ئاكرێ ، بێوارحسێن :
لژنا بلندا چاڤدێریا پاراستنا ساخله‌میێ ل ئاكرێ (14) ته‌ن ژكه‌ل و په‌لێن ده‌م بسه‌رچویى (ئێكسپایه‌ر) یێن هشك وشل و ده‌رمان ژناڤبرن .
شهاب یاسین به‌رپرسێ بنگه‌هێ چاڤدێریا بازرگانى ل ئاكرێ بۆ ئه‌ڤرۆ نيوز گوت : ئه‌و كه‌ل وپه‌لێن ئیروهاتینه ژناڤبرن (14)ته‌ن بوون ژوان (12) ته‌ن ژكه‌ل وپه‌لێن جودا یێن خوارنێ وڤه‌خارنێ و جوانكاریان بوون و(2)ته‌ن ده‌رمان بوون.
ل ده‌ستپێكا سالا 2016ێ و تانها (29) ته‌نێن كه‌ل وپه‌لێن ده‌م بسه‌رچویى هاتینه ژناڤبرن، ژوان (6) ته‌ن و(100)كیلوگرام ده‌رمان بوون .
ئه‌ڤرۆ نيوز:
پشتی UN سەرەدانا ھندەک قوتابخانا ل دھۆکێ کری، کۆژمەکێ پارەی بۆ وان قوتابخانا مەزاخت، ب تایبەت بۆ وان قوتابخانێن کێماسی تێدا، دا کو ئەڤ کێماسیە بھێنە چارەکرن، لێ ب دیتنا رێڤەبەرەکێ، ئەڤ پارێ ھاتیە مەزاختن گەندەلی تێدا ھاتیەکرن و ئەو پارێ بۆ ھاتیە دانان ل ھەمبەر وان تشتێن ھاتیە چێکرن زۆر ژێک دوورن و جھێ گومانێ یە.
ھەیام حاجی ئەحمەد، رێڤەبەرا قوتابخانەکێ یە دبێژیت: پشتی سەرەدانا رێکخراوا UN بۆ ھندەک قوتابخانان ژ بۆ ھاریکاریا ھندەک ژ وان قوتابخانێن زور دلاواز, بریار ھاتە دان کۆژمەکێ پارەی بۆ وان قوتابخانان بھێتە مەزاختن ل دووڤ وان کێماسیێن د ناف قوتابخانێ دا، کو بەری ئەو پارە بھێتە مەزاختن ب رێیا پەروەردێ بھێتە بەلاڤکرن و کومبونەک ب وان رێڤەبەران ھاتە کرن یێن پارە وەرگرتین و چێکرنا لیژنەکا ھەڤپشک بۆ وان قوتابخانێن دو دەواما تێدا دکەن، دا کوئەڤ پارە ب شێوەکێ یەکسانی ل دووڤ پێدڤیێن قوتابخانێ بھێتە مەزاختن.
ناڤبریێ گۆت ژی: ئەم ژی ل وێرێ ئامادەبووین، ھندەک رێڤەبەرا پارە وەرگرتن کو نێزیکی 4000 دولاران بوون، بەلێ یا پێدڤی بوو ئەو قوتابخانێن دو دەوام پێکڤە ڤی پارەی ب مەزێخن، چونکو ئیمزا ھەردو رێڤەبەرا ل سەر پسۆلان بوو, لێ بۆمە گومان چێبوو دەمێ پسولەکا سادە کو چو کوژمێن پارا ل سەر نەبوون، پشتی ھینکی مە بریار دا دووڤچونەکا رژد ل سەر پسۆلان بکەین و ھەموو پسۆلە گەھشتبوونە پەروەردا رۆژئاڤا بێ ئاگەھداریا مە پشتی داخاز ژ وان پسۆلان کری ژ بەشێ دارایی بۆ مە دیاربوو کو سەختە یا د پسۆلان دا ھاتیەکرن.
ھەیام ئاماژە ب وێ یەکێ کر، کوژمەکێ خەیالی ھاتیە نڤێسین بۆ وان پێداویستیا د ناڤ قوتابخانێ دا، لێ د راستی دا ئەو پێداویستێن ھاتینە چێکرن ل ھەمبەر ڤی پارەی جھێ گومانێ یە، ئەڤە خیانەتە ل ھەمبەر مللەتی و دڤێت ئەڤ کەسێن ب ڤان کاران رادبن بھێنە سزادان، چونکو ئەڤە مولکێ گشتی یە نەک یێ کەسەکی یە و گۆت: من ھەموو بەلگە ل بەردەست ھەنە و ئیمزا ژی ھاتینە گوھارتن ژلایێ دەواما دی و من ئەڤ داخواز ژ پەروەردا رۆژئاڤا و ژ رێکخراوێ ژی کریە دووڤچوونێ ل سەر وی پارەی بکەن، لێ ھێشتا بەرسڤ نەداینە.
