ئەڤرۆ نيوز:
د قووناغا سنێلەیێ دا بەردەوام ھەستێن مرۆڤان دھێنە گھۆرین و ب شێوەیەکێ بەرچاڤ سەردابرنا ھەردو رەگەزان یا بەردەوام و بەربەلاڤە، ب تایبەتی کچ گەلەک یا نازکە و ب چەند ئاخفتنێن ھندەک گەنجان سەردا دچن، چونکی کچ ژ نیڤا دلێ خوە ب ھەستێن خوە ب کوڕی ڤە دھێتە گرێندان و ھزر دکەت کو دی شوو ب وی کوڕی کەت.
پەیمان بەرواری وەک کچەک ل دۆر بابەتی بۆ ئەڤرۆ دیار کر کو کچ خودان ھەستەکا نازک و ھەستیارە و گەلەک جاران روو دایە کچ ب ھندەک ئاخفتنێن جوان و خەملاندی سەرداچوویە و کەفتیە داڤێن ھندەک کوران و ھەر ژلایێ وی کوڕی ڤە گەف لێ ھاتینە کرن و گۆت “جڤاکێ مە یێ نھا گەلەکێ ھەستیارە و ئەگەر لڤینەکا بچووک ل سەر کچێ بھێـتە دیتن دێ ئەو کچ د ناڤا جڤاکی دا خاترا خوە ژ ھەر تشتی خوازیت و ئەڤە ژی ئەگەرێ وێ چەندێ یە کو ھێشتا تێگەھشتنا جڤاکێ مە بۆ ڤان جۆرە کاران د ئاستەکێ لاواز دایە، لێ ھەردەم فەرە کچ یا ھشیار و سەر خوە بیت، چونکی گەلە کوڕ ھەنە ھیڤی و ئومێدێن وان ب تنێ خاپاندنا کچایە، بێ کو بزانن وان ژی دایک و خووشک یێن ھەین”.
ئەیوب نسری وەک رۆژنامەڤانەک خویا کر کو نھا ب شێوەیەکێ بەرچاڤ سەردابرنا ھەردو رەگەزان یا بەردەوام و بەربەلاڤە ب تایبەتی د قووناغا سنێلەیێ دا، چونکی ئەو قووناغ دھێـتە ھژمارتن ژ نازکترین قووناغێن ژیانا مرۆڤی و گۆت “ئەم نەشێن بێژین کیژ رەگەز پتر کارێ سەردابرنێ دگەل رەگەزێ بەرامبەر ئەنجام ددەت، چونکی نھا د ناڤ جڤاکێ مە دا ئەڤ دیاردە یا بەربەلاڤە و دھێتە ئەنجامدان ژلایێ ھەردو رەگەزان ڤە، لێ ب شێوەکێ تایبەت قوربانیدانێن ڤێ دیاردێ کچن، چونکی باوەریێ ب ھندەک ھەست و سۆزان ددەن کو ژلایێ ھندەک کوڕان ڤە دھێنە دان کو وان سۆزان چ بھایێ خوە نینە”.
ئەیوب نسری خویا ژی کر کو ژ لایێ ھندەک گەنجان ڤە بۆ کچێ ھندەک ھەست و سۆز دھێنە دان کو وەھا بۆ کچێ دیار دکەت ئەو کچ ب تنێ دێ بیتە ھەڤژینا وی یا راستەقینە و بۆ کچێ ئاماژێ ب دەولەمەندیێ دکەت و دابینکرنا ژیانەکا خوەشگوزەران و پشتی کچ بەرەڤ ھەست و سۆزێن وان جۆرە کوڕان دچن و ب ساناھی ئەو کچ ژ وان ئاشوپ و خەیالان ب دووماھی ناھێن، چونکی پەیوەندیێن سۆزداریێ دروست دبن و جار جار ژی ئومێدێن کچێ گەش دبن بۆ وی کوڕی ئەوێ ھزر د خرابکرنا وێ دا کری، لەورا ھندەک کوڕ ب ڤان سۆزان کچان بۆ خوە رادکێشن و دبیتە سەدەما سەردابرنا کچان، لێ ب دووماھیا ئەنجامێن ڤێ سەرەدەریا نەدروست و سەردابرنێ کچ بەرەڤ گڤاشتنێن دەروونی ڤە دچیت و ھەست ب خشیمیا خوە دکەن کو یێن ھاتینە سەردابرن”.
ژلایێ خوە ڤە شیلان سەینی شارەزایا جڤاکی دیار دکەت کو گەلەک کوڕ ھەنە ژ پێخەمەت خاپاندنا کچەکێ ھندەک ھەستێن سەختە ل دۆر خوە دروست دکەت و وان ھەستان پێشکێشی کچێ دکەن و پشتی کچ دبن ھەستێن وی کوڕی ڤە لاواز دبیت دێ دەستپێکا یاریا وی کوڕی سەر ھەلدەت ئەو ژی ب خاپاندنا کچا ھەژار ئەوا ژنیڤا دلێ خوە ب ھەستێن سەختە یێن کوڕی ڤە ھاتیە گرێدان و ئەڤ خاپاندنە ژی چ ب رێیا تۆمارکرنا دەنگێ کچێ بیت یان ژی ب بەلاڤکرنا ھندەک وێنەیێن کچێ بیت، دا کو وێ کچێ د ناڤ جڤاکی دا بچووک و بێ رێز بکەت و گەلەک جاران روو دایە ھەر ژ بەر ھەمان ئەگەرێن وەک ڤێ روودانێ مالباتا کچێ کچ تاوانبار دانایە و کچا خوە کوشتیە.
