ئەڤرۆ نیوز:
پەیڤدارێ ئێکەتیا وەبەرھێنەرێن کوردستانێ راگەھاند، ژ بەر تێکچوونا ئابووریا ھەرێما کوردستانێ د ڤان دو سالێن بۆری دا، نێزیکی 700 وەبەرھێنەرێن ھەرێما کوردستانێ دەست ژ کارێ خوە بەرداینە و ئیفلاس بووینە و گۆت: رەوشا نھا ھەرێم تێدا دبۆریت بوویە ئەگەر کو ھەڤبەندیێن بازرگانی ب رێژا 70% ل کێمیێ بدەن و نێزیکی 700 ھزار کەسان ژی ل کەرتێ تایبەت ماینە بێکار. ھەروەسا دیار کر کو ل ھەرێما کوردستانێ نێزیکی 100 ھزار خێزانان ل بن ھێلا ھەژاریێ دا دژین و نیڤا وان ژی فەرمانبەرێن حوکمەتا ھەرێما کوردستانێ نە.
مەلا یاسین مەحموود، پەیڤدارێ ئێکەتیا وەبەرھێنەرێن کوردستانێ د دیدارەکێ دا بۆ ئەڤرۆ دیار کر، بەر تێکچوونا ئابووریا ھەرێما کوردستانێ د ڤان دو سالێن بۆری دا کارتێکرنەکا گەلەک مەزن ل سەر ھەرێما کوردستانێ کر و کەرتێ وەبەرھێنانێ ژی بەر ب شکەستنەکا مەزن بر و بوو ئەگەر کو د دەمێ دیارکری دا نێزیکی 700 وەبەرھێنەرێن ھەرێما کوردستانێ بێ پارە بمینن و ھەتا دەمەکێ نەدیار دەست ژ کارێ خوە بەردەن و گۆت: ئەڤ رەوشە بوو ئەگەر ژی کو نێزیکی 700 ھزار کەسان ل کەرتێ تایبەت بێکار بمینن و نەشێن چو کارێن دی بکەن.
ناڤبری ئاماژە دا وێ چەندێ، ل سالا 2010 داھاتێ تاکە کەسی ل ھەرێما کوردستانێ بۆ ھەر خێزانەکێ ژ پێنچ ھزار دۆلاران تێپەراند بوو، بەلێ نھا داھاتێ سالانە یێ خێزانێ ژ ھزار دۆلاران تێناپەریت و ئەڤە ژی بوویە ئەگەر نھا نێزیکی 10% ژ خەلکێ ھەرێما کوردستانێ ل بن ھێلا ھەژاریێ دا بژین و گۆت: ژ سەرجەمێ میلۆن خێزانان ل ھەرێما کوردستانێ، نێزیکی 100 ھزار خێزانان ل بن ھێلا ھەژاریێ دا دژین و ئەو ژی نیڤا وان فەرمانبەرێن حوکمەتێ نە.
مەلا یاسین زێدەتر دبێژیت: ل سالا 2013 ھەڤبەندیێن بازرگانی ل ھەرێما کوردستانێ چوو بوو د سەر 10 ملیار دۆلاران دا، بەلێ ژ بەر تێکچوونا رەوشا ئابووری 70% ژ ھەڤبەندیێن بازرگانی کێمبووینە و نھا ژ سێ ملیار دۆلاران نابۆریت و گۆت: د ماوێ ڤان دو سالان دا 80% ژ کارگەھێن ھەرێما کوردستانێ ھاتینە راگرتن و نەشێن چو بەرھەمی دابین بکەن و کارتێکرنەکا مەزن ل گەنجان ژی کریە، چونکو رێژەکا مەزن یا گەنجان بێکار ھێلاینە.
نووترين نووچه
- هەلبژارتن تنێ بۆ ب دەستڤەئینانا كورسییان نینە، بەلكو پراكتیزەكرنا دیموكراسیەتێ یە
- ژ بۆ ئاشتیێ یا ژ دەستێ مە بهێت دێ ئەنجام دەین
- درووشمێ ئێك هەرێم، ئێك پەرلەمان، ئێك حوكمەت، ئێك هێزا پێشمەرگەی، كاك مەسعود بارزانی ئاماژە یا بۆ كری.
- بەرپرسەكێ پارتی: پارتی دێ سۆزێن خوە ب جهئینیت
- ب سەركەفتنا پارتی د هەلبژارتناندا دێ هەرێم زێدەتر ب هێز و ئارام و ئاڤەدان بیت
- تێکچوونا قۆناغا ئاشتیێ دێ بیتە ئەگەرێ شکەستنا ئاکپارتیێ
- سەرۆك بارزانی و رۆمانۆڤسكی پێنگاڤێن پێكئینانا حوكمەتا نوو یا هەرێما كوردستانێ گەنگەشەكرن
- پێدڤییە پێكئینانا حوكمەتێ ل سەر بنەمایێ دەنگێن ئالیێن سیاسی بیت د هەلبژارتناندا
- هێمن هەورامی: دانوستاندنێن پێكئینانا حوكمەتا نوو یا هەرێمێ دێ ل گەل هەموو ئالییان كەین
- هەبوونا بنەمایێ ئێك ئیدارە و ئێك حوكمەت و ئێک هێزا پێشمەرگەی باشترین بژاردەیە
سهرهكى Twitter
گواردیولا دێ سوارێزی ل گەل خوە بەت
ئەڤرۆنیوز، کاروان باعەدری :
پشتی ب فەرمی پێپ گواردیولا راگەھاندی ئەو دێ ل دووماھیا ڤی وەرزی ئەرکێ راھێنەریا یانا بایرن موینیخ یا ئەلمانی ب جھـ ھێلیت و ل وەرزێ بھێت ھەڤبەستا یانەکا نووی ئیمزاکەت، گواردیولا دیارکری یە ژی ئەو ھەڤبەستا ھەر یانەکێ ئیمزابکەت ئەو دخوازیت ھێرشبەرێ یانا بەرشەلۆنا سوارێز ل گەل وی بیت ژبەرکو ئێک ژ باشترین ھێرشبەرایە نوکە.
