ئه‌ڤرۆ نيوز:

سەرۆکێ لیژنا کاروبارێن پێشمەرگەی ل پەرلەمانێ راگەھاند، ھاریکاریا ھەڤپەیمانان بۆ شەڕێ داعشێ یا بەردەوامە و ھاریکاری دگەھیتە ھەرێما کوردستانێ، بەلێ ژلایێ موچە و خوارنا رۆژانە ڤە، ڕەوشا پێشمەرگەی یا خرابە و ھیڤیدارین کاریگەری نەکەتە سەر بەرەیێن شەڕی، ھەروەسا دیارکر، مە داخواز ژ ئەمریکا و بریتانیا کریە موچە و بودجێ پێشمەرگەی ب مەزێخن و ئەم ئاگەھداری شاندێ ھەرێمێ نینین بۆ ئەمریکا بۆ دەستڤەئینانا پشتەڤانیا دراڤی.
ئاری ھەرسین، سەرۆکێ لیژنا کاروبارێن پێشمەرگەی ل پەرلەمانێ کوردستان بۆ رۆژناما ئەڤرۆ گۆت” ئەم وەکو لیژنا کاروبارێن پێشمەرگەی ئاگەھداری چوونا شاندێ ھەرێما کوردستانێ بۆ ئەمریکا نینین بۆ ب دەستڤەئینانا پشتەڤانیا دارایی بۆ ھێزێن پێشمەرگەی، ئەو شاندێن ھەرێما کوردستانێ یێن دچنە وەلاتێن بیانی ل دۆر ڕەوشا پێشمەرگەی ل گەل سەرۆکێن لیژنێن ئەمن و بەرگریێ کۆمبوونان دکەن، ھەکە ئەم ژی دەولەت بان، ئەز سەرۆکێ لیژنا بەرگریا ھەرێما کوردستانێ مە، مخابن وەزارەتا پێشمەرگەی و شاندێ ھەرێمێ لیژنا پێشمەرگەی ئاگەھدار ناکەن و مە ل راگەھاندنێ گوھلێبوویە، بەری چوونا شاندێ ھەرێما کوردستانێ بۆ دەرڤە، ئەز ل گەل قۆنسۆلخانێن ئەمریکا و بەریتانیا کۆمبوویمە و من داخواز ژێ کریە ژبلی ھاریکاریێن لەشکری، پێدڤیە ھاریکاریا دارایی بۆ پێشمەرگەی بکەن وەکو مەزاختنا موچە و بودجەی، بەرسڤا وان ژی ئەوبوو ل گەل وەلاتێن خوە دێ بەحسکەن، بەلێ ھەتا نوکە چو ھاریکاریێن دارایی بۆ ھێزێن پێشمەرگەی نەھاتینەکرن ژلایێ ھەڤپەیمانان ڤە، ڕەوشا پێشمەرگەی ژلایێ دارایی ڤە یا خراپە و ھەموو لایەنەک ژی ڤێ ڕاستیێ دزانیت، بلا حوکمەتا ھەرێما کوردستانێ موچێ چو فەرمانبەران نەدەت، لێ فەرە موچێ پێشمەرگەی بھێتە مەزاختن ددەمێ خوەدا”.
ھەرسین گۆت ژی” حوکمەت یا چاکسازیێ دکەت د کێمکرنا مەزاختی و موچێن فەرمانبەران دا، ئەز ھێزێن پێشمەرگەی پشتڕاست دکەم ب چو شێوەیەکی موچێ ھێزێن پێشمەرگەی ناھێنە کێمکرن، سەرۆکێ حوکمەتێ ژی بڕیارەکا وەسا نادەت موچێ پێشمەرگەی بھێتە کێمکرن، ھەکە حوکمەت فەرمانا کێمکرنا موچێ پێشمەرگەی ژی بدەت، ب چو شێوەیەکی قەبوول ناکەین، ھەڤکاریا ھەڤپەیمانان بۆ ھێزێن پێشمەرگەی ژلایێ لەشکری ڤە یا بەردەوامە و نەھاتیە کێمکرن، بەلێ میکانیزما ھاریکاریان یا جۆدایە، دبیت د ھەیڤەکێ دا جارەکێ ھاریکاری بگەھن و ھەیڤا پاشتر دو جاران بگەھن، ژلایێ خوارنێ ڤە ھندەک ڕەوشا پێشمەرگەی یا خرابە، ڕەوشا لەشکرێن ئێک و گۆلان و فەرماندا زێرەڤانی و پۆلیسێن ئامادە یا باشە، تنێ چواردە لیوایێن سەر ب وەزارەتا پێشمەرگەی ڤە ڕەوشا وان ژلایێ خوارنێ ڤە یا باش نینە و دخوازین کاریگەریێ نەکەتە سەر بەرۆکێن شەڕی و بھێتە چارەسەرکرن”.

ئەڤرۆ نیوز:
لەیلا زانا و سەرۆک کۆمارێ تورکیا دێ د ناڤا ھەفتیا بھێت دا ھەڤدیتنەکێ ساز کەن و رەوشا تورکیا ب گشتی گەنگەشە کەن، دھێتە چاڤەرێکرن سیاسەتمەدارا کورد د ھەڤدیتنێ دا داخوازا راوەستاندنا ئۆپەراسیۆنێن د ناڤ باژێرێن باکورێ کوردستانێ دا ژ سەرۆک کۆماری بکەت و پێشنیازا ژ نوو ڤە دەستپێ کرنا قۆناغا ئاشتیێ و ھەڤدیتنێن ل گەل ئۆجەلانی بکەت.