ئەڤرۆ نیوز:
پشتی بڕینا کارەبا دەڤەرا پێنجوێن ژلایێ ئیرانێ ڤە ژ ئەگەرێ ھەبوونا قەرەکێ مەزن، پەیڤدارێ وەزارەتا کارەبێ ل ھەرێما کوردستانێ ڕاگەھاند، ئێدی کارەبێ ژ ئیرانێ ناکڕین و ژ تۆرا نیشتمانی دێ کارەبا وێ دەڤەرێ ھێتە دابینکرن.
محەمەد ئەمین ھەورامانی، پەیڤدارێ وەزارەتا کارەبێ ل ھەرێما کوردستانێ، ل دووڤ رووداو، ڕاگەھاند” ژئەگەرێ ھەبوونا قەرەکێ مەزن ژکڕێنا کارەبێ ژ ئیرانێ کو دبیتە نێزیکی 30 ملیۆن دۆلاران، ڕۆژا 4 ڤێ مەھێ ئیرانێ کارەبا پێنجوێنی بڕی، مەژی بڕیار دا ئێدی کارەبێ ژ ئیرانێ نەکڕین و ژ تۆرا نیشتمانی کارەبا پێنجوێنێ دابین بکەین”.
پەیڤدارێ وەزارەتا کارەبێ خویاکر ژی” نوکە تیمێن مە یێ کاردکەن بۆ گرێددانا کارەبا پێنجوێنێ ب تورا نیشتمانی ڤە و دچەند ڕۆژێن داھاتی دا دێ کار ب دووماھی ھێت و ئێدی مە پێدڤی ب کارەبا ئیرانێ نابیت”.
دەمێ 9 سالانە کارەبا دەڤەرا پێنجوێنێ کو سەر ب پارێزگەھا سلێمانیێ ڤەیە، ژلایێ ئیرانێ ڤە ب شێوێ 24 دەمژمێرێ دھاتە دابینکرن، بەلێ ھەر ژ وی دەمی و ھەتا نوکە چو پارەک ب ئیرانێ نەھاتیە دان و نوکە ژی حوکمەتا ھەرێما کوردستانێ ب گۆژمێ 27 ملیۆن دۆلاران قەردارا ئیرانێ یە.
پێشتر حوکمەتا ھەرێما کوردستانێ 13 مێگاواتێن کارەبێ ژ ئیرانێ دکڕین و کارەبا پێنجوێنێ پێ دابین دکر، نێزیکی سالەکێ یە ژی کڕینا 150 مێگاواتێن کارەبێ ژ تورکیا یا ھاتیە ڕاگرتن کو بەری نوکە کارەبا پشکەک ژ پارێزگەھا دھۆکێ دابین دکر،بەرھەمئینانا کارەبا نیشتمانی دنوکە دا 2650 مێگاواتە، ئەڤە ددەمەکی دا پێدڤیا کارەبێ دڤی وەرزی دا 3500 مێگاواتە.
ئەڤرۆ نیوز:
وەسا دھێتە پێشبینی کرن ستێرا پرتوگالی و یاریکەرێ یانا ریال مەدرید یا ئیسپانی ل ھاڤینا بھێت دێ پێکھاتیێ یانا ریال مەدرید ب جھـ ھێلیت و راپورتێن رۆژنامەڤانی ل ئیسپانیا وەسا دایە دیارکرن یانا مەلەکی دخوازیت بەری ب دووماھی ھاتنا ھەڤبەستا کریستیانوی ئەوا بریاری ٢٠١٨ ب دووماھی بھێت ب ھەڤبەستەکا باشتر ب فروشنە یانەکا دی داکو یانەکا یا مفاداربیت بەری ب دووماھی ھاتنا ھەڤبەستا وی.
