ئەڤرۆ نیوز:
سەعد حەریری سەرۆکێ بزاڤا پاشەرۆژا لوبنانێ د داخۆیانیەکێ دا بۆ دەزگەھێن راگەھاندنێ دیار کر کو ئیران یا بزاڤێ دکەت کو ب چەکی و گەف و کوشتنان پاشەرۆژا گەلێ لوبنانێ دیار کەت و دەستێوەردانێ د ھەموو کاروبارێن وەلاتێ مە دادکەن، لێ ئێدی ئەو یەک ب چو رەنگەکێ ناھێتە قەبوول کرن و دڤێت بەرپرسێن ئیرانێ ڤێ یەکێ باش بزانن کو لوبنان ب چو رەنگەکێ نابیتە پارێزگەھەکا ئیرانێ و یێن خەیالێن وەسا دروست دکەن ژی بلا زوو ژ خەوێ ھشیار ببن.
حەریری ئەو یەک ژی دیار کر کو ئیرانێ دڤێت ب رێیا ھندەک ھێزان لوبنانێ وەک وەلاتەک ل دژی سعوودیێ و وەلاتێن دی یێن ھەرێما رۆژھەلاتا ناڤین نیشا بدەت، لێ ئەز ب رەنگەکێ ئاشکرا دبێژم کو لوبنان وەلاتەک سەربخوەیە و خەلکێ لوبنانێ ئەو شیان ھەنە کو سەبارەت ب ھەموو بابەتەکێ ڤە بریارێن خوە بدەن و چو پێدڤیا مە ب بەرپرسێن ئیرانێ نینە کو خوە وەک خەمخورێ گەلێ مە نیشا بدەن و ب رێیا ھاریکاری کرنا بزاڤێن ھشکباوەر ئالۆزیێن ناڤخوەیی ل وەلاتێ مە دروست کەن و گۆت: (ئەز ب باوەرم خەلکێ لوبنانێ ئەڤرۆکە پتر ژ ھەر دەمەکێ یێ ھشیارە و دبیت کا ئیرانێ چاوا دڤێت یاریێ ب چارەنڤیسێ خەلکێ مە بکەت، ژ بەر ھندێ ژی سەرەرای ھەبوونا ناکۆکیان دڤێت ھەموو ھێزێن سیاسی یێن لوبنانێ ل دژی دەستێوەردانێن ئیرانێ خوەدان ئێک ھەلویست بن و نیشا ھەموو کەسەکێ ژی بدەن کو ئەم ناھێلین لوبنان ببیتە پارێزگەھەکا ئیرانێ).

ئەڤرۆ نیوز:
ئالۆزیێن د ناڤبەرا تورکیا و روسیا دا رۆژ ب رۆژ دژوارتر دبن و پشتی ھێرشێن تورکیا بۆ سەر رۆژئاڤایێ کوردستانێ مەترسیا شەرەکی ھەرێمی یێ دروست بووی و زانایێن سیاسەتێ ھشیاریێ ددەنە حوکمەتا تورکیا کو دەست ژ سیاسەتا خوە یا دوور ژ ئەقلێ سەردەمی بەردەت و ھەموو پارتێن سیاسی ژی ل دژی ھێرشێن بۆ سەر سووریێ یێن راوەستیاین و دیار دکەن کو ئەردۆگان وەلات بەر ب پارچەبوونێ ڤە دبەت.
پشتی ھێرشێن تورکیا بۆ سەر ئاخا رۆژئاڤایێ کوردستانێ ئالۆزیێن ل ھەرێمێ و تورکیا زێدەتر بەرفرەە بووینە و وەلاتێن زلھێز ھوشداریێ ددەنە حوکمەتا تورکیا کو سەروەریا ئاخا سووریێ بنپێ نەکەت.
د ڤێ دەربارێ دا نۆم چۆمسکی نڤیسەر و زانایێ ئەمریکی د سمینارەکی دا ل واشنتۆنێ راگەھاند کو دەستھەلاتا تورکیا ب کریارێن خوە یێن ل دژی سووریێ و کوردان دخوازیت ئەمریکا و روسیا بھینیتە ھەمبەرێ ھەڤدو و شەرەکی ھەرێمی دروست بکەت و گۆت: (دەستھەلاتداریا تورکیا ب تایبەت ژی ئەردۆگانێ سەرۆک کۆمار قەبوول ناکەت کو رۆلێ وان د پاشەرۆژا سووریێ دا نەبیت و بۆ ڤێ چەندێ بەردەوام ل دووڤ دروستکرنا ئالۆزیان دگەریت و شەرەکی ھەرێمی د بەرژەوەندا خوە دا دبینیت، لێ نە ئەمریکا و نە ژی روسیا نە بەرھەڤن بۆ تورکیا شەرێ ھەڤدو بکەن و دەستھەلاتدارێن ئەمریکا ژی وەک بەرێ نێزیکی تورکیا نابن و حوکمەتا تورکیا ب دروستکرنا ئالۆزیان تۆمەتبار دکەن ئەو یەک ژی وەسا خوەیا دکەت کو ئێدی تورکیا گرانیا خوە یا ل ھەرێمێ و ئورۆپا ژ دەست دایە و رۆژ ب رۆژێ تورکیا ب تنێ دمینیت).
