ئەڤرۆ نیوز:
شارەزایێ قانوونی یێ عیراقی، تارق حەرب، ڕاگەھاند، خوەنیشاندانێن بەغدا یێن ڕۆژێن ئەینیان ب سەرکێشیا ڕەوتێ سەدری کو تێدا داخوازا چاکسازیان و پێکئینانا حوکمەتەکا توکنوکرات، کارتێکرنێ ل سەرۆک وەزیرێن عیراقێ ناکەت، ئاشکرا ژی دکەت کو وەزیر و پەرلەمانتارێن ڕەوتێ سەدری ژی ژ گەندەلترین کەسایەتیانە، خویا ژی دکەت عەبادی سێ وەزارەتان دێ کەتە دەستە و چەندین وەزارەتێن دی ژی دێ ھەلوەشتینیت یان تێکھەلی ھەڤدو کەت.

تارق حەرب بۆ ڕۆژناما ئەڤرۆ گۆت” سیاسەتا حەیدەر عەبادی یا دیارە و ئەو خوەنیشادانێن ب پشتەڤانیا ڕەوتێ سەدری دھێنە ئەنجامدان، چ کارتێکرنێ ل سیاسەتا وی ناکەن”.
سەبارەت پێرابوونا ڕەوتێ سەدری بۆ ئەنجامدانا مانگرتنێ ل بەردەم دەرگەھێن دەڤەرا کەسک و چوونا موقتەدا سەدر سەرکردێ وی ڕەوتی بۆ ناڤ دەڤەرا کەسک ل بەغدا، تارق حەرب دیارکر” دبیت قوربانی ژ ئەنجامێ وێ مانگرتنێ بکەڤن و شوونوارێن مەترسیدار ل دووڤ خوە بھێلێت” بەلێ گۆت ژی” بەری چەند ڕۆژان من عەبادی دیت و بۆمە دیاکر کو ب ڕێیا دەزگەھێن ئەمنی دێ پێرابوون ھێنە وەرگرتن کو ڕەوش بەر ب خرابیێ نەچیت، بەلێ ل دەمێ ئەنجامدانا مانگرتنێ، ھەموو پێشبینی د ڤەکرینە”.
تارق حەرب ڕەخنە ل وان لیستێن کەسایەتیان گرتن ئەوێن ژلایێ ڕەوتێ سەدری دھێنە دەرکرن بۆ بەربژارکرنا وان بۆ پۆستێن وەزاری و گۆت” گەلەک ژوان ناڤێن دوان لیستان دا ھاتین دباشن و گەلەک ژی یێن ھەین نەدباش، بەلێ نە ھەموو ناڤێن تێدا ھاتین ژی سەربخوە و بێ لایەنن، بۆ نموونە ( ئەیاد بنەیان) کو ناڤێ وێ دلیستا بەربژارێن پۆستێ وەزارەتا وەرزش و لاوان دایە، د ھەلبژارتنێن بۆری دا بەربژارێ ( ڕەوتێ چاکسازی) بوو کو ئیبراھیم جەعفەری سەرۆکاتیا وی دکەت، دیسا گەلەکێن دی ژی وەکو وی یێن ھەین و ناڤێن وان د لیستێن ڕەوتێ سەدری یێن بەربژارێن پۆستێن وەزاری د حوکمەتا تەکنوکرات دا یێن ھاتین”.
دیسا گۆت” ڕەوتێ سەدری 90 بەربژار بۆ پۆستێن وەزاری یێن پێشکێشکرین، باشە ما مزگەفتە یان وەزارەتە، عەبادی ب خوە دێ وەزارەتان کێم کەت، ھندەکان دێ تێکھەلکەت و من پێزانینێن باش یێن ھەین کو دێ سێ وەزارەتان ژی کەتە دەستە و ل بەراھیا وان وەزارەتا وەرزش و لاوانە، ئەڤە ددەمەکی دا عەبادی ب خوە ژی دێ بەربژارێن خوە ھەین، زێدەباری بەربژارێن لیستێن سیاسی د جڤاتا نوونەران دا”.
ڤی شارەزایێ قانوونیێ عیراقی ڕەخنە ل ڕەوتێ سەدری گرتن و گۆت” یا دیارە وەزیر و پەرلەمانتارێن ڕەوتێ سەدری د گەندەلن، ھوون دشێن بھێنە بەغدا ب تایبەتی دەڤەرا کازمیە و ب چاڤێن خوە ببینن کا وەزیر و پەرلەمانتارێن سەدری چەند مولک و خانوبەر ھەنە”.
موقتەدا سەدر سەرۆکێ ڕەوتێ سەدری کو زێدەتر ژ 30 کورسیێن جڤاتا نوونەرێن عیراقێ و چەند وەزیر و بریکارێن وەزیران و رێڤەبەرێن گشتی د حوکمەتێ دا ھەنە، داخوازا ئەنجامدانا خوەنیشادانان ل گۆڕەپانا تەحریر ل بەغدا کربوو، ئەڤە چەندین ڕۆژێن ئەینی یە ب دەھان ھزار کەس ژ وەلاتیێن بەغدا ل ڕۆژێن ئەینی خوەنیشادانان ل وی جھی دکەن، بەری چەند ڕۆژان خوەنیشاندان بەر ب دەڤەرا کەسک ل بەغدا چوون ب مەرەما مانگرتنێ کو بارەگایێ حوکمەتا عیراقێ و جڤاتا نوونەران و بالیۆزخانێن وەلاتان ل وێ دەڤەرێ نە و بەری دو ڕۆژان موقتەدا سەدر ل گەل دو زێرەڤانێن خوە چو دناڤ دەڤەرا کەسک دا ب مەرەما مانگرتنێ.