ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 28ى كانوونا ئێكێ يا سالا 2015ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1227 |
| 1 يۆرۆيێ ئه‌ورۆپى | 1330 |
| 1 ليرێ توركى | 415 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئەڤرۆ نیوز، نەوزاد زادە:
دادوەرەکێ دادگەھا کەتنا دھوکێ دیارکر کو 300 وەلاتیان سکالا دژی خودانێ کومپانیا ” عادل موتەحیدە ” تومارکرینە ، و خودانێ کومپانیێ ژی ب غیابی بەرامبەر ھەر سکالایەکێ شەش ھەیڤان سزایێ زیندانی بو ھاتیەدان.
بەھزاد ئەتروشی دادوەرێ دادگەھا کەتنا دھوکێ بو رۆژناما رووداو دیارکر کو 300 وەلاتیان سکالا دژی ” د.روشدی سەعید ” خودانێ کومپانیا ” عادل موتەحیدە ” تومارکرینە کو پرانیا وان عەرەبن و دوسیێن وان ژی ل دادگەھێ ھاتینە ئێکلایکرن و گوت ژی : ( ئەوان وەلاتیان ل گورەی ماددەیا 456 ژ قانوونا سزایا عیراقێ کو یا تایبەتە ب ملبرین ” قولبرین ” ێ ڤە سکالا تومارکرینە ، و خودانێ کومپانیێ ژی بەرامبەر ھەر سکالایەکێ ب غیابی ب شەش ھەیڤان سزایێ زیندانی ب سەر ھاتیە سەپاندن ، و ل گورەی ڤێ یەکێ دڤێت خودانێ کومپانیێ 180 سالان د زیندانێ ڤە بمینیت )
ژلایی َخوڤە بەختیار ئەمین رێڤەبەرێ گشتیێ وەبەرھێنانێ ل پارێزگەھا دھوکێ دیارکر کو ژبلی وان 300 سکالایان نێزیکێ 1000 ھاولاتیێن دن لدەڤ مە سکالا تومارکرینە و ژ وان ژی 500 گرێبەستێن پەسەندکری ھەنە و مافێت وان بەرزەنابیت.
پشتی راگەیاندن و دەسبکاربوون لسەر درستکرنا پرۆژەیەکێ مەزنێ ئاکنجیکرنێ بناڤێ پرۆژێ ” دەشتی بحەشت ” ل باژێرێ ھەولێرێ ژلایێ کومپانیا عادل موتەحیدە کومپانیا ناڤبری ل سالا 2013 پرۆژەیەکێ ئاکنجیبوونێ ل دھوکێ ژی بناڤێ ” ستارز ” راگەیاند ، بەلێ پرۆژە ب نیڤەرویی مایەڤە.
ئه‌ڤرۆ نيوز:
عەگید شەرڤان یەک ژ فەرماندارێ ھێزێن سووریایا دیمۆکراتیک د داخویانیەکی دا بۆ رۆژناما ئەڤرۆ راگەھاند کو ئۆپەراسیۆنا رزگارکرنا ئاخا رۆژئاڤا و سووریێ ژ دەستێ تیرۆرستان ب دژواری بەردەوام دکەت و گۆت: (بۆ ژناڤبرنا تیرۆرستێن داعشێ پێدڤی بوو کو مە بەنداڤا تشرین رزگار کربا و د ئۆپەراسیۆنەکا بەرفرەە دا مە شیا د ناڤا سێ رۆژان دا بەنداڤێ بکەینە ژێر کۆنترۆلا خوە کو ئەڤ بەنداڤ جھەکی گەلەک ستراتیژیە و نھا داعش نەشێت وەک بەرێ ب ئاسانی لڤینان بکەت و ب سایا ڤێ بەنداڤێ ئەم دێ شێین د ناڤا چەند رۆژان دا باژێرکێن منجیب و جەرابلوسێ رزگار کەین).
