ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 21ى شوباتا 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1252 |
| 1 يۆرۆيێ ئه‌ورۆپى | 1385 |
| 1 ليرێ توركى | 420 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز، نيوار محه‌مه‌د سه‌ليم:
پشتى كۆمپانيا كوره‌ك تێليكۆم راگه‌هاندى كو بهايێ په‌يوه‌نديان ل دهۆك و هه‌ولێر ب رێژا 70% كێمكرى، ئه‌ڤرۆ نيوز چاوانيا شێوازێ كێمكرنێ ژى به‌لاڤكربوو لێ ژ به‌ر داخوازيا زۆرا وه‌لاتيان مه ب فه‌ر ديت ب هوورى چاوانيا داشكاندنێ شلۆڤه بكه‌ين.
داشكاندنا ب رێژا 70% يا كوره‌ك نه بۆ هه‌ر ده‌قيقه‌كێ يه يا ئاخفتنێ ئانكو به‌رى نوكه ب 80 دينارێن عيراقى بوو و دێ بيته 57 دينار، به‌لكو شێوازێ وێ يێ جودايه، د روونكرنه‌كێ دا بۆ ئه‌ڤرۆ نيوز ئه‌نده‌زياره‌كێ كۆمپانيا كوره‌ك تێليۆكوم راگه‌هاند كو ئه‌ڤه ب تنێ وه‌كو ئوفه‌ره‌كێ يه بۆ هه‌ردو پارێزگه‌هێن هه‌ولێر و دهۆك.
ل دووڤ ڤێ ئوفه‌رێ پشكداربووى دشێت مفاى ژ په‌يوه‌نديێن درێژ ب تنێ ببينيت ب ره‌نگه‌كى هه‌ر ده‌مێ 10 ده‌قيقا باخڤيت دێ ب تنێ سێ ده‌قيقه بۆ هێنه هژمارتن، ئانكو ب تنێ دێ بهايێ سێ ده‌قيقان ده‌ت ب ره‌نگه‌كى هه‌كه 10 ده‌قيقا پێشتر ئاخفت با دا 800 دينارێن عيراقى چن، لێ نوكه ب تنێ 240 دينار دێ چن.
پشكدار دشێت كورته نامه‌كێ بۆ 263 ب هنێريت و ل وى ده‌مى دێ نامه‌كا پشكداريكرنێ بۆ هێت كو پشكدارى يا كرى و پاشان ژى دێ نامه‌كا دووپاتركرنێ بۆ هێت و پيرۆزباهيا پشكدارى كه‌ت د پشكداريا وێ ئوفه‌را نوو دا، بۆ زانين ئه‌و كورته نامه يا بێ به‌رامبه‌ره.
ئەڤرۆ نیۆز، قائید میرۆ:
پەرلەمانتارەکا پارتی دیموکراتی کوردستان ھێرشکرە سەر حەیدەر عەبادی و دبێژیت، ھاتنا عەبادی تنێ موزایەدەبوویە و چو راستی نەگۆتن.
نەدا مێرگەسۆری، پەرلەمانتارا پارتی ل بەغدا ب ئەڤرۆ نیۆز راگەھاند” ھاتنا ئەڤرۆیا حەیدەر عەبادی سەرۆک وەزیرێن عێراقێ بۆ پەرلەمانی تنێ بۆ موزایەدێ بوویە و بەرچاڤ نەگرتنا ئاریشەیان و پرسێن ھەلاویستیێن ناڤبەرا ھەرێم و بەغدا چو تشتەکێ دی نەبوویە.
مێرگەسۆری گۆتژی”حەیدەر عەبادی خوە ژ پرسیارێن سەرۆکێن کۆتلەیێن پەرلەمانی ڤەدزی، ژبەرکو تنێ دەلیڤە ب سەرۆکێن کۆتلەیان ھاتەدان پرسیارا ل سەرۆک وەزیران بکەن و چو راستی تێدانەبوو ئاخفتنێن عەبادی.
ئەڤرۆ نیوز:
دلڤین محەمەد سەلیم ئەنداما جڤاتا پارێزگەھا ھۆکێ و سەرۆکا لژنا باژێرڤانی و خزمەتگوزاریێن گشتی بۆ ئەڤرۆ دیارکر بۆ کێمکرنا بھایان، ئەم یێن ل سەر کەرتان ھاتینە پارڤەکرن و نوکە کارێ من ل سەر کێمکرنا بھایێن ڤەگوھاستنێ یە دکەین کو ل گەل ژیارا وەلاتیان ب گونجیت.
دلڤینێ گوت ژی”نوکە ئەم مژوولی دانانا میکانزما کێمکرنا بھایا نین و ئەم یێن ل گەل ھەموو سازیێن گرێدای ب ھاتنوچوونێ ڤە روونشتین و ھەموو لایەن دھەڤکار بوون، بەلێ ھێشتا ئەم نە گەھشتینە ئەنجامان” .