ئاژانسا سکای سپورتس یا برێتانی دیارکری یە ھەتارادەیەکێ مەزن ریال مەدرید ھزر ل فروتنا ستێرا خوە یا پرتوگالی کری یە ژبەرکو داخوازیت بەری ب دووماھی ھاتنا ھەڤبەستا وی ئەو بشێن ب فروشن و کوژمەکێ پارەی ژ ھەڤبەستا وی مفابکەن داکو ل جھێ وی ستێرەکا دی بکرن کو فروتنا رونالدوی ب رازیبوونا ھەردو لاینەیە ھەتارادەیەکێ مەزن ھەردو لایەن گەھشتی نە رێککەفتنێ ل سەر ڤێ بریارێ.
وێ ئاژانسا برێتانی ئاماژە ب وێ چەندێ ژی کری یە ھەر ئێک ژ یانێن پاریس سان جێرمان و مانچستەر یوناید کوژمەکێ مەزن ب کرینا کریستیانو رونالدوی دایە و تایبەت یانا فەرەنسی یا ھەمی شیانێن خوە تەرخان کەت ژ بوو ب دەستڤە ئینانا رونالدوی تایبەت پشتی یاریکەرێ وێ ئیبراھیموڤیج بریارە ب جھـ ھێلانا وێ یانێ دای.
ھەردیسان ئاماژە ب وێ چەندێ ژی ھاتیەکرن یانا مانچستەر جەنسەکێ باشترە ھەی ژبەرکو رونالدوی حەزا ڤەگەراندنا یانا خوە مانچستەر یوناید ھەیە لێ ب مەرجەکی ئەوژی ھەکە ھەڤبەستا مانچستەر یوناید یا نێزیکی ھەڤبەستا ھەڤرکا وێ پاریس سان جێرمان بیت .
ئەڤرۆ نیوز:
یاریکەرێ ھێلا بەرەڤانیێ یێ یانا ئەتلەتیکو مەدرید فلیپی لویس پشتی یاریا ئەوان یا شڤێدی ل گەل یانا بەرشلۆنا ب دووماھی ھاتی ب سەرکەفتنا یانا کەتەلونی داخویانیەکا دژوار یاریکەرێ ھێلا بەرەڤانیا ئەتلەتیکو مەدرید دژی دادڤانێن یاریێ و یانا بەرشەلۆنا دا.
لویس دیارکر دادڤانێ یاریێ ھاریکاریا یانا بەرشەلۆنا کر ھەتا ئەو شیان سەرکەفتنێ ل سەر ئەوان توماربکەن ھەکە دادڤانێ یاریێ ھاریکاریا بەرشەلۆنا نەکربا دا ئەوان گوتنەکا دی ھەبیت بۆ ڤێ یاریێ لێ کارتا سور یا تورێس نەی دروست بوو دادڤان د وێ بریارا خوە دا نەیێ سەرکەفتی بۆ ئەو چەندە ژی بۆ باشیا بەرشلۆنا ڤەدگەریا و دورخستنا تورێس دبینت زولمەکا مەزن ل ئەوان ھاتەکرن.
ھەردیسان دیارکر ژی ئەرکێ ئەوان ل یاریا بھێت ژی یا ب سانەھی نابیت ژبەرکو ئەو یێ یاریێ بەرامبەر ئێک ژ باشترین یانێن جیھانێ کەن لێ دەلیڤەیا ئەوان ژی بۆ دەربازبوونێ ھێشتا مایە.
ھەژی گوتنێ یە یاری د بەرژوەندیا بەرشەلۆنا دا ب دووماھی ھاتبوو ب دو گولان بەرامبەر گولەکێ و ل نیڤا ئێکێ دادڤانێ یاریێ ھێرشبەرێ ئەتلەتیکو مدرید فرنادو تورێس ب کارتا سور دورخست بۆ ژ یاریێ پشتی وەرگرتنا کارتا دوێ یا زەر.
ئەڤرۆ نیوز:
ھەرچەندە نوکە ب بڕیارا حوکمەتێ مووچێن پلە بلند پاشکەفتیا 75% تێدا دھێتە کرن، بەلێ لژنا دارایی یا پەرلەمانێ کوردستانێ د کۆۆمبوونێن بەردەوام دایە ژبۆ وێ چەندێ بڕیارا پاشکەفتیا مووچان ل سەر پلێن نزم بھێتە لادان و مووچێن پلە بلند ب بەردەوامی بھێنە کێمکرن.
فەرسەت سۆفی ئەندامێ لژنا دارایی ل پەرلەمانێ کوردستانێ ژ فراکسیۆنا پارتی دیموکراتی کوردستان، ل دووڤ باس، دبێژیت” ئێدی مووچێن پلەبلند وەکو بەرێ نازڤرن و پێدڤیە ئێدی خەلکێ کوردستانێ ھەست ب وێ چەندێ نەکەن کو چینەک ل کوردستانێ یا ھەی گەلەک ل سەر واندایە”.
