چاكسازيێ و دابينكرنا مووچێ فه‌رمانبه‌ران دێ به‌رنامێ كارى يێ كومبوونێ بيت.
دهێته چاڤه‌رێكرن د كومبوونێ دا چه‌ندين بريار بهێنه دان، وه‌ك برينا ده‌رماله‌يێن پشكه‌كا فه‌رمانبه‌ران و وه‌رگرتنا ترومبێلێن فه‌رمانبه‌ران و كێمكرنا وه‌زاره‌تان بۆ 10 هه‌تا 11 وه‌زاره‌تان.
ل دۆر فروتنا نه‌فتا حكومه‌تێ، حكومه‌ت دێ پرۆژه‌ك يێ ل به‌ر ده‌ست كو ره‌نگه ئه‌ڤرۆ بريار ل سه‌ر بهێته دان، ئه‌وژى دروستكرنا بورده‌كێ چه‌ند كه‌سى يه بۆ فروتنا نه‌فتێ، هه‌م ب رێيا بوريا، هه‌م ژى ب رێيا تانكه‌ران.
ئه‌ڤرۆ نیوز، ئه‌كره‌م ئیبراهیم:
(جون ڤان دیرزاندا) كونسلێ وه‌لاتێ هوله‌ندا ل هه‌رێما كوردستانێ د چارچوڤێ سه‌ره‌دانا خوه‌دا بۆ دهۆكێ ل گه‌ل پارێزگارێ دهۆكێ فه‌رهاد ئه‌مین ئه‌تروشى كومبوو و د كۆنگره‌یه‌كێ رۆژنامه‌ڤانى دا گوت” ئه‌م به‌رده‌وامین ل سه‌ر هاریكاریا هه‌رێمێ ومه 100 راوێژكار ل كوردستانێ وئیراقێ هه‌نه بو مه‌شق وراهێنانا پێشمه‌رگه‌ى وهێزێن ئیراقێ هه‌روه‌سا مه چه‌ند فروكێن شه‌رى ژى هه‌نه بولێدانا تیرورستێن داعش هه‌روه‌سا ژسالا 2014وه‌ره مه تا نوكه پتر ژ(50) ملیون یورویا وه‌كو هاریكارى بو ئاواره وپه‌نابه‌ران ته‌رخانكرینه وب رێكا رێكخراوێن UNوNGOهاتینه مه‌زاختن هه‌روه‌سا دبیاڤێ ئه‌كادیمى وچاندنێ دا ژى مه هاریكاریا هه‌رێمێ كریه .
ل دور چاوانیا هاریكاریكرنا هه‌رێما كوردستانێ وده‌ربازبون ژقه‌یرانا داریى وئابورى گوت: ئه‌م دێ هاریكاریا كه‌رتێ تایبه‌ت كه‌ین نه‌خاسمه كه‌رتێ چاندنێ كو بهێته پێش ئێخستن وئه‌م دێ دگه‌ل حكومه‌تا كوردستانێ پتر گه‌نگه‌شا ل دور بابه‌تى ئه‌نجامده‌ین.
ئه‌ڤرۆنیوز, ره‌زوان رۆژبه‌یانى
ده‌رهێنه‌رێ كورد ؛جانۆ رۆژبه‌یانى بۆ ئه‌ڤرۆ نیوز خۆیاكر كو دێ ل رێكه‌فتێ 10/2/2016 فلمێ سینه‌مایى “ئێك مۆمك و دوو مۆمك “دێ ل سینه‌ماێین هه‌ولێرو سلێانیێ هێته نیشاندان .
؛جانۆ رۆژبه‌یانى گوت: ئه‌ف فلمه ژ ده‌رهێنانا من بخۆیه و سه‌ره‌راى ره‌وشا دارایى و ئه‌وله‌هێ كونها ب سه‌ده‌ما داعشێ چێبونه به‌لێ هه‌ر دهێته چاڤه‌رێكرن كو خه‌لكه‌ك باش پێشوازى ل فلمێن من بكه‌ن .
ئه‌ڤرو نیوز،بارزان مزوورى
ل دووڤ راپورته‌كا نه‌ته‌وه‌یێن یه‌كگرتوو كو ئامارا توندوتیژیێ داعش بو سه‌ر وه‌لاتییێن عێراقێ به‌لاڤكریه تێدا هاتیه كو داعش 3 هزارو پێنج سه‌د كه‌س یێن كرینه سه‌رباز و كوێله كو پتریا وان كوردێن ئیزدى نه ئه‌ون ئه‌وێن هاڤینا سالا 2014 ده‌سته‌سه‌ركرین.
د راپورتێدا ئاماژه ب وێ چه‌ندێ دایه كو دناڤ باژێرێ مووسل 800 حه‌تا 900 زاروكا ره‌ڤاندینه و گه‌له‌ك ژ وان ژى كوشتینه كو ده‌مێ ره‌ڤاندنا زاروكا هه‌ولدایه خوه ل ده‌ستێن وان قورتال لكه‌ن.
هه‌روه‌سا ئاماژه ب وێ یه‌كێ هاتیه كرن كو 18 هزارو 802 مه‌ده‌نى ل عێراقى كوشتینه ب شێوه‌یه‌كێ درندانه و 36 هزارو 254 عێراقى برینداركرینه ل ده‌ست پێكا سالا 2014 حه‌تا دوماهیا سالا 2015 یا چوویى.
نيشاندان