ئه‌ڤرۆ نیوز:
فوئاد حسێن سه‌رۆكێ دیوانا سه‌رۆكایه‌تیا هه‌رێمێ ئه‌ڤرۆ راگه‌هاند” د كومبوونا بهێت دا، پارتى ل دور پرسا سه‌رۆكاتیا هه‌رێمێ دێ به‌رسڤا پرۆژێ چار لایه‌نێن سیاسى ده‌ت.
ئه‌ڤرۆ لایه‌نێن سیاسى، گوران، ئێكه‌تى، پارتى، كومه‌ل، یه‌كگرتوو دیسان كومبوون و نه‌گه‌هشتنه چ ئه‌نجامه‌كێ و بریاره كومبوونا بهێت 6 هه‌یڤا بهێت بهێته سازكرن و ژڤانه پارتى به‌رسڤا پرۆژێ هه‌ر چار لایه‌نێن سیاسى بده‌ت.
ئه‌ڤرۆنیۆز، سالار دۆسكى:
ل دووڤ ئامارێن رێڤه‌به‌ریا په‌روه‌ردێ ل قه‌زا سێمێلێ، مامۆستایێن بێ مووله‌ت ئه‌ڤ ساله ده‌وامێ نه‌كه‌ن (151) مامۆستانه و پتر ژ (300) مامۆستا مووله‌تا ژ دایك بوونێ هه‌یه، ئه‌ڤه دبیته مه‌زنترین ئاریشه ل په‌روه‌ردا ناڤبرى .
عه‌بدوللا حه‌سه‌ن رێڤه‌به‌رێ په‌روه‌ردا قه‌زا سێمێلێ د دیداره‌كا رۆژنامه‌ڤانى بۆ مالپه‌رێ ئه‌ڤرۆ نیۆز گۆت” مامۆستایێن موله‌تا بێ مووچه وه‌رگرتین، نه هه‌موو چووینه ده‌رڤه، دبیت گه‌له‌كا نه‌خوه‌ش هه‌نه و گه‌له‌كا كاره‌كێ دى هه‌یه و مووله‌تا بێ مووچه وه‌رگرتیه، هه‌تا نوكه ل سنورێ په‌روه‌ردا سێمێلێ (151) مامۆستایێن موله‌دار هه‌نه كو بێ مووچه وه‌رگرتینه، بتنێ ل ئاماده‌یا خوانكێ(9) مامۆستا و (2) فه‌رمانبه‌ر مووله‌تا بێ مووچه وه‌رگرتینه ئانكو (11) ژ ئاماده‌یه‌كێ، ئه‌ڤ ڤالاهیه ب به‌رهه‌ڤ بێژان دێ هێنه پركرن.
ئه‌ڤرۆ نیوز: كاروان باعه‌درى:
ئه‌ڤرۆ ده‌مژمیر 5 ئیفارێ فرۆكه‌یین هه‌ڤپه‌یمانان دگه‌ل هێزێن پێشمه‌رگه‌هى چه‌ندین بنگه‌هێن داعشێ ل ناوچه‌یا به‌ندافا موسل و فلفیلێ تۆپاران كرن
رۆژنامه‌ڤان كاوه عیدۆ دنافا هێزێن پیشمه‌رگه‌هى دایه بۆ ئه‌ڤرۆ نیوز گۆت: هێزێن پیشمه‌رگه‌هى ل گه‌ل فرۆكه‌یێن هه‌ڤپه‌یمانا چه‌ندین بنگه‌هێن داعشێ تۆپارانكرن ل به‌ندافا مو.سل و فلفیلێ و و زیانێن مه‌زن ل وان دان چه‌ندین ترمبیلێن وان سوتن.
ئه‌ڤرۆ نیوز: ڤه‌ده‌ر ره‌شاڤایی:
به‌رپرسێن وه‌زاره‌تا به‌ره‌ڤانییا ئه‌مریكا بۆ ئێكه‌م جار پشت راستكر كو هێزێن تایبه‌ت یێن ئه‌مریكی لسه‌ر عه‌ردی ل رۆژئاڤایێ كوردستانێ هاریكارییا هێزێن كوردی دكه‌ت.
هه‌روه‌كی كه‌نالێ (NBC) یێ ئه‌مریكی به‌لاڤ كرییه: جه‌نه‌رال لوید ئوستن بۆ لژنا سه‌ربازییا جڤاتا پیران یا ئه‌مریكی ئاشكرا كر كو هێزێن تایبه‌ت یێن به‌ژاهی یێن ئه‌مریكی لسه‌ر عه‌ردی لگه‌ل هێزێن كوردی (یه‌په‌گێ) ل رۆژئاڤا كوردستانێ هه‌بوونا خوه هه‌یه، لێ دیاركر ژی ئه‌و هێز بتنێ بۆ شیره‌تكاریێ و هاریكاریكرنێ نه و پشكداریێ د شه‌ران دا ناكه‌ن.
