ئه‌ڤرۆ نیوز:
پشتى ریال مه‌درید شڤێدى به‌رامبه‌ر سیڤیلیا خوساره‌تبووى ب 3-2، راهێنه‌رێ ریال مه‌درید رافایل بینیتێز راگه‌هاند كو هنگاڤتنا راموس ئه‌و نه‌چاركرن كو وى بگوهرن.
رافایل بینیتێز هیڤى خواست پشتى ڤێ خوساره‌تیێ یانا وى به‌رامبه‌ر به‌رشه‌لونه یاریه‌كا باش بكه‌ن.
رافایل بینیتێز به‌حسێ نه‌پشكداریكرنا جیمس د گێمێ ئێكێ دا كر و گوت” ئه‌و نه‌دشیا زێده‌تر ژ 30 ده‌قیقا یاریێ بكه‌ت، له‌وما د گێمێ دوێ دا من پشكدار كر”
ئه‌ڤرۆ نيوز:
سكرتێرێ په‌رله‌مانێ كوردستانێ راگه‌هاند: بزاڤێن جدى يێن بۆ چاره‌كرنا هه‌ڤركيان دهێنه كرن و د چه‌ند رۆژێن بهێت دا دێ كۆمبوونێن پێنج قولى يێن لايه‌نێن سياسى ده‌سپێكه‌ن.
فەخرەدین قادر، سكرتێرێ پەرلەمانێ كوردستانێ، زێده‌تر بۆ باسنيوز گۆت: “بزاڤه‌كا جدى بۆ چاره‌كرنا قه‌يرانێن نوكه يێن هه‌رێما كوردستانێ يا هه‌يى”، ئاشكه‌را ژى كر كو د چه‌ند رۆژێن بهێت دا لايه‌نێن سياسى ل هه‌رێما كوردستانێ بۆ ئارامكرنا كاودانان دێ كۆمبوونێن به‌رده‌وام كه‌ن و كۆمبوونا پێنج لايه‌نێن سيساى هێته ئه‌نجام دان.
ل دووڤ گۆتنا فه‌خره‌دين قادر نوكه په‌رله‌مان يێ ئيفلج بووى و دڤێت بهێته ئه‌كتيفكرن و گۆت: “هه‌كه يوسف محه‌مه‌د ده‌ست ژ پۆستێ خوه به‌ردان يان نه‌ڤه‌گه‌ريا جهێ خوه، دشيان دايه د رێيا ئه‌ندامێن په‌رله‌مانێ كوردستانێ ب رێيا ده‌نگدانێ سه‌رۆكه‌كێ نوو بۆ په‌رله‌مانى هه‌لبژێرن”.
سكرتێرێ په‌رله‌مانێ كوردستانێ ب دوور نه‌زانى كو د ماوه‌كێ نێزيك دا يوسف محه‌مه‌د ڤه‌گه‌ريته جهێ كارێ خوه وه‌كو سه‌رۆكێ په‌رله‌مانى.
ئەڤرۆ نیوز:
ل گۆر راپۆرتەکا تەلەفزیۆنا ئەمریکا بریارە ئەڤرۆکە سەرۆک وەزیرێن ئیسرائیلێ بنیامین نەتانیاھۆ سەرەدانا ئەمریکا بکەت و ل گەل سەرۆکێ ئەمریکا باراک ئۆبامای ھەڤدیتنەکێ ساز بکەت، سالەکە کو ژ بەر سیاسەتا ئۆبامای یا ل ھەمبەر ئیرانێ و دانوستاندنێن ل گەل وی وەلاتی پەیوەندیێن ئەمریکا و ئیسرائیلێ ئالۆز بووینە و ئۆباما نھا بزاڤا ئاسایی کرنا پەیوەندیان ل گەل ئیسرائیلێ دکەت.
