ئەڤرۆ نیوز:
بریاردەرێ لیژنا ئاسایش و بەرگریێ ل جڤاتا نونەرێن عێراقێ، شاخەوان عەبدۆلا بۆ رۆژناما ئەڤرۆ خویاکر:د پرۆژێ بودجا سالا 2016 چ پارە بۆ ھێزێن پێشمەرگێ کوردستانێ نەھاتینە دابینکرن، لەورا دمادەیا 9 و بەندێ پێنجێ دا وەسا ھاتیە نڤێسین دڤێت دبۆدجێ دا ھێزێن پەیادە یێن عێراقی دا پارە بۆ پێشمەرگەی بھێتە تەرخانکرن،لێ لدووڤ پێشبینیێن مە چ پارە نەھاتینە دانان بۆَ پێشمەرگەی، لەورا ئەز وەک بریاردەرێ لیژنا ئاسایش و بەرگریێ ل جڤاتا نوونەرێن عێراقێ، پرۆژە یاسایەک دایە ھەر پێنج فراکسیۆنێن کوردی و ئەندامێن لژنا دارایی ل بەغدا، ژ پێخەمەت ھندێ ب شێین بۆ ماوێ سالەکێ مووچەی بۆ 100ھەتا 150 ھزار پێشمەرگەیان بۆ ھەموو ھەیڤان دابین بکەین، چونکە پێشمەرگە سازیەکا شەرعیە ل عێراقێ و گۆت ژی:نوکە ل عێراقێ پتری ملیۆن کەسان ل سازیێن ئەمنی مووچەی وەردگرن و ئەو پارێ بۆ ھێزێن پێشمەرگەی دیارکری کو نێزیکی 2 ترلیۆن دینارانە نە گەلەکن،ھەروەسا حەشدا شەعبی مووچێ خۆ ژ بۆدجا عێراقێ وەردگرن، لێ ئەم دگەشبینین کو ئەم بشێن ڤێ رێژا پارەی دابین بکەین و کارتێن گڤاشتنێ ھەنە و ئەم دشیێن گڤاشتنێ ل سەر حوکمەتا بەغدا بکەین.
دەرباری نە دانانا بودجا پێشمەرگەی بۆ سالا 2016 ناڤھاتی گۆت:حوکمەتا عێراقێ وێ ھزرێ دکەت کو دێ کوردستان جۆدابیت ژ عێراقێ لەورا بودجێ بۆ تەرخان ناکەن،نەڤێت پێشمەرگە تەجھیز بیت ژ ھەموو لایان ڤە،لێ ئەم ھەر دێ بەرەڤانیێ ژمافێن پێشمەرگەی کەین،مە ھیڤی ھەیە کو ئەم بشێن وەک پۆلیس و لەشکەر و ھەوو ھێزێن دی یێن عێراقێ پارەی بۆ پێشمەرگەی دابین بکەین،ھەکە ئەڤ پارە بۆ پێشمەرگەی ھاتنە دانان حوکمەتا عێراقێ نەچارە ب مەزێخیت،لێ ھەکە پارە نەدا ئەم دەنگی ل سەر بۆدجا سالا 2016 نادەین و دێ بەرەنگاریا وان کەین،چونکی خالێن لاواز یێن حوکمەتا عێراقێ لبەر دەستێ مە ھەنە،ئەم دشێن مفای ژێ بینین،ھەروەسا دبێژیت:نوکە کوردان ئەو رۆلێ بەرێ ل بەغدا نەمایە و ژیانا وان کەفتیە د مەترسیێ دا،لێ دڤێت ئەم فشارێ ل سەر بەغدا درۆست بکەین و بۆ ماوێ ھەیڤەکێ دەوامێ نەکەین و بالیۆزێن وەلاتێن بیانی ئاگەھدار بکەین،کو حوکمەتا عێراقێ زۆریێ لمە دکەت،ژ پێخەمەت بشێین بۆدجێ بۆ پێشمەرگەی دابین بکەین،لێ مخابن ھەتانوکە ئەم ئێک ھەلویست نەبووینە و پێکھاتەیا کوردان ددەستھەلاتا تەنفیزی دا ل بەغدا وەکو جاران نەمایە.