ئه‌ڤرۆ نیوز: ڤه‌ده‌ر ره‌شاڤایی:
بریاره سوبه‌هی 17 ئیلۆنێ ده‌مژمێر 11 سپێدێ پێنج ئالیێن سیاسیێن هه‌رێما كوردستانێ لدۆر پرسا سه‌رۆكاتییا هه‌رێمێ كۆم ببن.
د. فه‌رسه‌ت سۆفی ئه‌ندامێ یاسایێ شاندێ دانوستاندنكارێ پارتی دیمۆكراتی كوردستان ئاشكرا كر كو سوبه‌هی پارتی ب ئومێد ڤه دێ چیته كۆمبوونێ بمه‌ره‌ما رێككه‌ڤتنێ ل گه‌ل هه‌ر چار ئالیێن دی، ناڤهاتی هیڤی خاست داوی كۆم بوون بیت و هه‌می بگه‌هنه رێككه‌ڤتنه‌كێ.
ئه‌ڤرۆ نیوز: ڤه‌ده‌ر ره‌شاڤایی:
ئێكه‌یتا ئه‌ورۆپا توركیا كره د لیستا وه‌لاتێن نه‌ئارام دا و ب رێزا وان وه‌لاتان دانا یێن ئێدی بكێر حه‌واندنا په‌نابه‌ران نه‌هێت ژبه‌ر شه‌ر و په‌ڤچوونێن توركیا ل گه‌ل شه‌رڤانێن په‌كه‌كێ.
پشتی كۆمبوونا وه‌زیرێن ناڤخۆیێن وه‌لاتێن ئێكه‌تیا ئه‌ورۆپا د كۆنگره‌كێ رۆژنامه‌ڤانی دا وزیرێ ده‌رڤه‌یێ لوكسمبۆرگ جان ئه‌سێلبووم راگه‌هاند: بجۆركرنا توركیا بفه‌رمی هاته گوهرین و ئێدی ب جهه‌كێ ئارام و خودانا ره‌وشه‌كا بسلامه‌ت ناهێـه نیاسین. ”
ئێكه‌تیا ئه‌ورۆپا لسه‌ر چه‌ند پیڤه‌ران كو ب پیڤه‌رێن كۆپنهاگن دهێنه نیاسین دیار دكه‌ت كا وه‌لاته‌ك یێ ته‌نا و ئارامه یا نه ، بۆ ڤێ یه‌كێ دڤێت هه‌ر وه‌لاته‌كی ئه‌ڤ خاله لێ بهێنه بجئینان: مافێن دیموكراسییێن بنه‌ره‌تی، قانوون، مافێن مرۆڤان و رێزگرتن و پاراستنا مافێن كه‌مینه‌یان.
ئه‌ڤرۆ نیۆز، قائید میرۆ:
ژ ئه‌گه‌رێ دژواریا بۆردومانا فڕۆكه‌ییێن هه‌ڤپه‌یمانان بۆ سه‌ر چه‌كدارێن داعش ئه‌ڤرۆ ل به‌نداڤا مووسل هه‌تا پرا خازر دوازده بنگه‌هێن داعش بووینه ئارمانجێن هه‌ڤپه‌یمانان.
غه‌یاس سورچی، په‌یڤدارێ مه‌لبه‌ندێ ئێكه‌تی نیشتیمانی كوردستان ل نه‌ینه‌وا ب ئه‌ڤرۆ نیۆز راگه‌هاند” پشت چه‌كدارێن داعش ل میحوه‌رێن پێشمه‌رگه‌ی ده‌ست ب لڤینان كری، ده‌مژمێر 9ی سپێده‌هیا ئه‌ڤرۆ هه‌تا ده‌مێ ئێڤاری فڕۆكه‌یێن هه‌ڤپه‌یمانان بنكه و باره‌گایێن چه‌كدارێن داعش ل به‌نداڤا مووسل هه‌تا دگه‌هیته میحوه‌رێ خازر ب هویری بۆردومانكرینه و دوازده بنگه‌هێن تیرۆرستان بووینه ئارمانجا هه‌ڤپه‌یمانان.