ژلایێ خوەڤە عزەت سابر سەرۆکێ لژنا دارایی ل پەرلەمانێ کوردستانێ دبێژیت” ب ئەوێن دخانەنشینکری و یێن ددەوامێ دا، نێزیکی دو ھزار فەرمانبەرێن پلەبلند یێن ل کوردستانێ ھەین کو پلێن وان دسەر ڕێڤەبەرێ گشتی یە و ھەیڤانە ژی ل سەر شەش ملیۆن دیناران وەردگرن و ئەم ل لژنا دارایی یا پەرلەمانی دبزاڤێن بەردەوام داینە ھەتاکو بشێین ل دووڤ قانوونێ، مووچێن بلند پلند ڕێک بێخین”.
ڕاگەھاند ژی” حوکمەتا ھەرێمێ ب ڕێیا کێمکرنا قانوونا مووچێن پلە بلند و چەند کارێن دی، دشیا دەست بەرداری پاشکەفتیا فەرمانبەرێن پلە نزم ببیت” گۆت ژی” ب ڕێیا نەھێلانا دوو مووچەییێ و بندیواران و کێمکرنا مووچێن پلە بلند، حوکمەتێ دشیا ھەیڤانە گۆژمێ 100 ھەتا 110 ملیۆن دۆلاران ڤەگەرینیت کو ب وێ چەندێ دشیا مووچێ پێشمەرگەی زێدەبکەت و پابەندی بڕیارا ھژمار (19) یا پەرلەمانێ کوردستانێ ببیت کو ژلایێ سەرۆکێ ھەرێما کوردستانێ ژی ڤە ھاتیە ئیمزاکرن، ھەموو ئەو ژی مە یێن د پرۆژە قانوونەکێ دا کۆمکرین و ھنارتینە سەرۆکاتیا پەرلەمانێ کوردستانێ”.
دیارکر ژی” کێشا خودان پلێن بلند تنێ مووچێ وان یێن گەلەک نینە، بەلکو ھندەک ئیمتیازێن دی ژی یێن ھەین و زێرەڤانێن وان ژی گەلەکن، بەرپرس یێ ھەی 184 زێرەڤان یێن ھەین، کو ب سەر مال و زەڤی و ئاڤاھیێن خوە یێن بەلاڤکرین، ددەمەکی دا جھێ ڕاستەقینەیێ وان پاراستنا ئاخا کوردستانێ و خەلکێ کوردستانێ یە”.
دلشاد شەعبان جێگرێ سەرۆکێ لژنا دارایی ل پەرلەمانێ کوردستانێ ڕاگەھاند، ب ڕێیا چاکسازیێ و قانوونێ دخوازن ھەیڤانە 250 ملیار دینار بۆ حوکمەتێ ڤەگەرینن کو سالانە دبیتە سێ ترلیۆن دینار.
گۆت ژی” دشیاندایە وی پارەی ب ڕێیا کێمکرنا مەزاختیێن نە پێدڤی ژ دامودەزگەھێن حوکمەتێ و کێمکرنا مووچێن پلەبلند و ئەنجامدانا چاکسازیێ بۆ حوکمەتێ بھێتە ڤەگەراندن”.
پێشتر و ب بڕیارا ھژمار 315، وەزارەتا دارایی و ئابووری ل ھەرێما کوردستانێ، مەزاختیێن کریا کارەبێ و کریا موەلیدان و خزمەتگوزاریێن خودان پلێن تایبەت بڕی بوون.
ئه‌ڤرۆ نيوز:
بەرپەرسێ راگەھاندنا پۆلێسین قەزا زاخۆ بۆ رۆژناما ئەڤرۆ دیار کر کو ل رێکەفتی 4-4-2016 ل نێزیک دەمژمێر پێنج و نیڤی ئێڤاری ل سەر کێشەکا زەڤیان وەلاتیەک ھاتە کوشتن.
نەھشەت سەلمان بەرپەرسێ راگەھاندنا پۆلیسێن قەزا زاخۆ بۆ رۆژناما ئەڤرۆ خویا کر کو کێشەیەک ل سەر ھندەک زەڤیا د ناڤبەرا دو کەسان دا روو دا و ل سەر پرا گوندێ دوکەرێ وەلاتیەک ھاتە کوشتن.
