ئه‌ڤرۆ نیوز:

ئه‌ندازیارێ چاندنێ فاروق یوسف سلێمان رێڤه‌به‌رێ دارستان و پاوانان ل پارێزگه‌ها دهۆكێ بۆ ئه‌ڤرۆ دیار كر، زێده‌بارى به‌رهه‌مئینانا داروبارى، ئه‌م جاران پرۆژان ژى ئه‌نجامدده‌ین، بۆ نموونه‌ ئه‌م پاركێن دارستانێ چێ دكه‌ین، مه‌ پاركه‌ك ل باعه‌درێ چێكریه‌ و كو 60 دونه‌مێن ئه‌ردى دیواردكرینه‌ و بیره‌ك تێدا كۆلایه‌ و هژماره‌كا زۆر یا داران لێ دچینین، پاركه‌ك ل سه‌ر رووبه‌رێ 80 دونه‌مان ژى ل ئاكرێ هاتیه‌ چێكرن و گۆت: مه‌ ل به‌ره‌ هنده‌ك پاركێن دى ب هه‌مان شێوه‌ ل هنده‌ك ده‌ڤه‌رێن دیتر چێكه‌ین.
رێڤه‌به‌رێ دارستان و پاوانان ل پارێزگه‌ها دهۆكێ خویاژى كر، رێڤه‌به‌ریا وان تاقیگه‌ها چاندنا شانا ل پارێزگه‌ها دهۆكێ هه‌یه‌ كو ل هه‌رێمێ و عیراقێ ب تنێ ل دهۆكێ هه‌یه‌ و ئه‌و دو سال بوون مه‌ نه‌شیابوو سه‌ركه‌فتنێ تێدا بینین، به‌لێ ئه‌ڤه‌ ساله‌كه‌ به‌رهه‌مێ وێ ده‌رچوویه‌ كو نێزیكى سێ هزار به‌رهه‌م بوویه‌ و دارا پاولۆنیا بۆ ئێكه‌م جار هاتیه‌ به‌رهه‌مئینان و گۆت: ئه‌ڤ تاقیگه‌هه‌ رێیه‌كا زانستى یا نوویه‌ بۆ زێده‌كرنا داروبارێ دارستانێ.
ل دور داهاتێ داروبارى، ئه‌ندازیارێ چاندێ گۆت: ئه‌م داروبارى ب بوهایه‌كێ گه‌له‌ك كێم دفرۆشین و هێشتا ئه‌م نه‌بووینه‌ رێڤه‌به‌ریه‌كا به‌رهه‌مهێنه‌ر و مه‌ خواستیه‌ ئێدى داروبارى ب بوهایه‌كێ زێده‌تر بفرۆشین دا كو داهاتێ مه‌ زێده‌تر لێ بهێت و گۆت ژى: پتریا ئه‌و دارێن دهێنه‌ چاندن د مینن و ئه‌م وه‌كو رێڤه‌به‌رى چاڤدێریا وان دكه‌ین.

ئه‌ڤرۆ نیوز:
شاره‌زایه‌كێ ئابووری دبێژیت، ژبه‌ر قه‌یرانا دارایی ل هه‌رێما كوردستانێ، بازار یێ لاواز بووی ئه‌ڤه‌ ژی ژ ئه‌گه‌رێ هندێ یه‌ كۆ چو داهاته‌ك دده‌ستێ خه‌لكى دا نینن و هه‌روه‌سا لاوازی و كێمبوونا داهاتی ژى بوویه‌ ئه‌گه‌رێ هندێ كه‌لوپه‌لێن ئێكسپایه‌ر زێده‌ببن، ئابوورناسه‌ك ژی خویا دكه‌ت، لاوازیا حوكمه‌تێ دگێرانا ڕۆله‌كێ ئه‌كتیڤ دا بۆ كێمكرنا بهایێن بازارى كۆ دگونجای بن ل گه‌ل قه‌یرانا دارایی ل هه‌رێما كوردستانێ، دزڤریته‌ نه‌بوونا سیسته‌مه‌كێ دیاركرى یێ ئابوورى ل هه‌رێمێ.
