ئەڤرۆ نيوز:
ل ئامەدێ، بۆتان، دێرسیمێ و سەرحەدێ شەرێ د ناڤبەرا گەریلان و سەربازێن تورک دا بەرفرەە دبیت و د رەوشا نھا دا پرانیا دەڤەرێن بۆتانێ یێن چیایی د بن کۆنترۆلا ھێزێن PKK دایە و ل باژێرێ، سیلڤان، نوسەیبین، شەمزینان، لیجێ، سووریێ، جزیرێ و ئەلکێ شەرێ کولان ب کولانان بەردەوام دکەت و د شەرێ باژێران دا پێنج گەریلا و ١٣ پۆلیس و تیمێن تایبەتێن دەولەتا تورکیا جانێ خوە ژ دەست دان و ١١ وەلاتیێن سڤیل ژی ژ ئالیێ ھێزێن ئێمناھیێن دەولەتێ ڤە ھاتینە کوشتن.
ھەلبژارتنێن پێشوەخت یێن تورکیا نێزیک دبنو ھەر چەندە پرانیا سیاسەتمەدار، سازیێن سڤیل و گەلێن کورد و تورک چاڤەرێ وێ یەکێ بوون ئاگربەستەکا دو ئالی بھێتە راگەھاندن لێ ئۆپەراسیۆنێن سیاسی و سەربازی یێن دەولەتێ ل باکورێ کوردستانێ بەردەوام دکەن و د ھەمبەر دا گەریلایێن کورد ب دژواری بەرسڤا ئۆپەراسیۆنێن تورکیا ددەن و شەر ب رەنگەکی بەرچاڤ دژوار بوویە.
ب تایبەتی شەرێ د ناڤبەرا تورکیا و PKK دا ل ھەرێمێن بۆتان، دێرسم، ئامەدێ و سەرحەدێ دژواریا شەری ژ سالێن ١٩٩٠ زێدەتر بوویە و کریارێن دەولەتێ ل ھەمبەر خەلکێ سڤیل ژی رۆژ ب رۆژێ دژوارتر دبیت و ئەو یەک مەترسیێ ل سەر یەک پارچەیا تورکیا دروست دکەت، ژ بەر کو شەرێ ل باژێران و جودابوونا ھەر دو جڤاکێن کورد و تورک مەترسیێ ل سەر پەیوەندیێن کورد و تورکان دروست دکەت.
رۆژنامەڤانێ ناڤدار یێ تورکیا جەنگیز چاندار ژی د نڤیسا خوە یا ڤێ داویێ دا دیار دکەت کو ئەڤینداریا سەرۆک کۆمارێ تورکیا بۆ ئاڤاکرنا دەستھەلاتا دکتاتۆری ئانکۆ سیستەمێ بەرێ یێ سولتانێن ئۆسمانیان یەک پارچەیا تورکیا دخیتە د مەترسیێ دا و رۆژانە ب دەھان کەس ژ ھەردو ئالیان دھێنە کوشتن و ھەردو جڤاکێن کورد و تورک د وارێ ھەستیاری دا ژ ھەڤدو جودا دبن، دڤێت شەر نەمینیت جارەکا دی ھەردو ئالی ڤەگەرنە سەر مێزا دانوستاندنان لێ ڤێجارێ د بن چاڤدێریا پەرلەمانی دا روونشتن بھێنە سازکرن و چ تشتەکی ڤەشارتی نەمینیت.
ل ئالیێ دی لاوەکێ کورد یێ سڤیل پشتی ژ ئالیێ پۆلیسان ڤە ھاتیە کوشتن و پۆلیسان تەرمێ وی ب پشتا ترۆمبێلا سەربازی ڤە گرێدان و د ناڤ جادەیان دا ل دووڤ ترۆمبێلا سەربازی کێشاندن و ل ھەمبەر ڤێ یەکێ سەلاحەدین دەمیرتاش ھەڤسەرۆکێ HDP راگەھاند کو یێن ئەڤ کریارە ئەنجام داینە کەسێن بێنامووس و بێ ویژدانن و ئەو حوکمەتا کو چاڤێن خوە ل بنپێکرنا مافێ مرۆڤان دگریت و فەرمانا کوشتنا لاوێن کورد ددەت و پشتی مرنێ ژی تەرمێ وی ل دووڤ ترۆمبێلا سەربازی دکشینن و ژ بلی مرنێ چو تشتەکێ ھەژی کوردان نابینن، نەشێت ببیتە حوکمەتا کوردان و گەلێ کورد ڤێ دەولەتێ و حوکمەتا بێ قانوون و بێ وژدان قەبوول ناکەت و گۆت: (ئەڤرۆ دەولەتا ھەوە یا داگیرکەر ھاتیە وەلاتێ مە و زۆلم و زۆرداریێ ل مە دکەت و ئەم زۆلم و زۆرداریا وە قەبوول ناکەین و ئەم دێ حوکمەتا وە ھلوەشینین).
ژ ئالیێ خوە ڤە ئەحمەد داوود ئوگلۆ سەرۆک وەزیرێن حوکمەتا بەروەخت یا تورکیا راگەھاند کو ئەو ژ دیمەنێن کێشانا تەرمێ کەسەکی ل دووڤ ترۆمبێلا سەربازی ڤە گەلەک خەمگین بوویە و گۆت: (مە دو کەسێن بەرپرسیار شاندینە شەرنەخێ و لێکۆلین ھاتینە دەستپێکرن و پشتی ب داوی ھاتنا ڤەکۆلینێ و لێپرسینێ دی دەربارێ کەسێن تۆمەتبار دا دێ پێرابوونێن قانوونی ھێنە وەرگرتن).