ناڤھاتی ھەروەسا راگەھاند ژی کو د ئۆپەراسیۆنا رزگارکرنێ دا فرۆکێن شەری یێن ھەڤپەیمانا نێڤدەولەتی ھەڤکاریەکا باش داینە وان و گۆت: (نھا ئەم ل رۆژئاڤایێ روبارێ فراتێ نە و ئۆپەراسیۆنێن مە ب ھەڤکاریا فرۆکێن شەری یێن ھەڤپەیمانان ھەتا رزگار کرنا جەرابلوسێ دێ بەردەوام کەت و ھێزێن مە ئامادەکاریێن گەلەک مەزن بۆ ڤێ یەکێ کرینە و ئەم دخوازین د دەمەکی نە گەلەک دوور دا ھەموو ئاخا رۆژئاڤا بگەھیننە یەک و داعشێ ب تەمامی ژ ئاخا رۆژئاڤا دەرخینین).
د پشکەکی دی یا ئاخڤتنا خوە دا ژی فەرماندارێ ھێزێن سووریا یا دیموکراتیک راگەھاند د ئۆپەراسیۆنێ دا دو ھزار شەرڤانێن وان پشکداریێ کرینە و نێزیکی دەە ھزار شەرڤانێن مە ژی د ئامادە باشیێ دانە بۆ ئۆپەراسیۆنا منبیج و جەرابلوسێ و گۆت: (د ئەنجاما شەرێ سێ رۆژان دا تەرمێ گەلەک تیرۆرستان کەڤتنە د دەستێ مە دا و ھەروەسا ١٢ تیرۆرست ژی ب ساخی ھاتنە گرتن و د ئۆپەراسیۆنێ دا شەش شەرڤانێن مە ژی شەھید کەڤتنە و ھێزێن داعشێ بەر ب رەققایێ و منبیجێ ڤە رەڤیانە و ژ بۆ کو نەشێن خوە بەرھەڤ بکەن دڤێت ئەم بێی راوەستیان ئۆپەراسیۆنا رزگارکرنێ بەرفرەھتر و دژوارتر بکەین).
ھەر د ڤێ دەربارێ دا شاھین کایا رۆژنامەڤانێ کورد ل باژێرێ کلیسێ ژی راگەھاند کو ئۆپەراسیۆنا ھێزێن کوردی ل عەزازێ ل دژی تیرۆرستێن ئەلنوسرا و ئەحرار ئەل شام و کۆمێن ھەڤپەیمانێن وێ بەردەوام دکەت و گۆت: (ژ سنۆرێ تورکیا ڤە ئۆپەراسیۆنا ھێزێن کوردی دھێتە دیتن و فرۆکێن شەری یێن روسیا ژی بەردەوام ل بنگەھێن ئەلنوسرا و ئەحرار شام ددەن و د ناڤا دو رۆژان دا نێزیکی ٥٠ تیرۆرست ھاتینە کوشتن و شەش گوندێن عەزازێ ژی کەڤتنە ژێر کۆنترۆلا ھێزێن کوردی و ل دووڤ زانیاریان نێزیکی ٢٠ بریندارێن ھەردو رێکخستنێن تیرۆرست دەربازی تورکیا بووینە).
شاھین راگەھاند ژی کو وی ل گەل وەزیرێ پاراستنا عەفرینێ ئاخڤیە و وەزیرێ پاراستنێ راگەھاندیە کو بۆ ئێمناھیا کانتۆنا عەفرینێ و ب ھەڤدو را گرێدانا عەفرینێ و کانتۆنا کۆبانێ و راکرنا دۆرپێچا ل سەر کانتۆنێ دڤێت عەزازێ و جەرابلوسێ ژ تیرۆرستان بھێنە پاقژکرن و گۆت: (ل دووڤ ئاخاڤتنا وەزیرێ پاراستنا کانتۆنا عەفرینێ ب ھزاران شەرڤانێن کورد د ئۆپەراسیۆنێن ل دژی رێکخستنێن تیرۆرست دا پشکداریێ دکەن و بانگ ل وەلاتیێن عەفرینێ ھاتیە کرن کو خوە بۆ شەرەکی دژوار ئامادە بکەن و ھەکە پێدڤی کر دێ ب ھزاران وەلاتی بۆ شەری ئامادە کەن، ژ بەر کو دخوازن بێی راوەستان ئۆپەراسیۆنێ بەردەوام بکەن ھەتا کۆ ھەر دو کانتۆن بگەھنە یەک و ھەموو ئاخا رۆژئاڤا بھێتە رزگار کرن).
