ئه‌ڤرۆ نيوز:
ژ بەر ھەبوونا چەند جۆرێن تەحینا ئامێدیێ وەلاتی نزانن چو جۆرەک یێ دروستە ، ئەڤ یەکە ژی بوویە جھێ گازندا وەلاتیان. ئێک ژ وەلاتیێن کو بەردەوام تەحینێ دکریت بۆ ئەڤرۆ دیارکر، گەلەک جاران وان تەحینا ئامێدیێ دکری، ژ بەر کو تەحینەکە ژ کونجیێن خوە مالی دھێتە دروستکرن، لێ ھند جاران ھەر ئەو ناڤە لێ تاما وی تەحینێ نە وەکو یا بەری وێ یە و گۆت: ( ل گەلەک مارکێتان کێلویا تەحینێ کو ب ناڤێ ئامێدیێ ب 5 ھزار دینارایە، لێ ئەگەر مرۆڤ ل ئامێدیێ بکریت ئەڤە ب 12 ھزارایە).
کاروان حاجی سەعید بەرپرسێ بنگەھێ چاڤدێریا بازرگانی ل ئامێدیێ بۆ ئەڤرۆ دیار کر، دوورێن ھەشت ئاشێن تەحینێ ل قەزا ئامێدیێ ھەنە و دو ژ وانا ب ئاڤێ کار دکەن و بەھرا پترێ ژی ناڤێ ئامێدیێ ب ئاشێن وان ڤە ھەنە و ئەڤ ئاشە پتر گرنگیێ ب کونجیا خومالی ددەن ژ بیانی و گۆت: (ژلایێ مە ڤە دووڤچوون ل سەر وان ئاشان دھێتە کرن و چاوانیا چێکرنا تەحینا وان و و مێژویا ل سەر و جۆرێ کونجیێ، ھەروەسا ئەدرێس دھێتە لێکولینکرن و ب چو رەنگەمێ ئەم ناھیلێن سەختە د تەحینا ئامێدیێ دا بھێـتە کرن).
دەربارێ جوداھیا بھایێ ل جھەکی بۆ ئێکێ دا ناڤبری خویا کر، ل ل سەر جۆرێ ئاشی و جۆرێ کونجیانە، ھەکە کونجیا خومالی بیت دێ بھایێ وێ باشتر بیت، ھەکە یا بیانی ژی بیت دێ ئەرزانتر بیت).
ناڤبری ئاشکرا کر، ھند ئاشێن تەحینێ ھەنە دھێـتە زانین کو زەیتا تورکی ل سەر تەحینێ دھێتە زێدەکرن، بەلێ ئەڤ تشتە ھەتا نھا ل ئاشێن دەڤەرا ئامێدیێ نەھاتیە روودان.
ئێک ژ خودانێن مارکێتێن کارێ فروشتنا تەحینێ دکەن ب ناڤێ کاروان ئامێدی بۆ ئەڤرۆ دیارکر، ئەو چار جورێن تەحینێ دفروشیت و ھەر ئێک ژی ب بھایەکی یە و ھەموو ژی یێن ئامێدیێ نە و گۆت: (ھند جورێن وان تەحینا یێن ئاشێن بەری نە و ھند ژی یێن کارەبێ نە کو ئاش ب کارەبێ کار دکەت ئەڤێن ب کارەبێ کار دکەن ب ساناھیتر کار دکەن، لێ تاما تەحینا وان یا جودایە ژ تەحینا ئاشێ ب ئاڤێ کار دکەن یان ژی ئاشێن بەری).
ھەروەسا ناڤبری ئاماژە ب وێ چەندێ کر، تەحینا ژ کونجیێن خومالی تاما وێ خوشترە و بھایێ وێ ژی گرانترە، بەلێ ژ بەر کو کونجیێن خومالی زوو خلاس دبن و ب رێژەیەکا گەلەک ناھێنە کرن ل چەمێن دەڤەرێ ژ بەر وێ یەکی ژی تەحینا وێ بھایێ خوە ژ دەست نادەت.
ناڤبری ئەگەرێن جۆرەو جۆرێن بھا و تاما تەحینێ ڤەگەران بۆ جۆرێ ئاشی و جۆرێ کونجیان، ھەروەسا چاوانیا چێکرن و قەلاندنا ڤان کونجیان و گۆت: (ھەکە ئەڤ کونجیە یا خومالی بیت کو کیلویا وێ کونجیا خومالی نێزیکی پێنج ھزار دینارایە و ھەروەسا ب ئاگرێ داران و ل سەر پەلان بھێتە قەلاندن و ب ئاشێ بەری و ل بەر ئاڤێ بھێتە چێکرن وێ گاڤێ ئەڤ جۆرێ تەحینێ دبیتە باشترین جۆر و تامەکا تایبەت یا ھەی، لێ ژ بەر کو زەحمەتەکا مەزن پێرا دھێنە برن تا دھێتە چێکرن و گران ل سەر راوەستیت وێ دەمی دێ بھایێ وێ ژی گران بیت و کیلو تا 12 ھزار دینارا ژی دچیت).
ناڤھاتی دیارکر ژی، ھەکە کونجیێن ڤێ تەحینێ یێن دەرڤە بن و ئاشێ کارەبێ بیت و ھەر ب کارەبێ بھێنە قەلاندن وی دەمی ھەم تاما تەحینێ ھەم ژی بھایێ وێ ئەرزانترە، ژ بەر کو کرینا کونجیان و چێکرنا وێ ب ئەرزانتر ل سەر راوەستیت.
ل دووڤ گوتنا خودانێ ئاشێ پرا عیسێ ل ئامێدیێ قوناغێن دروستکرنا تەحینا خومالی ل ئاشێن ئاڤێ و یێن بەری ب ڤی رەنگی یە دەستپێکێ دێ کونجیان کەنە د برکا ئاڤێ دا بۆ ھەیاما دوو رۆژان تا نەرم دبن دبێژنێ (نماندن) و پاشان دێ بەن قوتن کو بەری نوکە ب میحتان د ناڤ تەلیسان دا دقوتان، لێ نھا ب ماکینێ یە و زووتر دھێنە قوتان و پشتی ڤێ کریارێ دکەنە برکا ئاڤە سویرکێ دا تا کونجی ب سەر ئاڤێ دکەڤیت و گلێش دچنە بنێ ئاڤێ ئەڤ کریارە ژی بۆ کێمتر ژ دەمژمێرەکێ دکێشێت و پاشان دێ کونجیان ھەلگرن ناڤ ئاڤێ و دێ کەنە ناڤ ئاڤا شرین تا تاما خوێ لێ نەمینیت و پاشان دێ بەن کەنە ناڤ فرنیێ دا و ھەتا دقەلن و پشتی سار دبن دێ کەنە ناڤ موخل و بیژینکان دا تا ب باشی پاقژ دبن و دێ بەن کەنە ئاشی دا و دێ تەحین لێ دەرکەڤیت.