ئه‌ڤرۆ نیوز:
وه‌لاتیه‌ك گازندا خوه دگه‌هینته ئه‌ڤرۆ نیوز و دبێژیت” ئەڤروکە من سەڕەدانا رێڤەبەڕیا پێشینەیا خانوبەرا ل دهۆکێ کر،ژبو دانا پێشینەیێ،پشتی 9 رۆژ ب سەر ڤەچووین،ئەز چوومە دەف فەرمانبەرا وەرگرتنا پارەیان،گوت دێ سێ هزار و نیڤا زێدە دەی،ژبەرکو 9 رۆژ یێ ب سەر ڤە چووین،هەتاکو ئەز چوویمە دەڤ رێڤەبەری هەر ل هەمان ئاڤاهی و من گۆتێ ئەز ژدوور هاتیمە، نەگەهشتیمە زوو بهێم و پشتی زڤریمە ڤە دەف وێ فەرمانبەرێ،گۆت 7 هزار و نیڤ چوونە سەر،من گۆتێ بۆچی؟دماوێ پێنج دەقیقادا چار هزار چوونە سەر،گۆت، دەمژمێر 12 خزینە دهێتە گرتن،لەورا ئەڤرۆ 22 هەیڤێ یە، وێ فەرمانبەرێ دانا 29.9.2015 ،ژنوو وی دەمی دەمژمێر 12 ی نیڤرۆ بوو،لەورا 7 رۆژ زێدە هاڤێژتنە سەر.
ئەڤرۆ نیوز ،سالار دۆسکی:
ئەندامەکێ پەرلەمانێ کوردستانێ ژ لیستا بەرەیی تورکمانی ئاشکراکر کو پرسا سەرۆکاتیا ھەرێما کوردستانێ پرسەکا نشتیمانی یە و پێدڤی ب رازیبوونا ھەموو پێکھات و ئالیێن کوردستانێ یە.
ئایدن مەعرۆف، ئەندامێ پەرلەمانێ کوردستانێ ژ لیستا بەرەیی تورکمانی دپەیجێ خوەیێ تایبەتێ جڤاکیێ فەیسبووکی دا ئاشکراکریە، کو پرسا سەرۆکاتیا ھەرێماک وردستانێ پرسەکا نشتیمانی یە و راستەوخۆ پێدڤی ب ھەموو ئالیێن سیاسی ل کوردستانێ یە و ئەم ل گەل رێکەفتنا سیاسی نە، بتنێ ب رێکەفتنا سیاسی ئەڤ کێشە دێ ھێتە چارەسەرکرن.
ئایدنی ھێشتا ژی گۆت: نوکە ھێزێن سیاسی ھەر ئێک ب عەقل و ھزر و بەرژوەندیێن خوە بەحسێ ڤێ پرۆسێێ دکەت، ھەر ئێک ب ئالاڤەکی ڤێ رەوشێ ڤەدگەریت، دبینم دڤێت خوە دور بکەین ژ ھەڤرکیا سیاسی .
ئەڤرۆ نیوز، زنار تۆڤی:
رێکخراوا تیرۆرستی یا داعش ئەڤڕۆ ڕۆژا چارشەمبی رێكه‌فتى 23ى ئيلۆنا 2015ێ چەندین بریار دان ل دور رۆژانێن جەژنا قۆربانێ کو ل رۆژا جەژنا قوربانێ نڤێژا جەژنێ ناھێتەکرن و نابیت ل وان دەڤەرێن دەستھەلاتا وان لێ، ب ئێکجاری نڤێژا جەژنێ لێ بھێتەکرن و ھەروەسا بریار دایە، نابیت ژن ب تنێ دەرکەڤن ل رۆژانێن جەژنێ و دڤێت زەلام د گەل دابن، دیسا دیارکریە، نابیت ژن جلێن رۆژئاڤایا ل بەرخوه بکەن.
ژ لایەکێ دی ڤە داعش ل ڤان رۆژان ژنێن بیژن ل مووسل ل سەر ئەندامێن خوه دابەش دکەت.
ئه‌ڤرۆ نيوز:
لايه‌نێن سياسى ل پارێزگه‌ها هه‌له‌بچه ل سه‌ر كورسيێن جڤاتا پارێزگه‌هێ رێكه‌فتن و ب گۆره‌يى رێكه‌فتنێ 10ى هه‌يڤا داهاتى ژڤانێ دووماهيێ يه بۆ پێشكێشكرنا ناڤێن كانديدێن لايه‌نان، به‌لاڤكرنا كورسيێن جڤاتا پارێزگه‌ها هه‌له‌بچه ل سه‌ر پيڤه‌رێ دووماهى ئه‌نجامێن هه‌لبژارتنان.