ھەروەسا شارەزایا جڤاکی خویا ژی کر کو د قووناغا سنێلەیێ دا بەردەوام ھەستێن مرۆڤان دھێنە گھۆرین و د ھەمان قووناغێ دا ژبەر کو کچ گەلەک یا ھەستیارە و ب چەند ئاخفتنێن ھندەک گەنجان سەردا دچن و دھێنە خاپاندن، چونکی کچ د ڤێ قووناغێ دا بەردوام ھیڤیا وێ ئەوە جھێ گرنگیدانێ بیت ژلایێ کەسەکی ڤە و گومان تێدا نینە ئەگەر د رەوشەکا وەھا دا کەسەک بھێت خوە ل مرۆڤی بکەتە خودان دێ دلێ مرۆڤی بۆ ڤەبیت و مرۆڤ یێ ئامادەیە باوەریێ پێ بینیت، لێ مخابن د وان رەوشان دا ھندەک گەنج وەھانە و وەھا دکەن کو ھندەک کچ ببنە ئێخسیرێن دەستێن وان.

ئەڤرۆ نیوز:
دیاردەکا ھەری بەربەلاڤ د ناڤ خێزانێن مە دا گھۆرینا جلکان ژ ئالیێ دایک و بابان ھەمبەری زارۆیێن خوە، ب تایبەت دەیکا فەرمانبەر، ئەڤ دیاردە چ کارتێکرنێ ل دەروونێ زارۆیان دکەت ب تایبەتی یێ کوڕ؟ ڤەکولەرەکێ جڤاکی دبێژیت “چونکی دەمێ زارۆیێ بچووک تشتی تۆمار دکەت بەس نزانیت چی یە! دەمێ ژنکێ دبینت بێ جلک یان نیڤ رووت دھێتە وێنەکرن ل پێش چاڤێن وی و دبیت بۆ خەلکەکی بێژت من ھوسا دیت یان وەسف بکەت”.
عەبدولجەبار عەبدولرەحمان ڤەکولەرەکێ جڤاکی خویار کر ژی کو دڤێت ھەر ژ دەستپێکێ مرۆڤ زارۆکی فێر بکەت کو لەشێ وی ملکێ وی یە دڤێت کەس نەبینت، ژبلی دایک و بابێن وی و دایک دڤێت ل پێش چاڤێن ھەمیا خوە نەگھۆریت. ھەروەکی زانایێن دەروونی ژی دیار دکەن کو زارۆک ژ دو سالان کێمتر بیت یان ھەتا سێ سالان ھزرێن جنسی ل دەڤ نینن، بەلێ ئەگەر ژیێ وی ژ چار سالان بۆری ھزرێن جنسی ل دەڤ پەیدا دبن.
ڤەکولەرێ جڤاکی دیار کر ژی کو یا باش نینە دایک خوە بەرامبەر زارۆیێن خوە بگھۆریت، بەلکو بلا ب تنێ خوە بگھۆریت، داکو ئەڤ زارۆیە ئەو تشتێ دبینیت ل کولانێ بەحسێ وێ نەکەت بۆ زارۆکێن جیرانا، چ بەحسێ لەشێ وێ بکەت یان جلکێن ژ ناڤدا و گۆت “رەنگە کارتێکرنێ ل زارۆیی ب خوە بکەت نەمازە ئەوێن ژ پێنج سالان مەزنتر بن، چونکی د وی تەمەنی دا وەکی مەگۆتی تشتەکی ژ سکسی دزانیت”.
عەبدولجەبار عەبدولرەحمان ڤەکولەرەکێ جڤاکی مەترسیەکێ د ڤێ دیاردێ دا دبینت و خویا کر کو مەترسیەکا دی ھەیە، ئەو ژی رەنگە زارۆک پرسیار ژ دایکێ بکەت ل سەر ئەو تشتێ ئەو دبینت و پرسیارا ناڤا ژێ بکەت و دایک تۆرە ببیت و زارۆکێ خوە بقوتیت، ئەڤجا یا باش ئەوە زارۆ ژ ڤان حالەتان دوور بن، ژبەر ھندێ ئاینێ ئیسلامێ دبێژت زارۆکێ خوە فێر کەن دەمێ دھێتە ژوور دەرگەھی بقوتیت و ب تایبەت دەمێ سپێدی و پشتی نڤێژا عەیشا داکو دایک و بابێن خوە د رەوشەکا نە ئاسایی دا نەبینیت.