ئەڤرۆ نیوز:
عەلی داوودی چاڤدێرێ سیاسی ل رۆژھەلاتێ کوردستانێ بۆ رۆژناما ئەڤرۆ دیار کر کو رێژا کۆچبەربوونا گەنجێن کورد بۆ ئورۆپا رۆژ ب رۆژێ بەر ب زێدەبوونێ ڤە دچیت، ب تایبەتی ژی پشتی کو ھندەک وەلاتێن ئورۆپا بریار دای پەنابەران وەربگرن گەنجێن رۆژھەلاتێ کوردستانێ ژی ئەو یەک بۆ خوە ب دەلیڤە زانین و نھا ب رێیا تورکیا بەرێ خوە ددەنە ئورۆپا و گۆت: (چەند ئەگەرێن سەرەکی یێ کۆچبەربوونا گەنجێن کورد ھەنە، لێ ل گۆر دیتنا من ئەگەرێ سەرەکی بێکاری و ئەو زۆلم و زۆرداریا رژێما ئیرانێ یە کو گەنجێ کورد ترسادیە، چونکو رۆژانە ل بەر چاڤێ خەلکی ل ئیرانێ چالاکڤانێن سیاسی و مەدەنی ب تایبەتی ژی یێن کورد دھێنە سێدارەدان و ژ بەر ھندێ ژی گەنجێ رۆژھەلات کەس ب ئازادی ناژین و ژ بەر ھندێ ژی کۆچبەربوونێ وەک دەلیڤەکێ بۆ گەرەنتیا ژیانا خوە دبینن).
ناڤھاتی د پشکەکا دی ئاخڤتنا خوە دا ئەو یەک ژی راگەھاند کو سازی و دەزگەھێن دەولەتێ باش ژ رەوشا کۆچبەربوونا لاوێن کورد ئاگەھدارن، لێ ل ھەمبەر وێ یەکێ بێدەنگن، ل گۆر نێرینا من دەولەتێ ب خوە دڤێت کو گەنجێ کورد کۆچبەر ببن، چونکو ئەو یەک د بەرژەوەندا وان دایە و دەولەتێ نەڤێت پاشی ئەو گەنجە سەرئێشیانێ بۆ وان دروست بکەن و ژ بەر ھندێ ژی چوونا گەنجێن کوردێن رۆژھەلات بۆ ئورۆپا د بەرژەوەندیا ئیرانێ دایە و گۆت: (براستی تشتێ ئەز دبینم رۆژ ب رۆژێ گەنج کۆچبەر دبن و ئەو یەک نھا بوویە مودێل و دیاردە، چونکو دەمێ گرۆپەک گەنج دچن ئێدی یێن دیتر ژی چاڤ ل وان دکەن و دەمێ بەحسێ ئازادی و خوەشیا ل ئورۆپا دھێتە کرن ھەموو گەنجەک ل رێیەکێ دگەریت دا خوە بگەھینتە ئورۆپا و ئەز وەسا دبینم ھەتا ئەو شەر و ئالۆزی ل رۆژھەلاتا ناڤین ھەبیت و وەلاتێن ئورۆپایی ژی پەنابەران وەربگرن گەنجێن کورد ل رۆژھەلاتێ کوردستانێ دێ بەردەوام بەرێ خوە دەنە ئورۆپا).
سەبارەت ب ڤێ مەترسیێ کو دێ کاریگەریا خوە ل جڤاکی کەت و دێ ئاریشێن جڤاکی دروست بن، عابد فەتاحی ئەندامێ پەرلەمانێ ئیرانێ یێ سەر ب پارێزگەھا ئورمیێ ژی د داخۆیانیەکێ دا بۆ مالپەرێ ئورمیە نیوز راگەھاند کو مە راپۆرتەکا بەرفرەە ل سەر چوونا گەنجان بۆ ئورۆپا و مەترسیا وێ ل سەر جڤاکێ ئیرانێ دایە سەرۆکاتیا پەرلەمانی و مە داخوازا روونشتنەکا پەرلەمانی کریە و بریارە کو د دەمەکێ نێزیک دا لیژنەکا تایبەتمەند سەرەدانا ئورمیێ و پارێزگەھێن دی یێن رۆژھەلاتێ کوردستانێ بکەت و ڤەکۆلینەکا باش ل دۆر وێ دیاردێ بکەت و گۆت: (بێگومان چوونا گەنجان بۆ دەرڤە تنێ ئاریشا مە نینە، بەلکو نھا ل رۆژھەلاتا ناڤین ئەو یەک بوویە دیاردە و گەنج دخوازن ل ئورۆپا بژین، لێ دڤێت ئەم ب رێیا دەلیڤێن کاری و خواندنێ و باشترکرنا رەوشا ئابووری وەسا بکەین کو گەنجێ مە بەرێ خوە نەدەنە ئورۆپا).
