ئەڤرۆ نیوز، زنار:
رۆژ بۆ رۆژێ دەنگوباسێن چونا ستێرا یانا ریال مەدرید کرستیانو رونالدۆ بۆ ناف رێزێن یانا پاریس سان جێرمان یا فرەنسی ل ھاڤینا ئەڤ سالە بەر ب بەلاڤبونێ دچیت.
د ڤی دەربارەی دا رۆژناما میرور یا ئنگلیزی دیارکریە کو ستێرا پرتوگالی و یانا مەلەکی رونالدوی کومبونێن نھێنی ل گەل سەروکێ یانا پاریس سان جێرمان ناسر خلێفی کرینە ل پایتەختێ فرەنسا پاریس پێخەمەت بابەتێ چونا وی بۆ یانا پاریسی ل دوماھیا وەرزێ ئەڤ سالە، ھەمان ژێدەر ئەو چەندە ژی راگەھاند کو جارا پێنجێ یە ھەردو لا کومبونێن خوە دکەن ب نھێنی پێخەمەت ب دوماھی ئینانا ڤێ ھەڤبەستێ کو ژ وانا دەمێ یاریا یانا ریال مەدرید ل گەل پاریس سان جێرمان ژ یاریێن قوناغا کومان دا ژ قارەمانیا ئوروپا قارەمانێن خولان ل یاریگەھا سانتیاگو بێرنابیو.
دھێتە زانین ل رۆژا چارشەمبا بوری ژی رونالدو ب فروکەیا خوە یا تایبەت بەر ب پاریس چوبو و دیسان کومبونەکا دی ل گەل خلێفی ئەنجام دابو و رۆژا پێنج شەمبی سپێدێ ڤەگەریابوو مەدرید و پشکداری د یەکەیا راھێنانان ژی دا کربوو لەورا چارەنڤیسێ ڤی یاریکەری ل گەل یانا ریال مەدرید ل دوماھیا ڤی وەرزی یێ دیار نینە و حەزا چونا خوە بۆ یانا فرەنسی ب ئاشکرای دیار نە کریە ھەتا نوکە و ھەمی کاران ب نھێنی ڤە دکەت.

ئەڤرۆ نیوز، زنار:
سەروکێ مێرنشێن ئێکگرتیێن عەرەبی (ئیمارات) شێخ خەلیفە ئەلمەنسور نێزیکترین کەسە بۆ کرینا یانا لیڤەرپول یا ئنگلیزی بەرامبەر ٧٠٠ ملیۆن جونیە ئسترلینی ل دووڤ پەیامەکێ رۆژنامەیێن ئنگلیزی.
رۆژناما دەیلی ستار یا ئنگلیزی ئەڤ پەیامە بەلاڤکریە و ئاماژە ب وێ چەندێ دایە کو نوکە یانا لیڤەرپول یا ئنگلیزی بارودوخێ وێ یێ دارایی یێ جێگیرە و کێشە نینن ل گەل خودانێ خوە یێ نوو ئەمریکی جون ھێنری ل گەل پشکێن ڤینوای سبورتس گروب یا ئەمرکیی لێ ئەو کوژمێ ملیاردێرێ ئیماراتی شێخ خەلیفە مەنسور پێشکێشکری بۆ کرینا ڤێ یانێ کو د گەھیتە ٧٠٠ ملیۆن جونیە ئسترلینی دبیت یانە بھێتە فروتن و رێککەفتن بھێتە کرن د ڤی دەربارەی دا کو یانا لیڤەرپول یانا ئێکێ نینە ملیاردێرێن عەرەبێن کەنداڤی د کرن کو بەری نوکە یانا مانچستەر ستی ژی ژلایێ حاکمێ مێرنیشینا دوبەی ڤە ھاتیە کرین.
ڤێ رۆژنامێ دیارکریە کو داھاتێ ملیاردێرێ ئیماراتی داھات و سامانێ وی د گەھیتە ٣٠ بلیۆن جونیە ئسترلینی کو دشیانێن وی دایە ڤێ یانێ پێشبێخیت.
دھێتە زانین بەری نوکە یانا لیڤەرپول ژلایێ ملیاردێرێ ئەمریکی جون ھێنری ڤە ھاتبوو کرین ل سالا ٢٠١٠ بەرامبەر کوژمێ ٣٠٠ ملیۆن جونیە ئسترلینی.

ئەڤرۆ نیوز:
بەردەوام رۆژنامەیێن برێتانی دەنگوباسان بەلاڤەکەن راھێنەرێ بەری نوکە یێ چێلسی و ریال مەدرید جوزێ مورینھو نێزیک بوویە ب فەرمی ھەڤبەستا مانچستەر یوناید ئیمزابکەت ل ھاڤینا بھێت کو چەند رۆژناما وەسا ژی دایە دیارکرن بتنێ مایە مورینھو ب فەرمی ھەڤبەستا خوە ئیمزابکەت ئەگەر ل سەر ھەمی خالان رێککەفتنی نە.
رۆژناما دەسەن یا برێتانی دیارکری یە بەردەوام پەیوەندی دناڤبەرا کارگێریا یانا مان یوناید و مورینھوی دا ھەنە و راھێنەرێ پرتوگالی داخوازی ژ کارگێریا یانا ئینگلیزی کری یە زیترین دەم ھەڤبەستێ ل گەل سێ یاریکەران ئیمزابکەن بۆ وەرزێ بھێت ئەوژی ھەر ئێک ژ یاریکەران ئیبراھیموڤیج گولکەرێ خولا فەرەنسا و یانا پاریس سان جێرمان و ریناتو سانشیز یاریکەرێ ھێلا ناڤین یانا بەنفیکا پرتوگالی و جون ستونز بەرەڤانێ یانا ئیفەرتون .
وێ رۆژنامێ دیارکری یە ژی مان یوناید دخوازیت سالا بھێت جارەکا دی ڤەگەریتە ھەڤرکیا ناسناڤێن ئوروپی و نافخوی و کوژمەکێ مەزن بۆ چەند ھەڤبەست نوو بەرھەڤکری نە لێ دبیت ئەڤ یاریکەرێن مورینھوی ژ یانێ داخوازکرین ب کوژمەکێ مەزن ل سەر یانێ نە راوست تایبەت ئیبراھیموڤیج ژبەرکو ھەڤبەستا وی ل گەل یانا وی ب دووماھی ھاتیە و ھەردیسان ھەردو یاریکەرێن دی دبیت ژ ٤٠ ملیون یورۆیا دەرباز نەبن.