ئەڤرۆ نیوز:
نەخۆشەک ئەڤە 10 رۆژە ل نەخوشخانا ھیڤی نڤاندی، دایکا وی دیاردکەت کو ئەگەرێ نەخۆشیا وی ژبەر خوارنا کڤارکا بوو و چو نەمابوو گیانێ خوە ژدەست بدەت.
دایکا فارسی، دیارکر ئەو ئاوارەنە و نوکە ل گرێ پانێ نە، کورێ وێ رۆژەکێ کڤارک خوارن و کەت و ب ھەوارکی گەھاندە نەخوشخانێ و گۆت: بەری ھینگی ژی کڤارک دخوارن، وێ رۆژێ ژی ل گەل خێزانێ خوارن، بەلێ ئەو ب تنێ وەلێ ھات.
دایکا فارسی دیارکردەمێ فارسێ یازدە سالی کڤارک خوارین، دلێ وی رابوو، چار رۆژا ئاگەهـ ژ خوە نەبوو، و گۆت: رەوشا وی یا ساخلەمیێ گەلەک تێکچوو لەورا نەچاربووین ل نەخوشخانێ بھێتە نڤاندن، بەلێ ھەر وێ رۆژێ ھندەکێن دیتر ژی ژ خێزانا مەخوار بوون، بەلێ چ لێ نەھاتن.
د.نزار بەکر، تایبەتمەندێ نەخوشیێن زارۆیان دیارکر کو راستە فارسی کلاڤوژک یان کڤارک خواربوون، ئەوژی ل بەر لێڤێن رووبارا شوون دبن، و گۆت: ھندەک جورێن کەرستێن ژەھراوی دناڤدا ھەنە، کو گەلەک کارتێکرنێ ل مێلاکێ و گولچیسکا و مێشکی و خوینێ دکەن و پتریا ئەندامێن لەشێ مرۆڤی بێھێز دکەن.
د.نزاری دیارکر دەمێ نەخۆش ئینای ئاگەە ژ خوە نەبوو و زەرکەکا ب ھێز ھەبوو، چونکو ئەو کەرستە ل مێلاکێ دھێنە دەرھاڤێژتن و گولچیسکێن وی تێک چبوون و یێ بێھوش بوو، و گۆت: نەخۆش ب سێلانێ ھاتە چارەسەرکرن و ھندەک جورێن دەرمانا بۆ کێمکرنا زەرکا وی و داکو ئاگەە ژ خوە ھەبیت ھاتنە دان، پشتی بوورینا چار رۆژا رەوشا وی باشتر لێ ھات و کوئەندامێن لەشێ وی باشتر لێ ھاتینە و نوکە گەلەک یێ باشە و بۆ زانین ئەڤ ژەھرە پتریا کەسێن دخوون پێ دمرن. بەلێ دایکا نەخۆشی دبێژیت: گەلەک ژ خێزانا مە خواربوون و چ لێ نەھاتن؟
د بەرسڤا ڤێ پرسیارێ دا، د.نزار دبێژیت: دەربارەی خوارنا وان ل سەر چەنداتیا ژەھراویبوونێ د راوەستیت و رەنگە ئەندامێن خێزانێ جورێ نە ژەھراوی خواربیت، یان کێمتر ژ وی خواربن، چونکو ھەکە وانژی جورێ ژەھراوی خواربا نەدوورە خرابتر لێ ھاتبان و گەلەک پێ دمرن.
د.نزار بەکر شیرەتا دکەت کو نە ھەر جورەکێ خەلک ببینن بخوون، پێدڤیە پشت راست ببن پاشی بخوون، و گۆت: نەخوش نوکە ل چاڤدێریا چرە و ھەر تشتێ پێدڤی بۆ ھاتیە کرن و پشتی ئەم ژ ساخلەمیا وی پشت راست دبین دێ ژ نەخوشخانێ ھێتە دەرخستن.