ل ئالیێ دی رێکخراوا مافێ مرۆڤی یا رۆژھەلاتێ کوردستانێ ژی د دووماھیا راپۆرتا خوە دا ئاماژە ب بلندبوونا رێژا سێدارەدانێ ل ئیرانێ کریە و ل گۆر راپۆرتێ پرانیا کەسێن کو دھێنە سێدارەدان کوردن و گەلەک ژ وان ژ بەر ھزر و نێرینێن وان یێن سیاسی دھێنە سێدارەدان و وێ یەکێ ژی کاریگەریا خوە ل گەنجێن کورد کریە و ژ بەر ھندێ ژی نەچار دبن کو بەرێ خوە بدەنە ئورۆپا.
ئەڤرۆ نیوز:
دەولەتا تورکیا ھێزێن خوە یێن سەربازی ل سنورێ رۆژئاڤایێ کوردستانێ بجە دکەت و د چوون و ھاتنا وەلاتیێن عەفرینێ و کۆبانێ دا ئاستەنگیان دروست دکەت و د ھەمبەر دا ھێزێن کوردی ژی ل سنورێ عەفرینێ ١٢ بنگەھێن سەربازی ئاڤاکرینە و رۆژ ب رۆژ ئالۆزیا ل سەر سنورێ رۆژئاڤا ل گەل باکورێ کوردستانێ بەرفرەھتر دبیت و ئەمریکا ژی ژ تورکیا دخوازیت کو دەستێوەردانێ د رەوشا رۆژئاڤا دا نەکەت.
سەعیدو کورداخی ئەندامێ لیژنا پاراستنا کانتۆنا عەفرینێ د داخۆیانیەکی دا بۆ رۆژناما ئەڤرۆ راگەھاند کو دەولەتا تورکیا دخوازیت ئالۆزیان ل سەر سنۆرێ رۆژئاڤا و باکوری دروست بکەت و گۆت: (د رەوشەکی دا کو ھێزێن مە ل گەل ھێزێن دی یێن سووریایێ یا دیمۆکراتیک د بەرھەڤیا ئۆپەراسیۆنەکا بەرفرەە دانە بۆ ئازادکرنا رەقا و جەرابلوسێ، دەولەتا تورکیا دخوازیت ئەنیا شەری یا ل ھەمبەر تیرۆرستێن داعشێ لاواز کەت و ھێزێن YPG راکێشیتە شەرەکی د گەل تورکیا دا لێ ھەتا نھا ئەم ب سەبر نێزیکی کریارێن دەولەتا تورکیا دبین و مە بەرسڤا ھێرشێن وێ نەدایە).
کورداخی ھەروەسا راگەھاند ژی تورکیا بەردەوام بزاڤێ دکەت ھندەک کۆمێن کو د ناڤا ھێزێن سووریێ یێن دیمۆکراتیک دا جە دگرن راکێشیتە ئالیێ خوە و د ناڤ بەرەیێ د دژی رۆژئاڤایێ کوردستانێ دا و گۆت: (تورکیا قەبوول بکەت یان نەکەت ھەتا ھەموو ئاخا رۆژئاڤایێ کوردستانێ نەھێتە ئازادکرن دێ ئۆپەراسیۆنێن مە بەردەوام بن و ھەموو بزاڤێن تورکیا یێن پارچەکرنا ناڤ رێزێن مە ھاتنە ژناڤبرن و ھەکە تورکیا بەردەوامیێ بدەتە ھێرشێن خوە یێن ل دژی بنگەە و سەنگەرێن YPG ئەم ژی دێ خوە پارێزین و مە ئەو یەک گۆتیە ھێزێن ھەڤپەیمانا نێڤدەولەتی ژی).
ل ئالیێ دی ئۆپەراسیۆنێن بۆ ئازادکرنا دەڤەرێن سەر ب باژێرێ حەسەکێ و ئازادکرنا باژێرکێ شەدادێ و ھۆلێ ژی بەردەوام دکەن و د ناڤا دو رۆژان دا د ئەنجاما ئۆپەراسیۆنێن ھێزێن کوردی و ھێزێن سووریا یا دیمۆکراتیک دا ٨٩ تیرۆرستێن داعشێ ھاتینە کوشتن و ھێزێن کوردی و ھەڤپەیمانێن وان د پێشڤەچوونا خوە دا بەردەوامن و ئارمانجا سەرەکی د ڤان ئۆپەراسیۆنان دا ژ ھەڤدو جوداکرنا دەڤەر و باژێرێن ل ژێر کۆنترۆلا داعشێ دانە).