بەرپەرسێ راگەھاندنا پۆلیسێن قەزا زاخۆ ئاشکرا ژی کر کو ئەو کەس ب ناڤێ (ن.س.خ) ل گوندێ دوکەرێ ب ھندەک گولێن کلاشێنکوفێ ھاتیە گوشتن و گۆت “تاوانبار (ج.ع.ع) خوە رادەستی جھێن ئەمنی و پۆلیسان نەکریە و د ھەمان دەم دا دوو کورێن تاونباری ل جھێ روودانێ ھاتینە دەستەسەکرن و دادوەرێ ڤەکۆلینێ ل زاخۆ بریار دا تاوانبار بھێتە گرتن ل دووڤ بەندێ 406 یاسا و ڤەکۆلین بەردەوامە ل بنگەھێ پۆلیسێن باتیفا”.
ئەڤرۆ نیوز:
سەرپەرشتیاری لیژنا کێمکرنا بھایان ل پارێزگەھا دھۆکێ بۆ ئەڤرۆ دیار کر کو خەلک نەیێ ھەڤکارە دگەل مە بۆ بجھئینانا کێمکرنا بھایان، چونکو ھەکە وەلاتیەکێ دیت نوشدارەکێ بھایی خوە کێم نەکریە پێدڤیە ئەو وەلاتی سەرا سەندیکا نوشداران بدەت، یان ھەکە کرێچیەکی دیت بھایێ خانی نەھێتە کێمکرن پێدڤیە ئەو کرێچی قەستا رێڤەبەریا باجا ئاڤاھیان بکەت داکو پێرابوون دگەل بھێنە وەرگرتن، وارێ خوارنێ ژێ پێدڤیە وەلاتی قەستا چاڤدێریا بازرگانی بکەن دەمێ دبینن دوکاندارەکی بھایێ خوە کێم نەکریە.
بەھزاد عەلی ئادەم جێگری پارێزگارێ دھۆکێ و سەرپەرشتیارێ لیژنا کێمکرنا بھا ل پارێزگەھا دھۆکێ گۆت “رۆژانە دووڤچوون ل سەر ھەر پێنچ بیاڤێن بھا بۆ ھاتیە دەست نیشانکرن یێ دھێتە کرن، ئەو ژی بیاڤی ساخلەمیێ و خوارنێ و کریا خانیان و ھاتنوچوونێ یێ دیتر ل ڤێری چەند لیژنە یێن ھاتینە دانان بۆ دووڤچوونێ و دانانا میکانزمێ بۆ نموونە د وارێ ساخلەمیێ دا ژلایی ساخلەمیێ و سەندیکا نوشداران و سەندیکا ددانان و دەرمانسازان کار دھێتە کرن کا چەوا دووڤچوون ل سەر بھا بھێتە کرن و ئەو کەسێن نەپیگیر دێ ھێنە سزادان یان ھوشداریکرن ھەکە بھا خوە کێم نەکەن”.
جێگری پارێزگارێ دھۆکێ ئەو ژی دیار کرکو ھەتا نوکە چ گازندە ل سەر نە بجھئینانا کێمکرنا بھایان نەگەھشتینە وان، ل دەمەکی پێدڤیە وەلاتی گازندێن خوە بگەھینە لایەنێن پەیوەندیدار داکو دووڤچوون ل سەر بھێتە کرن و پێرابوون بھێنە وەرگرتن و ئەڤرۆ 5/4 دێ ناڤێن لیژنا ھێنە بەلاڤکرن بۆ ھندێ ھەر وەلاتیەکێ گازندە ھەبیت بگەھینتە لیژنێ و گۆت “ھەتا نوکە چ نوشدار سەرا کێمکرنا بھایان نەھاتینە سزادان و گەلەک نوشداران بھایێن خوە کێم کرینە، لێ ھندەک ھێشتا پێگیری پێ نەکریە و دڤیت وەلاتی ھەڤکاربن دگەل لیژنا کێمکرنا بھایان بۆ ھندی کونترۆل ل سەر بھایان بھێتە کرن”.
