ئه‌ڤرۆ نيوز:
سه‌فين دزه‌يى په‌يڤدارێ حوكمه‌تا هه‌رێما كوردستانێ راگه‌هاند ب هه‌لكه‌فتا ئازادكرنا عيراقێ و سه‌رسالا ئێزديان كو دبێژنێ جه‌ژنا سور، ل سه‌رجه‌م دام و ده‌زگه‌هێن هه‌رێمێ دو رۆژ بهێنڤه‌دانن.
سه‌فين دزه‌يى په‌يڤدارێ حوكمه‌تا هه‌رێما كوردستانێ راگه‌هاند رۆژا 9 ڤێ هه‌يڤێ ب ب هه‌لكه‌فتا ئازادكرنا عيراقێ و رۆژا 20 ڤێ هه‌يڤێ ب هه‌لكه‌فتا سه‌رسالا ئێزديان كو دبێژنێ جه‌ژنا سور ل هه‌موو دام و ده‌زگايێن حكومى بهێنڤه‌دانن.
ئه‌ڤرۆ نیوز:
هه‌ردو مه‌كته‌بێن سیاسیێن پارتى دیموكراتى كوردستان و ئێكه‌تیا نیشتمانیا كوردستانێ، ئه‌ڤرۆ ل هه‌ولێرێ كومبوون و ل سه‌ر پێنج خالان كۆمبوون ب دووماهى هات.
ل دووڤ راگه‌هاندنه‌كا هه‌ڤپشك یا هه‌ردو مه‌كته‌بێن سیاسیێن پارتى و ئێكه‌تیێ، كومبوون ب مه‌ره‌ما شروڤه‌كرنا ره‌وشا سیاسى و ره‌وشا حكومه‌تا عیراقێ هاتبوو ئه‌نجامدان ب تایبه‌ت ئه‌و گوهۆرینێن عه‌بادى ب ژڤانه بكه‌ت.
ل دووڤ راگه‌هاندنه‌كا هه‌ڤپشكا هه‌ردو مه‌كته‌بێن سیاسی، هه‌ر دو ئالى د وێ باوه‌رێ دانه كو ئه‌و گوهۆرینێن عه‌بادى دكه‌ت هه‌موو كێشان چاره‌ناكه‌ت و دڤێت ئه‌و یه‌ك دیار ببیت كانێ پره‌نسیپا شه‌راكه‌تا گه‌لێ كوردستانێ د پێكئینانا ده‌وله‌تا فیدرالى دا مایه یان نه، كو ب باوه‌را پارتى و ئێكه‌تى، زور لایه‌نێن شه‌راكه‌تا وێ رێككه‌فتنێ ب دووماهى هاتیه.
پارتى و ئێكه‌تیێ ئاماژه ب وێ یه‌كێ كریه كو هه‌ر گوهۆرینه‌كا ل دام و ده‌زگه‌هێن عیراقێ بهێته كرن، دڤێت پشكا كوردان یا پاراستى بیت و سه‌ركردایه‌تیا سیاسى یا كوردستانێ دێ نوونه‌رێن خوه بۆ ڤێ مه‌ره‌مێ ده‌ستنیشان كه‌ن كو پشكا هه‌موو حزبێن كوردستانى دێ یا پاراستى بیت و دێ شانده‌كێ بلندێ كوردستانێ ب مه‌ره‌ما دانوستاندنان ل سه‌ر هه‌موو كیشان چیته به‌غدا.
ئەڤرۆ نیوز،زنار تۆڤی:
جارەکادی بۆ ماوێ پتر ژ سێ دەمژمێران تۆپخانەیا سۆپایێ تورکی چەندین جه ل دەڤەرا بەرواری بالا بوردۆمانکرن. ئەڤرۆ رۆژا دوشەمبی 4.4.2016 جارەکادی تۆپخانەیا سۆپایێ تورکی دەرارێ و نزدورێ و ملا رەدێ و هەروەسا چەندین جهێن نێزیکی گوندێ دێشێشێ و ئۆرە و سەرەر و هەروەسا چەندین جهێن نێزیکی رووبارێ زێ ژی ب دژواری بۆ ماوێ پتری سێ دەمژمێران بوردۆمانکرن و جارەکادی ڤێ تۆپبارانێ ترس ل دەف وەلاتیان پەیداکر.
