ئەڤرۆ نيوز:
پشتی شکەستنا ڕێککەفتنا د ناڤبەرا بەغدا و ھەرێما کوردستانێ دا ل دۆر ھنارتنا پەترۆلێ ھەرێمێ، نوکە بەحسێ ئیمزاکرنا ڕێککەفتنەکا نوو د ناڤبەرا ھەرێما کوردستانێ و بەغدا دھێتەکرن، پەرلەمانتارەکێ کورد ژی ل جڤاتا نوونەرێن عیراقێ دبێژیت، پێدڤیە ئەڤ ڕێککەفتنە ب شێوەیەکێ باشتر ژ یا بەرێ بھێتەکرن و ھەردو لایەن ژی پێگیری ب ڤێ ڕێککەفتنێ بکەن، پەیڤدارێ حوکمەتا ھەرێمێ ژی دبێژیت، یا فەرە بەغدا و ھەرێم ل دۆر پرسێن دارایی و پەتڕۆلێ ڕێککەڤن.
دکتۆر بەختیار شاوێس، ئەندامێ جڤاتا نوونەرێن عیراقێ ژ فراکسیۆنا ئێکەتی نیشتمانی کوردستان بۆ ڕۆژناما ئەڤرۆ گۆت” ھەرێما کوردستانێ پێدڤی ب ڕێککەفتنەکا دی یە ل گەل بەغدا، ژ بەر کو ھەتا نوکە ئەم یێ دچوارچۆڤێ عیراقێ دا دژین و ھەرێم نەشێت بێی بەغدا ئاریشەیێن خوە چارەسەربکەت، چونکی ئەم گرێدای بەغداینە و ئاریشەیێن مە ژی ل گەل بەغدا نە، ژبلی ئاریشەیێن دارایی، ئاریشەیێن مادێ 140 و ب دەھان ئاریشەیێن دی ژی یێن د ناڤبەرا ھەردو لایەنان ھەین، بۆ چارەسەرکرنا ھەموو ڤان پرسان پێدڤیە ھەرێما کوردستانێ ل گەل حوکمەتا عیراقێ ڕێککەفتنەکا نوو بکەت، ھەر بۆ نموونە سکرتێرێ گشتیێ ڕێکخراوا نەتەوێن ئێکگرتی (بان کی مون) بڕیار دایە قەڕی بدەتە عیراقێ و چەندین وەلاتێن دی ژی بڕیار یا دای قەڕان بدەنە عیراقێ، ھەکە بھێت و پەیوەندیێن مە ل گەل بەغدا دباش بن، دێ پشکا ھەرێما کوردستانێ ژڤان قەڕان ھەبیت، بەرۆڤاژی ڤێ چەندێ ھەکە پەیوەندیێن مە ل گەل بەغدا دئالۆز بن، ھەرێما کوردستانێ چو پشک دڤان قەڕان دا نابن”.
ڤی پەرلەمانتارێ کور زێدەتر گۆت” نابیت ڕێککەفتنا ڤێ جارێ د ناڤبەرا بەغدا و ھەرێما کوردستانێ دا، وەکی یا بەرێ بیت و پێدڤیە بەغدا و ھەرێم پێگیری ڤێ ڕێککەفتنێ بن، یا فەرە ھەرێما کوردستانێ ڕێککەفتنەکێ بکەت و بشێت بجە بینیت و ب ئاشکرا بێژینە بەغدا دشیاندایە ھەرێما کوردستانێ چەند پەتڕۆلێ ب ھنێریتە دەرڤە”.
دکتۆر بەختیاری گۆت ژی” ب دیتنا من ھەکە بەغدا و ھەرێما کوردستانێ ڕێککەڤن، دێ داھاتەکێ باش بۆ ھەرێما کوردستانێ ھێت، ژ بەر کو ژبلی داھاتێ پەتڕۆلێ بەغدا، داھاتێن دی ژی یێن ھەین، ژوانا وەرگرتنا قەڕی، بەلێ چو وەلاتەک یێ بەرھەڤ نینە قەڕی بدەتە ھەرێما کوردستانێ، چونکی ئەم وەکو ھەرێما کوردستانێ دەولەت نینین، ھەروەسا بەغدا 60 ملیار دۆلار پارێ یەدەک و 380 تەنێن زێڕی یێن ھەین، یان ھەکە بەغدا گەلەک پێدڤی ب بلندکرنا داھاتێ خوە ھەبوو، وی دەمی دێ شێت پارێ نوو چاپ بکەت، ھەتا نوکە بەحسێ ئەنجامدانا ڤێ ڕێککەفتنا نوو ب شێوەیەکێ فەرمی نەھاتیەکرن، ژبەر ڤان ئالۆزیێن نوکە بەغدا ڤەگرتی و ڕاستڤەکرنا حوکمەتا بەغدا، بەلێ دانوستاندن ل دۆر وێ ڕێککەفتنێ یێن ھاتینەکرن دناڤ خوەدا و فەرە ئەڤ ڕێککەفتنە بھێتەکرن”.