كورسى ب ڤى ره‌نگێ ل خوارێ نه:
ليستا خزمه‌ت (ئێكگرتوو و كۆمه‌ل) 7 كورسى.
ئێكه‌تى نشتيمانى كوردستان 6 كورسى.
بزاڤا گۆڕان 5 كورسى.
پارتى ديموكراتى كوردستان 3 كورسى.
بزاڤا ئيسلامى 2 كورسى.
هه‌ڤپه‌يمانيا نشتيمانى 1 كورسى.
كورسيا كوتا 1 كورسى.
ئەڤرۆنیۆز، سالار دۆسکی:
دەستەیا گەشت و گوزارێ حوکمەتا ھەرێما کوردستانێ ئاشکراکر کو بەرھەڤیێن تەمام کرینە بۆ پێشوازیکرنا گەشتیاران تایبەت ل ناڤەراست و باشورێ عیراقێ.
نادر ورستی پەیڤدارێ دەستەیا گەشت و گوزارێ ھەرێمێ بۆ ئەڤرۆنیۆز گۆت: سەرەرایی قەیرانێن دارایی و ئابووری ل کوردستانێ، رێڤەبەریێن گەشتیاری ھاتینە ئاگەھدارکرن کو وەک جەژنَن بوری کارێ خوە بکەن و لژنێن ھەفکاری و ھاریکاریا گەشتیاران بھێنە پێکئینان.
روستی ھێشتا ژی گۆت: ڤێ جەژنێ جوداھی ھەیە لگەل جەژنێن بوری چونکە کوردستانێ چەندین جھێن گەشتیاری ڤێ جەژنێ ھاتینە ڤەکرن و ئەڤە دبیتە دەرگەھەک بۆ راکێشانا گەشتیاران بۆ کوردستانێ.
ئەڤرۆ نیوز، سالار دۆسکی:
سەرۆکێ لژنا پیشەسازی و سوتەمەنیێ ل جڤاتا پارێزگەھا دھۆکێ ئاشکرا کر کو قەیرانا غازێ ل پارێزگەھێ نینە و ب تنێ ھەکە د رێکا ئاکرێ دا بۆ پارێزگەھێن دی وەک بازرگانی خەلک بفرۆشیت.
عەبدولسەمەد تێلی سەرۆکێ لژنا پیشەسازی و سوتەمەنیێ ل جڤاتا پارێزگەھا دھۆکێ بۆ ئەڤرۆ نیۆز گۆت: “قەیرانا غازێ یا نوکە ل پارێزگەھێ کارتێکرنا پارێزگەھێن ھەولێر و سلێمانیێ ل پارێزگەھا دھۆکێ بوویە، دوھی نەهـ ترۆمبێل گەھشتینە و ھەر رۆژ ھەشت دگەھشتن بەلکو دوھی ترۆمبێلەک زێدە ژی گەھشتیە”.
ناڤبری ئاشکرا کر کو قەیرانا غازێ ل کوردستانێ ژ بەر کارگەھا قادر کەرم بوویە کو نوکە کەفتیە بن نووژەنکرنێ، دیسان وەلاتی ژی بازرگانیێ ب غازا پارێزگەھێ دکەن و ب رێکا ئاکرێ بۆ ھەر دو پارێزگەھێن دی دھێتە رەوانەکرن.
تێلی نەڤەشارت كو راگەھاندنێ ژی کارتێکرن ل خەلکى کر و گۆت: “دەمێ کاودانێن خەلکێ ھەولێرێ ئاشکرا کرین خەلکێ مه یێ چاڤ ترسیایە و ئەگەر پێنچ بتلێن غازێ ھەبن کرنە شەش”.
ئەڤرۆ نیوز،زنار تۆڤی:
باراک ئۆباما سه‌رۆكێ ئەمریکا داخواز ژ وه‌لاتێن ئه‌ندام یێن ئێكه‌تییا ئورۆپا کر کو هه‌ر ئێك بارا خۆ یا كۆچبه‌ران وه‌ربگریت.
