ئەڤرۆ نیوز:
پشتی پانزین کەفتیە دەستێ کەرتێ تایبەت، ئێکسەر ھەڤرکی پەیدا بوو و ل ھژمارەکا مەزن یا پانزینخانان ل ھەرێما کوردستانێ بھایێ پانزینێ بەر ب ئەرزانیێ چوو و ل گەلەک جھان ھەتا 600 دیناران ژی دابەزیە و پێشبینی دھێتە کرن ھەتا 500 دیناران ژی بھێت، د دەمەکی دا کو نھا ل گەلەک پانزیخانێن حکوومی ھێشتا ب 700 دینارانە. رێڤەبەرێ بەلاڤکرنا بەرھەمێن گازێ ل پارێزگەھا دھۆکێ راگەھاند، نھا چو پانزینخانێن حکوومی ل دھۆکێ نەماینە و ژ سەرجەمێ 115 پانزینخانان ھەموو بووینە بازرگانی، ب تنێ 16 پانزینخانە تێ نەبن کو پانزینێ ب 500 دیناران ددەنە تەکسیان.
دلدار مزوری، شۆفێرەکێ پارێزگەھا دھۆکێ یە بۆ ئەڤرۆ دیار کر، ئەڤە نێزیکی دو سالان بوو ل ھەرێما کوردستانێ ھەردەم قەیرانا پانزینێ بوو و کارتێکرنەکا مەزن ل سەر شۆفێران ھەبوویە، ھەردەم شۆفێر ل بەر مەترسی و گەفێن نەمانا پانزینێ بوون، بەلێ ئەڤە ماوەیەکێ کورتە پانزین کەفتیە دەستێ بازرگانان و رەوشا وێ گەلەک باشتر و ھەتا پاقژتر ژی لێ ھاتیە و ھەکە ھەر ب ڤی دەستوداری دێ رەوش ھێشتا ژی باشتر لێ ھێت.
ناڤبری دیار کر کو ژبلی باشی و پاقژیا پانزینا نھا ھەی، بوھایێ پانزینێ ژی بەردەوام د ئەرزانیێ دایە چونکو ھەڤرکیەکا مەزن دناڤبەرا بازرگانان دا پەیدابوویە و ئەڤە ژی بێگومان د مفایێ وەلاتیان دایە و گۆت: ئێدی ئەز ب چو رەنگان پانزینا حکوومی یا 700 دیناری نا داگرم، بەلکو ب تنێ من چاڤ ل پانزینا 600 دیناری یا کەرتێ تایبەت ھەیە.
یوسف نوری، رێڤەبەرێ بەلاڤکرنا بەرھەمێن گازێ ل پارێزگەھا دھۆکێ بۆ ئەڤرۆ دیار کر، نێزیکی 115 پانزینخانان ل سنوورێ پارێزگەھا دھۆکێ ھەنە و نھا ھەموو پانزیخانە کەفتینە دەستێ کەرتێ تایبەت و پانزینا 700 دیناری نھا ل پارێزگەھا دھۆکێ نەمایە و گۆت: ب تنێ 16 پانزینخانە ل سنوورێ پارێزگەھا دھۆکێ ھەنە کو پانزینێ ب کۆژمێ 500 دیناران ددەنە تەکسیان و ھندەک ژ وان ژی نھا پانزینێ نادەنە شۆفێران.
رێڤەبەرێ بەلاڤکرنا بەرھەمێن گازێ خویاژی کر، ل گۆرەی رێنمایێن وەزارەتا سامانێن سرۆشتی چو بازرگان نابیت پانزینێ ب بھایێ پتر ژ 700 دیناران بفرۆشن و دڤێت کێمتر ژ وێ رێژی بن.
ل دووڤ گۆتنێن مستەفا تەھا، رێڤەبەرێ بەلاڤکرنا بەرھەمێن گازێ ل پارێزگەھا ھەولێرێ، کەرتێ تایبەت کارتێکرنەکا مەزن ل پانزینا حکوومی کر و ب رێژا 50% بەرھەمێ وێ یێ فرۆتنێ کێمتر لێ کریە، د دەمەکی دا بەری نھا وان ل پارێزگەھا ھەولێرێ رۆژانە دۆ ملیۆن لیترێن پانزینا حکوومی دفرۆتن، بەلێ نھا بۆ ئێک ملیۆن دابەزیە و بۆ ئەڤرۆ گۆت: سێ پانزینخانێن حکوومی ل ھەولێرێ ھەنە و داھاتێ وان تایبەت بۆ حکوومەتێ دھێت.
مستەفا تەھا زێدەتر دبێژیت: ئەز پێشبینی ناکەم پانزینا کەرتێ تایبەت ھەر ب ڤی شێوەی یا بەردەوام بیت، چونکو ئەرزانبوونا پانزینا کەرتێ تایبەت گرێدای بازارێ جیھانێ یە و ل ھەموو جیھانێ پترۆلا خام ئەرزانبوویە و ئەڤە ژی بوویە ئەگەر کو پانزینا ھەرێمێ ئەرزان ببیت. دابەزینا نرخێ پانزینا حکوومی د دەستێ دەستھەلاتا ئونجوومەنێ بلند یێ نەفت و غازێ یە ل ھەرێما کوردستانێ و ھەتا نوکە چو بریار ژ لایێ وان ڤە نەھاتینە دان کو پانزینا حکوومی ئەرزانتر لێ بھێت.
نيشاندان