ئەڤرۆ نیوز:
کی پتر خیانەتێ دکەت ژن یان زەلام؟بۆچی خیانەت ئەڤرۆ پتر دھێتە کرن؟ خیانەتا ھەڤژینی دبیتە ئەگەرێ ئاشکرابوون و بەردانێ؟ پتری د کیژ تەمەنی دا خیانەت دھێتە کرن؟ ئەگەرێ سەرەکی یێ خیانەتێ چی یە؟ پتر د ناڤ کیژ ھەڤژینان دا خیانەت دھێتە کرن؟ ئەرێ بیاڤی ئابووری ئەگەرێ ھندێ یە ژن ھەست ب ئیھمالکرنی بکەت و چاڤێ خوە ل زەلامەکی دی بگێریت؟
عومەر سەعدولا دەرووناس خویا کر کو کێم رێزگرتن و پشت گوھاڤێتن چ ژ لایێ زەلامی یان ژنێ ڤە بیت دێ بزاڤێ کەت بێگھۆرەکی پەیدا بکەت بۆ تێرکرنا حەزێن خوە، ھەروەسا کێم دیانەت چ ل دەف زەلامی یان ژنێ ئەگەر ئایین ل دەف وان تشتەکێ نۆرمال بیت، ھەروەسا ئارێشین ئابووری و جڤاکی و عاتفی ھەبن دبیتە ئەگەرێ پەیدابوونا خیانەتێ، زیدەباری گڤاشتنا ل سەر کچێ دەمێ ب زۆری ددەنە کەسەکی، چونکی ھەر دەمێ زەلامێ وێ ب دلی نەبیت دێ بۆ خوە ل بێگھورەکی گەریت و گەلەک جاران ژن وەکو تۆلڤەکرنێ ژ زەلامێ خوە دکەت دەمێ دبینت زەلامێ وێ دگەل کچەکێ دئاخڤیت یان دێ چیتە گەشتەکێ و ئەو ژنە دزانیت زەلامێ وێ وان شەڤا دگەل ژنەکا دی دبۆرینت وەک تۆلڤەکرن ئەو ژی خیانەتێ دکەت.
عومەر سەعدولا دەرووناس ئاشکرا کر ژی چ ئامارێن دروست ل بەر دەست نینن کا کێژ پتر خیانەتێ دکەت ژن یا زەلام و گۆت “ب دیتنا من ئەگەر زەلام وێ پێنگاڤێ نەھاڤێت ژن نەشێت وەبکەت ئەگەر ژنێ دیت زەلامێ وێ یێ باشە و چاڤدێریا مال و زارۆیێن خوە دکەت خیانەتێ ناکەت و د کەتوارێ نوکە دا بەھرا پتریا زەلامان خیانەتێ دکەن نەبتنێ ژ لایێ سکسی ڤە، بەلکو ڤەخوارنا مەی و کرنا قومارێ و پشت گوھاڤێتنا ژنێ ل سەر خاترا ھەڤالان ھەتا نیڤا شەڤێ”.
ھەروەسا دەرووناسی گۆت “خراب کارئینانا دەزگەھێن راگەھاندنێ ب تایبەتی زنجیرێن بیانی جرعەتەکا وەسا بۆ ژنێ چێ دکەت ئەو تشتێ د زنجیرا تەلەڤزیۆنێ دا ھەی ل دەف خێزانێ دبیتە تشتەکێ نۆرمال و دبێژیت بۆچی ئەم ڤی تشتی ناکەین و ھەمی تشت نوکە ل بەر دەستێ وان ئامادەیە و چ مال نینن بێ ئەنترنێت و دەستپێکێ پەیوەندیا وان ب تەلەفۆنێ یە پاشی ڤایبر و وێنە و کامیرە و ھەتا دگەھیتە دەرکەتنێ”.
ھەروەسا دەرووناسی ئاشکرا کر کو ھەر دەمێ خیانەت ئاشکرا بوو چ ژلایێ ژنێ یان زەلامی ڤە ل بەر دلێ ئێک سار دبن و ئەو حەژێکرن نامینت و دبیتە ئەگەرێ بەردانێ و گەلەک جارا زەلامی دڤێت ھەڤژینا خوە ب زڤرینت، بەلێ ژ بەر شەرما جڤاکی نەشێت و دبیت ل دەف ژنێ دەمێ زەلام خیانەتێ دکەن ژن لێ بۆریت، بەلێ زەلام نابۆریت و بەھرا پتر خیانەت د ژیەکێ بچووک دا دھێتە کرن، چونکی دەمێ کچ شوو دکەن ھەست بەرپرسیاریێ ناکەن، نەمازە ھەکە حەژێکرن بەری ھەڤژینیێ د ناڤبەرا وان دا نەبیت و گۆت “ئەز دگەل ھندێ مە دەمی ئێک ھەڤژینەکێ بۆ خوە بھەلبژێریت بەری ئینانێ ماوەیەکی بمینت دگەل و تێکەلیا وێ بکەت و ھەروەسا ئەگەر ژن بەردەوام ل بنگەھێن توندوتیژیێ سکالا ل سەر زەلامێ خوە تۆمار بکەت، ئەڤە ژی دبیتە دەرگەھەک بۆ زەلامی خیانەتێ بکەت خیانەت پەیڤەکا نەگونجایە، چونکی دژی رێنما و ئایینێ ئیسلامێ یە و سزایێ وی توندە و پتریا ئەو ژنێن دھێنە بەردان ئەگەرێ سەرەکی ئاریشێن ئابووری نە و گەنجێ مە بەری ژنئینانێ گەلەک تشتا ل سەر خوە دکەتە مال، بەلێ دەمێ دئینیت ئەڤ تشتە ھەمی نامینن”.
