ئەڤرۆ نيوز:
د ھەلبژارتنێن بۆری دا یێن پەرلەمانێ تورکیا کو تێدا پارتیا دیموکراتیک یا گەلان (HDP) شیا بەندێ ١٠% یێ ھەلبژارتنان دەرباز بکەت و بچیتە پەرلەمانێ تورکیا گەلەک رەوشەنبیر و نڤیسەرێن تورکیا پشتەڤانیا HDP کرن و دیار کرن دڤێت HDP بچیتە پەرلەمانی دا کو تورکیا پارچە نەبیت و کورد وتورک پێکڤە بژین. لێ پشتی راگەھاندنا خوەسەریا دیموکراتیک گەلەک نڤیسەر و رەوشەنبیرێن تورکیا دیار کرن کو HDPێ ئەم خاپاندین و ب دەنگێ مە چوونە پەرلەمانی و نھا ژی ب رێیا خوەسەریا دیموکراتیک دخوازن تورکیا پارچە بکەن.
د ڤێ دەربارێ دا نڤیسەر ئەحمەد ھاکان د نڤیسا خوە یا د رۆژناما حوریەتێ دا دیار کر کو دەمیرتاشی بەری ھەلبژارتنان گۆت مە دڤێت ل تورکیایەک دیموکراتیک ئەم پێکڤە بژین، مە نەڤێت تورکیا بھێتە پارچەکرن و مە دڤێت ئەم ببینە پارتیا ھەموو گەلێن تورکیا ل سەر ڤی بنەمایێ ژی گەلەک کەسێن تورک کو ب سالان دژبەریا PKK دکرن دەنگێ خوە دانە HDP دا کو شەرێ ل تورکیا ب دووماھی بھێت و HDP ببینە ھێزەکا دیموکراتیک کو دوور ژ شەری ب رێیا پەرلەمانی بزاڤا چارەکرنا پرسا کوردی بکەت، لێ مخابن ب راگەھاندنا خوەسەریا دیموکراتیک بۆ مە دیار بوو کو دەمیرتاشی ئەم خاپاندین و ئارمانجا سەرەکی یا وی ئەو بوو دا کو HDP بچیتە پەرلەمانی و ب ھێز کەڤیت و ئەو بشێن تورکیا پارچە بکەن و گۆت: (ئەم ھاتنە خاپاندن، لێ دڤێت HDP و دەمیرتاش ژی باش بزانن کو ئەڤرۆکە پرانیا کوردان ل تورکیا پشتەڤانیێ ل پرۆژێ وان ناکەن و راگەھاندنا پرۆژێن وەسا دێ بیتە ئەگەر شەرێ نھا ل باژێرێن کوردان دژوارتر بیت و ئەو یەک بەری ھەر کەسەکێ زیانێ دگەھینتە خەلکێ کورد، چونکو رۆژانە ژن و زارۆیێن کوردان ژ بەر شەرێ نھا ل باژێرێن کوردان جانێ خوە ژ دەست ددەن و دڤێت HDP دەستان ژ کارێن وەسا بەردەت و ل سەر بەرنامێ خوە یێ بەری ھەلبژارتنان بۆ دیموکراسیا تورکیا و پێکڤەژیانێ کار بکەت).
ل ئالیێ دی گەلەک نڤیسەر و رۆژنامەڤان و کەسایەتیێن سیاسی یێن تورک کو بەری ھەلبژارتنان ب رێیا بەرپرسێن جڤاکی پشتەڤانیا HDP دکرن پشتی راگەھاندنا خوەسەریا دیموکراتیک ژ ئالیێ پارتیا دیموکراتیک یا گەلان نەرازیبوونا خوە ل ھەمبەر وێ یەکێ دیار کرن و راگەھاندن کو مە پشتەڤانیا HDP دکر دا ئەو ببیتە پارتیا ھەموو گەلێن تورکیا و رەنگێ نەتەوی تێدا نەبیت، لێ مخابن دەمیرتاشی و HDP سەلماندن کو نیەتا وان یا خراب بوو و وان ب رێیا دەنگێ مە خوە گەھاندنە پەرلەمانی و نھا ژی دخوازن تورکیا پارچە بکەن، ئەم دژبەریا وی بەرنامێ وان دکەین و ھەکە نھا ھەلبژارتن ل تورکیا بھێنە کرن ژی دێ دەنگێ خوە دەینە پارتەکا دی و دێ ب توندی دژبەریا HDP کەین.

ئەڤرۆ نیوز:
مامۆستایەکێ زانکۆیێ دیار دکەت کو ئێک ژ خالێن بوویە ئەگەر ھەتا نھا قەیرانا سووریێ چارە نەبیت نەبوونا ئۆپۆزسیۆنەکا ئێکگرتی یە و ئالیێن کو خوە وەک ئۆپۆزسیۆن ددەنە نیاسین ژی ھەر ئێک سەر ب ھێزەکی یە و ژ بەر ھندێ ژی ھەتا نھا چو پێنگاڤ بۆ چارەکرنا قەیرانا سووریێ نەھاتینە ئاڤێتن و وەزیرێ دەرڤە یێ روسیا ژی دبێژیت کو بەرھنگاریا سووریێ ھەتا نھا نەشیایە شاندەکێ بۆ دانوستاندنان ل گەل رژێما بەشاری دیار کەن.
