ئه‌ڤرۆ نیوز: ڤه‌ده‌ر ره‌شاڤایی:
سێ ترۆمبێلێن بۆمبرێژكری ل باژیرێ تل ته‌مه‌ر ل كانتۆنا جزیرێ ل رۆژئاڤا كوردستانێ هاتنه په‌قاندن و چه‌ندین قۆربانی لدووڤ خوه هێلان كو تێدا خه‌لكێ سڤیل ژی هه‌نه.
چالاكڤان و رۆژنامه‌ڤان موحه‌مه‌د حه‌سه‌ن ژ كانتۆنا جزیرێ خویاكر كو په‌قینا ئێكێ ل نێزیك نه‌خۆشخانه‌كا سه‌ربازییا هێزێن كوردی یه‌په‌گێ بوو، دو په‌قینێن دی ل جادێن نێزیك په‌یدابووینه و هه‌تا نها هه‌ژمارا قۆربانیان ناهێته زانین.
ئه‌ڤرۆ نیوز: ڤه‌ده‌ر ره‌شاڤایی:
گه‌له‌ك كه‌س تێر خه‌و نابن، و هنده‌ك ژی جگاران دكێشن و شێوازێ كارێ وان یێ وه‌سایه كو گه‌له‌ك روونشتن یا هه‌ی و نها ژی بهاتنا وه‌رزێ په‌رسیڤێ و چه‌ند نه‌خۆشیێن دی یا ژ هه‌مییا گرنگتر مرۆڤ بۆ خوه پاراستنێ بكه‌ت ئه‌وه كو بزاڤێن بهێزكرنا سیسته‌مێ به‌رگرییا له‌شی (مه‌ناعه) بكه‌ت، بۆ ڤێ یه‌كێ ژی نۆشدار ژبه‌ر پێكهاتێن سرۆشتیێن وان یێن گرنگ شیره‌تا خارنا ڤان جۆره خارنان دكه‌ن كو بده‌ستئێخستنا وان یا بزه‌حمه‌ت نینه:
ماست:
ژێده‌رێ پرۆتین و كالسیومی یه و پرۆبایوتیك ژی هه‌یه كو به‌كتریایا باشه رادبیت ب هه‌ڤسه‌نگكرنا به‌كتریایێن زیانبه‌خش د گه‌ده‌ی دا له‌ورا بۆ سیسته‌مێ به‌رگریێ یێ باشه.
كولند:
زینك د كولندی دا هه‌یه كو ئه‌و ژی ماده‌كه گه‌له‌ك یا فه‌ره بۆ خانێن سیسته‌مێ به‌رگریێ.
دانقۆت
دانقۆت كو ژ گه‌نمی دهێته چێكرن و ناهێته هووركرن كو ببیته ئار، مادێن ریشالی و پرۆتین و ڤیتامین بی هه‌یه، هه‌كه‌ر (جه‌نینا گه‌نمی)بده‌ست ته بكه‌ڤیت مفایێ وێ هێشتا گه‌له‌ك پتره ژ دانقوتێ.
چا: مادێ پۆلیفینۆل هه‌می جۆرێن چایان دا هه‌یه كو ماده‌كێ دژی ئوكسیدا بهێزه و سیسته‌مێ به‌رگرییا له‌شی بهێز دئێخیت، هه‌كه‌ر ته دڤێت مفایێ وێ بهێزتر بكه‌ی پیچه‌كا لیمۆنێ یان هنگڤینی یان ژی زنجه‌بیلێ به‌رده ناڤ چایا خوه دا.
پتات: وه‌كی هه‌می خارنێن سه‌ر ره‌نگێ ئاخێ، پتاتان مادێ بێتا كارۆتین كو د له‌شی مرۆڤی دا بۆ ڤیتامین ئه‌ی دهێته گوهورین هه‌یه، ئه‌و ژی بۆ سیسته‌مێ به‌رگرێ یێ باشه.
سپیناغ: سپیناغێ ترشاتیا ڤیتامین بی هه‌یه و یا باشه بۆ نووكرنا (دی ئێن ئه‌ی) یا مرۆڤی و خانێن نوو چێدكه‌ت، ئه‌ڤه و زێده‌باری زه‌نگینییا وێ د ڤیتامین سی دا، لێ یا گرنگه بۆ ژناڤنه‌چوونا مادێن وێ گه‌له‌ك نه كه‌لینی.
