ئەڤرۆ نیوز:
ئەندامەکا جڤاتا نوونەرێن عیراقێ ژ فراکسیۆنا پارتی بۆ ئەڤرۆ دیار کر کو بڕیارە ئەڤرۆ 25-4-2016 پەرلەمانتارێن کورد ل جڤاتا نوونەرێن عیراقێ بەر ب بەغدا بچن، ژ بەرکو سوبەھی 26/4 دێ روونشتنا جڤاتا نوونەران دەست پێ کەت و دبیژت: ھەکەر روونشتن ل سەر حکومەتا عەبادی بیت، ئەم دەنگی ل سەر لیستا ئێکێ یا حوکمەتا عەبادی نادەین، ب تنێ ھەکەر لیستا دویێ ھاتە پێشکێشکرن دێ کورد دەنگی ل سەر دەن.
نەجیبا نەجیب، ئەنداما جڤاتا نوونەرێن عیراقێ خویا کر، ھەتا نوکە پەرلەمانتارێن مانگرتی درژدن کو سەلیم جبوری نەبیتە سەرۆکێ جڤاتا نوونەران و گۆت: “ھەکەر ئەڤرۆ 25/4 رێژا قانوونی یا پەرلەمانتارێن مانگرتی تەمام بیت و ل سەر ھەلوەیستێ خوە دبەردەوام بن دێ ئاریشە روودەن و نە دوورە روونشتنا پەرلەمانی نەھێتەکرن، لێ ھەکەر ھاتو ھەموو پەرلەمانتار رازی بن کو دەستەیا سەرۆکاتیا پەرلەمانی نەھێتە گوھۆرین روونشتن دێ ھێتەکرن”.
گۆتژی: “ئەڤرۆ 25/4 ب تنێ ئەم دێ د روونشتنەکێ دا ئاماژە بین، ئەوژی ھەکەر دبەرژوەندیا مللەتێ کورد دا بیت”.
نەجیبا خانێ ئاشکرا ژی کر، لیستا ئێکی یا عەبادی پێشکێشکری ژ 12 وەزارەتان ژ بلی وەزارەتا ناڤخوە و بەرگریێ پیک دھێت و گۆت: “د لیستا ئێکێ دا وەزیری دارایی و کۆچ و کۆچبەران کو بەھرا کوردانە یێن ھاتنیە گوھارتن، ئەڤەژی غەدرە ل کوردان ھاتیەکرن، لەو ئەم ل سەر لیستا ئێکێ یا حوکمەتا عەبادی رازی نابین، لێ لیستا دویێ ژ 14 وەزارەتان پێک دھێت، دیسا ژبلی وەزارەتا نافخوە و بەرگریێ و د گەل سێ وەزارەتێن کوردان، ئەم ل سەر لیستا دویێ یا حوکمەتا عەبادی درازینە، لێ ھندەک لایەنێن دی یێن سیاسی دژی لیستا دویێ یا حکومەتا عەبادی نە”.

ئەڤرۆ نیوز:
ئەندامەکا پەرلەمانێ عیراقێ ژ فراکسیۆنا پارتی دیموکراتی کوردستان دیارکر ئێدی جھێ مە ل بەغدا نینە وەکو نوونەرێن مللەتێ کورد چونکی مرۆڤ نەشێت نوونەراتیێ بکەت وعیراق وەلاتەکە کو چو سالوخەتێن وەلاتی تێدا نەماینە، چونکی چو دبن کونترۆلێ نەمایە.
نەجیبا نەجیب ئەنداما پەرلەمانێ عیراقێ ژ فراکسیۆنا پارتی دیموکراتی کوردستان بۆ رۆژناما ئەڤرۆ گۆت” شەرم ژ خەلکێ خوە دکەین کو دچینە بەغدایەکێ ئەوا ھەتا نوکە چو مافێ خەلکێ مە دابین نەکەت، چونکی چو سالوخەتێن دەولەتان نینن و دبن کونترۆلێ دەرکەفتیە و ئابوورێ وێ ب تنێ بۆ ھندەک پارێَزگەھانە و ئێمناھی دبن کونترۆلا وێ حوکمەتێ دا نینە و بڕیارا وێ د دەستی دا نینە”.