محەمەد شیکەیی سەرۆکێ سەندیکا ڤەگوھاستنێ ل دھۆکێ دیارکر، ھێشتا ئەم یێن د قۆناغا دانوستاندنێ دا وھەتا نەگەھینە ئەنجامەکی، نەشیێن چ دیار بکەین.
حەسەن ئیسماعیل شوفێرێ تەکسیێ یە، ب تورەیی ڤە گۆت” دەمێ پانزین بۆ 900 دیناران بلند بووی، من ھەر نەفەر ب سێ ھزاران دبڕن، نوکە ژی ھەر ب سێ ھزاران نەفەران دئینم و دبەم” گوت ژی” نیڤەکا ترومبێلا قەرە ل سەر من و ئەز نەشێم نەفەران بۆ ھەر جھەکی بکەمە دو ھزار دینار، چونکی رەوشا من یا ئابووری گەلەک یا نەخوەشە، دسەر ھندێ ڕا ئەم ژی ھزرا ڕەوشا خەلکی دکەین”.
دلشێر محەمەد عەلی، فیتەرە، دبێژیت”ڕەوشا کارێ مە یێ پێشەسازیێ یا خرابە و ھەر کارێ ئەم دکەین، دێ بێژن ب قەر و ئەم ب ھەیڤان وان کەسان نابینین ھەتا کو جارەکادی ترۆمبێلا وان ژ کاردکەڤیت و پێدڤی مە دبنەڤە، ژبەر ھندێ ئەو تشتێ ب ساناھی بیت، ئەم دشێین بھایێ وان کێم بکەین بۆ یێن دزانین دێ پاران دەن، چونکی کارێ مە ژی ل کێمیێ دایە و ئێدی مە ئەو باوەریا بەرێ ب کاری نەمایە، بەلێ ژبەر ڤێ ڕەوشێ و قەیرانێ، ھەتا ڕادەکێ باش مە بھا و حەق دەستێ خوە یێن کێمکرین”.
ئەڤرۆ نیوز:
ستێرا بەرازیلی و یانا بەرشەلۆنا نەیمار حەزا خوە بۆ کرنا یاریێ ل گەل ھەلبژارتیێ ئولومپی یێ بەرازیل دیارکری یە ئەوا بریارە ل ھاڤینا ئەڤ سالە ل وەلاتێ بەرازیل ھەڤرکیێن وان بھێنەکرن.
ل دۆر ئەوان داخویانیێن نەیماری بۆ کرنا یاریێ ل گەل ھەلبژارتیێ بەرازیل یێ ئولومپی یانا بەرشەلۆنا ھاتیە دەنگ کو دیارکری یە ئەو ناخوازن یاریێ ل گەل ھەلبژارتیێ ئولومپی بەرازیل بکەت ژبەرکو دو قارەمانیا ل دیڤ ئێک ئەو یاریێ بۆ ھەلبژارتیێ بەرازیل بکەت دێ ماندی بوونەکا مەزن گەھیتە ستێرا ئەوان یا بەرازیلی بۆ سالا بھێت ژبەرکو ئەو دێ پشکداری ل گەل ھەلبژارتیێ بەرازیل یێ ئێکێ ژی د قارەمانیا کوپا ئەمریکا دا ژی کەت.
رۆژنامەیێن نێزیک ل یانا کەتەلونی وەسا دایە دیارکرن راھێنەرێ بەرشەلۆنا لویس ئەنریکی دیارکری یە ئەو رێکێ نادەتە نەیماری دو قارەمانیا ل دیڤ ئێک پشکداریێ ل گەل ھەلبژارتیێ وەلاتێ خوە بکەت ژبەرکو ئەو دێ توشی ماندی بوونەکا مەزن بیت دێ بیتە ئەگەرێ کارتێکرنێ ل سەر شیانێن لەشی یێن وی.
ژلایەکێ دیڤە چەند رۆژنامەیێن ئیسپانی ژی وەسا دیارکری یە نەیمار کەڤتیە دناڤبەرا ئاگرێ وەلاتێ خوە و یانا کەتەلونی دا ژبەرکو ئەو دخوازیت یاریێ بکەت ل گەل ھەلبژارتیێ ئولومپی یێ بەرازیل و دبیت کرنا یاریێ ل گەل ھەلبژارتیێ ئولومپی ئاریشە دناڤبەرا نەیمار و بەرشەلۆنا دا پەیدابن و بیتە ئەگەرێ ب جھـ ھێلانا یانا کەتەلونی ل سالا بھێت ,
ئه‌ڤرۆ نيوز:
بەرپرسەکێ پارتی دیمۆکراتی کوردستان ئاشکرا کر کو پارتی ل بەغدا سکالا ل سەر وان ئالیان تۆمارکریە کو گەفان ل وەلاتیێن کورد دکەن بۆ دەرکەفتنێ ژ باژێرێ بەغدا و گۆت: “ھەتا نوکە ھژمارەکا وەلاتیێن کورد ژبەر گەفێن تێنەکرن مالێن چۆلکرینە و ئاوارەی ھەرێما کوردستانێ بووینە”.