ئەڤرۆ نيوز:
سەرۆکێ لیژنا پەروەردە و خواندن بلند ل پەرلەمانێ کوردستانێ دوھی 25/11/2015 سەرەدانا پەروەردا دھۆک یا رۆژھەلات کر و د ھەڤدیتنەکێ دا دگەل رێڤەبەرێ پەروەردێ سەمیر عەبدولعەزیز کۆم بوو چار خالێن ھاتینە پێشنیارکرن گەنگەشە کرن، کو د بەرژەوەندیا مامۆستا و قوتابیان دابیت و ژ ڤانە تا رۆژا ئێک شەمبی ئەڤ خالە ببنە بریار و بھێتە پەسەندکرن .
د. ئیبراھیم ئەحمەد سمۆ سەرۆکێ لیژنا پەروەردە و خواندن بلند ل پەرلەمانێ کوردستانێ خویا کر پشتی گوھدانا نوونەرێن قوتابیان و مامۆستا و رێڤەبەریا پەیمانگەھا راھێنان و گەشەپێدانا پەروەردەیی ل دھۆکێ کری، ب فەر زانی کۆمبوونەکێ ل نڤیسنگەھا پەرلەمانی گرێ دەن و دووڤچوونەکا جدی بۆ بابەتی بکەن و بنڤیسن و گۆت “د دیدارەکا ڤەکری دا دگەل وەزیرێ پەروەردێ مە داخوازیێن وان گەھاندینە جەنابێ وەزیرێ پەروەردێ”.
چار خالێن گرێدایی قوتابیان و مامۆستایان ھاتنە گەنگەشەکرن و بەرچاڤکرن پێکھاتینە ژ (خالا ئیکێ: قوتابیێن ڤێ پەیمانگەھێ ب بەکالۆریۆس بھێنە ھژمارتن، و خالا دویێ: خواندن ل پەیمانگەھێ ژ سێ کۆرسا ببیتە دو کۆرس ب زێدەکرنا ھەیڤەکا خواندنێ نەکو کۆرس بھێتە زێدەکرن ل سەر خواندنێ، خالا سیێ: پشتی دەرچوونێ رێ بۆ خواندنا ماستەرێ، تا نوکە نەھاتیە دیارکرن کو دێ رێ بۆ ھێتە دان یان نە، لێ دەمێ بریار بۆ پەروەردا بنیات ھاتە دان دێ پاشی گەنگەشە بۆ دەرچوویێن ڤێ پەیمانگەھێ ژی ھێتەکرن. خالا چارێ: گرێدایی وان مامۆستایانە یێن ل ڤێ پەیمانگەھێ کو ئەوێ بەکالۆریۆس ھەی دڤێت ماستەرێ بخوینن یان ماستەر ھەی و دڤێت دکتۆرایێ بخوینن دێ شێن خواندنا خوە بەتە سەری، لێ پشتی مۆلەتێ ژ وەزارەتا پەروەردێ وەردگریت. و بژڤانین ھەتا دەستپێکا حەفتیا بھێت فەرمانەکا ویزاری پێ بدەرکەڤیت و بھێتە بجھئینان.
ئەڤرۆ نیوز:
ھێزێن ئەمنی ل باژێڕێ ھەولێرێ 27 جھێن لەشفرۆشیێ گرتن و سەرۆکا لیژنا ساخلەمیێ ل پەرلەمانێ کوردستانێ ئاشکرا کر، ل پارێزگەھا دھۆکێ جھێن لەشفرۆشیێ نینە و ل سلێمانیێ ژی بەری نوکە ھاتینە گرتن.
