ئەڤرۆ نیوز:
سەرۆکێ فراکسیۆنا ئێکگرتووی ئیسلامی کوردستان ل پەرلەمانێ کوردستانێ د بەرسڤا رەخنێن گۆڕان دا ئەوێن ل ئێکگرتوو ھاتینە کرن، دبێژیت ژبەر پشکداریا مە د کۆمبوونەکێ دا کو تنێ مە بۆچوونێن خوە ل سەر چاکسازیێ بەرچاڤکرن، ب خائین ھاتینە ھژمارتن.
ئەبوبەکر ھەلەدنی، سەرۆکێ فراکسیۆنا ئێکگرتووی ئیسلامی ل پەرلەمانێ کوردستانێ د نڤیسینەکێ دا ل دۆر پشکداریا فراکسیۆنا وان د کۆمبوونا جێگرێ سەرۆکێ پەرلەمانێ کوردستانێ و سەرۆکێن فراکسیۆنان و سەرۆکاتیا لیژنێن دارایی و قانوونی و کاروبارێن پەرلەمانی، دبێژیت” کۆمبوونەکا ئاسایی بوو و ڕۆژانە ژی ھەموو پەرلەمانتار ل ئاڤاھیێ پەرلەمانی دەوامێ دکەن”.
ھەلەدنی، دووپاتی ل سەر وێ چەندێ ژی کر” ل دووڤ پەیڕەوێ ناڤخوەیێ پەرلەمانێ کوردستانێ، جێگرێ سەرۆکێ پەرلەمانی سەرپەرشتیا کاروبارێن لیژنێن پەرلەمانی دکەت و بۆ وی ھەیە ل گەل کۆمببیت، ل دو سالێن بۆری ژی دا، جێگرێ سەرۆکێ پەرلەمانی ئەڤ کارە یێ ئەنجامدای”.
سەرۆکێ فراکسیۆنا ئێکگرتووی ئیسلامی ل پەرلەمانێ کوردستانێ د بەرسڤا گۆڕان دا، زێدەتر دبێژیت” د وێ کۆمبوونێ دا بەحسێ چاکسازیێ ھاتە کرن، باشە ھەکە فراکسیۆنێن پەرلەمانی و پەرلەمانتار بۆچوونێن خوە بەرچاڤ نەکەن، پا کارێ وان چی یە؟” دیاکر ژی کو ئەو پشتەڤانیا تمام یا پرۆسا چاکسازیێ دکەن، ھەکە یا بچووک و دەستپێک ژی بیت.
ل رۆژا ئێکشەمبی 27 ڤێ مەھێ، جەعفەر ئێمینکی جێگرێ سەرۆکێ پەرلەمانێ کوردستانێ ل گەل سەرۆکێن فراکسیۆنێن پەرلەمانی کۆمببو و ئەو کۆمبوون ببو جھێ نەرازیبوونا فراکسیۆنا گۆڕان و پشکداری تێدا نەکر و ڕەخنە ل وان فراکسیۆنان ژی گرت یێن پشکداری د وێ کۆمبوونێ دا کری.
نيشاندان