ئه‌ڤرۆ نيوز:
دەولەتا تورکیا ل سەر سنۆرێ رۆژئاڤایێ کوردستانێ ھێزێن سەربازی زێدە دکەت و تانک و تۆپێن گران بجە دکەت و ژ وەلاتیێن کورد یێن ل سروج، سەرێکانیا باکور و گوندێن کیلیسێ خواستیە کو گوندان ڤالا بکەن و بچنە باژێران. ھەروەسا ھێزێن تورکیا د ناڤا ٢٠ رۆژان دا ب دەھان جار سنۆرێ رۆژاڤا دەرباز کرینە و ب تۆپان ل چەپەرێن YPG ددەت.
سەرۆک وەزیرێن کانتۆنا کۆبانێ ئەنوەر موسلیم د داخویانیەکی دا راگەھاند کو دەولەتا تورکیا دخوازیت ھێزێن خوە یێن سەربازی ب تانک و تۆپان ل گوندێن سنۆری بجیە بکەت و گۆت: (ھێزێن تورکیا ب تایبەت پشتی رزگارکرنا گرێ سپی و بەنداڤا تشرین ھێرشێن خوە ل سەر سەنگەرێن YPG زێدە کریە و د ناڤا ٢٠ رۆژان دا ب دەھان جار تانک و ھێزێن سەربازی یێن تورکیا سنۆرێن مە دەرباز کرینە و دخوازن ئالۆزیان دەرخینن لێ ھەتا نھا ھێزێن مە بەرسڤا تورکان نەداینە).
سەرۆک وەزیرێن کانتۆنا کۆبانێ ھەروەسا راگەھاند ژی ھەر رۆژا کو دەولەتا تورکیا ھێزێن خوە ل سنۆری زێدە دکەت و ب تانک و تۆپان ھێرشی بنگەھێن شەرڤانێن کورد دکەت د ھەمان دەمی دا چەکدارێن داعشێ ژی ھێرشی گوندان دکەن و گۆت: (ئەم باش دزانین کو پەیوەندیێن تورکان و داعشێ ھەنە و د ھەماھەنگیێ دا ھێرشی مە دکەن لێ ب سایا بەرخوەدانا مەزنا شەرڤانێن مە ھەتا نھا نەشیاینە د پیلانێن خوە دا سەرکەڤتی بن).
ھەر د ڤێ دەربارێ دا سەرۆک وەزیرا کانتۆنا عەفرینێ ژی راگەھاند کو ھێزێن تورکیا د ناڤا ڤێ ھەفتیێ دا سێ جاران سنۆرێ کانتۆنێ دەرباز کرینە و ل گوندێن رۆژئاڤا ب تانکان گەریانە و گەفا کوشتنێ ل وەلاتیان کرینە و گۆت: (نھا ھەم ل سنۆرێ کانتۆنا کۆبانێ و ھەم ژی ل سنۆرێ کانتۆنا مە ب سەدان تانک و تۆپێن گران ھاتینە بجھکرن و ل عەزازێ چەکێن گران و کەلوپەلێن سەربازی بۆ ھەرسێ رێکخستنێن تیرۆرست ئەل نوسرا، ئەحرار ئەل شام و کۆما تورکمانان دھێتە ڤەگوھاستن و ئارمانجا وان ئەوە کو ھێرشەکا بەرفرەە ژ عەزازێ بەر ب کانتۆنا مە ڤە دەستپێ بکەن، لێ مە ژی ھێزا خوە ل سەر ھەموو سنۆران بجە کریە و ھێزێن ھەڤپشک یێن YPG و ھێزێن سووریا یا دیمۆکراتیک ئۆپەراسیۆنێن ل دژی ڤان کۆمێن تیرۆرست بەردەوام دکەن و ھەتا رزگارکرنا عەزازێ ژی دێ بەردەوام کەن).
ھەر د ڤێ دەربارێ دا رۆژنامەڤانێ ناڤدار یێ تورکیا جەنگیز چاندار ژی راگەھاند کو دەولەت و حوکمەتا تورکیا ژ ئەقلێ دەولەتێ دوور دکەڤن و یاریان ب ئاگری دکەن و گۆت: (بەری نھا ئەمریکا د دەما چوونا سەربازێن تورک دا بۆ ناڤ ئاخا رۆژئاڤا ھۆشداری دابوو ھێزێن تورکیا لێ حوکمەتا داوود ئوگلۆ د بن فەرمانا سەرۆک کۆمار ئەردۆگانی دا بەردەوامە د بنپێکرنا سەروەریا ئاخا سووریێ و رۆژئاڤایێ کوردستانێ دا و ئەو یەک دێ زیانێ گەھینتە تورکیا و دڤێت د زووترین دەم دا حوکمەت دەست ژ ڤان کریاران بەردەت و تێبگەھیت کو دەولەتەک برێڤە دبەن ھەکە نە ئەمریکا و روسیا و جڤاکێ نێڤدەولەتی ڤێ یەکێ قەبوول ناکەن).
جەنگیز چاندار ھەروەسا دیار ژی کر کو رۆژ ب رۆژ تورکیا د وارێ ئابووری، سیاسی و جڤاکی دا پارچە دبیت و ئابوورێ وەلاتی بەر ب تێکچوونێ ڤە دچیت و سیاسەتا دەولەتێ د ناڤا جڤاکێ تورکیا دا پارچەبوونەکا گەلەک مەزن دروست کریە و گۆت: (ئەز ژ کیژ ئالیەکێ ڤە بەرێ خوە ددەمە رەوشا تورکیا دبینم ب تنێ خرابی، تێکچون، ئالۆزی و شەر ھەیە و ھێڤیەکا وەسا ئێدی ل وەلات دا نەمایە کو ئارامی جێگر بیت و د ناڤا ھەیڤەکی دا نێزیکی ٦٠٠ کۆمپانیێن مەزن و خوەدانکارێن ناڤدار پرۆژێن خوە ل تورکیا ھێلان و ڤەگەریانە وەلاتێن خوە و د وارێ جڤاکی دا ژی مخابن ب سایا سیاسەتێن دژوار یێن سەرۆک وەزیران و سەرۆک کۆماری پشکەکا وەلات د ناڤ شەری دایە و پشکا دی ژی د ژیانا خوە یا نۆرمال دایە، لێ ھەکە شەر و ئۆپەراسیۆن بەردەوام بکەن رۆژئاڤایێ تورکیا ژی دێ ئالۆز بیت و ئارامیا ھەموو وەلات تێک بچیت و بۆ ڤێ چەندێ ئەز جارا داوی بانگ ل سەرۆک کۆمار و سەرۆک وەزیران دکەم سیاسەتێن خوە یێن ل ھەمبەر کوردان، رۆژئاڤایێ کوردستانێ بەر چاڤان دەرباز کەن ھەکە نە ئەز ژ نھا پێڤە دبێژم دێ تورکیا پارچە بیت).