ئامێدیێ، نەوزاد زادە ھلوری:
ھەر ژ دەستپێکا درۆستبوونا دەڤەرا ئامێدیێ وەلاتیێن گوندێن دەڤەرا زێبارێ بو دەربازبوون ل رووبارێن دەڤەرێ داڤەرست بکارئینایە و وەکو وەلاتی ددەن دیارکرن کو زێدەتری 100 سالایە ئەو داڤەرستێ بکاردئینن.
عەبدولخالق ھلۆری وەلاتیەکێ گوندێ ھلورایە دیارکر کو ئەڤە 30 سالە د ژیێ وی دا داڤەرست ھەیە و بۆ ئەڤرۆ نیوز گۆت: “سەرەرایی کو بکارئینانا داڤەستان یا ب مەترسیە بو ھەموو کەسان بەلێ ئەڤە زێدەتری 100 سالایە داڤەرست ل گوندێ مە بۆ دەربازبوونێ دھێتە بکارئینان، ئەم گەلەک بێزاربوینە بڤێ یەکێ ژبەرکو چوو رێکێن دن نینە کو ئەم ل روباری دەربازبین”
وەلاتیێن گوندێ ھلورا دکەڤن دا باج و رسومات ژ وەلاتیێن کومەلگەھا سیریێ و ناحیا شێلادزێ وەردگرتن بەرامبەر دەربازبوونا وان ژ داڤەرستێ و عەبدولخالقی زێدەتر گۆت: “چیایێن دەڤەرا زێبارێ د وەرزێ بھارێ دا گەلەک جورێن گیایێ خوارنێ ھەنە و خەلکەکێ زور ل دەڤەرێن سیریی َو شێلادزێ و پرانیا دەڤەرا ئامێدیێ قەستا چیایێن گوندێن مە دکر داکو گیایێ بوھارێ دەستخوڤە بینن، ژبو کێمکرنا خەلکی بەرامبەر دەربازبوونا وان مە باج و رسومات ژ خەلکی وەردگرتن ، بەلێ دنھا دا ئەڤ یەک نینە و ھەر کەس دکاریت بێ بەرامبەر دەرباز ببیت”.
رێڤەبەرێ ناحیا شێلادزێ دیارکر کو گوندێن دکەڤنە سەر روبارێن دەڤەرێ پێدڤی ب دروستکرنا پرانە و بۆ ئەڤرۆ نیوز گۆت: “ئەم دگەل جھێن پەیوەندیدار ئاخفتینە و مە ل بەرە پرەکێ دناڤبەرا گوندێ ھلورا و کومەلگەھا سیریێ بو وەلاتیێن چەند گوندەکێن دەڤەرا زێبارێ درۆست بکەین بەلێ ژ بەر قەیرانا دارایی د نھا دا ئەو پرە ناھێتە چێکرن ، و ئەو پرا کو نھا ل شێلادزێ بۆ گوندێن دەڤەرا زێبارێ دچن بو ھەموو گوندان ژ دەست نادەت و گەلەک گرنگە کو پرەکا دن ژی بھێتە چێکرن”.
جیھاد زێباری ئەو ژی وەلاتەکێ دەڤەرا زێبارێ یە لسەر تەوەری گۆت: “سواربوونا داڤەرستێ تشتەک نورمال و گەلەک خوشە و سالانە سەدان کەس بو مەرەمێن گەشت و گوزار و سواربونا وێ قەستا داڤەرستێ دکەن ، بەلێ سواربونا داڤەرستێ ل ھەموو وەرزێن سالێ ژ دەست نادەت ب تایبەتی د وەرزێ زستانێ و دەستپێکا بوھارێ ژ بەرکو رووبار گەلەک بوش دبیت و سورابونا وێ ب مەترسی دبیت ب تایبتی بوو ژن و زاروان“.
لسەر چەوانیا چێکرنا داڤەرستێ عەبدولخالق ھلۆری گۆت : “ چێکرنا داڤەرستێ گەلەک ب ساناھی یە و ھەموو کەس دکارن درۆست بکەن، بۆ چێکرنا داڤەرستێ ئەم پێدڤی ب دوو ستونێن داری یان ئاسنی و تێلەکا ئاسنی و سندوق و گولبەرینەکێ و ھندەک کەنەفێینە، دەستپێکێ ھەردوو ستوونان ل راستا ئێک ل ھەردوو لایێن روباری دێ چکلینین و تێلا ئاسنی د سەر ھەردوو ستونان دا راکێشین، دووڤدا سندوقێ ب گولبەرینی ڤەکەین و گولبەرینی ژی دێ لسەر تێلا ئاسنی دا دانین و کەنەفێ ژی ب ھەردوو سەرێن ستوونێن چکلاندی و سنووقێ ڤە گرێدەین و بڤی رەنگی دێ داڤەرست یا بەرھەڤ بیت بو سواربونێ“.
گوت ژی گۆت: “باشترە درێژاھیا داڤەرستێ ژ 200 میتران کێمتر بیت و بلنداھیا وێ ژی 10میتران بلندتربیت ژ رووباری و ل دەما سواربوونێ 300 کیلوگرامان زێدەتر ھەلنەگریت ، ژبەرکو بەروڤاژی دێ بیتە سەدەم کو داڤەرست بکەڤیت و ئەنجامێن ب مەترسی پشتخوڤە بھێلیت“.