هه‌ولێر، قائید میرۆ
ل تاخه‌كێ قه‌زا كه‌لار یا ده‌ڤه‌را گه‌رمیان مامۆستایه‌ك ژلایێ هژماره‌ك كه‌سێن نه‌نیاس هاته‌كوشتن، پۆلیس ژی رادگه‌هینن چو كه‌س لسه‌ر روویدانێ نه‌هاتینه گرتن.
رائید عه‌لی جه‌مال، په‌یڤدارێ پۆلیسێن گه‌رمیان ب ئه‌ڤرۆ نیۆز راگه‌هاند” دوهى هژماره‌ك چه‌كدارا ته‌قه ل مامۆستایه‌كی كربوو، پشتی برینداربوونێ مامۆستا بۆچاره‌سه‌ریێ هاتبوو ڤه‌گوهاستن بۆ نه‌خۆشخانه‌یێن باژێڕێ سلێمانیێ، به‌لێ سپێده‌هیا ئه‌ڤرۆ ب ئه‌گه‌رێ گرانیا برینا خوه گیانێ خوه ژده‌ستدا.
رائید عه‌لی گۆتژی” ڤه‌كۆلین دبه‌رده‌وامن لسه‌ر چاوانیا كوشتنا مامۆستای ، به‌لێ چو كه‌س نه‌هاتینه‌گرتن و به‌ری چه‌ند هه‌یڤان ژی تیزاب ب ترۆمبیلا ئه‌ڤی مامۆستای هاتبووكرن.
ئەڤرۆ نیوز:
تیما تەپا پێ یا زاخۆ دناڤ ئەرد و جەماوەرێ خوە دا نەشیا سەرکەفتنێ ل سەر یانا پێشمەرگا ھەولێر توماربکەت پشتی ئەڤرۆ ل یاریگەھا خوە یا نیڤدەولی توشی خوسارەتیێ بووی ب گولەکێ بێ بەرامبەر ژ چارچوڤێ یاریێن گەرا سیێ ژ یاریێن چار گوشا زێرینا فاستلینکا کوردستانێ .
دڤێ یاریێ دا ل دەستپێکا یاریێ ھەردو تیمان ھێرشبرنە سەر گولێن ئێک و راھێنەرێ یانا زاخۆ د یاریا ئەڤرۆ دا چەند گوھورین ل پێکھاتیێ تیما خوە کر بوون لێ ئەو گوھورینت د پێکھاتیێ خوە دا کرین چو گوھورین ل ئاستێ تیمێ نە کر تایبەت ل ھێلا نافين و نیڤا ئێکێ ب گولەکێ بێ بەرامبەر ب دووماھی ھات بو پێشمەرگا ل نیڤا دوێ دا تيما زاخۆ باشتر هاته دناڤ یاریێ دا لێ هێلا به‌ره‌ڤانیا پێشمه‌رگه به‌رامبه‌ر هه‌می هێرشێن هێرشبه‌رێن زاخۆ راوستان، و ب ڤێ ئەنجامی تیما پێشمەرگا خالێن خوە گەھاندنە حەفت خالان و بەردەوامی دا ھەڤرکیا ناسناڤێ خولا کوردستانێ بوو وەرزێ ئەڤ سالە و ب شەش خالان زێرین ژ پارێزگەھا دھۆکێ ڤەگەریا پایتەختێ کوردستانێ پشتی ل رۆژا ھەینیا بوری شیای سەرکەفتنەکا گرنگ ل سەر یانا دھۆک ل یاریگەھا دھۆکێ توماربکەت ب گولەکێ بێ بەرامبەر .
ئەڤرۆ نیوز:
یاریا کلاسیکو یا دووماھیێ کو تێدا بەرشەلۆنا ل گەل ھەڤرکا خوە یانا ریال مەدرید توشی خوسارەتیێ بووی ژ چارچوڤێ یاریێن لیگا ئیسپانیا دا ئاریشە گەرمتر لێکرن دناڤبەرا راھێنەرێ یانێ لویس ئەنریکی و ستێرا وێ یا ئەرژەنتینی لیونێل مێسی .