ل ئالیێ دی ل تاخا شێخ مەقسود یا کو ئاکنجیێن وێ کوردن و ل گەل تاخا ئەشرەفیە د ژێر کۆنترۆلا شەرڤانێن کورد دانە شەر بەردەوام دکەت و ھەردو کۆمێن تیرۆرستی یێن ئەلنوسرا و ئەحرار شام تاخێن کوردان دانە بەر تۆپان و د ھەمبەر دا ھێزێن کوردی ژی بەرسڤا تیرۆرستان ددەن و د ئەنجاما ئۆپەراسیۆنێن ھێزێن کوردی دا ١٢ چەکدارێن ئەلنوسرا و ئەحرار شام ھاتینە کوشتن و د ھەمان دەمی دا شەرێ رژێمێ و ڤان ھەردو رێکخستنێن تیرۆرست ژی بەردەوام دکەت و فرۆکێن شەری یێن روسیا و یێن رژێمێ ژی بنگەھێن تیرۆرستان بۆمبە باران دکەن.
ئه‌ڤرۆ نیوز:
رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا سێشه‌مبى رێكه‌فتى 29ى كانوونا ئێكێ يا 2015 ئه‌سمانێ دهۆكێ دێ ساهى بيت ل گه‌ل هنده‌ك ئه‌ورێن كێم.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ هاتنا فشارێن بلندێن باكوورێ رۆژهه‌لاێ وه‌لاتێ توركيا بۆ سه‌ر هه‌رێما كوردستانێ دهێته پێشبينيكرن ئه‌سمانى دهۆكێ دێ ساهى بيت ل گه‌ل هه‌بوونا هنده‌ك ئه‌ورێن كێم ل ده‌ڤه‌رێن جودا.
پشكا پێشبينيان دايه زايه زانين كو دێ ئاراستێ باى ژى دێ باشوورێ رۆژئاڤا بيت ب ره‌نگه‌كى د ناڤبه‌را 5 هه‌تا 10 كم دا و ماوێ ديتنێ ژى 8 بۆ 10 كم بيت، پلێن گه‌رمێ ژى دێ د ناڤبه‌را 3 بۆ 16 پلان دا بيت.
ئه‌ڤرۆ نیوز، ملله‌ت جه‌مال:
رێڤه‌به‌ریا هاتن و چوونا پارێزگه‌ها دهۆكێ ئاگه‌هداریا هه‌مى شوفێر و هاولاتیێن به‌رێز دكه‌ت كو ل رۆژا چوارشه‌مبى رێككه‌فتى 30/12/2015 ده‌واما فه‌رمى ل رێڤه‌به‌ریا ناڤبرى ناهێته‌كرن لدور ڤى بابه‌تى به‌رپرسێ به‌شێ په‌یوه‌ندى و راگه‌هاندنا هاتن وچوونا دهۆكێ رائیدێ مافپه‌روه‌ر ئازاد تاها بو ئه‌ڤرۆ نیوز گوت: ژبه‌ر جه‌ردا سالانه ل رۆژا چوارشه‌مبى چو مامه‌له ل رێڤه‌به‌ریا مه ناهێنه وه‌رگرتن و ب رێڤه‌برن و هیڤیدارین هه‌ر هاولاتیه‌كێ مامه‌له‌كا بله‌ز هه‌بیت دڤان دو رۆژان دا برێڤه‌ببه‌ت چنكو ل وێ رۆژێ بتنێ فه‌رمانبه‌ر دێ ده‌وامێ كه‌ن و چو مامه‌له‌له ناهێنه وه‌رگرتن و ب رێڤه‌برن
. لدووماهیێ ناڤبرى دیاركر كو سالانه ل سه‌رێ سالێ ئه‌ڤ جه‌رده دهێته‌كرن و هیڤى خواست كو هاولاتى ڤێ ئاگه‌هداریێ به‌رچاڤ وه‌رگرن و قه‌ستا رێڤه‌به ریێ نه‌كه‌ن ل رۆژا دیاركرى.
