ئه‌ڤرۆ نیوز:
له‌یلا زانا ئه‌نداما په‌رله‌مانێ توركیا د داخۆیانیه‌كى دا راگه‌هاند كو دڤێت گه‌لێن كورد و تورك وانه‌كێ مه‌زن بده‌نه‌ ده‌ستهه‌لاتدارێن توركیا و AKP و بۆ وان نیشا بده‌ن كو ئه‌و دخوازن پێكڤه‌ و ب ره‌نگه‌كى ئازاد بژین و گۆت: (ئه‌ڤ زۆلم و زۆرداریا كو AKP د ده‌مێ ده‌ستهه‌لاتا خوه‌ دا ل گه‌لێ كورد و غه‌له‌وى و كێم نه‌ته‌وه‌ێن دى كریه‌ چو ده‌ستهه‌لاتێن به‌رێ نه‌كرینه‌ و ده‌مێ رزگاربوونا ژ AKP هاتیه‌).
له‌یلا زانا ئه‌نداما په‌رله‌مانێ توركیا ژ پارتا دیمۆكراسیا گه‌لان د داخویانیه‌كى دا ل باژێرێ باتمانێ راگه‌هاند كو هه‌لبژارتنێن یه‌كێ مژدارێ بۆ پاشه‌رۆژا توركیا و باكورێ كوردستانێ گه‌له‌ك گرنگن و د ڤێ هه‌لبژارتنێ دا دێ گه‌لێن توركیا ب كورد، تورك و هه‌موو نه‌ته‌وه‌ و باوه‌ریێن جودا بریارا خوه‌ بۆ پاشه‌رۆژا خوه‌ ده‌ن و گۆت: (حوكمه‌تا AKP د ده‌مێ ده‌ستهه‌لاتا خوه‌ دا ئه‌ڤ ١٣ سالن زۆلم و زۆرداریێ ل گه‌لان دكه‌ت و گه‌نده‌لیه‌كى مه‌زن یێ سیاسى و ئابوورى خستیه‌ د ناڤا ده‌ستهه‌لاتێ و هه‌موو ده‌زگه‌هێن ده‌وله‌تێ دا و ده‌مێ رزگاربوونا ژ ڤێ ده‌ستهه‌لاتا AKP هاتیه‌ و ئه‌م دێ پێكڤه‌ ب ده‌نگێن خوه‌ بریارێ ل سه‌ر پاشه‌رۆژا خوه‌ ده‌ین و ئه‌ز باوه‌ر دكه‌م هه‌موو گه‌لێن توركیا دخوازن ب ره‌نگه‌كى وه‌كهه‌ڤ و ئازادانه‌ پێكڤه‌ بژین و ئاشتیه‌كا سه‌رتاسه‌رى دروست بكه‌ن، بۆ ڤێ چه‌ندێ ژى دڤێت ئه‌م هه‌موو پێكڤه‌ ده‌نگێ خوه‌ بلند بكه‌ین و د سندۆقێن ده‌نگدانێ دا حسابێ ژ ئه‌ردۆگانى و داوود ئوگلۆ و هه‌ڤالێن وى بخوازن و وان ب رێیا سندۆقێن ده‌نگدانێ بێده‌نگ كه‌ین).
له‌یلا زانا هه‌روه‌سا راگه‌هاند ژى سه‌رۆك كۆمار ئه‌ردۆگانى، سه‌رۆك وه‌زیران داوود ئوگلۆ و حوكمه‌تا وان ژ ده‌ستپێكرنا شه‌رى به‌رپرسن و یێن كو پرۆسا دانوستاندنان دانه‌ راگرتن و جاره‌كا دى شه‌ر دانه‌ ده‌ستپێكرن ئه‌و ب خوه‌ نه‌ و گۆت: (ده‌مێ هاته‌ راگه‌هاندن كو هه‌ڤدیتن و دانوستاندن ل گه‌ل به‌رێز ئۆجه‌لانى هاتیه‌ ده‌ستپێكرن ئه‌م هه‌موو كه‌یفخوه‌ش بووین و ب راستى ژى مه‌ باوه‌ریه‌كا مه‌زن دا ئه‌ردۆگانێ سه‌رۆك كۆمار و حوكمه‌تا AKP دا كو پرسا كوردى ل گه‌ل نوونه‌رێن راسته‌قینه‌ یێن كوردان چاره‌ بكه‌ن، ژ به‌ر كو مه‌ نه‌دخواست ئێدى خوین بهێته‌ رێتن و لاوێن كورد و تورك بهێنه‌ كوشتن، چونكو گه‌لێ كورد ژ نه‌چاریێ ده‌ست ب شه‌رێ چه‌كداریێ كربوو و سیاسه‌تمه‌دارێن كورد گه‌له‌ك جاران راگه‌هاندینه‌ كو ئه‌و ئاماده‌نه‌ شه‌رى راوه‌ستینن و ب دانوستاندنان و ب رێیێن ئاشتیانه‌ پرسگرێكا كوردى چاره‌ بكه‌ن لێ ده‌وله‌تێ هه‌رده‌م خواست كو كوردان بخاپینیت و وه‌ك ڤێ حوكمه‌تا AKP دۆزا كوردى ب ته‌مامى ژ ناڤ ببه‌ن، لێ ئێدى كورد هشیاره‌ و خوه‌دان رێبازه‌كا مه‌زن یا ئازادیێنه‌ و ناهێنه‌ خاپاندن).