د. خالد ئەحمەدی مامۆستایێ زانستێن سیاسی ل ئورمیێ بۆ رۆژنامە ئەڤرۆ دیار کر کو قەیرانا سووریێ کاریگەریا خوە ل ھەموو رۆژھەلاتا ناڤین کریە و ھەکە ئەو قەیرانە د دەمەکێ کورت دا نەھێتە چارەکرن دێ بیتە ئەگەر کو شەرەکی مەزنتر ل دەڤەرێ روو دەت و ژ بەر ھندێ ژی نھا ئەمریکا و روسیا تا رادەیەکی شیاینە کو د ناڤبەرا خوە دا ل دۆر سووریێ بگەھنە ھندەک رێککەڤتنان و گۆت: (ئەمریکا و روسیا دیتن کو ھەکە شەرێ ل سووریێ وەسا بەردەوام بیت دێ بیتە ئەگەر گرۆپێن دیتر یێن تیرۆرستی وەک داعشێ و ئەلنوسرا و گەلەک گرۆپێن دی دەرکەڤن و ئاریشێن مەزن بۆ بەرژەوەندیێن روسیا و ئەمریکا دروست کەن، ژ بەر ھندێ ژی ھەر دو وەلاتێن زلھێز گەھشتنە ھندەک رێککەڤتنان و بریار دان کو حوکمەتەکا دەمکی ب پشکداریا ھەموو ئالیێن سیاسی ل سووریێ بھێتە ئاڤاکرن دا کو قەیرانا سووریێ ب رێیێن سیاسی چارە بیت).
ناڤھاتی د پشکەکا دی یا ئاخڤتنا خوە دا ئەو یەک ژی دیار کر کو نھا ئاریشا مەزن یا کو ل سووریێ ھەیە و ئاستەنگیەکا مەزن ل ھەمبەر چارەسەریا قەیرانا وی وەلاتی دروست کریە ئاریشا ئۆپۆزسیۆنا وی وەلاتی یە. چونکو ئۆپۆزسیۆنەکا ئێکگرتی ل سووریێ نینە، ئەو ھێز و ئالیێن کو خوە وەک ئۆپۆزسیۆنا سووریێ ددەنە دیار کرن کو ھەر ئێک سەر ب وەلاتەکی یا ھێزەکا بیانی یە و پشتا خوە ب وان گەرم کرینە و د راستی دا ل گۆر بەرژەوەندیێن وان سیاسەتێ دکەن و د دەمەکی وەسا دا ژی ئەو ژ بەرژەندیێن خەلکێ سووریێ دوور دکەڤن کو نموونا بەرچاڤ ژی رۆلێ خراب یێن ھندەک وەلاتێن عەرەبی نە کو بووینە ئەگەر ھەتا نھا ژی چو پێنگاڤێن بەرچاڤ بۆ چارەکرنا قەیرانا سووریێ نەھێتە ئاڤێتن و گۆت: (ھەکە ئۆپۆزسیۆنەکا ئێکگرتی ل سووریێ ھەبا دا ئەو شێن شاندەکێ ھەڤپشک پێک ئینن و ل گەل شاندێ رژێما سووریێ سەبارەت ب پاشەرۆژا وی وەلاتی دانوستاندنان کەن، چونکو بۆ ھەر کەسەکی ئاشکرایە کو قەیرانا سووریێ ب شەری چارە نابیت و دڤێت ھەر دو ئالی ب رێیێن سیاسی بزاڤا چارەکرنا قەیرانا سووریێ بکەن، لێ ژ بەر نەبوونا ئۆپۆزسیۆنەکا ئێکگرتی رژێما سووریێ ژی ھەر بزاڤا ھندێ دکەت کو بەرنامێن بۆ چارەسەریێ گیرو بن و نەگەھنە چو ئەنجامان و ئەو یەک ژی بێگومان دێ بیتە ئەگەر شەرێ ل سووریێ پتر ڤەکێشیت و زیانەکا مەزن ژی بگەھیتە خەلکێ سڤیل و وەلاتێ وان وێران دبیت).
ناڤھاتی د دووماھیا ئاخڤتنا خوە دا ئەو یەک ژی دیار کر کو دڤێت بەری ھەر تشتەکێ ئۆپۆزسیۆنەکا ئێکگرتی ل سووریێ بھێتە ئاڤاکرن و ئەو ھێز د ناڤبەرا خوە دا بەرنامەکێ ھەڤپشک بۆ پاشەرۆژا سووریێ دیار کەن و ب ھێزەکا مەزن دەست ب دانوستاندنان ل گەل رژێما سووریێ بکەن، لێ مخابن ھەتا نھا ئەو یەک دیار نەبوویە و ژ بەر ھندێ ئەز بخوە نەبوونا ئۆپۆزسیۆنەکا ئێکگرتی ل سووریێ وەک فاکتەرەکێ گرنگ یێ بەردەوامیا قەیرانا وی وەلاتی دبینم.
ل ئالیێ دی سیرگێی لاڤرۆڤ وەزیرێ دەرڤە یێ روسیا ژی د داخۆیانیەکێ دا بۆ دەزگەھێن راگەھاندنێ دیار کر کو تنێ رێیا چارەکرنا قەیرانا سووریێ ئاڤاکرنا حوکمەتەکا دەمکی یە کو بەری نھا مە ل گەل ئەمریکا و وەلاتێن دی بریار ل دۆر وێ چەندێ دابوو، لێ ھەتا نھا ژی ئۆپۆزسیۆنا سووریێ نەشیایە کو شاندەکێ بۆ دانوستاندنان ل گەل رژێما بەشاری پێک بینیت و ژ بەر ھندێ ژی ھێشتا دانوستاندنان دەستپێ نەکریە و نھا ئۆپۆزسیۆنا سووریێ بوویە ئاستەنگ ل ھەمبەر چارەکرنا قەیرانا وی وەلاتی.