ئەڤرۆ نيوز:
د دەمێن بۆری دا گەلەک بەحس ل مەترسیێن ھاتنا میلیشیێن حەشد شەعبی بۆ سنۆرێ کەرکووکێ و خۆرماتوو و دەڤەرێن دی یێن کوردستانی دھاتە کرن و ھوشداری ژی دھاتنە دان ل دۆر زێدەبوونا ھژمارا چەکدارێن شیعی ل وان دەڤەران، نوکە ژی ئەو مەترسیە یێن دیاردبن.
ژێدەرەکی پلانەکا مەترسیدار یا میلیشیێن حەشد شەعبی یێن شیعی دژی کەرکووکێ ئاشکراکر کو ل دووڤ گوتنا وی ژێدەری، حەشد شەعبی ل بەرە بنگەھەکێ لەشکریێ مەزن ل گوندێ (بەشیر) ل باشوورێ رۆژئاڤایێ کەرکووکێ دەمەزرینیت.
وی ژێدەرێ باوەرپێکرێ بۆ رۆژناما (ھەولێر) دیارکر ” ھادی عامری بەرپرسێ میلیشیا (بەدر) و سەرکردێ دیارێ حەشد شەعبی، د کۆمبوونەکێ دا ئاماژە ب وێ چەندێ کر، ھەتاکو ئەو ھێزێن نوکە ل گوندێ (بەشیر) ھژمارا وان نەگەھیتە ١٠ ھزار چەکداران، ڕێ نادەین پێشمەرگە پشکداریێ د رزگارکرنا وی دا بکەت”.
ئاماژە ب وێ چەندێ ژی دا” عامری گوتیە ژی، ھەر دەمێ ١٠ ھزار چەکدارێن حەشد شەعبی کۆمکرن، دێ بنگەھەکێ لەشکری دامەزرینین بۆ وێ چەندێ ببیتە ھێزا ھەڤڕکا کوردان ل کەرکووکێ و بێ مە کورد نەشێت چو بکەن”.
دبێژیت ژی” ئارمانجا سەرەکی یا شیعان، کۆمکرنا ١٠ ھزار چەکدارانە و دەمێ دھێتە نێزیکی کەرکووکێ دێ جھگیر بیت و نازڤریت و نھێنیا گیرۆبوونا رزگارکرنا گوندێ (بەشیر) بۆ ڤێ چەندێ دزڤریت”.
د دەمێ بۆری دا، ھێزێن پێشمەرگەی شیان رووبەرەکێ بەرفرەە ل باشوور و رۆژئاڤایێ کەرکووکێ و داقووق و خۆرماتوو ژ دەستێ تیرۆرستێن داعشێ رزگار بکەن، بەلێ ھەتا نوکە میلیشیێن حەشد شەعبی یێن شیعی نەشیاینە گوندێ (بەشیر) یێ شیعی رزگاربکەن، ڤێ چەندێ پرسیار ل دەڤ پتریا چاڤدێرێن سیاسی پەیداکریە، لێ دیارە ژی نھێنی و مەرەمێن میلیشیێن حەشد شەعبی ل دەڤەرێن کوردستانی زێدەتر یێ رۆھن و ئاشکرا دبن.
ل دووڤ پێزانینێن (ھەولێر) ژ وی ژێدەری ب دەستخوەڤە ئیناین، دو رۆژان بەری ھێرشا پێشمەرگەی بۆ سەر گوندێ (ئەلبو محەمەد) و گوندێن دی، سێ ھزار چەکدارێن شیعی یێن ب سەر میلیشیا (ئەبولفەزل ئەلعەباس) ڤە چوونە باژێرکێ (تازە خۆرماتوو)ی ل باشوورێ کەرکووکێ.
دھێتە زانین ژی مالپەرێ (المدی) بەری چەند رۆژان ژ زارێ فەرماندەکێ فەوجەکا میلیشیا حەشد شەعبی ل دەڤەرا (لەیلان) ل باشوورێ کەرکووکێ بەلاڤکربوو” ھزار چەکدارێن حەشد شەعبی د دەمێ دو رۆژێن داھاتی دا دێ خوە بەرھەڤکەن کو بچن دەڤەرا (فەتحە) ل پارێزگەھا سەلاحەدین و ل گەل ھێزەکا دی دا ئێک بگرن کو خوە بۆ کونترۆلکرنا باژێرکێ (رەشاد) و دەوربەرێن وی بەرھەڤ دکەن”.
عەقید (خەلەف ئیبراھیم جبووری) ئەو فەرماندێ فەوجا میلیشیا حەشد شەعبی بەحس ل وێ چەندێ ژی کربوو کو ” ل دووڤ وان فەرمانێن مە ژ ھادی عامری وەرگرتین و ب ڕێیا (ئەبو رزا نەجار) فەرماندێ لیوا ١٦ یا حەشد شەعبی گەھشتینە مە، داخواز ژ مە ھاتیە کرن کو ھەموو شیانێن خوە رێکبێخین و ل گەل ھێزێن پێشمەرگەی دا ھەماھەنگیێ بکەین بۆ رزگارکرنا حەویجە و جھێن دی ژ دەستێ داعشێ”.
ژلایێ خوەڤە (محەمەد خەلیل جبووری) سەرۆکێ فراکسیۆنا عەرەبی ل جڤاتا پارێزگەھا کەرکووکێ بۆ (المدی) ئاشکراکر” ھێزەکا حەشد شەعبی کو عەرەبێن کەرکووکێ تێدا یێن ھەین، دێ چنە ھەمان دەڤەرا پارێزگەھا سەلاحەدین و ل گەل ھێزێن ل وێرێ دێ پشکداریێ د کونترۆلکرنا قەزا (حەویجە) و باژێرکێن ب سەرڤە کەن”.