رێبه‌ر ئیسماعیل بۆ ڕۆژناما ئه‌ڤرۆ دێژیت، لاوازیا گێرانا ڕۆله‌كێ ئه‌كتیڤ ژلایێ حوكمه‌تا هه‌رێمێ ڤه‌ دپرسا كێمكرنا بهایێن بازاری بۆ نه‌بوونا سیسته‌مه‌كی ئابووری یێ دیاركری ل هه‌رێمێ دزڤریت، دیسا به‌رزه‌بوونا ڕۆلێ حوكمه‌تێ دناڤ به‌را بوچوونا بازارێ ئازاد و بازارێ سوشیالیستى دا و تێكهه‌لبوونا هه‌ردو یان ونه‌بوونا پلانه‌كا ڕۆهن بۆ ب رێڤه‌برنا ئه‌ڤا هه‌ى و تێكهه‌لبوونا حزبێن حوكمڕان د بازارى دا ب تایبه‌ت دبارێ بازرگانیێ و كه‌رتێ ئاكنجیبونێ دا . هه‌روه‌سا پاوانكاریا چه‌ند كۆمپانیان دبازاری دا دبیته‌ ڕێگر بۆ كێمكرنا بهایان”.
ب دیتنا رێبه‌ری” تاكو حوكمه‌ت بشێت خودى بریار بیت، نه‌كو داخوازكه‌ر، پێدڤیه‌ یان ب ڕێیا كێمكرنا باجێ و پێشته‌ڤانیكرنێ دا ل سه‌ر وان كه‌لوپه‌لان یێن پێدڤى كو بهایێن وان بهێنه‌ خوارێ وه‌ك كه‌لوپه‌لێن خوارنێ و ده‌رمان، هه‌روه‌سا ل سه‌ر وان كه‌رتێن خزمه‌تگوزارى و گرێدای ژیارا خه‌لكى وه‌كو ئاكنجیبون و ئاڤ و كاره‌با گشتى و تایبه‌ت ( مووه‌لیدان) و كلینكێن نوژداران ، یان حوكمه‌ت ببیته‌ هه‌ڤڕك ل گه‌ل كه‌رتێ تایبه‌ت دبازارى دا ، وه‌كو ڤه‌كرنا سوپه‌رماركتێن حكومى كو تێدا كه‌لوپه‌ل ب بهایێن ئه‌رزان بهێنه‌ فروتن ،وڤه‌كرنا كلینگێن حكومى ل ئێڤارى ب بهایێن ئه‌رزان و ب ڤان ڕێیان حوكمه‌ت دشێت ڕۆلێ خو ئه‌كتیڤ بكه‌ت ژ خانا داخازكه‌ره‌كێ لاواز ببیته‌ بڕیاده‌ره‌كێ بهێز، هه‌ر چه‌نده‌ یا ب ساناهى نینه‌، لێ ڕه‌وشا ئه‌ڤرۆ دخازیته‌ پێنگاڤێن وێره‌ك” .
شهاب یاسین، شاره‌زا د بیاڤێ كارگێرى و ئابوورى دا دده‌ته‌ دیاركرن كو حوكمه‌تێ ڕۆله‌كێ لاواز دبازاری دا نینه‌، به‌لكو بازاری لاوازى یا پێڤه‌ دیار بووی، ئه‌و ژى ئه‌گه‌رێ هندێ یه‌ كۆ چو داهاته‌ك دده‌ستێ خه‌لكى دا نینن، هه‌روه‌سا لاوازی و كێمبوونا داهاتی ژى بوویه‌ ئه‌گه‌رێ هندێ كۆ كه‌لوپه‌لێن ئێكسپایه‌ر به‌ر ب زێده‌بوونێ ڤه‌ بچن، لێ یا ل سه‌ر حوكمه‌تى ئه‌وه‌ كۆ دڤێت پلانه‌كا باش و ڕێكخستى هه‌بیت بو كێمكرنا كرێیان، چ كریا دوكان و جهێن بازرگانی، یان ژى خانیان، دیسا ڤه‌گوهاستنێ ژی وهه‌ر كریه‌كا دى ژی”.
ل دووڤ بۆچوونا شهابی، نابیت گرنگیدان تنێ ل سه‌ر ئێك داهات بیت وه‌كو په‌ترۆلێ، به‌لكو دڤێت گرنگی ب بوارێن چاندنێ و گه‌شتوگوزارێ بهێته‌دان، هه‌روه‌سا دڤێت خه‌لك ژی بزانێت مه‌زاختیان گه‌نكى و بۆ كیڤه‌ بكارئینیت یان ژى كێم كه‌ت”.

ئه‌ڤرۆ نیوز:
شڤان محه‌مه‌د وه‌لاتیه‌كێ ده‌ڤه‌را ئامێدیێ یه‌ دیاركر كو گوشتێ سوور گه‌له‌ك یێ گرانه‌ و گۆت” هه‌موو سالان بۆ جه‌ژنا نه‌وروزێ و سه‌یرانێن بوهارێ، ئه‌م گوشتێ سوور دكڕین، به‌لێ ژ به‌ر گیرۆبوونا مووچه‌یان، مه‌ هه‌تا نوكه‌ گوشتێ سوور نه‌كڕیه‌”.
