ئەڤرۆ نیوز:
جەنەرال محەمەد پاکپور فەرماندارێ ھێزێن ئەردی یێن پاسدارێن ئیرانێ د رێورەسمەکا سەربازی ل تەھرانێ ئاخڤی و دیار کر کو رەوشا رۆژھەلاتا ناڤین گەلەک ئالۆزە و رەنگە شەرەکی مەزن ژی روو بدەت، لێ ئیرانێ سنۆرێ خوە گەلەک باش پاراستینە، ھێزێن عیراقی نھا وەک جاران ل سەر سنۆرێ مە ب ھێز نینن و گەلەک خالێن مە یێن سنۆری ل دەستێ PKK دانە و ئەم رۆژانە چاڤدێریا وان دکەین و گۆت: (ھەکە ئەو شاشیان بکەن و ئاریشان بۆ بەرژەوەندیێن مە دروست بکەن ئەم دێ ب توندی ھێرشی وان بکەین، لێ ئەو د رەوشا نھا دا نەشێن چو ئاریشان بۆ ئیرانێ دروست بکەن).
فەرماندارێ پاسدارێن ئیرانێ ئەو یەک ژی دیار کر کو ژ سالا ٢٠١١ ڤە ھەتا نھا ب ھزاران سەربازێن مە ل دەرڤەی سنۆرێ ئیرانێ پشکداری د گەلەک شەران و ئۆپەراسیۆنان دا کرینە و وان بەرھەڤیەکا مەزن بۆ ھەر پێشھاتەکێ یا ھەی، ل ئالیێ دی مە شیایە د ماوەیێ چەندین سالێن بۆری دا چەکێن گران و پێشکەڤتی دروست بکەین و ئەڤرۆکە ئەم دشێین بەرسڤا ھەر مەترسیەکێ ل سەر ئاخا خوە بدەین و گۆت: (نھا چ مەترسی ل سەر وەلاتێ مە نینن و ھەموو سنۆرێن مە ژی د پاراستی نە، لێ دیسان ژی ل ھەمبەر ھەر پێشھاتەکێ مە بەرھەڤیێن تەمام کرینە و ناھێلین چو ھێزەک مەترسیێ بۆ ئاسایشا وەلاتێ مە دروست کەت).

ئەڤرۆ نیوز:
رۆژنامەکا ئەمریکی دیار دکەت کو ھەرچەندە نھا پەیوەندیێن تورکیا و ئەمریکا ژ بەر پێشڤەچوونێن ھێزێن کوردی ل رۆژئاڤایێ کوردستانێ و شەرێ ل دژی داعشێ تێک چووینە لێ ئەمریکا چو دەمەکێ ژ بەر کوردان دەستان ژ تورکیا بەرنادەت و ھەروەسا ئەمریکا چو دەمەکێ کوردێن رۆژئاڤا ژی ب تنێ ناھێلیت چونکو ئەمریکا نەڤێت روسیا ل رۆژئاڤایێ کوردستانێ بھێز کەڤیت.
رۆژناما نیویورک تایمز د راپۆرتەکێ دا دیار کریە کو پێشڤەچوونێن ھێزێن کوردی ل رۆژئاڤایێ کوردستانێ و ئازادکرنا چەندین دەڤەرێن ستراتیژی ژ ئالیێ ھێزێن سووریا یا دیموکراتیک وەسا کر کو تورکیا ھەست ب مەترسیەکا مەزن ل سەر سنۆرێ خو بکەت و ژ بەر ھندێ ژی چەندین رۆژ تورکیا ناڤەندێن یەکینەیێن پاراستنا گەل بومبەباران دکەت، مەترسیا تورکیا ژ ھندێ دھێت کو وێ نەڤێت ھێزەکا سەر ب پارتیا کرێکارێن کوردستانێ کو تورکیا وان وەک تیرۆرست دبینیت ل سەر سنۆرێ وێ بھێز کەڤیت و ژ بەر ھندێ ژی ئەردۆگان چەندین رۆژن بزاڤێ دکەت کو ئۆباما و سەرکردێن دی یێن رۆژئاڤا پشتەڤانیێ ل وێ ھێزێ نەکەت و پشتەڤانیێ ل ھێرشێن تورکیا بکەت.
د پشکەکا دی یا راپۆرتێ دا ھاتیە دیار کرن کو ئەمریکا دبینیت ئەڤرۆکە تنێ ھێزا کو دشێت ل سووریایێ شەرێ داعشێ بکەت و وان بدەتە راگرتن ھێزێن کوردی نە و ژ بەر ھندێ ژی سەرەرای نەرازیبوونێن تورکیا ژی ئەمریکا وان ب تنێ ناھێلیت و سەرەدانا نوونەرێ تایبەتێ ئەمریکا بۆ کۆبانێ و رۆژئاڤایێ کوردستانێ نیشا ددەت کو ئەمریکا گرنگیەکا مەزن ددەتە رۆژئاڤا و یا بەرھەڤ نینە ژ بەر تورکیا دەستان ژ رۆژئاڤایێ کوردستانێ بەردەت.
د راپۆرتێ دا ئاماژە ب ڤێ خالێ ژی ھاتیە کرن کو ئەمریکا ژ تورکیا پشتراست نینە و گومانێن جدی ل سەر ھاریکاریا تورکیا بۆ داعشێ و جەبھەت ئەلنوسرا ھەیە و ژ بەر ھندێ ژی ئەمریکا نەڤێت ئەو ھەر دو رێکخراوە ل رۆژئاڤایێ کوردستانێ بھێز کەڤن و ژ بەر ھندێ ژی ئەمریکا پشتەڤانیێ ل ھێزێن سووریا یا دیموکراتیک و یەکینەیێن پاراستنا گەل دکەت.
ل ئالیێ دی دەزگەھێن راگەھاندنا تورکیا ژی دیار دکەن کو ئەردۆگان بزاڤەکا مەزن دکەت کو بشێت ب رێیا ئەمریکا و ئورۆپا ئاستەنگیان ل ھەمبەر پێشڤەچوونێن یەکینەیێن پاراستنا گەل دروست بکەت، ئەلمانیا نھا تا رادەیەکا باش ھاریکاریا تورکیا دکەت، لێ ئەمریکا و پرانیا وەلاتێن ئورۆپا ل دژی سیاسەتا تورکیانە ل ھەمبەر رۆژئاڤایێ کوردستانێ و ناخوازن کوردان ل سووریایێ ب تنێ بھێلن.