مالپەرێ دون بالون یێ ئیسپانی دیارکری یە مێسی چاڤەرێ راھێنەرێ خوە ئەنریکی بوو وی وەکو ھێرشبەرەکێ ئازاد ل پێکھاتیێ یاریا کلاسیکو بدانیت داکو پتر دەلیڤەیا تومارکرنا گولان ھەبیت و ب ئازادیانە دناڤا یاریگەھێ دا سەرەدەریێ بکەت لێ لویس ئەنریکی ئەو چەندە نەکر ئەوا راھێنەرێ بەرێ یێ بەرشەلۆنا گواردیولا ل گەل مێسی کر ب کو د یاریێن کلاسیکو دا مێسی وەکو یاریکەرەکێ ئازادەنە ل ھێلا ھێرشبەریێ دانە .
ھەردیسان ھاتیە دیارکرن ژی ئەڤ چەندە بوویە جھێ نە ئارامیا مێسی ژبەرکو ئەو ھەردەم دخوازیت یاریا کلاسیکو وەکو یاریکەرەکێ ئازاد بیت کو دبیت ئەڤ چەندە بیتە ئەگەرێ پەیدابوونا ئاریشا دناڤبەرا مێسی و لویس ئەنریکی دا .
ھەژی گوتنێ یە مێسی بەری یاریا کلاسیکو دیارکر بوو ئەو دخوازیت گولا وی یا ژمارە ٥٠٠ د مێژویا وی یا تەپا پێ دا ل سەر یانا ریال مەدرید بیت لێ ئەو نەشیا وی خوزیا خوە ب جھـ بینت و ھەتا رادەیەکێ مەزن تورە بوونا وی پتر بۆ وێ چەندێ ڤەدگەریت.
ئه‌ڤرۆ نیوز:
جه‌مال كوچه‌ر جێگرێ سه‌رۆكێ فراكسیۆنا ئێكگرتوو ئیسلامى كوردستان ل جڤاتا نوونه‌رێن عیراقێ، دیاركر كو كوردان كاخه‌زێن گڤاشتنێ ل سه‌ر عه‌بادى یێن هه‌ین وبۆ ڕۆژناما ئه‌ڤرۆ گۆت” كورد د جڤاتا نوونه‌رێن عیراقێ دا ب هێزن و 20% كورسیێن وێ یێن هه‌ین، پێگه‌هێ له‌شكرى مه كوردان یێ هه‌ی و سنوره‌كێ درێژ د ده‌ستێ مه‌دایه ل شه‌ڕێ دژی داعشێ، دیسا كوردان پێگه‌هه‌كێ سیاسى یێ هه‌ی و كوردان پێگه‌هه‌كێ نێڤده‌وله‌تی ژی یێ هه‌ی و و نابیت بهێنه لاوازكرن.
جه‌مال كۆچه‌ری زێده‌تر بۆ ئه‌ڤرۆ گۆت” ئه‌مریكا ب عه‌بادى ڕاگه‌هاندیه كو ب چو ڕه‌نگان نابیت كورد بهێنه پشت گوه هاڤێتن و كورد ڤێ قوناغێ دگرنگن بۆمه و مه ئێك كێشه ل ڕۆژهه‌لاتا ناڤین یا هه‌ی و بۆمه خه‌مه ئه‌وژى شه‌ڕێ دژی داعشێ یه، ئیدارا ئۆبامای دڤێت به‌رى هه‌لبژارتنێن ئه‌مریكا داعشێ بشكێنیت، یان گه‌له‌ك لاواز بكه‌ت و ئه‌ڤه بێ كوردان ناهێته‌كرن و نه مووسل بێ كوردان دهێته ئازادكرن و شه‌ڕ ژی ل گه‌ل داعشێ بێ كوردان ناهێته‌كرن، نه ل عیراقێ و نه ژی ل سووریێ”.