شڤانی زێده‌تر گۆت” د ڤێ ڕه‌وشێ دا، نوكه‌ گوشتێ سوور یێ گرانه‌، د هه‌مان ده‌م دا گوشتێ مریشكان ژى یێ گرانه‌ و پێدڤیه‌ جهێن شوله‌ژێ ڕه‌وشا وه‌لاتیان ل به‌رچاڤ وه‌ربگرن، ژ به‌ر كو خه‌لكه‌ك، ب تایبه‌ت د وه‌رزێ بوهارێ دا، گه‌له‌ك مه‌زاختنان دكه‌ن و دڤێت دوكاندار ژى پیچه‌ك هاریكاریا خه‌لكى بكه‌ن”.
سه‌میع سه‌دیق وه‌لاتیه‌كێ دی یێ ده‌ڤه‌رێ یه‌ دیاركر كو ئه‌وى ئه‌ڤ ساله‌ به‌رهه‌ڤیێن خوه‌ بۆ سه‌یرانێن بوهارێ یا كری و گۆت” خه‌لكێ مه‌ به‌هرا پتر ل وه‌رزێ بوهارێ دچیته‌ سه‌یرانان، هنده‌ك كه‌س ژى ڤان رۆژان بۆ خوه‌ ب ده‌رفه‌ت دبینن كو كه‌لوپه‌لان گران بكه‌ن و پێدڤیه‌ جهێن شوله‌ژێ چاڤدێریا بازارى بكه‌ن و ئه‌ڤه‌ سه‌ره‌راى كو دڤێت دوكاندار ژى وژدانا خوه‌ بده‌ن كارى و ڕه‌وشا كوردستانێ و قه‌یرانا دارایى ل به‌رچاڤ وه‌ربگرن، ئه‌ڤه‌ د ده‌مه‌كێ دایه‌ كو كڕینا گوشتێ سوور ژى بوویه‌ داب و نه‌ریت و ته‌ شیان هه‌بن و نه‌بن دڤێت مرۆڤ هه‌ر بكڕیت”.
ڤه‌گێر ڕێكانى،گوشت فرۆشان ل بازارێ شێلادزێ دیاركر كو ئه‌ڤ ساله‌ به‌رامبه‌ر سالێن بۆرى داخوازیا خه‌لكى بۆ كڕینا گوشتێ سوور 50% یا كێم بووی و بۆ ئه‌ڤرۆ گۆت” هه‌ر سال چه‌ند رۆژان به‌ری جه‌ژنا نه‌وروزێ و سه‌یرانێن بوهارێ، مه‌ به‌رخ و گولك دكڕین و وه‌لاتیان ژى سرا بۆ كڕینا گوشتى د گرت، به‌لێ ئه‌ڤ ساله‌ وه‌سا نینه‌ و هنده‌ك جاران چار ڕۆژان ئه‌م گولكه‌كى نافرۆشین و به‌رى نوكه‌ ڕۆژانه‌ مه‌ گوشتێ گولكه‌كی یان دویان دفرۆت”.
زێده‌تر گۆت” سالا بۆری مه‌ كیلۆیا گوشتێ سوور یێ نه‌رمه‌ ب 15 هزار دیناران و پێهه‌ل د فرۆت و كیلۆیا گوشتێ ب هه‌ستى ڤه‌ ژى مه‌ ب 13 هزار دیناران د فرۆت، ئه‌ڤ ساله‌ ئه‌م كیلۆیا گوشتێ سوور یێ نه‌رمه‌ كێمتر ژ 13 هزار دیناران دفرۆشین و گوشتێ ب هه‌ستى ڤه‌ ژى ب 10 هزار دیناران د فرۆشین، به‌لێ داخوازى ل سه‌ر كڕینێ گه‌له‌ك یا كێمه‌”.
ناڤبرى دیاركر ژى كو ل سالێن بۆرى و ل هه‌ر سێ ڕۆژێن جه‌ژنا نه‌وروزێ وه‌لاتیان گه‌له‌ك گوشت دكڕى و گۆت” سه‌ره‌راى كو مه‌ گوشت یێ ئه‌رزانكری، به‌لێ دیسان دبێژین گوشت هێشتا یێ گرانه‌ و ئه‌ڤ چه‌نده‌ دزڤریت بو وێ یه‌كێ كو ل كوردستانێ كێم كه‌س چێل و گولك و به‌رخان ب خودان دكه‌ن و ب زه‌حه‌ه‌ت ب ده‌ست مه‌ دكه‌ڤن و پتریا جاران ژى خودانكرنا وان ب ڕێیا پرۆژه‌یانه‌ و پرۆژه‌ ژى نه‌شێن داخوازیێن خه‌لكى بجه بینن”.