ئەڤرۆ نيوز:
سترانبێژا ب ناڤ و دەنگ حوسنا مەتر د نووترین داخویانیا خوە دا دیارکر کو ل وەلاتێ خوە ب ناڤێ حوسنا کوردی ھاتیە ناڤکرن، ئاشکراکر کو بناڤ و دەنگیا وێ ل کوردستانێ ڤەدگەریت بۆ حەزژێکرنا خەلکێ کوردستانێ بۆ وێ، گۆت: کوردستانێ ب وەلاتێ خوەیێ دووێ دزانم،ھەتا نوکە من مال ل کوردستانێ نینە و ھەر دەما بێمە کوردستانێ ل ئوتێلان دژیم.
حوسنا مەتەر بۆ مالپەرێ خەلک گۆت: پشتەڤانێ من یێ دارایی ل ھەرێما کوردستانێ ھەر ئەز ب خوە بوویمە و دیسا گوندێ لوبنانی ژی پشتەڤان بووینە، لێ نوکە من پشتەڤانیێ دارایی نینە کوردستانێ، چ بەرپرس و بازرگانێن کورد پشتەڤانێن منێن دارایی نین و بتنێ ئەز و برایەکێ من پشتەڤانێَن کارێ منین، ژ روویێ مەعنەوی ڤە نەتەوا کورد ھەموو پشتەڤانێ کارێ منێ ھونەری یە.
ھەمبەر پەیوەندیێن ڤیانێ ژی، ناڤبریێ گۆت: من چ پەیوەندیێن ڤیانێ ل گەل چ بەرپرس و بازرگانێن کورد نینە کو بیتە ئەگەر بەردەوام بھێمە کوردستانێ و بتنێ من پەیاما ھونەری ھەیە و بەردەوام ھاتن و چوونێ دکەم و مەرج نینە ھاتن و چوونێ دڤێت پەیوەندیەکا ئەڤینی بیت.
حوسنا مەتر زێدەتر بێژیت خوەزی ھەموو جیھان وەک ھەولێرێ و کوردستانێ تەناھی و ئارامی ھەبا و ھەتا نوکە کەسەکێ چ ھێرش ل من نەکریە و چ مەترسی ل سەر ژیانا من پەیدا نەبوویە و پەیوەندیا من ل گەل کوردان بتنێ ئەوە کو کورد نەتەوەکێ باشن و قەدر گرن.
ئەڤرۆ نیوز:
سەرۆکێ ئەنجومەنێ پارێزگەھا نەینەوا ئاشکرا کر کو دوھی 27/12/2015 ئەنجومەنی ب پرانیا دەنگان دلدار زێباری ئەندامێ ئەنجومەنی ژ کارێ وی دوور خست و گۆت “ژ 10/6/2015 و ھەتا نھا دلدار زێباری د کۆمبوونێن ئەنجومەنی دا بەرھەڤ نەبوویە”.
بەشار کیکی سەرۆکێ ئەنجومەنێ پارێزگەھا نەینەوا دیار کر کو پەیرەوێ ناڤخۆیێ ئەنجومەنێ پارێزگەھا نەینەوا دا ھاتیە ھەکە ھەر ئەندامەک چار روونشتنان بێی عزرەکا شەرعی بەرھەڤی کۆمیوونان نەبیت دێ لێپرسین ل گەل ھێتە کرن و گۆت “پشتی داگیرکرنا مووسلێ 40 روونشتن مە کرینە، خۆ ئێکێ ژی دلدار زێباری سەرۆکێ کوتلا ئاڤەدانی و دادپەروەریێ بەرھەڤ نەبوویە”.
کیکی خویا ژی کر ھەر ل گۆر پەیرەوێ ناڤخۆیی لێپرسین ل گەل زێباری ھاتەکرن و پشتی ھینگێ ئەنجومەنی د روونشتنا خوە یا دوھی دا ب پرانیا دەنگێن بەرھەڤبوویان ئەنجومەنی بڕیارا ژ کار لادانا وی دەر کر.