غه‌یاسی گۆت ژی” گوره‌ی زانیاریێن گه‌هشتینه مه هه‌ژده چه‌كدارێن داعش هاتینه كوشتن و هژماره‌كا زۆرژی برینداربووینه و هاتینه ڤه‌گوهاستن بۆ نه‌خۆشخانه‌یێن مووسل، هه‌روه‌سا 11 ترۆمبێل و ئامیرێن سه‌ربازی هاتینه ژناڤبرن، ئه‌ڤرۆ فڕۆكه‌یان حه‌شر ب چه‌كدارێن داعشكرینه.”
ئه‌ڤرۆ نیوز: ڤه‌ده‌ر ره‌شاڤایی:
پشتی وه‌لاتێ هه‌نگارییا پێرابوونێن نوو و توند ل دژی كۆچبه‌ران بكار ئینای و سنۆرێ خوه لگه‌ل سربیا ل هه‌مبه‌ر كۆچبه‌ران گرتی، نها كۆچبه‌ران ده‌ست پێكرییه رێیه‌كا نوو دگرنه به‌ر خوه بۆ گه‌هشتنا وه‌لاتێن باكۆر و رۆئاڤایێ ئه‌ورۆپا.
بسه‌دان په‌نابه‌ر ئه‌ڤرۆ 16ئیلۆنێ ده‌ربازبوونه وه‌لاتێ كرواتیا وه‌ك به‌رگوهره‌ك بۆ رێییا هه‌نگارییا كو نها یا داخستییه، و حكومه‌تا كرواتیا ژی دده‌ته خویاكرن كو ئه‌و به‌رهه‌ڤن كۆچبه‌ران د وه‌لاتێ خوه را ده‌رباز بكه‌ن و رێیێ بۆ ڤه‌كه‌ن بچنه وی وه‌لاتی یێ وان دڤێت.
ئه‌ڤرۆ نیۆز، قائید میرۆ:
كرێكاره‌كێ بیناسازیێ ل ئاڤاهیه‌كی بلند دا كه‌فت و گیانێ خوه ژده‌ستدا، پۆلیس ژی دبێژن ڤه‌كۆلین هاتینه ده‌ستپێكرن.
موقه‌دم كاروان خۆشناو، په‌یڤدارێن پۆلیسێن هه‌ولێرێ ب ئه‌ڤرۆ نیۆز راگه‌هاند” به‌ری نیڤرۆیا ئه‌ڤرۆ دده‌مێ كاركرنێ كرێكاره‌ك بناڤێ مه‌سعود مه‌حه‌مه‌د 35سالی، لتاخێ راستی یێ باژێڕێ هه‌ولێرێ د ئاڤاهیه‌كێ بلند دا كه‌فت و گیانێ خوه ژده‌ستدا.
كاروانی گۆت ژی” پشتی گه‌هشتنا هێزێن پۆلیسا ده‌ركه‌فت ل نهوما هه‌شتێ كه‌فتیه خوار و ڤه‌كۆلین دبه‌رده‌وامن بۆ زانینا كه‌فتنا كرێكاری.
ئه‌ڤرۆ نيوز:
چەندین سازیێن راگەھاندنێ ب بھانا نووترین دەنگ و باس و رۆمالکرنا بەردەوام رێ پتر بۆ چوونا گەنجان خوەشکرینە کو ژ کوردستانێ بەر ب وەلاتێن ئەرۆپا کوچک بەر بن. چالاکڤانەک ژی دبێژیت: دڤیابا ل شوونا راگەھاندێ ئەو ھەموو دەنگۆ بەلافکرین کو وەلاتێن ئەوروپی خەلکی وەردگریت و مافێ ئاکنجیبوونێ ددەنێ، دڤیابا راگەھاندنێ ھەموو ئەو خالێن نەرینی یێت کوچکرنێ نیشا خەلکی دابان و کار ل سەر ڤێ کربایە.