ل ئالیێ دی پەیڤدارێ وەزارەتا دەرڤە یا ئەمریکا ژی د پرێس کۆنفرانسەکی دا راگەھاند کو ئەو ب ھەموو رەنگی پشتەڤانیا ھێزێن پێشمەرگە ل ھەرێما کوردستانا عیراقێ و یەکینەیێن پاراستنا گەل ل رۆژئاڤایێ کوردستانێ دکەن و گۆت: (باوەریا مە ب ھێزێن کوردی ل سووریێ و عیراقێ ھەیە و ھەتا نھا رۆلەکی گەلەک مەزن د شکاندنا داعشێ دا دیتینە و ئەم بەردەوام ھاریکاریا وان دکەین).
پەیڤدارێ وەزارەتا دەرڤە یا ئەمریکا ھەروەسا راگەھاند ژی نابیت تورکیا سەنگەر ئانکۆ بنگەھێن ھێزێن کوردی ل سووریێ ئانکۆ رۆژئاڤا بۆمبەباران بکەت و گۆت: (ھێزێن کوردی ل عیراقێ و سووریێ ھەڤپەیمانێن مە نە و نابیت تورکیا ھێرش بکەتە سەر ھێزێن کوردی ل سووریێ و ئەو یەک دێ زیانێ گەھینتە ھێزا د شەرێ ل دژی تیرۆرستێن داعشێ دا، بۆ ڤێ چەندێ ژی مە ب فەرمی ژی ژ تورکیا خواستیە دەستێوەردانێ د رەوشا ناڤخوە یا رۆژئاڤا و سووریێ دا نەکەت).
ژ ئالیێ خوە ڤە دیمیتری مەدڤەدەڤ سەرۆک وەزیرێن روسیا د داخویانیەکی دا بۆ رۆژناما مۆسکۆ راگەھاند کو پەیوەندیێن وان ل گەل سووریێ و عیراقێ د ئاستەکی بلند دانە و گۆت: (بۆ مە یا گرنگ ئەوە ئاخا سووریێ و عیراقێ ژ تیرۆرستێن داعشێ و قاعیدە بھێتە پاقژکرن و پشتی کو تیرۆرست ھاتنە ژناڤبرن وی دەمی گەلێ سووریێ دێ بریارا خوە ل سەر پاشەرۆژا خوە دەت و ئەم دەستێوەردانێ د ناڤ کاروبارێن سووریێ دا ناکەین).
ل سەر پەیوەندیێن ل گەل ئەمریکا ژی سەرۆک وەزیرێن روسیا راگەھاند کو ل سووریێ و عیراقێ ل ھەمبەر تیرۆرستان ھەماھەنگیەکا باش د ناڤبەرا مە و ئەمریکا دا ھەیە و گۆت: (ئارمانجا مە و ئەمریکا ل سووریێ و عیراقێ ژناڤبرنا تیرۆرستانە و مە د ڤێ دەربارێ دا ھەماھەنگیەکا باش ژی د ناڤا خوە دا دروست کریە و ئەم دژبەریا ھەڤدو ناکەین).
ئەڤرۆ نيوز:
سەرۆک وەزیرێن عیراقێ یێ بەرێ و سەرۆکێ ھەڤالبەندا دەولەتا قانوونێ دوھی شەمبیێ راگەھاند، ئەم پێشوازیێ ل گوھۆرینا سیستەمێ حوکمڕانیێ ل عیراقێ دکەین کو ژ سیستەمێ پەرلەمانی ببیتە سیستەمێ سەرۆکایەتی کو د پەیرەوکرنا وی سیستەمی دا وەلاتی ب شێوەکێ راستەوخوە سەرۆک کۆمارە د ھەلبژێرن، ب دوور ژی زانی کو ئەڤ پرسە دڤێ قۆناغێ دا بھێتە بجھئینان، ژ بەر کو ب پێدڤی راستڤەکرنا دستووری یە.
نوری مالکی سەرۆک وەزیرێن بەرێ و جێگرێ سەرۆک کۆماری کو پۆستێ وی و ھەردو جێگرێن دی یێن سەرۆک کۆماری ژلایێ حەیدەر عەبادی سەرۆک وەزیران ڤە ھاتیە ھەلوەشاندن دداخۆیانیەکێ دا گوت” نوکە ھندەک بزاڤ یێن دھێنە کرن بۆ گوھۆرینا سیستەمێ حوکمڕانیێ ل عیراقێ ل پاشەرۆژێ، ئەڤ پرۆسا گوھۆرینێ ژی پێدڤی ب داخوازیێن جەماوەری نە ژ لایێ گەلێ عیراقێ ڤە ب ڕێیا ئەنجامدانا خوەنیشادانێن ئاشتیانە یێن بەرفرەە کو جڤاتا نوونەران نەچار بکەن وێ گوھۆرینێ ئەنجام بدەت”.