خواكر ژی” كورد ناهێنه پشت گوه هاڤێتن و عه‌بادى ژى گۆتیه كوردان و پشتى گوتارا خوه ل جڤاتا نوونه‌ران خواندی، به‌ر مێزا مه هه‌ر پێنچ فراكسیۆنێن كوردى دا هات و گۆت من سێ وه‌زیر بۆ هه‌وه داناینه و ئه‌ڤه نه سه‌پاندنه وهین دشێن ب گوهۆڕن ب تنێ هنده‌ك ته‌كنوكراتان بۆمه ڤرێكه‌ن”.
دییاركر ژی” مه وه‌زیر و بریكارێن وه‌زیران و بالیۆز و كه‌سانێن له‌شكرى یێن هه‌ین و ئه‌ڤه دستوورى داناینه و هه‌كه گوهۆڕین بهێته‌كرن و ڕێژا مه مسوگه‌ر بوو، دێ داهات مه‌زنتر بیت و دڤێت حوكمه‌تا هه‌رێمێ ب گه‌رمى بهێته سه‌ر هێلێ و هه‌تا به‌رسڤا هه‌رێمێ ڤه‌كێشان ژى بیت، هه‌كه مه پێگه‌هه‌كێ ب هێز هه‌بیت، مه چو ده‌مێ دڤێت ئه‌م دشێین ڤه‌گه‌رین كوردستانێ”.
جه‌مالى هێشتا گۆت” مه پێدڤى ب به‌غدا یا هه‌ی ژ چه‌ند خالان، هه‌تا نوكه مه ل هه‌رێما كوردستانێ بڕیار نه‌دایه، مه پێدڤى پێ هه‌یه هه‌تا بڕیارێ دده‌ین، چونكی دڤێت ژێكڤه‌بوونا مه و عیراقێ یا قانوونى و دستوورى بیت، ژ به‌ر كو دبیت وه‌لاتێن زلهێز قه‌بوول نه‌كه‌ن و هه‌كه ب شه‌ڕ ژێ ڤه‌بین و جیران دوژمن بن و هه‌ڤپه‌یمان نه ڕازیبن ژ مه، دێ كه‌ڤینه ئاریشه‌كێ، هه‌تا هه‌كه سه‌ربخوه‌یێ ژى وه‌ربگرین وببینه ده‌وله‌ت، بلا جیرانیا مه یا خوه‌ش بیت و نه هه‌موو ده‌مان شه‌ڕ بیت، چونكی مه ده‌رگه‌ه ئازاد نینن، هه‌ر جارا ئه‌و هه‌ر چار وه‌لاتێن ده‌وروبه‌ر خوه بكه‌نه ئێك، دشێن مه برسی بكه‌ن”.
ئاماژه دا” بۆچوونه‌ك دناڤ سه‌رۆكێن فراكسیۆنان و كه‌سانێن شاره‌زا و ئالیێن سیاسى هه‌یه كو ئه‌و پێرابوونێن عه‌بادى دكه‌ت، دو بۆچوون ل سه‌ر هه‌نه، بۆچوونه‌كا هه‌ى كو ئه‌و پێرابوون ددستوورى نینن و ب تنێ سه‌رۆك وه‌زیران بمینیت، بۆچوونه‌كا دى یا هه‌ى كو ئه‌و پێنگاڤێن بۆ وان پێرابوونان د قۆناغێن قانوونى دا نه‌هاتیه هاڤێتن و نابیت وه‌زیره‌ك بهێته‌دانان و به‌حسێ هه‌لبژارتنا وى بهێته‌كرن و هێشتا وه‌زیرێ حوكمه‌تا دى دكارى دابیت و ده‌ست ژ كاری نه‌كێشا بیت “.
