ئەڤرۆ نيوز:
یاریێن گەرا سیێ یێن قوناغا ئێکێ یا کومان ژ قارەمانیا یانێن ئوروپا قارەمانێن خولان بریارە ئەف شەڤە بەردەوامی پێ بھێتە دان و د گوپیتکا یاریێن ڤێ گەرێ دا ل ناڤبەرا ھەردو یانێن پاریس سان جێرمان یا فرەنسی و ریال مەدرید یا ئسپانی و ل ھەمبەر ھەردو یانێن مانچستەر سیتی و یونایتد یێن ئێنگلیزی دێ بزاڤێن باشکرنا ھەلویستێ خوە کەن و یوڤانتوس ژبو پاراستنا پێشکەفتنا خوە ل وەرزێ نوو.
د کوما ئێکێ دا و ل پاریسا پایتەختێ فرەنسا دێ جھێ گوپیتکا یاریێن ڤێ گەرێ بیت دەمێ پاریس سان جێرمان یا فرەنسی دێ مێڤانداریا یانا ریال مەدرید یا ئسپانی کەت و ھەڤرکیا ڤان یانا بو سەرکەفتنێ دێ گوھورینێ ئێخیتە رێزبەندا کومێ چونکو نوکە ھەردو یانا شەش خال یێن ھەین ژ دو سەرکەفتنا و بەری دەستپێکرنا ڤێ یاریێ و چونا ریال بو پاریس ناڤێ کەریم بنزیما د لیستا یاریکەران دا نینە پشتی نوشداران خویاکری کو ب تمامی ژ ھنگافتنێ قورتال نەبویە و ل ھەمبەر ھەردو یاریکەران سێرجیو راموس و یێ کرواتی و ھێلا ناڤین لوکا مودریچ دێ پشکداربن پشتی ژ ھنگافتنێ قورتال بوین.
ل دور ڤێ یاریێ راھێنەرێ بەرێ یێ ھەردو یانێن پاریسی مەدریدی کارلو ئەنشلوتی خویاکر یا ب زەحمەتە ئاماژە ب یانا سەرکەفتی بکەین لێ پێشبینیا وێ چەندێ کر کو یانا پاریس سان جێرمان دێ زێدەتر بزاڤێ کەت کونترولێ ل سەر تەپێ بکەت و ل ھەمبەر یانا ریال ل سەر ھێرشێن ھەڤدژ کو ئەڤە دێ مەترسی بیت ل سەر یانا ھەڤرکا وێ ھەر چەندێ ھێلا بەرەڤانیا یانا فرەنسی گەلەک یا ب ھێز و کێم گول ل سەر دھینە تومارکرن.
ژلایەکێ دووڤە ستێرا یانا پاریس سان جێرمان زەلاتان ئیبراھیموڤیچ یێ سویدی خویاکر ئەو دزانیت دێ ب چو رێک سەرکەفتنێ ل سەر یانا ئسپانی تومارکەن و ل ناڤا ئەردێ خوە دا وان خوسارەت کەن.
زێدەتر ڤی یاریکەری خویاکر ھەر چەندە ئەو نە ل ئاستێ خوە یێ جارانە لێ وەکو جەنگاوەرەکی دێ دناڤ یاریگەھێ دا ھێتە دیتن و نەپشکداریا ھژمارەکا یاریکەرێن ریال چو کارتێکرنا خوە نابیت چونکو چەکێ پێدڤی ل ناڤ پێگوھوران یێ ھەی.
ھەر د ڤێ کومێ دا ھەردو یانێن دی یێن بریندار مالمو یا سویدی و شاختار دونیستیک یا ئوکرانی دێ یاریا خوە ل گەلێن کەن پشتی ل ھەردو یاریێن وە یێن بوری توشی خوسارەتیێ بووین.
د کوما دویێ دا و پشتی بورینا دو یاریان ھەلویستێ ھەر چار یانا وەکو ئێکی ب سێ خالن و دبیت دەستپێکا ھەڤرکیا ب ھێز ژ یاریێن ئەف شەڤەبیت دەمێ سیسکا موسکو یا روسی مێڤانداریا یانا مانچستەر یونایتد یا ئێنگلیزی دکەت.
یانا مانچستەر یونایتد دێ بزاڤێ کەت ل ڤێ یاریگەھێ بیرھاتنێن خوە یێن خوش یێن سالا ٢٠٠٨ دوبارە بکەت دەمێ ب ناسناڤێ سیێ یێ ڤێ قارەمانیێ ھاتیە خەلاتکرن ل سەر کیستێ وەلاتیا خوە چێلسی و بو ب جە ھاتنا ڤێ ئارمانجێ مورالا یاریکەرێن وێ یا بلندە ب تایبەت پشتی سەرکەفتنا ڤێ حەفتیێ د خولا ئێنگلیزی دا و راھێنەرێ وێ لویس ڤانگالێ ھولەندی باوەریەکا تمام ھەیە دێ بیتە دەستپێکەک بەر ب رێکا دورستا سەرکەفتن و ب جە ئینانا ئومێدان.
ھەر د ڤێ کومێ دا یانا پی ئێس ئایند ھوڤن یا ھولەندێ سەرکێشا کومێ دێ بیتە مێڤانا یانا فولفسبورگ یا ئەلمانی.
د کوما سیێ دا دەلیڤە ل ھەمبەر یانا گەلاتا سەرای یا تورکیا دبیت یا دووماھیێ بیت بو گەشکرنا ھیڤیێن خوە د کومێ دا بو پلێتا دەربازبونێ، لێ ئەرکێ وێ یێ ب ساناھی نابیت دەمێ مێڤانداریا یانا بنفیکا یا پرتوگالی سەرکێشا کومێ و خودانا دو سەرکەفتنا د یاریێن بوری دا دکەت، د دەمەکی دا کو یانا ئەتلەتیکو مەدرید یا ئسپانی خودانا رێزا دویێ ب سێ خالا ئارمانجا ب ھێز ئێخستنا ھەلویستێ خوە یێ ھەی دەمێ مێڤداناریا یانا ئێف سی ئاستان یا کازخستانی دکەت.
د کوما چارێ دا دەلیڤە ل ھەمبەر یانا یوڤنتوس یا ئیتالی یا ھەی پێش وەخت خوە نێزیکی ب دەستڤەبرنا پلێتا دەربازبونێ بیت دەمێ مێڤانداریا یانا بروسیا مونشن کلادباغ یا ئەلمانی دکەت ئەوا ل ھەردو یاریێن بوری خوسارەت بووی و پێنج گول ل سەر ھاتینە تومارکرن و ل ھەمبەر یوڤانتوس ھژماران خالێن خوەەب گەھینتە نەە خالان و ژلایەکێ دووڤە ئەشبیلیا یا ئسپانی و مانچستەر سیتی یا ئێنگلیزی خودانێن سێ خالا ژ دو یاریێن بوری ئارمانجا وان ب تنێ سەرکەفتنە داکو بەردەوامیێ ب دەنە رێزا دویێ.