ئیسماعیل سایەمیر، جێگرێ بەرپرسێ لقێ پارتی دیمۆکراتی کوردستان ل بەغدا بۆ رۆژناما ئەڤرۆ دیار کر کو گەف کرن ل سەر وان کوردێن ل باژێرێ بەغدا د ئاکنجی یا بەردەوامە و رۆژانە ب رێیێن جودا داخواز ژ وان دھێتە کرن کو باژێرێ ناڤبری بجە بھێلن و گۆت: “ھەتا نوکە چەندین خێزانێن کورد مالێن خوە بجە ھێلاینە و ئاوارەیی باژێرێن ھەرێما کوردستانێ بووینە و ل دووڤ پێزانینێن مە دەستەکێ سیاسی ل پشت ڤان گەفان ھەیە کو کوردان نەچار دکەت باژێرێ بەغدا بجە بھێلن”.
ناڤھاتی ئاماژە دا وێ چەندێ کو ھندەک ژ وان گەفان ژ لایێ خودانێن نڤیسینەگەھێن کرین و فرۆتنا ئەر و خانیان ل کوردان دھێنە کرن دا کو کورد بەغدا بجە بھێلن و ئەو مۆلکێن وان بۆ خوە ئەرزان بکرن، بەلێ ب دیتنامن ئەڤ گەفێن دھێنەکرن بتنێ ژێدەرێ مەترسیێ نینن، چونکی ھندەک دەستێن دی ژی ل پشت ھەنە.
جێگرێ بەرپرسێ لقێ پارتی دیمۆکراتی کوردستان ل بەغدا دیار کر وان وەکو پارتی دیمۆکراتی کوردستان سکالا تۆمارکریە و داخوازا ڤەکۆلین و ئاشکراکرنا تۆمەتباران کریە و گۆت: “پاراستنا کوردێن بەغدا دکەڤیتە ستوویێ حوکمەتا عێراقێ ژبەر ڤێ چەندێ پێدڤیە حوکمەتا فیدڕال دەمەکێ زوو ڤان دەستان ئاشکرا بکەت داکو بگەھنە سزایێ خوە”.
ئه‌ڤرۆ نيوز:
بڕیارە ب شێوەیەکێ فەرمی سەرۆکایەتیا جڤاتا وەزیران بڕیارێ ل دۆر کێمکرنا قستێن وەبەرھێنانێ بۆ ئەڤان وەلاتیان دەر بکەت یێن یەکێن ئاکنجیبوونێ ب شێوەیێ قست کڕین، بەرپرسەکێ دەستەیا وەبەرھێنانێ ژی دبێژیت “دێ رێنما و بڕیار بۆ دانا قستان ھێنە دەرکرن، ب مەرجەکی دگەل قەیرانا دارایی بگونجن”.
سامان عەرەب، ئەندامێ دەستەیا گشتیا وەبەرھێنانێ ل ھەرێما کوردستانێ بۆ رۆژناما ئەڤرۆ گۆت “ژبەر قەیرانا دارایی و گیروبوونا مووچێ فەرمانبەران وەلاتیێن ھەرێما کوردستانێ نەشێن وەکە پێدڤی قستێن خوە یێن کڕینا یەکێن ئاکنجبوونێ بدەن، لەوڕا جڤاتا بلندا وەبەرھێنانێ و ئێکەتیا وەبەرھێنەران چەندین کۆمبوون بۆ ڤێ مەرەمێ ئەنجام داینە و دانوستاندن ل دۆر ڤەدیتنا میکانیزمەکێ بۆ دانا قستان ھاتینەکرن، ب مەرجەکی رەوشا وەلاتیان بەرچاڤ بھێتە وەرگرتن و بڕیارە ب نڤیسارەکا فەرمی سەرۆکایەتیا جڤاتا وەزیران بھێتە ئاگەھدارکرن و جڤاتا وەزیران ب شێوەیەکێ فەرمی کۆمپانیێن وەبەرھێنانێ ئاگەھدار بکەت و قستێن وەلاتیان کێم بکەن و ل دەمەکێ نێزیک دێ ئەڤ پێنگاڤ ھێتە ھاڤێتن”.