عەبدولرەحمان سوبحی ڤەکۆلەرێ جڤاکی دیار کر کو دەمێ کوڕ بۆ خوە ل کچەکێ دگەریێت دێ سەحکەتە کچەکا وەسا گەلەک تێکەلی دگەل زەلاما نەکربیت و کچەکا وەسا بیت شارەزایی نەبیت ژلایێ تێرکرنا حەزان ڤە دەمێ دئینیت ئەو تشتێ زەلامی دڤێت ئەو ژنە نەشێت بۆ بکەت یان دەمێ زارۆیەک بوو دێ مژوولی زارۆیێ خوە بیت و زەلامی پشتگوە دھاڤێژیت ئەڤە ژی دبیتە دەرگەھەک کو زەلام خیانەتێ بکەت، زیدەباری نەرەوشەنبیریا سکسی ل دەف زەلامی کو نەشێت حەزێن ھەڤژینا خوە تێر بکەت و بارێ ئابووری ئەگەرێ سەرەکی یێ پەیدابوونا خیانەتێ یە.
ڤەکۆلەرێ جڤاکی بەحسێ چارەسەریا خیانەتێ کر کو ئەوە ژنئینان د ناڤ ھەموو جڤاکان دا تشتەکێ پیرۆزە، بەلێ ب مەرجەکی نەتەمەنێ کچێ دەە سال ھەتا پازدە سالان بچووکتر بیت ژ یێ زەلامی، چونکی دەمێ ئەڤ کچە دگەھیت زەلامی شیان نامینن و ل وی دەمی خیانەت پەیدا دبیت و بەرۆڤاژی بۆ زەلامی.

ئەڤرۆ نیوز:
ل دەمەکی ھەکە ئەم تەکنەلۆژیا و پێشکەفتنا سەردەم ب شێوەیەکێ ئەرێنی ب کار بینین دێ مە نێزیکی ھەڤ کەت، لێ د ھەمان دا ھەکە ب شێوەیەکێ نەرێنی ب کار بینین ئامرازەکێ باشە بۆ ژێک جودابوونێ ژی، کو تشتەکێ وسا ب راستەقینە ل ئیتالیا روو دایە، پارێزەرێن تایبەت د وارێ ھەڤژینی و جودابوونێ دیار کریە کو 40% ئەگەرێن ژێکڤەبوونا ھەڤژینان بۆ خراب بکارئینانا تۆرێن جڤاکی دزڤڕیت.
د ڕاستی دا whats up رۆلەکێ باش د ئاشکراکرنا خیانەتێ دا ھەیە، چونکی پرانیا زەلامان پیاوان ل ولاتێ ئیتالیا چەندین ھەڤالێن کچ ھەنە و بەرنامێ whats up بۆ پەیوەندیکرنێ ب کار دئینن.
ب شێوەیەکێ گشتی تەکنەلۆجیا ل گەلەک ولاتان ب ئەگەرەکێ سەرەکیێ ژێکڤەبوونا ھەڤژینان دھێتە دانان، ھەروەکو د راپرسیەکێ دا ھاتی کو ل سالا 2011 ژ لایێ پارێزەرەکی وارێ ھەڤژینی و جودابوونێ ل ولاتێ بەریتانیا بۆ دەستنیشانکرنا ئەگەرێن ژێکڤەبوونا ھەڤژینان ھاتیە ئەنجامدان، ئەنجامێن راپرسیێ دیار بوویە کو ئێک ل سەر سێ حالەتێن ژێکڤەبوونێ ژ بەر خراب بکارئینانا تۆرێن جڤاکی و فێسبوکە، چونکی بکارئینانا فێسبوکێ یا ب سەناھی یە کو مرۆڤ دشێت د دەمەکی دا دگەل چەند ھەڤالان باخڤیت و پەیوەندیان گرێدەت و بەرنامێ whats up ژی ب سەناھی یە و د ھەمان دەمی دا کەسێ بکارئینەر دشێت وێنەیان ژی بھنێریت.
پشتی گھۆرینێن د بەرنامێ whats up دا ھاتین کو دەمێ مرۆڤ نامەیەکێ دنڤیسیت نیشانەکا کەسک دیار دبیت کو یێ بەرامبەر دزانیت نامە ھاتیە خواندن، کو ھیچ کەس نەشێت حاشاتیێ ل نەخواندنا نامێ بکەت.
ھەژی گۆتنێ یە د ھەیڤا بۆری دا ل وەلاتێ سعوودیێ حالەتەکێ ژ ڤی جۆری روودایە، کو ل دەمەکی زەلامەکی ب رێیا بەرنامێ whats up چەند جاران ل نامە بۆ ھەڤژینا خوە فرێکرین و ئەو نیشانا کەسک دیاربووی کو نامە خواندینە، لێ بەرسڤ نەدان و ھەر ب وی ئەگەری ژنا خوە بەردا.