ھەژی گۆتنێ یە ل ناڤەڕاستا سالا بۆڕی و ھەتا نھا، ڕێکخراوا توندڕەوا داعش، دەست ب سەر باژارێ مووسلێ ناڤەندا پارێزگەھا نەینەوا و باژێرکێن (تەلەعفەر، بەعاج و حەمدانیە)دا گرتینە، و پشتی ھینگێ ئەنجومەنێ پارێزگەھا نەینەوا ل دھۆکێ ئەرکێن خوە ئەنجام ددەن.
ئەڤرۆ نیوز، سنەگەر زرار:
یاریکەرەکێ کورد بوویە جھێ گرنگیا گەلەک رۆژنامەیێن وەلاتێ نەرویج ژبەر ئەو ئاستێ باش ل ماوێ بوری ل گەل تیما خوە پێشکێشکری و وەسا دھێتە زانین ئەڤی یاریکەری پاشەرۆژەکا گەش ھەیە ل سەر ئاستێ وەلاتێ نەرویج .
رۆژناما داگبلادیت یا نەرویجی بەلاڤەکری یە وارھێل سلێمان ب ھاتنا ھەلبژارتیێ لاوێن کوردستانێ د قارەمانیا (Norway Cup) گەلەک یێ کەیفخوش بوو ژبەرکو ئەوژی خەلکێ ھەرێما کوردستانێ یە و ل سالا ٢٠١٥ ل گەل یانا خوە پشکداری د وێ قارەمانیێ دا کری یە و شیابوو ئاستەکێ بلند پێشکێش بکەت .
یاریکەرێ کورد و خەلکێ باژێرێ دھۆکێ وارھێل سلێمان د دیدارەکا تایبەت دا بۆ ئەڤرۆ نیوز گوت: من د قارەمانیا ئەڤ سالە دا یا نەروی کوپ وەکو کابتنێ تیما Rosendal/Trio/Halsnøy پشکداری کر و د یاریێن کومان دا بەرامبەر ھەلبژارتیێ لاوێن کوردستانێ من یاریی کر و گەلەک یێ کەیفخوشحال بووم ب دیتنا ھەلبژارتیێ وەلاتێ خ وە.
زێدەتر ناڤبری گوت: ل سالا ٢٠٠٩ ل گەل خێزانا خوە بەر ب وەلاتێ نەرویج ھاتین و ل سالا ٢٠٠٩ دەست ب یاریا تەپا پێ من کری یە و سالا ٢٠١٠ ھەتا ٢٠١٢ بۆ یانا Strand Ulv IL کر، پشتی بورینا سێ سالان چومە دناڤ رێزێن یانا تریۆ ئای ئێڵ کو ھەتانوکە ل گەل ڤێ یانێ یێ بەردەوام، دەستپێکێ ل گەل ڤێ یانێ ل تیما ١٦ سالی من دەستپێکر و ژبەر ئاستێ من یێ باش ل گەل وێ تیمێ راھێنەرێ تیما ١٩ سالی سەرارای ژیێ من نە یێ ھاریکار بوو لێ ئەوی ئەز داخوازی تیما ١٩ سالی کرم .
زێدەتر یاریکەرێ ناڤبری دیارکر ئەو دخوازیت یاریێ ل یانا رۆزنبێرگ یا نەرویجی و ھەلبژارتیێ ئێکێ نەرویج بکەت و ل سەر ئاستێ ئورۆپا ژی ھیڤیا وی ئەوە بیتە یاریکەرەکێ پیشەکار دخولا کاتشیو دا تایبەت ل یانا یوڤانتوس، خۆلا پریملیگ ب ھێزترین خولا تەپا پێ دبینت و حەژێکەرێ یانا ریال مەدرید و یاریکەرێ ھەلبژارتیێ پرتوگال کریستیانو رۆنالدوی یە .
پروڤایل
-ناڤ: وارھێل سەمیر سلێمان یێ بەرنیاس (وارھێل سلێمان)
-رۆژا دایکبوونێ: ٢٧/٦/١٩٩٧ باژێرێ دھۆکێ
-کێش: ٧١ کگم.