زۆلفا مەحموود، سەرۆکا لیژنا ساخلەمی ل پەرلەمانێ کوردستانێ بۆ رۆژناما ئەڤرۆ گۆت “پشتی دووڤچوونەکا ھوور بۆ جھێن لەشفرۆشی تێدا دھێتەکرن ھاتیە کرن، بۆ مە دەرکەفت، زۆر جھێن بازرگانی مینا سەنتەرێن مەساجی و کافتریا و ناڤێن جودا بووینە جھێن لەشفرۆشیێ و ل چەند رۆژێن بۆری مە دەزگەھێ ئاسایشا ھەولێرێ ل دۆر ڤێ پرسێ ئاگەھدار کرینە و شیاینە 27 خانەیێن لەشفرۆشیێ تنێ ل سنوورێ باژێڕێ ھەولێرێ بگرن و نابیت ل بن ناڤێن جودا کارێ لەشفرۆشیێ تێدا بھێتە ئەنجامدان، چونکە دبیتە ئەگەرێ بەلاڤکرنا چەندین نەخۆشیێن مەترسیدار بۆ سەر ژیانا مرۆڤان و ئەڤ کەسە ب شێوەیەکێ نەشەرعی و نە قانوونی ئەڤی کاری دکەن”.
زۆلفایێ گۆت ژی “ل باژێڕێ ھەولێرێ دو جە ھەبوون ب بەلگە مە سەلماند بۆ لەشفرۆشیێ دھێنە بکارئینان و چەندین جھێن دی ژی ھەبوون گومان ل سەرە و ئەگەر جھەک بخوازیت بۆ لەشفرۆشیێ بھێتە بکارئینان، بلا مۆلەتا فەرمی ژ حوکمەتێ وەرگرن، نەک ب ناڤێن جودا بچن لەشفرۆشیێ بکەن، ل دھۆکێ مە پێزانین ھەنە و چ بەلگە نینن خانەیێن لەشفرۆشیێ ھەبن، ل سلێمانیێ ژی بەری نوکە ھاتبوونە گرتن”.
ئەڤرۆ نیوز:
گییرۆبوونا وەرگرتنا پێشینەیا ھەڤژینی و ئاڤاھیان بۆ پێشمەرگەی و ئەو کەسێن خوەبەخشێن ل بەرۆکێن شەری دھێتە رەدکرن کو بەری نوکە ب ناڤێن وەلاتیێن ئاسایی پارە ژ حوکمەتێ وەرگرتینە، پەرلەمانتارەک ژی ئاشکرا دکەت کو ئەڤ ئاریشە یا سیاسی نینە بەلکو ئاریشەکا کارگێری یە و گۆت: “ھندەک کەس ب رێیا ڤێ بڕیارێ فێلان دکەن”.
دلێر ماوەتی، جێگرێ سەرۆکێ لژنا کاروبارێن پێشمەرگە و قوربانیێن جینۆسایدا ل پەرلەمانێ کوردستانێ دیار کر کو ھەتا نوکە ئاریشا وان پێشمەرگێن پێشینێن ھەڤژینی و ئاڤاھیان ب ناڤێ وەلاتیان وەرگرتی نەھاتیە چارەکرن و وەکو فەرمانبەرێن دی ھەر شەش ھەیڤان جارەکێ ھندەک پارە ب ناڤێ پێشینا ھەڤژینیێ دھێتە بڕین و بۆ SNN گۆت: “پێدڤیە ل میحوەرێن ھێزێن پێشمەرگێ کوردستانێ پشتەڤانیا وان پێشمەرگێن د بەرووکێن شەری دا و پێشینەیا ھەڤژینی و ئاڤاھیان ل سەر بھێتەکرن و ب نڤیسارەکا فەرمی بۆ وەزارەتا پێشمەرگەی بھێتە رەوانەکرن و ب رێیا وان بۆ وەزارەتا دارایی یا حوکمەتا ھەرێما کوردستانێ بھێتە ھنارتن”.
ناڤھاتی ئاماژە دا وێ چەندێ ژی کو ھندەک کەس ب ناڤێ پێشمەرگەی فێلان دکەن و نە پێشمەرگەنە بتنێ بۆ دەمێ چەند رۆژان ل میحوەرێن پێشمەرگەی ماینە و داخوازا ھاریکاریێ دکەن داکو دانا قەڕێن پێشینەیان پاشبێخن.
ھەژی گۆتنێ یە کو ل ھەیاما بۆری پەرلەمانێ کوردستانێ بڕیاردابوو قەڕێن پێشینێن ھەڤژینی و ئاڤاھیان ژبەر قەیرانا دارایی و کێمبوونا مووچا بۆ ھێزێن پێشمەرگەی پاشبێخیت ھەتا کو قەیرانا دارایی ل ھەرێمێ چارەسەر دبیت.