سامانی گۆت ژی “مە داخواز کریە ھژمارێن حسابی ل بانکێ بۆ ڤەگەڕاندنا پارێ قستێن یەکێن ئاکنجیبوونێ بھێنە ڤەکرن و دەستەیا وەبەرھێنانێ ژی چاڤدێریا پڕۆسێ بکەت د ناڤبەرا وەبەرھێنەر و وەلاتیان دا، ئەم پشتڕاستین حوکمەت دێ پێنگاڤێن باش ھاڤێت بۆ بەرژەوەندیا وەلاتیێن ھەرێما کوردستانێ و رەوشا ئابوورا وەلاتیێن قستی ددەن بەرچاڤ دێ ھێتە وەرگرتن”.
ئه‌ڤرۆ نيوز:
پشتى ئه‌نجامدانا نشته‌رگه‌ريه‌كا سه‌ركه‌فتى بۆ پێ وى، هشيار زێبارى، وه‌زيرێ دارايێ عيراقێ نوكه ل له‌نده‌نا پايته‌خێ بريتانيا چاره‌سه‌ريا سرۆشتى وه‌ردگريت و بۆ كاركرنێ ژى رۆژانه رێنمايان ب به‌رپرسێن وه‌زاره‌تێ دده‌ت.
فازل نه‌بى، بريكارێ وه‌زاره‌تا دارايى يا عيراقێ بۆ رووداو راگه‌هاند: هشيار زێبارى وه‌زيرى دارايى يێ عيراقێ يێ ل له‌نده‌نا پايته‌ختێ بريتانيا و نشته‌رگه‌ريه‌كا سه‌ركه‌فتى بۆ پێ وى هاتيه ئه‌نجام دان و رۆژانه چاره‌سه‌ريا سرۆشتى وه‌ردگريت.
ده‌رباره‌ى ڤه‌گه‌ريانا زێبارى بۆ عيراقێ فازل نه‌بى گۆت: “هێشتا هشيار زێبارى ژى به‌رسڤا وێ پرسيارێ نزانيت و هه‌ر ده‌مێ د چاره‌سه‌ريا وى يا سرۆشتى دا ديار بوو كو ره‌وشا وى يا باشه و دشێت كار بكه‌ت دێ ڤه‌گه‌ريت”.
ئاماژه ب وێ چه‌ندێ ژى كر كو پشتى چوونا هشيار زێبارى كار خاڤ نه‌بوويه وه‌كو به‌رى نوكه كار دهێنه ئه‌نجام دان و رۆژانه ب رێيا په‌يوه‌نديێ رێنمايان دده‌ت.
ئەڤرۆ نیوز، ھەژار مەعروف:
زاروکینیا خوە حەژێکەر و پشتەڤانێ یاریکەرێ نیڤدەولی یێ کورد و یانا دھۆک خالد موشیر بوو ل سالا ٢٠٠٨ وێنەیەک وەکو بیرھاتن ل گەل یاریکه‌رێ ھەلبژارتیێ عیراقێ یێ بەری نوکە و یاریکه‌رێ نوکە یێ یانا دھۆک گرت و پشتی بورینا ھەشت سالان جارەکا دی وێنە بۆ ھەمان کەسێ ھێتەگرتن لێ ئەڤ جارە ژلایێ رۆژنامەڤان ڤە بۆ ھاتەگرتن ل دەمێ یاری دژی خالد مشیر کر و ئەوێ وێنە بۆ بیرھاتن گرتی شیان ب ھەڤکاریا ھەڤالێن خوە سەرکەفتنێ ل سەر یانا دھۆک توماربکەن.
ھوزفان زاھد محەمەد یاریکەرێ یانا گارە ئەوێ ل وەرزێ ئەڤ سالە ژ یانا ھەلو ھاتیە ڤەگوھاستن بۆ ناڤ رێزێن پێکھاتیێ تیما گارە چیروکا وی وێنەی بۆ ئەڤرۆ نیوز گوت: ئەز گەلەک داخباری ئاستێ یاریکەر خالد مشیری مە ھەردەم خەونا من بوو ئەز یاری بەرامبەر ئەوی بکەم یان ل گەل ئەوی بکم.
ھوزفان دایکبوویێ ١٩٩٣ ئەو چەندە ژی دیارکر ئەو وێنە ل سالا ٢٠٠٨ ھاتیە گرتن و وی دەمی ئەز وەکو پشتەڤانەک ھاتمە پێش یاریان و پاش ل سالا ٢٠١٠ ئەوی پەیوەندی ب تیما لاوێن ھەلو کر و پاش یێ بەردەوام بۆ ل گەل ھەمان یانە بۆ چار وەرزان ل گەل یانا ھەلو یاری دخولا پلا ئێک و پلا نایاب دا کریە.
نيشاندان
