ئه‌ڤرۆ نيوز:

سەرۆکێ فیدراسیۆنا سەرانسەریا پەنابەران ل ھەرێما کوردستانێ ئاشکرا کر، ل ڕۆژێن بھێت تەرمێ حەفت کۆچبەرێن دی یێن ھەرێما کوردستانێ ژ وەلاتێ نەمسا دێ ھێنە ڤەگەڕاندن بۆ ھەرێمێ، کو ب ئەگەرێ کارەساتا کامیۆنا نەمسا خەندقی بوون و گۆت “سێ ژ وان خەلکێ دھۆکێ نە و ژ ئێک خێزانن کو پێکھاتینە ژ دو برا و مامی”.
ئامانج عەبدولا، سەرۆکێ لقا ھەرێما کوردستانێ یا فیدڕاسیۆنا سەرانسەریا پەنابەران بۆ رۆژناما ئەڤرۆ ئاشکرا کر کو ڤان رۆژان حەفت تەرمێن دی کو چار ژ وان یێن دەڤەرا گەرمیانن و سێ ژی یێن باژێڕێ دھۆکێ نە دێ ئینە کوردستانێ و گۆت “ئەو سێ تەرمێن دھۆکێ دو برا و مامن و نوکە پشکنین یێ بۆ تەرمێ وان پەنابەران دھێتەکرن و پشتی مامەلێن وان دووماھی دھێن ل سەر ئەرکێ حوکمەتا ھەرێمێ دێ بۆ کوردستانێ ھێنە ڤەگەڕاندن،
ئامانج عەبدولا خویا ژی کر کو دیاردا کۆچا نەقانوونی ژ ھەرێمێ بۆ ئورۆپا یا بەردوامە و گۆت “مە حوکمەت و پەرلەمانێ کوردستانێ ژ ئەگەرێ ڤێ کۆچا نەقانوونی ئاگەھدار کرینە، چونکی خەلکێ مە یێ دبیتە خارنا نەھەنگێن ناڤا دەریای و د ناڤا زیندانێن ئورۆپا دا ژیانا خوە دەرباز دکەن”.
ھەژی گۆتنێ یە ب ئەگەرێ نەمانا ھەناسێ ھژمارەکا پەنابەران د ناڤا کامیۆنەکا وەلاتێ نەمسا دا خەندقی بوون کو ھژمارەک ژ وان پەنابەران خەلکێ ھەرێما کوردستانێ بوون و ھەتا نوکە تەرمێ شەش پەنابەرێن ھەرێمێ ھاتینە ڤەگەڕاندن کو چار ژ وان خەلکێ دھۆکێ بوون و دو پەنابەرێن دی ژی خەلکێ قەزا زاخۆ بوون.

ئەڤرۆ نيوز:

پەرلەمانتارەکێ فراکسیۆنا پارتی ل پەرلەمانێ کوردستانێ رەخنێن توند ل سەرۆکێ پەرلەمانی دگریت، ژ بەر کو ب ڕێیا راگەھاندنێ رەخنێ ل حوکمەتا ھەرێمێ دکەت، دبێژیت ژی یا سەیر ئەوە ھەتا نوکە سەرۆکێ پەرلەمانی نزانیت کا حوکمەتا ھەرێمێ چەند یا قەردارە و ژ دەڤ خوە ھژماران دئینیت.
دلشاد شەعبان جێگرێ سەرۆکێ لژنا سامانێن سروشتی ل پەرلەمانێ کوردستانێ بۆ مالپەرێ فەرمیێ پارتی گوت” جھێ حێبەتیێ یە ل دەڤ من کو سەرۆکێ دەزگەھەکێ مەزن کو باوەری دایە حوکمەتەکێ، نوکە ب لاوازی و ب ڕێیا راگەھاندنێ بەحس ل وێ چەندێ دکەت کو پێدڤیە ئەو حوکمەتە دانپێدانێ ب وێ چەندێ بکەت کو نەشێت کێشا مووچان چارە بکەت ٢٠ ملیار دۆلاران ژی یا قەردارە، پێدڤیە سەرۆکێ پەرلەمانی ب فەرمی ل ھۆلا پەرلەمانی ویچ ئاخڤتنێ ئاراستەی حوکمەتێ بکەت، نەکو ب ڕێیا راگەھاندنی و یا جھێ حێبەتیێ ژی ئەوە سەرۆکێ پەرلەمانی نزانیت حوکمەتا ھەرێمێ چەند یا قەردارە و ھەر ژ دەڤ خوە ھژمارەکێ دئینیت کو چو راستی بۆ نینە”.
دلشاد شەعبانی گوت ژی” سەرۆکێ پەرلەمانی کو نەشێت وەزیرەکی بینیتە پەرلەمانی و شیانێن راستڤەکرن و دەرکرنا قانوونەکێ نەبیت و ل بن سیاسەتا خوە یا خراب دا، پەرلەمان ل سەر دو بەرەیان یێ دابەشکری و ئەڤە ژی رامانا وێ ئەوە کو پێدڤیە بەری ھەموو کەسەکی جەنابی وی دان پێدانێ ب وێ چەندێ بکەت کو پەرلەمانێ ئیفلیج کری و گرنگترین کورسیا ڤێ ھەرێمێ یا داگیرکری بێ کو چو مفای بگەھینی وەلاتیان”.
ئەڤ پەرلەمانێ پارتی دووپاتیێ دکەت” بەری نوکە ژی من یا گوتی و نوکە ژی دێ بێژم، تو زەلامێ دەولەتێ نینی، چونکی ژ روویێ مەنتقی ڤە ھێز و چو تشت تە نینن و ژ روویێ ھزری و ئەکادیمی ژی ڤە ئێک گوھۆرین ژی ھەوە نەکریە و نەشێن بکەن ژی، باشترین چارەسەری ئەوە تو دەست ژ کاری بکێشی ھەتاکو خەلکەکێ دی یێ خودان شیان جھێ تە تژی بکەت و ئارام بیت”.
دلشاد شەعبان زێدەتر دبێژیتە سەرۆکێ پەرلەمانی” ئەز شەرم دکەم ئەندامێ پەرلەمانەکی بم تو سەرۆکێ وی بی و تە ئیفلیج کری، گەلەک ژ ئەندامێن پەرلەمانی ژی نەڤێن سلاڤی تە بکەن، بەلێ حەسودیێ ب حوکمەتەکێ دبەم کو ئەندامێن وێ ل رۆژا ژ دایکبوونا سەرۆکێ وێ، دیاریان و کێکێ بۆ دبەن”.