سیاسه‌تمه‌دارا ناڤدار یا كورد د پشكه‌كى دى یا ئاخاڤتنا خوه‌ دا ژى راگه‌هاند كو سه‌ركه‌ڤتنا HDP د هه‌لبژارتنێن یه‌كێ مژدارێ دا و بنكه‌ڤتنا AKP دێ رێیا ئاشتیێ و چاره‌كرنا پرسگرێكا كوردى ب دانوستاندنان ڤه‌كه‌ت و شۆره‌شا رۆژئاڤایێ كوردستانێ بێخیته‌ ژێر پاراستنێ و گۆت: (ئه‌م هه‌موو دزانین كو سه‌رۆك كۆمار ئه‌ردۆگان و حوكمه‌تا AKP ب هه‌موو شیانێن ده‌وله‌تێ و حوكمه‌تێ ڤه‌ ل دژى شۆره‌شا رۆژئاڤا هاریكاریا تیرۆرستێن داعشێ و ئه‌ل نوسره‌ كرن و هه‌تا ڤێ ده‌مێ ژى دكه‌ن، ژ به‌ر ڤێ یه‌كێ دڤێت ئه‌م ڤان ل ده‌ستهه‌لاتێ نه‌هێلین و شۆره‌شا ب رومه‌ت یا گه‌لێ كورد ل رۆژئاڤا ب پارێزن، ئێدى هه‌موو جیهان ژى دبینیت كو ئه‌ردۆگان و هه‌ڤالێن وى چاوا ده‌ستێن خوه‌ كرینه‌ د ناڤ ده‌ستێ داعشێ و ئه‌ل نوسره‌ دا و تیرۆرستان ل دژى گه‌لێ كورد و گه‌لێن سووریێ بكار دئینن و ئه‌ڤرۆ ل جیهانێ ژى چو پشته‌ڤانیه‌ك ژ ئه‌ردۆگانى و حوكمه‌تا AKP را نه‌مایه‌ و توركیا رۆژ ب رۆژێ ل جیهانێ ب تنێ دمینیت).
د دووماهیا ئاخڤتنا خوه‌ دا ژى له‌یلا زانا ئه‌نداما په‌رله‌مانێ توركیا راگه‌هاند كو ژ ده‌مێ ده‌ستپێكرنا ده‌ستهه‌لاتا AKP ڤه‌ هه‌تا نها یه‌ك تیرۆرست نه‌هاتیه‌ گرتن و تیرۆرستێن داعشێ ب پشته‌ڤانیا سه‌رۆك كۆمار ئه‌ردۆگان و حوكمه‌تا داوود ئوگلۆى كۆمبوونێن ئاشتیێ كرینه‌ ناڤه‌ندا رێتنا خوینێ و گۆت: (ئه‌ى گه‌لێ كورد، گه‌لێ تورك و هه‌موو باوه‌ریێن جودا وه‌رن ئه‌م پێكڤه‌ وانه‌كا مه‌زن بده‌ینه‌ ڤێ حوكمه‌تا پشته‌ڤانێ تیرۆرێ، وه‌رن ئه‌م پێكڤه‌ پاشه‌رۆژه‌كا ئازاد و دیمۆكراتیك و وه‌كهه‌ڤ دروست بكه‌ین، ده‌لیڤه‌كا زێرین هاتیه‌ ل به‌ر ده‌ستێ مه‌، وه‌رن ئه‌م پێكڤه‌ ڤێ ده‌لیڤا زێرین بكه‌ینه‌ ده‌لیڤتا ئاشتى، ئازادى و چاره‌كرنا پرسگرێكا كوردى).