مالکی خویا کر ژی” سیستەمێ سەرۆکایەتی ڕێ ددەتە وەلاتیان کو سەرۆک کۆماری ب شێوەکێ راستەوخوە ب ھەلبژێرن و سەرۆک کۆمار ژی حوکمەتێ پێک دئینیت”.
ئەڤرۆ نیوز:
ل ٦-١١- ٢٠١٥ ێ ، دو سال دەبازبوون ل سەر خۆلا چارێ یا پەرلەمانی کو ھەموو فراکسیۆن پشکدارببون د کابینا ھەشتێ یا پەرلەمانی دا، ب دیتنا چاڤدێرێن سیاسی لیستێن ئۆپۆزسیۆنێ ھەمان رۆلێ خۆلا سیێ ھەبوو و خوە ژبیرکربوو کو پشکدارن د حوکمەتێ دا.
دیندار نەجمان چاڤدێرێ سیاسی بۆ رۆژناما ئەڤرۆ گوت” نابینم دو سالێن خولا چارێ چو جوداھیەکا مەزن ھەبیت ل گەل خولێن دی، چونکی لیستێن ھەر سێ فراکسیۆنێن ئۆپۆزسیۆنێ ھەمان رۆلێ خۆلا بەرێ ھەبوویە و ھەر بکارێ بەرھنگاریبوونا حوکمەتێ رادبوون وەکو پشکداری دکابینا حوکمەتێ دا و لەوما بوو ئەگەرێ قەیرانا نوکە یا ھەرێم تێدا دبوریت”.
دیندار نەجمان ھێشتا ژی گۆت” سەرۆکاتیا پەرلەمانی بەرپرسە ژ وێ قەیرانا سیاسی یا مەزن ل ھەرێما کوردستانێ ھەی، رۆژا ێ٢٣ خزیرانێ ل سەر پرسا سەرۆکاتیا ھەرێما کوردستانێ کو گومان تێدا نەبوو ئەڤ پرسە ل پەرلەمانی دا ناھێتە چارەسەرکرن و تایبەتی ب پەراوێزخستنا ھێزەکا مەزن وەک پارتی دیموکراتی کوردستان”.
ل دۆر نە پەیدابوونا چار سالێن ئارامیێ دبن سیبەرا حوکمەتا بنکە فراوان دا، دیندار نەجمان دۆسکی گۆت”دروستبوونا بزاڤا گۆڕان ل سەر دژایەتیکرنا ھەر دو حزبێن دەستھەلاتدار بوو و خەلکەک ل دۆر کومبوو چونکی نەیێ رازیبوو ژ وان ھەردو حزبان، دەمێ گۆڕان ھاتیە دحوکمەتا بنکە فراوان دا، ژ قۆناغا دژایەتیێ ھاتە د قۆناغا (تەوافق) دا، وێ سیاسەتێ کارتێکرنەکا نەرێنی ل سەر جەماوەرێ گۆڕان کر، ب دیتنا وان گۆڕان پێ گوھۆرا پارتی و ئێکەتی یە و ڤێ چەندێ وەکر کو سیاسەتا گۆڕان خوەیا نەبیت دناڤبەرا حوکمەت و ئۆپۆزسیۆنێ دا.
ب دیتنا نەجمانی حوکمەتێن بنکەفراوان د سەرکەفتی نابن و دبێژیت” حوکمەتێن بنکەفراوان دلاوازن و گەلەک جاران درێژخایەن نابن و دھێنە ھەلوەشاندن و ئەڤ نموونێن حوکمەتان ل وەلاتێن فرە حزبی پەیدا دبن، چونکی چو حزبەک نەشێت پتریا دەنگان ب دەست خوەڤە بینیت”.