شتی: هه‌رچه‌نده نه وه‌رزێ شتی یه، لێ دڤی وه‌رزی دا هه‌كه‌ر ل بازاری بده‌ست ته بكه‌ڤیت ژبه‌ركو ب هه‌بوونا دایكا گلاتوسیون و دژه ئوكسیدان دهێته نیاسین و شێدارییا پێدڤی بۆ له‌شی په‌یدا دكه‌ت یا گرنگه بخۆی.
ئه‌ڤه و ژبیرنه‌كه هه‌كه‌ر بشێی سیر د خارنێن ته دا هه‌بیت گه‌له‌ك باشه، و باهیڤان ژی مشه بخۆ.
ئه‌ڤرۆ نیوز: ڤه‌ده‌ر ره‌شاڤایی:
دۆنالد ترامپ ملیاردێر و كاندیدێ كۆمارییان بۆ سه‌رۆكاتیا ئه‌مریكا بۆ به‌رگێ كۆڤارا (Time magazine) وێنه لگه‌ل ئه‌لهۆیه‌كی دگرتن، لێ ئه‌لهۆی حه‌ز ژێ نه‌كر و بزاڤكرن وی ژ خوه دووركه‌ت.
دو جاران ئه‌لهۆ كو سیمبۆلا نیشتمانیا ئه‌مریكایه ڤیا خوه ژ ترامپی دوور كه‌ت و جاره‌كێ پرچێ كاندید ترامپ تێكبر كو ژ ئالیێ خه‌لكی ڤه گه‌له‌ك كۆمێنت لسه‌ر پرچا وی هه‌نه ب پرچه‌كێ نه‌سروشتی دبینن.
ناڤهاتی به‌ری حه‌فتییه‌كێ گۆت بوو دڤێت نه‌هێلن بوسرمان بچنه ئه‌مریكا و ته‌مامي رێ لێ بهێته گرتن و بهێنه قه‌ده‌غه‌كرن، ڤێ یه‌كێ ژی نه‌رازیبوون و كارڤه‌دانێن مه‌زن بتایبه‌ت ژ ئالیێ بوسرمانێن ئه‌مریكا ڤه لدووڤ خوه ئینان.
ئه‌ڤرۆ نیوز ، له‌زگین جۆقى:
سه‌رۆكێ قه‌والێن ئێزدیان به‌هزاد سلێمان سڤو بۆ ئه‌ڤرۆ نیوز دیاركر كو ئه‌ڤرۆ 10/12/2015 جڤاتا روحانیا ئێزدیان دگه‌ل بریكارێ میرێ ئیزدیان و هژماره‌كا ره سپى یێن ده‌ڤه‌را شنگال و سه‌ركردێن له‌شكه‌رى ل ده‌ڤه‌را شنگال دێ ل به‌ر مه‌زارگه‌هێ شه‌رفه‌دین به‌یاننامه‌كێ راگه‌هینن وتێدا دێ چه‌ندین داخوازیان ژ حوكمه‌تێ كه‌ت.
به‌هزاد سلێمان سڤو سه‌رۆكێ قه‌والێن ئێزدیان دیاركر كو ل به‌ر مه‌زارگه‌هێ شه‌رفه‌دین دێ ئێزدى داخوازا سزادانا وان كه‌سان كه‌ن یێن ده‌ست د تاوان دا هه‌بن و هه‌ر جۆرى تاوانه‌كێ بیت كو ل شنگال هاتبته كرن و دێ داخواز كه‌ن هه‌موو ب ریێن قانوونى بهێنه سزادان و گۆت” ئه‌م دێ ل به‌ر مه‌زارگه‌هى شه‌رفه‌دین راگه‌هینن ئه‌م دژى تێكدانێ و كارێن وێرانكرنیینه و دێ دووپاتیێ ل سه‌ر پێكڤه ژیانێ كه‌ین”.
ئه‌ڤرۆ نیوز، له‌زگین جۆقى:
حه‌فت رێكخراوێن جڤاكى مه‌ده‌نى ل پارێزگه‌ها دهۆكێ ئه‌ڤرۆ ل نیڤه‌كا بازارى دهۆكێ ب هه‌لكه‌فتا رۆژا جیهانى مافى به‌یاننامه‌ك به‌لاڤكر و داخوازا رزگاركرنا ره‌ڤاندیێن ئێزدى كرن.
عبدالعزیز محسن به‌رپرسى ئه‌نستتیوتا دهوك بۆ ره‌وشه‌نبیریا گشتى داخوازا ژ جڤاكى نێڤ ده‌وله‌تى كر هاریكار بن دگه‌ل هه‌رێما كوردستانى و ئه‌و كه‌سێن سڤیل ئه‌وێن تیرورستان ره‌ڤاندین و ب زوترین ده‌م بهێنه ئازادكرن وكریارێن تیرورستان ب ته‌ڤگوژى و جینوساید بهێنه هژمارتن .