دیاركر ژی” هه‌كه مه‌ره‌ما عه‌بادى لادانا هنده‌ك كه‌سان و ئالیان بیت، دێ ڕه‌فتار به‌رامبه‌ر مه هه‌بیت، به‌لێ هه‌كه مه‌ره‌ما وى ئاڤاكرنا حوكمه‌ته‌كێ بیت ل گه‌ل نوكه ب گونجیت و ئه‌و مه‌رجێن هه‌ردو بانكێن نێڤده‌وله‌تی و ئیسلامى و نه‌ته‌وێن ئێكگرتى بجهبینیت، پێدڤیه حوكمه‌تا كارا بیت و ژ كه‌سانێن شاره‌زا بیت، وى ده‌مى دبیت به‌ر ب ده‌ست ژ كاركێشانا وێ نه‌چین، هه‌كه مافێ كوردان هاته به‌رزه‌كرن كو دڤێت 20% بیت ژ حوكمه‌تا نوو و مه سێ وه‌زاره‌ت دێ هه‌بن و هه‌كه ئالیێن سیاسى وه‌زیرێن خوه نه گوهۆڕین، ئه‌م ژى ناگوهۆڕین و هه‌كه گوهۆڕین دێ بیته بابه‌ته‌كێ دى، پێنگاڤا دویێ، هه‌كه مه‌ره‌ما عه‌بادى یا دروست نه‌بیت، وى ده‌مى دێ پێگه‌هێ كوردى لاواز كه‌ت و نه‌چارین به‌ر ب هه‌لوه‌شاندنا حوكمه‌تا عه‌بادى بچین”.
ب دیتنا جه‌مال كۆچه‌ری” چو تشت ل ده‌ڤ كوردان ناهێته گوهۆڕین و دبیت وه‌زیر بهێنه گوهۆڕین، به‌لێ نابیت وه‌زاره‌ت بهێنه گوهۆڕین كو سێ وه‌زاره‌تن و هه‌ر ئێكێ وه‌زاره‌ته‌ك ل گه‌ل هاتیه لێكدان و ب تنێ به‌حسێ وه‌زیرى كریه”.
جه‌مالی دیاركر كو كورد ژ وه‌زیرێن خوه درازینه و گۆت” نه‌بوونا بۆدجێ ژلایێ وه‌زاره‌تا دارایى ڤه، نه كێشا وه‌زیرى یه ئه‌و ڕێككه‌فتنه‌كا سیاسى یه و به‌رامبه‌ر په‌ترۆلێ یه و هه‌رێم په‌ترۆلێ بۆ به‌غدا ناهنێریت و به‌غدا ژی بۆدجێ ناڤرێكه‌ت”.
ل دووڤ بۆچوونا جه‌مال كۆچه‌ری” شیعان دڤێت حوكمه‌تا زۆرینه پێكبینن كو ل ده‌سپێكێ هنده‌ك وه‌زیر بهێنه‌دانان كو پێگه‌هێ حزبى یێ وانیێ لاواز بیت ونه ب ڕێیا فراكسیۆنێن كوردى بیت و پێنگاڤا دویێ نه‌شێن چ بكه‌ن، چونكی چ پاره نینه دێ وه‌زیر چ كه‌ت و دڤێت بۆدجه‌كا ب هێز هه‌بیت، له‌وما پشتى ده‌مه‌كى دێ هنده‌ك وه‌زیرێن دى ئینیت و پاشی دێ لاده‌ت وحوكمه‌ته‌كێ پێكئینیت و كا چاوان جێگرێن خوه و یێن سه‌رۆك كۆمارى لاداین و كه‌سه‌كێ نه ئاخڤتى، له‌وما دڤێت هه‌رێما كوردستانێ ب ڕژدى بهێته سه‌ر هێلێ كا دێ چ بریارێ ده‌ت”.
ئه‌ڤرۆ نيوز:
فه‌رماندێن پێشمه‌رگه‌ی گومان ل سه‌ر هنده‌ك سه‌ربازێن له‌شكرێ عیراقێ هه‌ین كو ل باشوورێ ڕۆژئاڤایێ هه‌ولێرێ هاتینه بجهكرن كو پێزانینان دده‌نه داعشَ، چونكی هێرشا داعشێ بۆ سه‌ر وان ده‌ڤه‌ران ب شێوه‌كێ به‌رفره‌ه زێده‌بوویه.