لەیلا زانا سیاسەتمەدارا کورد د داخۆیانیەکی دا بۆ رۆژناما ئەڤرۆ راگەھاند کو وێ نێزیکی ھەفت ھەیڤ بەری نھا داخوازا ھەڤدیتنێ ژ سەرۆک کۆمارێ تورکیا رەجەب تەیب ئەردۆگانی کریە و د ڤی دەمێ ھەستیار دا بەرسڤدانا ئەردۆگانی یا گرنگە و گۆت: (ئەز ژ دەستپێکێ ڤە دبێژم من وەک ئەنداما پەرلەمانا تورکیا و وەک ژنا کورد داخوازا ھەڤدیتنێ ژ بەرێز سەرۆک کۆماری کربوو و پشتی نێزیکی ھەفت مەھان بەرسڤا داخوازا من دا و ئەز وەسا چاڤەرێ دکەم کو د ڤان رۆژێن بھێت دا ل دووڤ بەرنامێ سەرۆک کۆماری ھەڤدیتن بھێتە پێکئینان و ئەز دێ د ھەڤدیتنێ دا ھژمارەک پێشنیازان بۆ راوەستاندنا شەری و جارەکا دی دەستپێکرنا قۆناغا ئاشتیێ پێشکێش کەم).
سیاسەتمەدارا کورد ھەروەسا راگەھاند ژی کو تورکیا و باکورێ کوردستانێ ئەڤ سێ ھەیڤن کەڤتیە د ناڤا رەوشەکا گەلەک مەترسیدار دا و ھەکە وەسا بەردەوام بکەت دێ برینێن گەلەک کوور دروست بن و ھەردو گەل ب تەمامی ژ ھەڤدو دوور کەڤن و گۆت: (ئەز وەک سیاسەتمەدار و ژنەکا کورد قەبوول ناکوم نە لاوێن کورد و نە ژی لاوێن تورک بھێنە کوشتن و نابیت باژێر و باژێرکێن باکورێ کوردستانێ بھێنە وێرانکرن و وەلاتیێن سڤیل بھێنە کوشتن).
لەیلا زانا د پشکەکا دی یا ئاخڤتنا خوە دا ژی دیار کر کو د قۆناغا نھا یا ھەستیار دا ھەردو بەرێزان ئۆجەلان و ئەردۆگان دشێن رۆلێ خوە بگێرن و شەری راوەستینن و جارەکا دی قۆناغا ئاشتیێ دەستپێ بکەن و گۆت: (دڤێت ھەموو تورکیا و باکورێ کوردستانێ بزانن کو ب کوشتن و شەر و وێرانکرنێ پرسگرێکا کوردی چارە نابیت و رێتنا خوینێ برینێن ھەردو ئالیان زێدەتر کوور دکەت و ھەردو گەلان ژ ھەڤدو دوور دکەت، بۆ ڤێ یەکێ ژی دڤێت د زووترین دەم دا جارەکا دی ھەڤدیتنێن ل گەل بەرێز عەبدوللا ئۆجەلانی بھێنە دەستپێکرن و ل سەر بنگەھێ چارەیەکا سیاسی و ئاشتیانە پێنگاڤێن بەرچاڤ بۆ چارەکرنا پرسگرێکا کوردی بھێنە ھاڤێتن و ھەردو ئالی ژی بێی مەرج نێزیکی چارەکرنا پرسگرێکان ببن).
سیاسەتمەدارا ناڤدارا کورد ھەروەسا راگەھاند ژی کو گەل و سازیێن جڤاکێ سڤیل گرنگیەکا مەزن ددەنە ھەولدانێن ئاشتیێ و ئەڤرۆ تشتێ ھەری ب رومەت و پیرۆز بجە کرنا ئاشتیێیە و گۆت: ( ھەر رۆژا کو دچیت شەر دژوارتر دبیت و زێدەتر باژێرێن مە وێران دبن و خەلک دەست ژ وارێ خوە بەرددەن و کۆچبەر دبن بۆ ڤێ چەندێ ژی دڤێت سیاسەتمەدار داکەڤنە مەیدانێ و تانک، تۆپ و سەربازان ژ مەیدانا شەری دوور کەن و پرسگرێکا کوردی ل سەر مێزێن دانوستاندنان چارە کەن).
لەیلا زانا د داویا ئاخڤتنا خوە دا ژی راگەھاند کو مخابن ھێشتا ل جزیرا بۆتان و سورێ ئۆپەراسیۆن و شەر بەردەوامە و ھەر رۆژ کارەساتەکا نوو یا مرۆڤی دروست دبیت و درەنگ ماین مرنە و گۆت: (داخوازێ ژ ھەردو ئالیان ژی دکەم دەستێن خوە ژ چەکان ڤەکێشینن و جارەکا دی ڤەگەرنە ڤە سەر مێزا دانوستاندنان و د چارەکرنا پرسگرێکا کوردی دا چەکان بێدەنگ بکەن و وەک زمانێ چارەسەریا پرسگرێکان بکار نەھینن، ژ بەر کو ب شەری نە کورد سەردکەڤن نە ژی دەولەتا تورکیا).