ئەڤرۆ نيوز:
سترانبێژا گەنج پەروازحسێن راگەھاند، ئەڤە دەمەکە ئەو ل گەل ھەڤژینێ خوە یێ سترانبێژ (گۆران سالح) مژوولێ کارەکێ ھونەری یێ ھەڤپشکن، لێ نەخواست ناڤەرۆکا وی ئاشکەرا کەت و گۆت: بۆ شەڤا سەرێ سالێ دێ ل مالا خوە بم.
ھێشتا گۆت: ئەز ب باوەرم پرۆژێ من و گۆرانی دێ یێ باش و سەرکەفتی بیت، چونکو ئەڤە دەمەکێ درێژە ئەمێ کاری ل سەر دکەین و گۆرانی ئەڤ پرۆژە ل گەل چەندین ھونەرمەند و مۆزبکژەنێن خودان سەربۆر بەحسکریە، و ھەموویان دەست خۆشی لێ کرینە و بەرھەڤیا خوە ژی بۆ سەرخستنا پرۆژەی دیارکرینە، لێ نوکە مەنەڤێت بەحسێ ناڤەرۆکا وی بکەین و بلا ئەو ببیتە سوپرایز بۆ حەزژێکەرێن دەنگێ مە.
دلایەکێ دا گۆت: راستە ئەز دان ب وێ چەندێ ددەم بەری بچمە پرۆگرامێ ( ئەرەب ئایدۆل ) خەلکەکی ئەز وەکو سترانبێژ نەدنیاسیم، لێ پشتی پرۆگرامی ئەو بارێ گران کەفتە سەرملێن من و ھەرجھەکێ ئەز سەرەدانا وان دکەم ئێکسەر ڤێ پرسیارێ ژمن دکەن (بەرھەمێ تە چو لێ ھات؟ ).
ل دووماھیێ گۆت: بۆ سەرێ سالێ من چو بەرنامە نینن، بتنێ بەرنامێ من ئەوە ل گەل خێزانا خوە ل مال روونم.
ئەڤرۆ نیوز:
مەلەک رۆژھات سترانبێژا بەرنیاسا باکۆرێ کوردستانێ دیارکر، وێ بەرھەڤیەکا باش بۆ ئاھەنگێن سەرێ سالێ کریە و دێ دوان ئاھەنگاندا ھندەک سترانێن خوە یێن نوو بێژیت.
ناڤھاتیێ گۆت: بۆ سەرسالا نوو 2016 ئەز ژلایێ ھژمارەکا کۆمپانیان ھاتیمە داخوازکرن بۆ گێرانا ئاھەنگێن سەر سالێ، لێ ژبەر نەبوونا دەمی من ھندەک رەت کرینە و پرانیا ئاھەنگێن من دێ ل ناڤا تورکی بین و دوور نینە ھەکە دەم ھەبۆ بۆ ئاھەنگەکێ یان بەرنامەکێ ھونەری بھێمە ھەرێما کوردستانێ ژی.
زێدەتر گۆت: ژبەرکو سالا نوویە، ئەز ژی دێ ھندەک سترانێن نوو بێژم، کو دێ دناڤ ئەلبۆما منا داھاتی دا بن.
ل دووماھیێ گۆت: ھیڤیا منا ھەرە مەزن ئەوە ل نێزیک داعش نەمینن و ھەرچار پارچێن کوردستانێ د ئاشتی و ئارامیێ دا بژین و ل وی دەمی ئەم ئاھەنگێن سەرکەفتنێ بۆ خەلکێ کوردستانێ بگێرین.
ئەڤرۆ نیوز:
ل دووڤ نڤیسارا ژمارە 11388 کو ل رۆژا 9/12/2015 ژ قائیمقامیا قەزا دھۆکێ دەرکەفتیە تێدا ھاتیە ئاشکرا کرن کو ل قەزایێن دھۆک، سێمێل، زاخۆ و ئامێدیێ ھەر ژ دەمژمێر دوی شەڤ ھەتا حەفتی سپێدێ و ژ دەمژمێر 10 سپێدێ ھەتا ئێکێ نیڤرۆ موەلیدێن کارەبێ کارناکەن.