ل دووڤ داخویانیێن ژێده‌رێن كوردی، ئه‌و ددلته‌نگن كو دناڤ له‌شكرێ عیراقی ئه‌وێ ل ده‌ڤه‌را مه‌خموورێ هاتیه بجهكرن، هنده‌ك ژسه‌ربازان په‌یوه‌ندیێن ب هێز ل گه‌ل چه‌كدارێن داعشێ یێن هه‌ین ووان په‌یوه‌ندیان بكاردئینن بۆ هنارتنا پێزانینان ل سه‌ر ده‌ڤه‌رێ ب ئارمانجا به‌رفره‌هكرنا شیانێن هێرشا داعشێ.
ئه‌ڤ دلته‌نگیا كاربه‌دستێن كورد دده‌مه‌كی دایه كو ل ده‌ستپێكا سالا 2016 ێ، حوكمه‌تا عیراقێ ب ڕازیبوونا حوكمه‌تا هه‌رێما كوردستانێ، هێزه‌كا به‌رفره‌ه ل باشوورێ هه‌ولێرێ بجهكر، ب مه‌به‌ستا كونترۆلكرنا مووسلێ، ل 24 ئادارا 2016 ێ، له‌شكرێ عیراقێ دبه‌یاننامه‌كێ دا ده‌ستپێكرنا ئۆپه‌راسیۆنا كونترۆلكرنا مووسلێ ڕاگه‌هاند.
نه‌جات عه‌لی، ئێك ژ فه‌رماندێن پێشمه‌رگه‌ی ل میحوه‌رێ مه‌خموورێ ب ( ده‌نگێ ئه‌مریكا) ڕاگه‌هاند” داعشێ ژێده‌رێن پێزانینان دناڤ له‌شكرێ عیراقێ، حه‌شدا نیشتمانی و خه‌لكێ عه‌ره‌ب ل ده‌ڤه‌رێ یێن هه‌ین”.
ب گۆره‌ی وی فه‌رماندێ پێشمه‌رگه‌ی، داعشێ هه‌بوونا په‌یوه‌ندیێن جڤاكی ب ده‌لیڤه دیت بۆ ب ده‌ستڤه‌ئینانا پێزانینان و دبێژیت” دناڤ له‌شكرێ عیراقێ دا، سه‌رباز هه‌یه كو بابێ وی، برا، یان مامێ وی ئه‌ندامێ داعشێ یه، ئه‌وا دناڤ له‌شكرێ عیراقی دا هه‌ی، هنارتنا پێزانینایه ژ ئه‌گه‌رێ هه‌بوونا په‌یوه‌ندیێن جڤاكی”.
سیروان بارزانی، فه‌رماندێ میحوه‌رێ گوێر – مه‌خموور، ب ده‌نگێ ئه‌مریكا ڕاگه‌هاند كو ئه‌و د پشت ڕاستن ژهه‌بوونا ژێده‌رێن هه‌والگێریا داعشێ دناڤ سه‌ربازێن عیراقی دا و ئه‌و نوكه مژوولی كۆمكرنا به‌لگانه ل دۆر ڤێ چه‌ندێ.
سیروان بارزانی خویاكر ژی” وه‌كو دیكیومێنت، چو ل ده‌ف مه‌نینه، به‌لێ 100% ئه‌م دئاگه‌هدارین و دزانین كو پێزانین بۆ داعشێ دچن، به‌ری نوكه ده‌مێ مه كۆمبوون ل گه‌ل له‌شكرێ عیراقێ دكر، ڕادیو و ئامیرێن دی یێن مه یێن چاڤدێریێ تێبینیا ڤه‌گوهاستنا پێزانینان بۆ داعشێ دكر سه‌باره‌ت وێ چه‌ندێ به‌ر ب كیڤه دێ چین و چاوان دێ چین”.
ب دیتنا شاخه‌وان عه‌بدوللا، بڕیارده‌رێ لژنا ئاسایش و به‌رگریێ ل جڤاتا نوونه‌رێن عیراقێ، بجهكرنا له‌شكرێ عیراقێ ل مه‌خموورێ، ئاسایشا باشوورێ هه‌ولێرێ یا تێكدای و بوویه ئه‌گه‌رێ به‌رفره‌هبوونا تۆپبارانكرنێ ژلایێ داعشێ ڤه.