ئەڤرۆ نیوز:
شاندەکێ ھەرێما کوردستانێ بۆ وەرگرتنا چەکێ پشکا ئاھێن خوارنێ یا وەلاتیێن ھەرێما کوردستانێ یێن نەھاتین چوویە بەغدا و بڕیارە حەفتیا بھێت ڤەگەرنە ھەرێمێ و پارەی د گەل خوە دا بینن، کو یێ چار ھەیڤێن سالا بۆری نە و بڕیارە 18 ھزار دینار وەکو قەرەبووکرنا کەلوپەلێن خوارنێ یێن د وان چار ھەیڤان دا نەھاتین بۆ وەلاتیان بھێنە دان.
بەری نوکە وەزارەتا بازرگانی یا عیراقێ ڕاگەھاندبوو، ھەمبەر نەھاتنا کەلوپەلێن خوارنێ یێن ھەیڤانە ھەر وەلاتیەک ب کۆژمێ 25 ھزار دیناران دێ ھێتە قەرەبووکرن، پاشی ئەو پارە بۆ 18 ھزار دیناران ھاتە کێمکرن، بڕیارە حەفتیا بھێت پارێ قەرەبووکرنا وەلاتیان بگەھیتە ھەرێما کوردستانێ.
شەوکەت محەمەد، رێڤەبەرێ کۆمپانیا بەلاڤکرنا ئاھێن خوارنێ ل سلێمانیێ دیار کر کو پشتی ژ لایێ وەزارەتا بازرگانی یا عیراقێ ڤە ھاتینە ئاگەھدارکرن، وان نوونەرێن خوە ھنارتینە بەغدا بۆ ئینانا پارێ قەرەبووکرنا کەلوپەلێن خوارنێ یێن ھەیڤانە یێن وەلاتیان و بۆ SNN گۆت: “ئەو پارە ژ پێش ھەرچار ھەیڤێن (نەە، 10، 11 و 12) یێن سالا بۆری یە، 18 ھزار دینار وەکو قەرەبووکرنا کەلوپەلێن خوارنێ یێن د ڤان چار ھەیڤان دا نەھاتین بۆ وەلاتیان بھێنە دان”.
ئاشکرا ژی کر، ئەو نوکە چاڤەرێی ڤەگەریانا وی شاندێ ھەرێمێ نە یێن بۆ ئینانا پارەی چووینە بەغدا و گۆت: “ئەم چاڤەرێینە حەفتیا بھێت ئەو شاندە ڤەگەریتە ھەرێمێ و پارەی د گەل خوە دا بینن، ھەر دەمێ پارە گەھشت دێ دەست ب بەلاڤکرنا وی کەین”.
ئەڤرۆ نیوز:
پشتی ئێخستنا فرۆکا شەری یا روسیایێ ل ئاخا سووریێ، نڤیسەر و رۆژنامەڤانێن شارەزا د وارێ سیاسەتێ دا وەسا دبینن کو تورکیا خوە تووشی قەیرانەکا سیاسی کریە و نە ھەڤپەیمانیا ناتۆ و نە ژی جڤاکێ نێڤدەولەتی پشتەڤانیێ ل تورکیا ناکەت و ئەڤ شاشیا دەستھەلاتێ دشێت تورکیا راکشیتە ناڤ شەرەکی کو تورکیا تێدا زەرەرمەند بیت و بەر ب پارچەبوونێ ڤە بچیت.