نۆم چۆمسکی ھەروەسا راگەھاند ژی کو رۆژھەلاتا ناڤین ئێدی ب چو رەنگەکی نازڤریتە ڤە وەک سەردەمێ بەری سالا ٢٠١٠ و روسیا و ئەمریکا ھەتا ئاستەکی بلند ل سەر پارڤەکرنا داھاتیێن سیاسی، ئابووری و جوغرافی ل رۆژھەلاتا ناڤین ل ھەڤ کرینە و گۆت: (ھەم روسیا و ھەم ژی ئەمریکا سیاسەتا تورکیا یا ڤان چەند سالان وەک سیاسەتەکا دوور ژ ئەقلێ سەردەمی ب ناڤ دکەن و ھەلویست و گەف و کریارێن تورکیا ب جدی وەرناگرن و ھەری داویێ ھێرشێن تورکیا بۆ سەر کوردێن باکور و تۆپبارانکرنا ئاخا رۆژئاڤایێ کوردستانێ ژی بوویە سەدەمێ ڤێ یەکێ کو تورکیا ژ ھەموو حساباتێن ل رۆژھەلاتا ناڤین بھێتە دوورخستن و ھەردو دەولەتێن زلھێز ھەم ل سەر فیدراسیۆنا ل سووریێ و ھەم ژی ل سەر بەرژەوەندیێن دو ئالی ل ھەڤکرینە و نە بۆ تورکیا و نە ژی بۆ ئالیەکی دی نە ئامادەنە شەرێ ھەڤدو بکەن).
ھەر د ڤێ دەربارێ دا جەنگیز چاندار رۆژنامەڤانێ ناڤدار یێ تورکیا ژی راگەھاند کو ئەو باوەر ناکەت تورکیا بکەڤیتە ئاخا سووریێ و رۆژئاڤایێ کوردستانێ و گۆت: (جیھانا ئەڤرۆ رێ نادەت کو تورکیا ھەسپێ خوە ل رۆژھەلاتا ناڤین ب دلێ خوە بھاژوت و سیاسەتا نھا یا حوکمەتێ تورکیا ژ ھەر ئالی ڤە بێ بھا کریە و نە د ناڤ وەلات و نە ژی ل دەرڤەیێ وەلات پشتەڤانیا ھێرشێن ل دژی سووریێ ناھێنە کرن و ھەکە حوکمەت رژدیێ ل سەر کوورکرنا ئالۆزیان و ھێرشکرنا سەر کوردان بکەت دێ بیتە سەدەمێ تێکچوونا حوکمەتا ئاکپارتی د وارێن ئابووری، سیاسی و جڤاکی دا دێ شکەستنەکا مەزن دروست کەت و نە (ناتۆ) نە ژی ئەمریکا نە ئامادەنە د ڤێ رەوشا نھا دا ھەڤکاریا تورکیا بکەن و روسیا و ئیران ژی بۆ پاراستنا سووریێ ژ ھەر دەمی زێدەتر د رژدن).
ل ئالیێ دی وەزیرێ پاراستنا تورکیا ل تەلەفزیۆنا TRT1 یا تورکیا پشکداریا بەرنامێ سیاسەتێ بوو و راگەھاند کو وان د ناڤ دو رۆژان دا ب دەھان جاران ل بنگەھێن یەکینەیێن پاراستنا گەل داینە و گۆت: (ژ ئالیێ سووریێ و دەڤەرێن د بن کۆنترۆلا YPG ڤە ل دژی مە ھێرش ھاتینە کرن و بۆ ڤێ چەندێ د چارچۆڤێن قانوونێن نێڤدەولەتی دا مە مافێن خوە یێن بەرسڤدانێ ب کار ئیناینە و ھەکە ھێزێنYPG دەست ژ فرۆکخانا مانخێ بەرنەدەن و دۆرپێچا ل سەر عەزازێ رانەکەن ئەم دێ بەردەوام بن د بۆمبە باران کرنا تیرۆرستێن YPG دا).