شاخه‌وان عه‌بدوللا بۆ ده‌نگێ ئه‌مریكا گۆت” نابیت حوكمه‌تا هه‌رێما كوردستانێ ڕێ ب له‌شكرێ عیراقێ بده‌ت، ل ده‌ڤه‌رێ بهێته به‌لاڤكرن و نێزیكی ئاكنجیان ببیت، بۆ ڕێكگرتنێ ژ هێرشێن زێده‌تر یێن داعشێ بۆ سه‌ر پێشمه‌رگه‌ی و وه‌لاتیان”.
ل دووڤ بۆچوونا شاخه‌وانی” ژ ده‌مێ له‌شكرێ عیراقێ هاتیه وێ ده‌ڤه‌رێ، هێرشێن داعشێ یێن زێده‌بووین و ئه‌ڤه ژی به‌لگه‌یه ل سه‌ر وێ چه‌ندێ كو ژناڤ وی له‌شكری پێزانین دگه‌هنه داعشێ، هه‌كه نه، داعش ل وێ ده‌ڤه‌رێ نه‌شێت چو بكه‌ت”.
ئه‌ڤرۆ نیوز:
به‌رپرسه‌كێ وه‌زاره‌تا شه‌هید و ئه‌نفالكریان یا حوكمه‌تا هه‌رێما كوردستانێ ئاشكرا كر كو پتریا زیندانیێن سیاسی دو مووچه هه‌نه، چونكى فه‌رمانبه‌رن و مووچێ زیندانیێن سیاسی وه‌كو پاداشت ل دووڤ قانوونێ بۆ هاتیه مه‌زاختن و گۆت: “ئه‌ڤ ساله چو مووچه بۆ زیندانیێن سیاسی نه‌هاتینه مه‌زاختن ژبه‌ر ڤێ چه‌ندێ بڕیاره ڤێ حه‌فتیێ سه‌رۆكاتیا جڤاتا وه‌زیران بڕیارێ ل سه‌ربده‌ت”.
ئه‌حمه‌د مام ره‌سول، رێڤه‌به‌رێ گشتى یێ زیندانیێن سیاسی بۆ رۆژناما ئه‌ڤرۆ دیار كر كو ژ ده‌ستپێكا سالا 2016ێ حوكمه‌تا هه‌رێمێ مووچێ زیندانیێن سیاسی راگرتیه و بۆ ڤێ چه‌ندێ ژى وه‌زاره‌تا شه‌هید و ئه‌نفالكریان د گه‌ل لژنا بلندا به‌رهه‌نگاربوونا قه‌یرانان كۆمبوویه و داخوازى یێن خوه ئاراسته‌ی جڤاتا وه‌زیران كرینه بۆ به‌لاڤكرنا مووچێ زیندانیێن سیاسی و گۆت: “هژمارا زیندانیێن سیاسی یێن مووچه بۆ هاتیه دیار كرن پێنج هزار و 160 كه‌سن و به‌هرا پتریا وان دو مووچه هه‌نه، چونكى زۆربه‌یا زیندانیێن سیاسی فه‌رمانبه‌رن و ژبه‌ر هه‌بوونا دو مووچان حوكمه‌تێ موچێ وان راگرتیه”.
ناڤهاتى ئاماژه دا وێ چه‌ندێ كو ئه‌ڤ مووچێ بۆ زیندانیێن سیاسی هاتیه مه‌زاختن به‌رانبه‌ر زیندانیكرنا وانه و ل دووڤ قانوونا هژماره 11 بۆ ده‌مێ 10 سالان ڤی مووچه‌ی دێ وه‌رگرن و وان ئه‌ڤ چه‌نده بۆ حوكمه‌تێ دیاركریه كو هه‌شت سال بۆرین و بتنێ دو سال ماینه و گۆت: “حوكمه‌تێ سۆزدایه چاره‌یه‌ك بۆ مینحه و مووچێ زیندانیێن سیاسی ببینن و بڕیاره ڤێ حه‌فتى یێ به‌رسڤا وه‌زاره‌تا شه‌هید و ئه‌نفالكریان بهێته‌دان و چاره‌نڤیسێ مووچێ زیندانیێن سیاسی بهێته دیاركرن”.