حەسەن جەمال نڤیسەر و رۆژنامەڤانێ ناڤدارێ یێ تورکیا د داخویانیەکی دا راگەھاند کو ئێخستنا فرۆکا شەری یا روسیا ب فەرمانا سەرۆک کۆمار ئەردۆگانی ھاتیە ئەنجامدان و گۆت: (ئەز نزانم ئەردۆگان و حوکمەت ب چ ئەقلی خوە دکەنە د ناڤ ئالۆزیێن سووریێ دا و د رەوشەکا کو ناڤێ تورکیا ل پال رێکخستنێن تیرۆرست یێن وەک داعشێ و ئەل نوسرایێ دا دھێتە زمان چاوا دشێت فرۆکێن روسیا کو ل بنگەھێن ئەل نوسرا و داعشێ ددەن دئێخیتە خوارێ، ئەردۆگان و داوود ئوگلۆ ل دووڤ چنە؟ بۆچی وەلاتێ مە دکەنە د ناڤ ئاگری دا کو د وی ئالۆزی و ئاگری دا بێگومان دێ تورکیا تووشی شکەستنێ بیت).
رۆژنامەڤانێ تورکی ھەروەسا راگەھاند ژی کو تورکیا ب دەستێ خوە ھەبوونا روسیا ل سووریێ و رۆژھەلاتا ناڤین ب ھێزتر کر و نھا ب ترس چاڤەرێی بەرسڤا روسیا ماینە. ھەکە وەسا ھزر دکەن دێ روسیا بێ بەرسڤ مینیت د ناڤ شاشیەکا مەزن دانە و گۆت: (ئەم قەبوول بکەین یان نەکەین نە ئەمریکا و نە ژی ئورۆپا و ھەڤپەیمانیا ئەتلانتیک (ناتۆ) بۆ خاترا چاڤێن تورکیا ل گەل روسیا ناکەڤنە شەری و د مژارا شەرێ داعشێ و قاعیدە دا نەشێن ل گەل تورکیا جە بگرن، ژ بەر کو نھا ئورۆپا ب خوە ئێش و ئازارەکا مەزن ژ ھێرشێن تیرۆرستێن ئیسلامی دبینیت و ب سەدان بەلگە ھاتینە بەلاڤکرن کو تورکیا ھاریکاریا وان تیرۆرستان دکەت، ڤێجا دێ چاوا د ئالۆزیا ل گەل روسیا دا پشتا مە بگرن).
فەھیم تاشتەکین رۆژنامەڤان و شارەزا د سیاسەتا رۆژھەلاتا ناڤین دا راگەھاند کو ئەردۆگان و داوود ئوگلۆ پشتی ئێخستنا فرۆکا شەری یا روسیایێ بێی کو چ داخویانیەک بدەن خوە ئاڤێتن ھەمبێزا ناتۆ و خواستن کو ل دژی روسیا ھەلویستەک بھێتە وەرگرتن لێ ناتۆ ئاشکرا کر کو ئەو خوە ناکەتە د ناڤا پرسگرێکا د ناڤبەرا تورکیا و روسیا دا و گۆت: (د کۆمبوونا ناتۆ یێ دا فرەنسا، بەلجیکا، بریتانیا، ھۆلەندا و نەمسا رەخنەیێن دژوار ل تورکیا گرتینە و ئامادەنەبوون کۆمبوونا ناتۆ بھێتە ئەنجامدان و بۆ ڤێ چەندێ ژی ناتۆ چ بریارەک وەرنەگرت و ئاشکرایە کو تورکیا ب تنێ ما، ڤێجا دێ دەستھەلاتدارێن تورکیا چ کەن دا روسیا بەرسڤەکا دژوار نەدەت، ئایا دەستھەلاتدارێن تورکیا دزانن کو ب ئێخستنا فرۆکا روسیا خوە ب فەرمی کرنە پشتەڤانێ تیرۆرێ؟).
