ئەڤرۆ نیوز:
تایبەمەندەکی نەخۆشیێن پیستی بۆ ئەڤرۆ دیارکر کو گەلەک جۆرین ھەستداریێ ھەنە و ھەموو جۆرێن وێ مەترسیدارن، ھەکە وەلاتی چارەسەریا خوە نەکەن و ھەستداری بگەھیتە ئاستەکێ بلند رەنگە وەلاتی گیانێ خوە ژ دەست بدەت و گەلەک جاران وەرزێ بوھارێ حەساسیێ بۆ مروڤێ چێدکەت.
د. تەلال رەشید، تایبەتمەندێ نەخۆشیێن پیستی دیارکر کو پیستێ مروڤی مەزنترین ئامیرێ بەرگریا لەشێ مروڤی یە و پاراستنا ھەموو لەشێ مروڤ دکەت، دەمێ پیست تووشی حەساسیێ دبیت زووٍر کارتێکرن ل مروڤی دھێتە کرن، ھەکە حەساسی بگەھیتە ئاستەکێ بلند و مرۆڤ چارەسەریێ وەنەرگریت، رەنگە ئەو وەلاتی گیانێ خوە ژ دەست بدەت.
تایبەتمەندێ نەخۆشیێن پیستی دیارکر ژی، ھەکە حەساسی وەکو لیرا ل حەفکا مروڤی پەیداببیت د ڤی حالەتی دا بێھنا مرۆڤی تەنگ دبیت و دگەھتە قووناغەکا زۆر مەترسیدار و ل نەخۆشخانەیان نەساخ دھێـتە نڤاندن ھەتا دھێتە چارەسەرکرن و گۆتژی: بۆ ھندەک مروڤان حەساسی ژ دەرمانان چێدبیت، ھەکە جۆرەکی حەساسی یێ مەزن ژ دەرمانی چێبیت و بگەھیتە ھندەک جھێن مەترسیدار د لەشێ مروڤی دا، ئەم نەچار دبین ئوکسجینی بدەینە نەخۆشی و ھندەک جاران سوندە بۆ نەساخی ژبەر حەساسیێ دھێتە دانان بۆ ھندێ ژ بێھن تەنگیێ بھێتە رزگارکرن و ئەڤ حالەتە پتر ژ بەر دەرمانان دروست دبن.
تایبەتمەندێ نەخۆشیێن پیستی ئەوژی دیارکر کو گەلەک جاران خۆارن دبیتە ئەگەرێ دروستبوونا حەساسیێ د ڤی حالەتی دا رەنگە مروڤ نزانیت ژ کێژ جۆرێ خۆارنێ حەساسی بۆ وی دروست بوویە و گۆت: ھەکە بەردەوام بخۆت دێ ھەردەم تووشی حەساسیێ بیت، پتریا جاران ھندەک جورێن فێقی وەکو فراولە و موز و کێوی و فستەق و بندەق حەساسیێ بۆ مروڤان چێدکەن و ھەکە گولچیسکێن مروڤی ژی ب دروستاھی کارێ خوە نەکەن حەساسی ژێ بۆ مروڤی دروست دبیت.
د.تەلال ئاشکرا کر کو کەرستێن کیمیاوی دبنە ئەگەرێ حەساسیێ بۆ وەلاتیان و گەلەک جاران حەساسی ژ بەر وەرزێ بوھارێ بۆ مروڤی چێدبیت، ژبەر گوھرینا پلێن گەرماتیێ و جل وبەرگ و گەلەک جاران ژ تشتەکێ چیدبیت نە دھزرا مروڤی دایە بۆ نموونە دێ مروڤ دەست دەتە کەرەستەکی دێ حەساسی بۆ مروڤی ژێ دروست بیت و گەلەک جاران روناھی حەساسی چێدکەت و پانسلین وگەلەک جۆرین دی یێن دەرمانان حەساسیێ بۆ مروڤی چێدکەن، بەلێ پێدڤیە ھەر کەسەکێ تووشی حەساسیێ ببیت سەرەدانا نوشداری بکەت بۆ وەرگرتنا چارەسەری و گۆت: مخابن دبیت گەلەک وەلاتی ھەبن قەستا نوشداری ناکەن بۆ چارەسەریا حساسیێ ئەو ب خوە حساسی یا مەترسیدارە پێدڤیە وەلاتی چارەسەریا خوە وەربگریت، چونکو رەنگە یا ب زەحمەت بیت مروڤ بشێت ب دروستاھی خوە ژ حەساسیێ بپاریزت، چونکو ل بەر حەتاڤێ و گەرمێ و خوارنێ و گەلەک کەرستێن دی یێن خوارنێ و ڤەخۆارنێ حەساسی دروست دبیت لەورا ژێ پیدڤیە مروڤی قەستا نوشداری بکەت.