ئه‌ڤرۆ نیوز:
رێڤه‌به‌رێ گشتى یێ كۆچ و كۆچبه‌ران ل وه‌زاره‌تا ناڤخۆ یا حوكمه‌تا هه‌رێما كوردستانێ ئاشكرا كر كو د ئه‌ڤ ساله دا زێده‌ترى دو هزار كۆچبه‌ران ڤه‌گه‌ڕیاینه هه‌رێما كوردستانێ ژبه‌ر ڤێ چه‌ندێ وان پێشنیاره‌ك دایه حوكمه‌تێ ئه‌و كه‌سێن فه‌رمانبه‌ر و ژ كارێ وان هاتینه دوورخستن و ڤه‌گه‌ڕیاین كارئاسانى بۆ بهێته‌كرن كو جاره‌كادى ڤه‌گه‌ڕنه سه‌ر كارێن خوه.
شاكر یاسین، رێڤه‌به‌رێ گشتى یێ كۆچ و كۆچبه‌ران ل وه‌زاره‌تا ناڤخۆ یا حوكمه‌تا هه‌رێما كوردستانێ دیار كر كو ل دووڤ وان دووڤچوونێن ژ لایێ وان ڤه هاتینه‌كرن ژ ده‌ستپێكا سالا 2016 و هه‌تا نوكه زێده‌ترى دو هزار كۆچبه‌ران ڤه‌گه‌ڕیاینه هه‌رێما كوردستانێ و سه‌ره‌رایى ڤێ چه‌ندێ وان به‌رنامه‌ك ل گه‌ل رێكخراوا كۆچا جیهانى دانابوو بۆ پێشۆازیكرنا وان كۆچبه‌رێن هاتینه سنوورداشكرن بۆ هه‌رێما كوردستانێ و بۆ رووداو گۆت: “د هه‌مان ده‌م دا مه نڤیساره‌ك بۆ حوكمه‌تا هه‌رێما كوردستانێ هنارتبوو كو ئه‌و فه‌رمانبه‌رێن قه‌ستا ده‌رڤه‌ى وه‌لاتى كرین و ژ كارێ وان هاتینه دوورخستن و جاره‌كا دى ڤه‌گه‌ڕیایین كارئاسانى بۆ بهێنه‌كرن كو جاره‌كا دى ڤه‌گه‌ڕنه سه‌ر كارێن خوه، به‌لێ هه‌تا نوكه به‌رسڤا مه نه‌هاتیه‌دان”.
ناڤهاتى ئاماژه دا وێ چه‌ندێ كو ل 17ى هه‌یڤا بۆرى ل برۆكسل وان پشكدارى د كۆمبوونه‌كا جیهانى دا ل دۆر چه‌وانیا هاریكاریا په‌نابه‌ران و ڤه‌گه‌ڕاندنا وان كربوو و گه‌له‌ك سۆز ب وان هاتبوونه‌دان كو هاریكاریا په‌نابه‌ران بكه‌ن ڤه‌گه‌ڕنه وه‌لاتێ خوه و گۆت: “نوكه ئه‌م چاڤه‌رێ ب جه ئینانا وان سۆزاینه”.
نه‌زهه‌ت حسێن، رێڤه‌به‌رێ پشكا په‌نابه‌ر و ره‌ڤه‌ندا كورد ل رێڤه‌به‌ریا كۆچ و كۆچبه‌ران ئاشكرا كر كو نوكه كۆچكرنا وه‌لاتیان بۆ ده‌رڤه‌ى وه‌لاتى ب رێژا 90% كێم بوویه و بۆ مالپه‌رێ فه‌رمى یێ پارتى دیمۆكراتى كوردستان گۆت: “ل وه‌لاتێ ئه‌لمانیا بتنێ نێزیكى شه‌ش هزار كه‌سان ناڤێن خوه نڤێسینه كو ڤه‌گه‌رنه عیراق و هه‌رێما كوردستانێ”.
نيشاندان