چالاکڤان مستەفا بامەرنی بۆ ئەڤرۆ دیار کر، د ھەر وەلاتەکی دا دەما راگەھاندن خزمەتێ دکەت و دبیتە دەستھەلات، وی دەمی ئەو دەستھەلات دھێتە بکارئینان، دێ بزاڤا کەت د رێیا خوە دا وەلاتی نەئێخنە د خالێن لاواز دا بۆ بەرژەوەدیا دوژمنێ خوە و دژی بەرژەوەندیا وەلاتیان خوە بکار نەھێت و ببیتە پرەک دناڤبەرا دەستھەلاتی و خەلکی دا، دەما وەلات دکەفیتە رەوشەکا وەکی یا نوکە تێدا دبورین و راگەھاندن دێ بزاڤا کەت رۆلەکێ نەتەوەیی بگێریت، ب تایبەت ھەکە وەلاتی کەفتە حالەتێ رەڤینێ، دڤێت راگەھاندن ھەموو بزاڤا بکەت بۆ بەرزەکرنا مۆرالێ وەلاتی، وەک نوکە دڤیابا ل شوونا راگەھاندێ ئەو ھەموو دەنگۆ بەلافکرین کو وەلاتێن ئەوروپی خەلکی وەردگریت و مافێ ئاکنجیبوونێ ددەنێ، دڤیابا راگەھاندنێ ھەموو ئەو خالێن نەرینی یێت کوچکرنێ نیشا خەلکی دابان و کار ل سەر ڤێ کربایە.
بامەرنی زێدەتر دبێژیت: ئەو کەسێن بەری نوکە کوچکری و دەردەسەریێن وان بۆ خەلکێ دیارکربان و ھەموو ئەو قوناغێن ژیانا کوچبەریێ نیشا خەلکی دابان، نە ھەما ئێکسەر بچنە قوناغا خۆشیا کوچبەراتیێ، دبینم گونەھبارێ دویێ راگەھاندنە پشتی دەستھەلاتێ، وەک پرەنسیپێن کارێ خوە ب دروستی نارابیت د دەرحەق وەلات پارێزیێ دا و دەستھەلات بەرپرسا ئێکێ یە ل سەر راگەھاندنێ، چونکو دەستھەلاتێ کێمتر خەمی کریە د ڤی بواری دا د دەمێن ھوسان دا دڤیابیت دەستھەلاتێ رێنمایێن خوە ھەبن بۆ راگەھاندێ وەکی ھەر وەلاتەکی.
رۆژنامەڤان عەبدولرحمان بامەرنی دیار کر، راگەھاندن ڤەگۆھاستنا راستیانە، دوڤچوونە ل سەر ئەگەرێن پەیدابوونا روودانێ و رۆنکرنا ھەموو کوژیێن ڤەشارتی یێن بەرزە ژ ھەر روودانا پەیدابووی، راگەھاندنێ د چوونا گەنجان دا نەشیایە وەک پێدڤی رۆلێ خوە بگێریت، ب بگەھینە باوەریەکێ ئەو راگەھاندنا ل ھەرێما کوردستانێ د ماوێ ٢٤ سالێن بوری دا کو ھەموو تشت ب نازکی و ھەستیاری دھاتنە وەرگرتن، ئەو ئێک ژ شاشیێن مەزن بوو و ب تنێ مە خەلکێ خوە دخاپاند، دڤێت راگەھاندن رۆلێ گەھاندنا راستییان وەک ھەی بەلاڤ بکەت و دوڤچوونا بۆ بکەت.
عەبدولرەحمان ئاماژە دا وێ چەندێ، دەمێ راگەھاندن بابەتێ کوچبەریێ بەلاڤ دکەت و دکەتە بابەتێ رۆژەڤێ، رامانا وێ ئەو نینە راگەھاند دبیتە ھاریکار و ئەڤە بەھانا بەرپرسانە و سیاسیێن مە دڤێن روویێ راستیێ و ناکۆکیێن دناڤبەرا خوە دا ڤەشێرن، بۆ پەردەپۆش بکەین و نە زێدەتر، یا راست ژی راگەھاند یا چاڤێ سیاسی و سەرکردایەتیا سیاسی ل ھەرێما کوردستانێ ل بەر مەترسیەکێ ڤەدکەت، سەرکردایەتی ل گەلەک بابەتان د خەون و ب تنێ راگەھاندن ھوشیاریان ددەتێ کو یێ د مەترسیێ دا.
چالاکڤان د بیاڤێ راگەھاندنێ دا، بابێ دێرکی کو چەندین سالە ل دەرڤەی وەلاتی دژیت گۆت: دبینم راگەھاندنا مە یا کوردی گەلەک بزاڤێ کەت گەنجێ مە قەستا دەرڤەیی وەلاتی بکەن، راگەھاندنا کوردی دشیا ب رەنگەکێ دی رۆمالا ڤان بوویەران کربا و نە ب وی رەنگێ نھا بەحس ژێ دکەت، پێدڤی بوو رەزالەت و ئیزا و دەردەسەری ژی ل بەرچاڤ کربان و نە ب تنێ پێشوازیکرنا وەلاتان ل کوچبەران، دبینم راگەھاندنا کوردی د ڤێ رۆمالێ دا سەرکەفتن نەئینایە.
نيشاندان