ئەڤرۆ، زنار:
بریارە ئەڤرۆ ھەلبژارتیێ عیراقێ یێ تەپا پێ یاریا خوە یا دوماھیێ ژ ڤاڤارتنان ھەمبەر ھەلبژارتیێ ڤێتنامێ بکەت د چارچوڤێ ڤاڤارتنێن دەربازبونێ بۆ موندیالا روسیا ٢٠١٨.
ھەلبژارتیێ عیراقێ ئەڤرۆ دێ یاریێ تنێ بۆ سەرکەفتنێ کەت و ژ بلی ڤی ئەنجامی چو ئەنجامێن دی د بەرژەوەندیا وێ دا نین ژبەرکو دەلیڤا سەرکێشا کومێ بەری نوکە ھەلبژارتیێ تایلەند بۆ خوە مسوگەر کریە ب چاردە خالان و عیراقێ ل رێزا دویێ ب نەە خالان و عیراق بۆ یاریا ئەڤرۆ پێدڤی ب حنێرەکێ یە داکو دەربازبیتە قوناغا دویێ یا ڤاڤارتنێن موندیالێ و راھێنەری َخوە ژی گوھارتیە و دێ چاڤێ وێ ل یاریێن ھەلبژارتیێ ئوردون ل گەل ئوسترالیا بیت و ئیمارات ل گەل سعودیێ و سوریا ل گەل ژاپونێ زێدەباری یاریا کوریا و لوبنانێ ژی کو پێدڤیە ئەڤە ھەلبژارتێن رێزا دویێ سەرکەفتنێ تومارنەکەن داکو عیراقی وەک باشترین تیما دویێ دەرباز بیت.
بۆ یاریا ئەڤرۆ ھەمبەر ڤێتنام عیراقێ راھێنەرێ خوە یێ نوو عەبدولغەنی شەھەد ل شونا یەحیا علوان دەسنیشان کریە بۆ ڤێ یاریا چارەنڤیسی لەورا ھەمی پێشبینی دھێنە کرن عیراقی ئەڤرۆ ئێڤاری سەرکەفتنێ تومارکەت لێ تنێ پێدڤی ب حنێرەکێ یە دا کو دەربازی قوناغا دویێ یا ڤاڤارتنان بیت.

ئەڤرۆ، زنار زوبێر:
چاڤەرێ دھێتە کرن ئەڤرۆ ئێڤاری ھەردو نوونەرێن پارێزگەھێ یانێن ئاکرێ و سێمێل دو یاریێن ئێکلاکەر ئەنجامبدەن بۆ خوە قورتال کرن ژ داکەفتنا خولا پلە دو دەمێ یاریێن خوە ھەمبەر یانێن کەرکووک دکەن ژ یاریێن گەرا سیێ قوناغا دویێ یا خولا ھەرێما کوردستانێ یا تەپا پێ بۆ یانێن پلە ئێک.
ل یاریگەھا خوە یانا ئاکرێ ژ کوما دویێ دێ یاریەکا گرنگ ھەمبەر یانا سەورە یا کەرکووک ئەنجام دەت ویانا ئاکرێ د ڤێ یاریێ دا پێدڤی ب سەرکەفتنێ یە و سێ خالێن یاریێ داکو مانا خوە د ھەڤرکیێن خولێ دا مسوگەر بکەت ل وەرزێ ئەف سالە و بەروڤاژی ڤێ چەندێ ھەر ئەنجامەکێ دێ مفای نا گەھینتە وێ و دێ د مەترسیا داکەفتنێ دا بیت ژبەرکو نوکە ئاکیر َد کوما خوە دا ب حەفت خالان ل رێزا دویێ دھێت لێ تیمێن ل دووڤ دا گەلەک نێزیکی وێ نە.
ژلایێ خوە ڤە نوونەرا دویێ یا پارێزگەھێ یانا سێمێل بەر ب باژێرێ کەرکووک چویە بۆ ئەنجامدانا یاریا خوە ھەمبەر یانا خاک و ژبلێ سەرکەفتنێ چو ئەنجامێن دی د بەرژەوەندیا سێمێل دا نینن و دێ ھەلویستێ وێ ئالوز کەت و دێ ب فەرمی داکەڤیت بۆ خولا پلە دو ژبەرکو نوکە ب سێ خالان رێزا دوماھیێ سێمێل د کوما خوە دا دھێت و خاک بەری وێ ب چار خالان.

ئەڤرۆ، زنار:
یاریکەرێن بەرازیل باوەری ب خوە نەمایە بۆ یاریا شەڤەکا دی ئەوا بریارە ل ھەمبەر ھەلبژارتیێ پارگوای ئەنجام بدەت ژ ڤاڤارتنێن دەربازبونێ بەر ب موندیالا روسیا ٢٠١٨.
روژنامەیێن بەرازیل دیارکریە بێزاریەک ل دەف یاریکەرێن ھەلبژارتیێ بەرازیل پەیدابویە ژ ئەگەرێ وێ وەکھەڤیا یاریا بوری ھەمبەر ھەلبژارتیێ ئوروگوای پشتی بەرازیل شیای نیڤا ئێکێ دو گۆلان توماربکەت لێ دووڤ دا ئوروگوای ب رێکا کاڤانی و سوارێزی شیان وەکھەڤیێ بینن ل ناڤ ئەرد و جەماوەرێ بەرازیل دا ب ڤی ئەنجامی کارتێکرنا خوە ل ئاستێ یاریکەرێن بەرازیل کریە تایبەت پشتی ھەردو یاریکەرێن وێ نیمار داسێلڤا و داڤید لویس ژئەگەرێ کارتێن زەر یاریا شەڤەکا دی ھەمبەر پارگوای یاریێ ناکەن کو ئەڤە ژی بویە ئەگەرێ ھەبونا ترس و نەباوەریێ ب خوە ژلایێ یاریکەرێن بەرازیل، و ل شوونا ڤان یاریکەران گابریێل و فلیپی ھاتینە داخواز کرن دیسان پشکداریا مارسێلو ژی د گومانێ دایە ل گەل نە پشکداریا یاریکەران ریناتو و ئوگوستوی کو دێ بەرازیل توشی کێشەیێن مەزن کەت د ڤێ یاریێ دا.