فەھیم تاشتەکین ھەروەسا راگەھاند ژی ئەو دەڤەرێن کو روسیا بومبەباران دکەت ل ژێر دەستھەلاتا ئەل نوسرا و کۆمێن تیرۆریست یێ وەک سولتان سەلیم و ئارتێشا فەتح دایە و ئەڤ ھەرسێ کۆمێن تیرۆرست چەند مەە بەرێ ل وێ دەڤەرێ گوندێن ئەرمەنیان سوتاندن و دو گوندێن عەلاویان ب تەمامی ژ ھۆلێ راکرن و ب سەدان وەلاتیێن سڤیل یێن بێ تاوان کوشتن و گۆت: (نھا ئەردۆگان و داوود ئوگلۆ دەرکەڤتنە پێشیا راگەھاندنێ و دبێژن مە بۆ پاراستنا تورکمانان کریە و فرۆکا روسیا سنورێن مە بەزاندیە، ھەکە ئەو ھندە نیشتمان پەروەر و تورکمان پەروەرن بۆ چ دەمێ ل تلەعفەر و دوز خۆرماتۆ ب ھزاران تورکمان ھاتنە کوشتن و رەڤاندن ب خوەدان ل وان دەرنەکەڤتن؟ نھا ئەم قەبوول بکەین یان نەکەین د جڤاکا نێڤدەولەتی دا ناڤێ تورکیا دێ وەک پشتەڤانێ تیرۆرێ ھێتە زمان و ئەو ژی مەزنترین زیانە بۆ وەلاتێ مە).
ل ئالیێ دی وەزیرێ بەرگیریێ یێ روسیا راگەھاند کو نھا وان چەند رێک بۆ بەرسڤ داینا تورکیا دانینە سەر مێزێ و د دەمەکی گەلەک نێزیک دا دێ بەرسڤا تورکیا ھێتە دان و گۆت: (تورکیا پشتەڤانێ رێکخستنێن تیرۆرستە و نابیت جیھان ل ھەمبەر تیرۆرێ و پشتەڤانێن وێ بێدەنگ بمینیت).
ھەروەسا ب ملیۆنان وەلاتیێن روسیا ب رێیا نامە، فەیسبووک، تویتەر و تۆرێن جڤاکی ژ سەرۆکاتیا روسیا خواستن کو بەرسڤەکا دژوار بدەتە تورکیا و د ھەمان دەمی دا ھەرسێ کۆمپانیێن مەزنێن روسیا یێن گەشتیاری ھەموو سەفەرێن گەشتیاری یێن بۆ تورکیا راگرتن و وەزارەتا بازرگانیێ ئینانا کەل و پەلێن تورکیا قەدەغە کر و وەزارەتا بەرگیریێ رێککەڤتنێن سەربازی یێن ل گەل تورکیا ھلوەشاند و وەزیرێ وزێ ژی راگەھاند کو ئەو چاڤەرێی فەرمانا ڤیلادەمیر پوتینن بۆ برَینا گازا سروشتی بۆ تورکیا، کو ئەڤ یەک دێ تورکیا گەلەک تەنگاڤ کەت.
ئەڤرۆ نیوز:
ژێدەرەکێ بەرپرس ل دەستەیا نەزاھێ راگەھاند چەندین کەیسێن گەندەلیێ گەھشتینە وان و نوکە کار ل سەر دھێتەکرن، ئێک ژ وان پارێ سندۆقا وەزارەتا شەھیدانە و ھەتا نوکە چار رێڤەبەرێن گشتی ل سەر ھاتینە دەستەسەرکرن و ب کەفالەت ھاتینە ئازادکرن، لێ ھێشتا ئەو پرسە ئێکلا نەبوویە و گەلەک بەرپرس و کەسێن دی دەستێ ل گەل ھەی و ل رۆژێن بھێت دێ ھێنە دەستەسەرکرن و بۆ رۆژناما ئەڤرۆ گۆت: (ھەر کەسەکێ تۆمەتبار بیت دێ ھێتە دەستەسەر کرن).
ھەمان ژێدەرێ نەڤیای ناڤێ خوە ئاشکرا بکەت گۆت: (خەلکێ کوردستانێ ب رێیا رۆژناما ئەڤرۆ پشتڕاست دکەین، کو کار کرن بۆ نەھێلانا گەندەلیێ یا بەردەوامە و ل حەفتیا بھێت گەلەک تشت ل سەر بادەکێن گەندەلیێ دێ ھێنە ئاشکرا کرن و چو گەندەلکار، د ھەر پۆست و پلەیەکی دا بن قورتال نابن و دادوەرێ دەستەیا نەزاھێ یێ بەردەوامە ل سەر گازیکرنا وان کەسێن دەست د گەندەلیێ دا ھەی).