سه‌رۆكێ ئه‌مریكا باراك ئۆباما د په‌یوه‌ندییه‌كا تێله‌فونی دا دگه‌ل شیره‌تكارا ئه‌لمانی ئه‌نگێلا مێركل بەحسێ بارودۆخێ كۆچبه‌ران کر و دیارکر،پێدڤیە وەلاتێن ئوڕۆپی کۆچبەران وەربگرن و ل سەر خۆ دابش بکەن و هاریکاریا وان بکەن.
ئۆبامای ب رێیا ئه‌نگێلا مێركل شیرەتکارا ئەلمانیا داخواز ژ وه‌لاتێن ئه‌ندام كر،کو هه‌ر ئێك بارا خۆ ژ كۆچبه‌ران وه‌ربگریت و ل گۆری وێ پلانا دابه‌شكرنێ ئه‌وا ئێكه‌تییا ئۆرۆپا دانای ژبۆ حەواندنا وان.
ئەڤرۆ نیوز، زنار ۆڤی:
سکرتێرێ گشتی یێ قۆلپا ئەتلەسی (ناتۆ)ژەنس ستۆلتەنبەرگ هۆشداریێ ددەتە دەولەتا تورکیا سەبارەت هێریشێن ل سەر پەکەکێ و دیارکریە:”مافێ تورکیایە کو ل ھەمبەری هێریشا خوە بپارێزیت و بەرەڤانیێ ژخۆ بکەت،لەورا پێدڤیە ئەڤ چەندە د چارچۆڤێ پاراستنێ دا بمینیت و ئاریشە نەهێنە زێدەکرن.
ژێنس ستۆلتەنبەرگ سکرتێرێ گشتی یێ ناتۆیێ سەبارەت هێرشێن فڕۆکێن سۆپایێ تورکیا بۆ سەر پەکەکێ هۆشداری دا وەلاتێ تورکیا،خویاکر،
هێڕشێن سۆپایێ تورکیا ب فڕۆکان دێ پێڤاژۆیا ئاشتیێ دگەل پەکەکێ ئێخیتە د مەترسیێ دا و هەردو لایەن دێ ژێک دوور کەڤن و گوت ژی،مافێ ھەر وەلاتەکێ یە کو بەرەڤانیێ ژ خۆ بکەت،دەمێ هێرش دهێنە سەر،لەورا دڤێت پارێزی د سەر پێڤاژۆیا ئاشتیێ بهێتە کرن و ئێدی ئاریشە ل تورکیا زێدە نەبن.
ئه‌ڤرۆنیۆز، ئه‌یاد به‌روارى
پارێزگه‌رێ به‌غدا ئاماره‌كا نوو یا حاله‌تێن تووشبوویێن نه‌خوه‌شیا كولیرایێ ل به‌غدا راگه‌هاند و هوشداری ژی دا ژ پشتگوه هاڤێتنا ره‌فتاركرنێ ل گه‌ل ڤێ نه‌خوه‌شیێ و مه‌ترسیێن به‌ربه‌لاڤبوونا وێ كو ئێدی كونترۆل ل سه‌ر نه‌هێته كرن.
عه‌لی موحسن پارێزگه‌رێ به‌غدا د به‌یاننامه‌كێ دا كو ب رێیا نڤیسینگه‌ها وی یا راگه‌هاندنێ هاتیه به‌لاڤكرن دبێژیت” هژمارا تووشبوویێن كولیرایێ ل ده‌ڤه‌را ئه‌بو غرێب ل رۆژئاڤایێ به‌غدا گه‌هشته 240 كه‌سان و چار حاله‌ت ژی ل كه‌مپه‌كا ئاواران هاتینه تۆماركرن”.
پارێزگه‌رێ به‌غدا هوشدارى دا ژ له‌زاتیا به‌لاڤبوونا ڤێ نه‌خوه‌شیێ ل به‌غدا و گوت ” هه‌تا نوكه شه‌ش وه‌لاتیان گیانێ خوه یێ ژ ده‌ستدای”.
ژلایه‌كێ دى ڤه وه‌زاره‌تا په‌روه‌ردێ ل عیراقێ بریاردا ده‌ستپێكرنا سالا خواندنێ یا نوو یا قۆناغا سه‌ره‌تایی ژبه‌ر كولێرایێ ژ 1/10/2015 بۆ 18/10/2015 بهێته پاشخستن ژبۆ پاراستنا قوتابیان ژ وێ نه‌خوه‌شیێ و هه‌تاكو وه‌زاره‌تا ساخله‌میێ پێرابوونێن پێدڤی ل دۆر ڤی بابه‌تی وه‌ردگریت.
نيشاندان