ئەڤرۆ نیوز:
دبەیاننامەکا ڕۆژنامەڤانی دا، د.بێریڤان خەیلانی ئەنداما جڤاتا نوونەرێن عیراقێ ھوشداری دایە حەیدەر عەبادی سەرۆک وەزیرێن عیراقێ سەبارەت کودەتایا ل سەر ھەڤپشکیا دستووری و مافێن مللەتێ کورد ب بھانەیا ھەلبژارتنا حوکمەتا تەکنوقرات دۆر ژ حەزا مللەتێ کورد و فراکسیۆنێن کوردستانی، ھەڤدەم حێبەتیا خوە یا مەزن دیارکر ژ ڕێیا ب ڕێڤەبرنا چاکسازیان د چارچۆڤێ ھەلوەشاندنا ئەنجامێن ھەلبژارتنان و پێکئینانا حکومەتێ دۆر ژ ھەلبژارتنێن مللەتێ عیراقێ و ئەندامێن جڤاتا نوونەران، ل شوونا دەستەسەرکرنا نەھنگێن گەندەلیێ و سزادانا گەندلکاران و ڕادەستکرنا وان بۆ دادگەھێ و ڤەگەراندنا سەروەت و سامانێ گشتی ئەوێ ھاتیە ڕەڤاندن بۆ دەرڤەی وەلاتی.
بێریڤان خەیلانی دھوشداریا خوەدا گۆت” کودەتایا ل سەر ھەڤپشکیا دستووری و مافێن مللەتێن کورد ب بھانەیا پێکئینانا حوکمەتەکا تەکنوقرات دۆر ژ حەزا مللەتێ کورد و فراکسیۆنێن کوردستانی کارەکی مەترسیدارە” خەیلانی ھەروەسا ئاماژەدا” درووشمێ چاکسازیێ یێ بوویە شیرەک ددەستێن بەغدا دا بۆ پتر پشتگوھخستن و پەراوێزکرنا مافێن کوردان و نەھێلانا دووماھی خالێن پەیوەندیان و ھەڤپشکیێ د ناڤبەرا بەغدا و ھەرێما کوردستانێ دا” . دیسا ھوشداری دا کو لادانا وەزیرێن کوردان بێی وەرگرتنا بۆچوونا کوردان دێ دووماھیێ ب ھەڤپشکیا ئێکگرتنا نیشتمیانی ئینیت.
بێریڤان خەیلانی دیارکر، کورد وەکو پێکھاتەکێ رەسەن و سەرەکی یە ددستوورێ عیراقێ دا ھاتیە پەسەندکرن، ھەتا نوکە ژی یاریکەرەکی سەرەکی یە د پێکئینانا ھەر حکومەتەکێ دا کو دەنگدان ل سەر بھێتە کرن دجڤاتا نوونەرێن عیراقێ دا.
ناڤبریێ پرسیارەک ئاراستەی عبادی کر و گۆت” ئەرێ پشتگوھخستنا پێکھاتێ کوردان و دەست ب سەرداگرتنا دەنگ و پۆستێن مللەتێ کورد کو نەتەوا دویێ یە ل عیراقێ دبیتە چاکسازیا سیاسی یان ژی پتر پەراوێزکرن و پشتگوھخستن و لادانە مافێن وانە ؟.
ھەر دبەردەوامیا پرسیارا خودا دبێژیت” ئەرێ سەرۆک وەزیران تو دێ گوھۆڕینێ ل سەر خوە قەبوول کەی و پۆستێ خوە بجە ھێلێ ل گەل وەزیرێن کوردان ژ بۆ ھەلبژارتنا حوکمەتەکا تەکنوقرات یا بێ لایەن؟ “.
ڤێ ئەنداما کورد دجڤاتا نوونەرێن عیراقێ دا، حێبەتیا خوە دیارکر ب ڤی ڕەنگێ چاکسازیان و پەنابرنا ل بەر ھەلوەشاندنا ئەنجامێن ھەلبژارتنان بیێ وەرگرتنا بۆچوونا مللەتێن عیراقێ و ھەتا جڤاتا نوونەرێن عیراقێ ژی.
ل دووماھیێ ھوشداری دانە عەبادی کو پێکھاتێ کوردان دێ ڕەنگڤەدان و ھەلویستێن ب ھێز ھەبن دژی ڤی کاری، دووپاتکر ژی کو پشتگوھخستنا کوردان دێ ڕەنگڤەدانێن نەرێنی بۆ ھەبن ل سەر ئێکگرتنا عیراقێ و پرۆسا سیاسی ل عیراقێ و پێگەھێ عیراقێ ل ڕۆژھەلاتا ناڤین و جڤاکێ نێڤدەولەتی و نەتەوەیێن ئێکگرتی دا ھەبن.
نيشاندان