سەبارەت ئەگەرێ پێکئینانا حوکمەتێ د ناڤبەرا پارتی و ئێکەتی و ئێکگرتوو دا، حکمەت نەجمانی گوت” درەوشەکا وەک نوکە دا کو ھەرێم تێدا دبوریت، ئێکرێزیا پارتێن سیاسی یا گرنگە و گوھۆرینا حوکمەتێ ب رێیێن قانوونی تشتەکێ نورمالە، لێ دڤێت بەری ڤێ پێنگاڤێ ئاسایکرنا رەوشێ ل ھەرێما کوردستانێ بھێتەکرن و ب دیتنا من گوھۆرینا حوکمەتێ دڤان کاودانان دا د بەرژەوەندا مللەتی دا نینە” لێ گوت ژی” ل دووڤ پێزانینێن من، چو سیناریۆ بۆ ھەلوەشاندنا حوکمەتێ و ئاڤاکرنا حوکمەتەکا نوو نینن و ھەکە ئەڤ نیازە ھەبن، گەلەک سیناریۆ یێن ھەین بۆ حوکمەتەکا نوو، ئەوژی پێکئینانا حوکمەتێ د ناڤبەرا پارتی و ئێکەتیێ دا، یان پارتی و ئێکەتی ل گەل ئێکگرتوو”.
ئه‌ڤرۆ نيوز:
به‌رى ده‌مه‌كێ كێم ياريا د ناڤبه‌را هه‌ردو يانێن سيڤليا و ريال مه‌دريد ژ چارچۆڤێ ياريێن گه‌را 11 ژ خولا لاليگا يا ئسپانى هاتنه كرن و ريال ژ ده‌رڤه‌ى ياريگه‌ها خوه تووشى خوساره‌تيێ بوو.
هه‌ر چه‌نده ل ده‌سپێكێ يانا مه‌له‌كى شيا گۆلا سه‌ركه‌فتنێ ب رێياي ياريكه‌رێ خوه سێرجيۆ رامۆس تۆمار بكه‌ت، به‌لێ ژ ئه‌گه‌رێ هنگافتنێ ياريگه‌هـ ب جهـ هێلا و پشتى ده‌ركه‌فتنا وى ژى يارى ب ته‌مامى هاته گوهۆڕين.
يانا سڤيليا ب ره‌نگه‌كێ گه‌له‌ك به‌رچاڤ مفا ژ كوڕێ باژێرێ خوه سێرجيۆ رامۆس ديت و شيا پشتى ده‌ركه‌فتنا وى سێ گۆلان ل سه‌ر يانا ريال مه‌دريد تۆمار بكه‌ت و دياريه‌كا به‌ركه‌فتى پێشكێشى هه‌ڤركا وێ يانا به‌رشه‌لۆنا بكه‌ت ئه‌وا ژ لايێ خوه ڤه ئه‌ڤرۆ سه‌ركه‌فتن ل سه‌ر يانا ڤياريال تۆماركرى ب دو گۆلان بێ به‌رامبه‌ر.
هه‌ر چه‌نده پشتى ڤان سێ گۆلێن سيڤيليا، يانا ريال مه‌دريد بزاڤێن مه‌زن بۆ گوهۆڕينا ئه‌نجامێ ياريێ كرن كو هه‌ر چنه بيت وه‌كهه‌ڤ بكه‌ت، لێ ب تنێ شيا گۆله‌كا دى تۆمار كر و به‌هرا هندێ نه‌دكر چ ژ ئه‌نجامێ خالێن ياريێ ب گوهۆڕيت و سڤيليا سێ خالێن گرنگ ژ ريال مه‌دريد چێكرن.
ئه‌ڤرۆ نیۆز، قائید میرۆ
وه‌زاره‌تا ئه‌وقاف و كاروبارێن ئاینی مژۆلی دارشتنا پلانا حه‌ج و عومرێ دكه‌ن بۆ سالا داهاتی.
مه‌ریوان نه‌قشبه‌ندی، به‌رپرسێ په‌یوه‌ندیێن وه‌زاره‌تا ئه‌وقاف و كاروبارێن ئاینی ب ئه‌ڤرۆ نیۆز راگه‌هاند” كو پشتی ده‌ستبكاربوونا وه‌زیر و رێڤه‌به‌رێ دیوانا وه‌زاره‌تێ، بشێوه‌یه‌كێ ئاسایی كاروبارێن وه‌لاتیان دهێنه رێڤه‌برن و دده‌مێ 48 ده‌مژمێراندا هه‌موو مامه‌له‌یێن به‌رێ هاتینه مه‌شاندن.
مه‌ریوانی گۆتژی” بڕیاره ڤێ حه‌فتیێ وه‌زاره‌تا ئه‌وقاف و كاروبارێن ئاینی پلانا سالا داهاتیا حه‌ج و عومرێ داڕێژن و وه‌زیر و ستافێ وه‌زاره‌تێ مژۆلی دانانا پلانا حه‌ج و عومرێ دكه‌ن.
نيشاندان