ئەڤرۆ نیوز:
سایتێ (رای الیوم) یێ ئوردنی، راپۆرتەک ل دۆر پاشەرۆژا دەڤەرا ڕۆژھەلاتا ناڤین و گوھۆڕینێن دێ ل دەڤەرێ پەیدابن ب تایبەتی ل عیراقێ و سووریێ و بەھرا کوردان ژوان گوھۆڕینان پشتی ژناڤچوونا ڕێککەفتناما سایکس – بیکۆ .
سایتێ ئوردنی ئاماژێ ب گوتنێن شارەزایێ ستراتیژی یێ ئوردنی د. ربحی حەلوم دکەت، کو دبێژیت” د سەد سالیا ڕێککەفتنانا سایکس – بیکۆ دا بەرھەڤیێن نەخشەکێ نوو بۆ ڕۆژھەلاتا ناڤەراست د ناڤبەرا ئەمریکا و رۆسیا دا یێن دھێنە کرن”.
حەلوم خویا دکەت” د ھەر سێ ھەیڤێن بھێت دا، دێ شەڕەکێ مەزن ڕوودەت و وەلاتێن عەرەبی ب سامان وخەلکێ خوەڤە دێ بنە قوربانی و د ئەنجامدا دێ دەولەتا کوردی ( ل باکوورێ عیراقێ و سووریێ) ھێتە دامەزراندن ھەتا دگەھیتە بەندەرێ ئسکەندەرۆن ل سەر دەریا سپی”.
ئاماژێ ددەت”دو ھێزێن ھەرێمایەتی دێ ل دەڤەرێ ھەین ئەوژی ئیران و ئیسرائیل کو دێ گرەنتیا بەرژەوەندیێن ئەمریکا و رۆسیا ل وێ دەڤەرێ کەن، ئیرانێ دێ دەستھەلات ل سەر سووریێ و عیراقێ و لوبنانێ ھەبیت، ئیسرائیلێ ژێ دێ دەستھەلات ل سەر مسرێ و سعودیێ و وەلاتێن کەنداڤی و ئوردنێ ھەبیت، وەکو دەستھەلات و ئینتیدابا فرەنسی و بریتانی کو ئەنجامێ وێ بوویە ڕێککەفتنا سایکس – بیکۆ کو ب ڕێیا وێ ڕێککەفتنێ حەزێن دەولەتا عوسمانی ئیفلیج کرین”.
ب گۆرەی وی سایتی، بۆ دیارکرنا سیناریۆیا بھێت یا ھەڤپەیمانیا چارقۆلی یا ئەمریکی رۆسی ئیرانی ئیسرائیلی ب تەوافوقی و لێکگوھارتنا بەرژەوەندیان، ھەموو پێشھاتێن بلەز ئاماژێ ددەنە وێ چەندێ کو ددەمێ کێمتر ژ سالەکێ دا، دو کیانێن نوو دێ ھێنە کوپیکرن، ئەوژی کیانێ کوردی کو د ئەنجامدا ھەرێما کوردستانێ دێ ژ عیراقێ جودابیت و دێ دەولەتا کوردی یا سەربخوە ھێتە ڕاگەھاندن ژ حزبێن پارتی دیموکراتی کوردستان و ئێکەتی نیشتمانی کوردستان و حزبێن ب سەر ئوجەلانی ڤە ( پەکەکە و پەیەدە) ل بن ناڤێ (دەولەتا کوردی یا سەربخوە) کو دێ ژ مووسلێ و کەرکووکێ و ھەتا کوبانی و سنۆرێ وێ دێ گەھیتە باژێرێ لازقیە یێ دەولەتا عەلەوی، کیانێ دویێ ژی یێ عەلەوی یە کو ڤێ دووماھیێ جێگرێ وەزیرێ دەرڤەیێ رۆسی (سیرجی ربابکوف) ئاماژێ پێدای ب پێشوازیا رۆسیا بۆ پێشنیازا دەولەتا فیدرالی ل سووریێ، کو دێ دووبارە ڕژێما ئەسەدی ھێتە بەرھەمئینان بەلێ نە ل سەر ھەموو سووریێ، بەلکو ب ڕێیا دامەزراندنا دەولەتا عەلەوی ل سەر کنارێ سووری کو پایتەختا وێ دیمەشق بیت و ژ لازقیە ل سەر سنۆرێ دەولەتا کوردی ل باکووری و ھەتا کنارێ سووری کو دێ یێ ھەڤسنۆر بیت ل گەل کنارێ لوبنانی یێ دبن دەستھەلاتا حزب اللە دا”.
ل دووڤ وی سایتی، ھەردو دەولەتێن کوردی یا سونی و عەلەوی یا شیعی، دێ ھەڤسەنگیا تائیفی د بەرژەوەندا ھەردو زلھێزان پارێزیت، رۆسیا دێ بەھرا خوە ژ کێکێ وەرگریت ب ڕێیا دانانا بنگەھێن لەشکری یێن بەردەوام ل سەر کنارێ سووری.
ل دووڤ وی شارەزایێ ئوردنی، د قۆناغا گەرم یا بھێت دا، دێ ڕادەیا بجھئینانا ڤێ پلانێ دیاربیت کو ئارمانج ژێ بدەستڤەئینانا خەونا ئیسرائیلێ د پارچەکرنا وەلاتێن عەرەبی یێن ھەڤسنۆر دگەلدا و ببنە دەولەتێن لاواز و گرەنتیا ڕۆژئاڤای ب سەرکێشیا ئەمریکا بۆ بەرژەوەندیێن خوە ل ڕۆژھەلاتا ناڤەراست بەلێ ب ھەبوونا سپۆنسەرەکێ نوو ئەوژی ئیرانا پشتی ڕێککەفتنا ئەتۆمی کو ئەوژی بزاڤێ دکەت کونترۆلێ ل سەر عیراقێ و وەلاتێن کەنداڤی بکەت کو ھندک ژوان ببنە پشکەک ژ ئیمبراتۆریەتا وێ کو ببیتە بەرامبەر ئیسرائیلێ و بزاڤکرنا پارچەکرنا سعودیێ بۆ چەندین وەلاتان.