نەجیبایێ دیارکر” بسپۆری و سەربورامە یا خۆلا بۆری نەشێن بکاربینین کو بکەڤیتە دخزمەتا خەلکی دا و کارەکی بکەی، تو وێ نابینی کارێ خوە بکەی، دبینم بەغدا گەلەک تشت ل گەل ھەرێما کوردستانێ کرن وەکو بڕینا بودجا کوردستانێ و نەدانا مووچێن فەرمانبەران و نە قەرەبووکرنا خەلکێ زیانداربووی و ھەتا پارێ پێشمەرگەی ژی نادەت و پشتەڤانیا پێشمەرگەی ناکەت”.
خویاکر ژی” چ داخویانی و نێریێن وان جودا نەبووینە و بەرامبەر، ئەم وەک کورد چاڤێن مە دگرێداینە و تو نەشێی ھەر داخواز بکەی، ھەکە دبیتە رۆژا چوونا بەغدا، ئەم ل گەل سەرکرداتیا خوە یا کوردی دچینە بەغدا ژبەر پەیوەندیێن مەیە ژ بەر وەلاتێن بیانی” .
ھێشتا گۆت”ھەکە تو د چ لژنە دا بی ل پەرلەمانێ عیراقێ، یا بێ مفایە و گەلەک جاران ب نڤیسارێن فەرمی مە مەزنە بەرپرسێن حوکمەتا بەغدا گازی کرینە ل سەر کێشێن وەلاتیێن کوردستانێ، بەلێ ھێجەت گرتینە و ناھێن، لەوما دبینم ھەبوونا مە ل بەغدا دڤێ قۆناغێ دا ئەم نەشێن ب دورستی دڤی سەقایی دا کارێ خوە ئەنجام بدەین و نوونەرێن خەلکێ خوە بین و ئەم یێن گەھشتینە وێ باوەریێ کو 100% ل گەل نەتەوا عەرەب تۆ بکەی یان نەکەی وتۆ گەلەکێ باش بی یان نە، بەرامبەر کوردان ناھێنە گوھۆڕین و ھەر ئێکن و ماف و بەرژوەندیێن کوردان ھەر ل بەرچاڤ وەرناگرن”.
ھەمان ئەنداما پەرلەمانی گۆت ژی”ھێشتا مە نەدیتیە نەئەندامێن پەرلەمانێ عیراقێ ژ سونە و شیعان بەحسێ مافێ کوردان کربیت و دڤێت، یان بێژن پێدڤیە بودجە بۆ ھەرێما کوردستانێ بھێتەدان و ھەتا جھێن حزبی و دینی و حکومی ژی ل عیراقێ ھێشتا نە گۆتینە کورد پشکەکن ژ عیراقێ” .
نەجیبایێ دیارکر” باشترین رێ ئەوە سەرکرداتیا کوردستانێ و سەرۆکێ ھەرێما کوردستانێ کار بکەن ب زووترین دەم کورد ل گەل نەتەوا عەرەبان د عیراقێ دا نەمینن، چونکی تو نوونەرێ خەلکێ خوە بی ل بەغدا و ئەو بەغدا نەشێـت بۆ خەلکێ تە چ بکەت، مانا تە ل وێرێ بۆ چیە؟، بەغدایەکا مە چو ژێ نەدیتی و باوەرناکەم چو ژێ ببینم ژی و ئەم یێن گەھشتیمە وێ باوەریێ ئێدی ئەم نەشێن چ ژێ بینین”.
ل دووماھیێ نەجیبا نەجیب دبێژیت” چوونا مە بۆ بەغدا بجھئینانا بڕیارێن سەرکرداتیا کوردی نە و سەرکرداتی ژی یا گەھشتیە وێ باوەریێ، بەلێ دبینم ھێشتا ئەو دەم نەھاتیە کو بڕیارێ ل سەر نەمانا مە ل بەغدا بدەن”.