-بلندیا: ١٧٣ سم.
نوکە ئاکنجیێ باژێرێ (Husnes) ھۆردالاند یێ نەرویجی یە
ل ھێلا بەرەڤانیێ یاریێ کەت
دەستپێکا خوە یا وەرزشی ٢٠١٠ ھەتا ٢٠١٢ بۆ یانا ئای ئێڵ ستراند وۆڵڤ (Strand Ulv IL) ل گەل وێ یانێ ٥٦ یاری کرن شیابوو ١٢ گولا بۆ تیما خوە توماربکەت.
ل سالا ٢٠١٣ پەیوەندی ب یانا تریو ئای ئێلر کری یە ھەتا نوکە یێ بەردەوامە ل سالا ٢٠١٣ بۆ تیما پێگەھشتیان کری یە و سالا ٢٠١٤-٢٠١٥ ل گەل تیما لاوێن وێ تیمێ پشکداری کری یە و شیا ٦٣ یاریان پشکداری ل گەل تیما خوە بکەت و چار گول ژی تومارکری نە و ل گەل تیما ٢٠ یاری ئەڤ سالە ژی ل گەل تیما خوە یا ئێکێ ژی کری نە یا پشکدار دخۆلا پلا چار یا وەلاتێ نەرویج دا
یاری کردووە و لەو ماوەیەشدا ٥٦ یاری و ١٢ گۆڵی لەگەڵ ئەم تیپە ھەبووە.
ئەڤرۆ نیوز:
ئەندامەکێ پەرلەمانێ کوردستانێ ژ فراکسیۆنا پارتی دیمۆکراتی کوردستان بۆ ئەڤرۆ دیار کر کو ھەموو کارێن پێدڤی ھاتینە کرن کو ل گۆر دەستبکاربوونا پەرلەمانی دانوستاندنان بکەن و گۆت “یوسف محەمەد دشێت وەکو ئەندام پەرلەمان بھێتە د ناڤ پەرلەمانی”.
محەمەد عەلی یاسین پەیڤدارێ فراکسیۆنا پارتی دیمۆکراتی کوردستان دیار کر کو بۆ سالا بھێت 2016 دێ ئیک ژ ئەولیاتێن کارێ وان چاکسازی بیت و بریار ئەوە چاکسازی د بیاڤێن جودا جودا یا بەردەوام بیت و پلان ئەوە دەسپێکا سالا بھێت زووترین وەخت پرۆژی چاکسازی بکەڤتە کاری و گۆت “ئەم دشێین وەکو قووناغەکا دەستپێکێ تشتەکێ باش بکەین و ھیڤدارین خەلک و ھەموو دامودەزگەھێن حوکمەتێ پشتگیریێ ل پرۆژێ چاکسازیێ بکەن”.
ناڤبری ئەو ژی دیار کر کو چاکسازی دێ ھێتە کرن داکو رێکوپێکی بکەڤیتە شێوازێ کارکرنێ و سیستەمی و تێکەست کر کو بابەت نەئەوە چەند داھاتی دێ بۆ حوکمەتێ زڤریت، بەلکو خالێن سەرەکی ئەوە چاکسازی ل دامودەزگەھێن حوکمەتێ بھێتە کرن ل سەر ئاستێ کێمکرنا مەزاختیان و زێدەکرنا خزمەتان کار بھێتە کرن و پێداچوون ل سەر شێوازێ مەزاختیان ئەڤە د قووناغا ئێکێ یا چەاکسازی دایە و ل قووناغا دویی کار دێ ل سەر دامودەزگەھێن حوکمەتێ ھێتە کرن.
محەمەد عەلی یاسین ئەو ژی دیار کر کو د پرۆژێ چاکسازیێ دا دەرمالێن پەرلەمانتاران ھاتنە کێمکرن و ئەم دێ کار بۆ وێ چەندی کەن پرۆژە بکەڤیتە د وارێ بجھئینانێ دا و گۆت “ب ھەموو شیانێن خوە دێ پشتگیریا پرۆژێ چاکسازیێ کەین”.
نيشاندان