ئەڤرۆ نیوز:
تێکەلێ ھنگڤینی ئێکە ژ سروشتیترین چارەسەریان بۆ نەھێلانا مویێن سەروچاڤان، چونکی ئەڤ تێکەلە موییان ناھێلیت و پیستی ژی نەرم دکەت، ھەروەسا رۆخساری گەش و جوان دکەت دێ یێ ساخلەم بیت، پشکەکا ڤی پێکھاتێ سروشتی ڤیتامین و کانزایێن دژی ئوکسیدان تێدانە، لەورا پێدڤیە تو ھایدار بی و گەلەک ب ھشیاری بکار بینی، چونکی پێست فرەھترین ئەندامێ لەشی یە و تو چ بدانیە سەر ئێکسەر دێ ھەلکێشیتە ناڤ خوینێ و خانێن لەشی.
پێدڤیێن پێکھاتی:
* دو کەڤچکێن ھنگڤینی.
* دو کەڤچکێن شەربەتا لیمۆیێ.
* کەڤچکەکێ جەھێ قوتای (ئارێ جەھی).
چەوانیا دروستکرنێ:
ھەمی پێکھاتێن ل سەری ھاتینە دیارکرن زۆر ب باشی تێکەلی ھەڤ بکە، پاشان وی تێکەلەی دێ ل وی جھی دەی یێ دڤێت موی لێ نە مینن، پشتی ھینگێ بۆ دەمێ ١٥ خولەکان دێ ھێلییە پێڤە و پاشان ب ئاڤا گەرم دێ شووی، پشتی شویشتنێ دێ ھندەک کرێمی ل سەروچاڤێن خوە دەی.
ئەڤێ کریارێ دو جار ھەتا سێ جاران د حەفتیەکێ دا دووبارە بکە، دێ بینی پشتی ھەیڤەکێ ئەو جھێن تە ل سەر بکار ئینای ب تمامی موی لێ نامینن.
ئه‌ڤرۆ نیوز: ڤه‌ده‌ر ره‌شاڤایی:
پشتی فرۆكه‌ڤانه‌كێ رووسی ژ فرۆكا رووسی یا ژ ئالیێ توركیا ڤه هاتیه ئێخستن رزگاربووی و خویاكری كو به‌ری هێرشێ توركیا چ هۆشداری نه‌داینێ، وه‌زیرێ ده‌رڤه‌یێ رووسیا سێرگی لاڤرۆڤ دیاركر كو توركیا بۆ ئازراندنێ فرۆكا رووسی ئێخستیه.
لاڤرۆڤ توركیا ب پشته‌ڤانیكرنا داعش تومه‌تباركر و گۆت: ل چه‌ند ده‌ڤه‌رێن توركیا كو تیرۆرستێن داعش تێدا گه‌له‌ك بدلێ خوه‌نه، بازاره‌كێ بازرگانیكرنێ ب ئه‌ندامێن له‌شێ مرۆڤی كو ژ له‌شێ كوشتیێن سوری دهێنه ده‌رئانین دامه‌زراندينه .
هه‌روه‌سا لاڤرۆڤ پتر پێڤه چوو تومه‌ته‌كا دی پالدا توركیا و ئاشكرا كر كو داعش د ئاخا توركیا دا پلانێن هێرشێن تیرۆری بۆ سه‌ر وه‌لاتێن دی به‌رهه‌ڤكرینه، لێ دیار نه‌كر لسه‌ر كیژان وه‌لاتان. هه‌روه‌سا ره‌تكر رێ ب چ به‌رپرسه‌كێ توركی بده‌ت كو سه‌ره‌دانا رووسیا بكه‌ت.
ژ ئالیێ خوه‌ڤه سه‌رۆك وه‌زیرێن رووسیا مێدڤێدێڤ گۆت: توركیا به‌رده‌وام سه‌روه‌رییا ئاسمانێ ئیراق و سوریا و ئه‌رمینیا و یونان دبه‌زینیت، و ژنوو نها دڤێـت وانه‌كێ لسه‌ر به‌زاندنا سه‌روه‌ریێ نیشا رووسیا بده‌ت؟ ئه‌ڤ یه‌كه نه به‌هانه‌یه بۆ ئێخستنا فرۆكا رووسی .”
نيشاندان