نڤیسارا قایمقامیا قەزا دھۆکێ کو ئیمزا بوتان محسن، قایمقامێ قەزا دھۆکێ ل سەرە و دانەک دەست ئەڤرۆ کەفتیە تێدا ھاتیە: “ل رۆژا 8/12/2015 لژنا سەرپەرشتیا موەلیدان ل پارێزگەھا دھۆکێ کۆمبوونەک ل سەر رەوشا کارەبێ و موەلیدان ئەنجامدا و د کۆمبوونێ دا ھاتە دیار کرن کو ژبەر نەبوونا کارەبا گشتی دێ بھایێ ئەمپێرێن کارەبا موەلیدان گران بیت، ئەڤە ژی دێ بیتە ئەگەر بارێ خەلکی ژی گەلەک گران بیت، ژ بەر ڤێ چەندێ د ڤێ کۆمبوونێ دا بڕیار ھاتە دان کو ل قەزایێن دھۆک، سێمێل، زاخۆ و ئامێدیێ ژ دەمژمێر دوی شەڤ ھەتا حەفتی سپێدێ و ژ دەمژمێر 10 سپێدێ ھەتا ئێکی نیڤرۆ موەلیدێن کارەبێ کارناکەن و ل قەزایێن ئاکرێ، بەردەرەش و شێخان دێ کارکرنا موەلیدان بەرنامێ خوە یێ تایبەت ھەبیت”.
ئەڤرۆ نیوز:
رێڤەبەرێ کاروبارێن ئێزدیان ل پارێزگەھا دھۆکێ بۆ ئەڤرۆ دیار کر کو پشتی شنگال ژ لایێ پێشمەرگەی ڤە ھاتیە رزگارکرن، ئاوارە حەز دکەن جارەکا دی ڤەگەرنەڤە سەر مال و مۆلکێن خوە، ل دووڤ ئامارێن رێڤەبەریا مە ھەتا نوکە دو ھزار و 600 خێزان ڤەگەریاینە شنگالێ و پتریا وان ژی ئاکنجیێن ناحیا سنوونێ و دەڤەرێن ب سەرڤەنە.
ھادی دوبانی، رێڤەبەرێ کاروبارێن ئێزدیان ل پارێزگەھا دھۆکێ ئاشکرا کر، ل دووڤ ئاماران بەری تیرۆرستێن داعش بھێن 600 ھەتا 700 ھزار کوردێن ئێزدی ل ھەرێما کوردستانێ ھەبوون و پتریا وان ل پارێزگەھا دھۆکێ و دەشتا نەینەوا دئاکنجی بوون، لێ پشتی تیرۆرستێن داعش ھاتین 420 ھزار کەس ژ وان ئاوارە بوون، ھزار و 280 کەس ژی ھاتینە شەھیدکرن و 840 کەس ژی ھەتا نوکە دبێ سەروشوونن، 240 کەس ژی ژ ئەگەرێ برسێ و تێھنێ گیانێ خوە ژ دەست داینە کو پتریا وان زارۆ و دانعەمر بوون، پێنچ ھزار و 838 کەس ژی ژ ئالیێ داعشێ ڤە یێن ھاتینە رەڤاندن و ھەتا نوکە ب تنێ ھزار و 307 کەس ژ دەستێن داعشێ ھاتینە رزگارکرن.
خویا ژی کر، پێشمەرگێ قارەمان رووبەرکێ مەزن ژ ئاخا شنگالێ رزگارکریە، لێ ھێشتا دەڤەرا گرعزیر و تلبەنات و تلقەسەب و سیبا شێخدرێ ماینە د دەستێن تیرۆرستان دا و گۆت: “ئەم پێشبینی دکەین پشتی ئەو دەڤەر ژی دھێنە رزگارکرن پتری 21 گورێن ب کۆم بھێنە دیتن”.
رێڤەبەرێ کاروبارێن ئێزدیان ل پارێزگەھا دھۆکێ ئاماژە ب وێ چەندێ ژی کر، ل دووڤ ئامارێن رێڤەبەریا وان ھەتا نوکە دو ھزار و 600 خێزان ڤەگەریاینە سەر مال و مۆلکێن خوە ل شنگالێ و پتریا وان ژی ئاکنجیێن ناحیا سنوونێ و دەڤەرێن ب سەرڤەنە و گۆت: “ئاوارێن شنگالێ دبن خیڤەتان ڤە دلتەنگ بووینە و ھەکە خانیێن وان بھێنە چێکرن ڤە و خزمەتگوزاری بگەھنە دەڤەرێن وان گەلەک حەز دکەن جارەکا دی ڤەگەرنە سەر مال و مۆلکێن خوە ل شنگالێ”.
نيشاندان