ئەڤرۆ نیوز،زنار تۆڤی:
لدووڤ نڤیسارەکا وەزارەتا دارایی یا حوکمەتا ھەرێما کوردستانێ کو بدەست باس کەفتیە،روونکرنەک دەربارەی پاشکەفتنا مووچە و چەند بابەتێن گرنگ داینە،وەکو د وێ نڤیسارێدا ئاماژە پێ ھاتیەدان،سەرجەم مووچەیێ کو نەھاتیە دان ب فەرمانبەران ل سالا 2015 د تۆمارەکێ دا بناڤێ (امانات رواتب مستحقە) ھاتینە تۆمارکرن و دەمێ داھاتی ھەبیت،ئەو پارە دێ بۆ فەرمانبەران ھێتە مەزاختن.
وەزارەتا دارایی جەختکریە،ئەو رێژەیا ژ مووچێ فەرمانبەران دھێتە پاشئێخستن،ب فەرمی د تۆمارێن تایبەتدا ھاتینە تۆمارکرن،ئەرکە ل سەر وەزارەتا دارایی ئەو رێژەیا ھاتیە پاشخستن ل دەمێ ھەبوونا داھاتیێ پێدڤی بھێتە مەزاختن،حوکمەتا ھەرێما کوردستانێ مووچێ ھەیڤێن (9،10،11،12) یێن سالا 2015 یێن فەرمانبەران نەداینە،کو دگەھیتە زێدەتری 2 ترلیۆن دیناران.
د وێ نڤیسارێ دا رابەر سەدیق،بریکارێ وەزارەتا دارایی ئەو چەند روونکریە کو خشتەیێ پاشکەفتنا مووچەیان ب شێوێ ھەیڤانە چاڤخشاندن تێدا بھێتەکرن،ئەو ژی ل بەرچاڤ وەرگرتنا داھاتیێ ھەیڤانە،ب رەنگەکی کێمترین رێژا پاشکەفتنێ ل سەر وان فەرمانبەرێن مووچێ وان یێ کێم بھێتە جێبەجێ کرن.
ل رۆژا 3 شوواتا 2016 ئەنجۆمەنێ وەزیرێن ھەرێما کوردستانێ،بریار ل سەر پاشکەفتنا مووچێ فەرمانبەران دا،کو پاشکەفتن ژ 15% دەست پێ دکەت ھەتاکو 75%،ئەڤەژی د رێنمایێن وەزارەتا دارایی دا ھاتیە،کو دگەل میکانزما پاشکەفتنا مووچەی،چ جۆداھیێن مووچەی ناھێنە مەزاختن،ژبەر ھوکارێ کێمبوونا مووچەی،بوویە وەزارەتا دارایی ھەتاکو مووچە ئاسایی دبیت،لێبرینێن تایبەت ب قەر و پیشینەیان دگەل مووچەی جێبەجێ نەکەت.
بەری نوکە د نڤیسارەکێ دا کو باس بەلاڤکربوو،وەزارەتا دارایی وەکو قەر ل سەر حوکمەتێ مامەلە دگەل مووچێ نەدای یێ سالا 2015 کربوو،غازی سەعید ئەندامێ لیژنا بلند یا روو ب روو بوونا قەیرانا دارایی ل سەرۆکاتیا ئەنجۆمەنێ وەزیرێن کوردستانێ بۆ باس گۆتبوو،مووچێ نەدای و پاشکەفتنا مووچەی دێ وەکو قەری لدەف حوکمەتێ بیت،گۆت ژی:مووچێ نەدای یێ سالا 2015 و پارێ پاشئێخستی مافێ فەرمانبەرانە و تێناچیت،چونکی ب بریار مووچە ھاتیە پاشئێخستن و پاشکەفتنە دێ وەکو قەری لدەف حوکمەتێ مینیت و حوکمەت پابەندە ب دانا وان قەران و ھەر دەمێ دۆخێ دارایی ژی باشتربوو،ئەو قەر ژی دێ ھێنەدان بۆ فەرمانبەران.