رۆژنامەیا “دەیلی ستار” یا برێتانی دیارکری یە یانا مانچستەر سیتی یا ئینگلیزی پەیوەندی ب راھێنەرێ یانا بایرن میونیخ کری یە و ھەردیسان حەزا ئینانا ھێرشبەرێ یانا بەرشەلۆنا ژی ھەیە و یانا ئینگلیزی شیانێن ئینانا وی یاریکەری ژی یا ھەی.
تەرمێ پۆلیسەکێ ھاتنوچوونێ ھاتە دیتن
ئەڤرۆ نیوز: بارزان مزووری:
رائید سەعدون، رێڤەبەرێ پشکا راگەھاندنا پۆلیسێن سۆران بۆ مالپەرێ ئەڤرۆ نیوز ئاشکرا کر کو ل شەڤا شەمبی سەر ئێکشەمبی ھاتینە ئاگەھدار کرن کو تەرم ل گوندێ دیلیزان سەر ب ناحیا دیاناڤە ھاتیە دیتن، تیمێن مە گەھشتنە جھێ روودانێ کو ل دووڤ زانیاریێن دەستپێکێ کو ب دەمانجێ ھاتیە کوشتن ل دووڤ ڤەکۆلینا وەسا دیار بوو کو وی خوە کوشتیە”.
گۆتژی: “تەرمێ وی بۆ نوشداریا داد ل سۆران ھاتە ڤەگوھاستن، ل دووڤ دا بۆ مالباتا وی”. خۆیا کر ژى ئەو کەس کارمەندێ ھاتنوچوونا سۆرانە و ئاکنجیێ دەڤەرا سۆرانە، ب ناڤێ “ی. ع.”.
ناڤبری گوت کو ڤەکۆلین ل دوور کوشتنا وی یا بەردەوامە د گەل کەس و کار و ھەڤالێن نێزیکێن وی دا بگەھنە ئەگەرێن دروست یێن روودانێ.
بۆچى كاره‌با گشتى كێم دهێته به‌لاڤكرن؟
ئه‌ڤرۆ نيوز:
رێڤەبەرێ بەلاڤکرنا کارەبێ ل پارێزگەھا دھۆکێ بۆ رۆژناما ئەڤرۆ دیارکر کو د یازدە ھەیڤێن بۆری دا (1253) زێدەگاڤی ل سەر کارەبێ ھاتینە کرن و کارەب ژێ ھاتینە بڕین و ب کوژمێ شێست و حەفت ملیۆن دیناران ھاتینە سزاکرن و گۆت “ئەو زێدەگاڤی جۆراوجۆرن”.
سەفەر تەیب رێڤەبەرێ بەلاڤکرنا کارەبێ ل پارێزگەھا دھۆکێ گۆت ژی “تیمێن مە بەردەوام دگەرن و رۆژانە مال مال دچن و ئەو کەسێ زێدەگاڤی ل سەر تۆرا کارەبێ کری ئەم وێ زێدەگاڤیێ رادکەین و کارەب ژێ دھێتە بڕین و بۆ ماوێ دو سالا بھایێ کارەبێ ژێ وەردگرین”.
دەربارەی قەرزێن کارەبێ رێڤەبەرێ بەلاڤکرنا کارەبێ ل پارێزگەھا دھۆکێ خویا کر کو ھندەک کەس دھێن دەینێ خوە دەن و ھندەک ژی دھێن پارێ وان بۆ دکەنە (قست) و گۆت “خوزی قەیرانا دارایی ب دووماھیی ھاتبا داپتر مە شیا با خزمەتا خەلکی بکەین و شانازیێ ب خەلکێ دھۆکێ دبەین ب ھەموو تشتا و حەز دکەین ھەموو دەمان قوربانیێ بدەت پێخەمەت وەلاتەکێ ئازاد ھەبیت”.
دووماھیێ ئەندازیار سەفەر تەیب گۆت “وەرزێ زڤستانێ وەرزەکێ نەخۆشە و ھندی خەلک بشێن ئابووریێ د کارەبێ دا بکەن باشە و دیسان دبیتە ئەگەر کو مە کارەب ھەبیت و قەیرانا دارایی کارتێکرن ل سەر ھەموو رێڤەبەریا کریە”.
ب وێنه: چاپا نوو یا پارێ 50 هزاری کەفتە بازاری
کوردەک دبیتە سەرکەفتیێ ئێکێ یێ کۆلیژا ھێزێن ئاسمانی ل عیراقێ
ئه‌ڤرۆ نيوز:
قوتابیێ کورد (دلشێر عەلی ئەحمەد) ل ئەینیا بۆری 18/12/2015 د ریورەسمێن ئاھەنگا دەرچوونێ دا ل کۆلیژا ئاسمانی یا عیراقێ پلا ئێکێ ل سەر ئاستێ کۆلیژا ناڤھاتی ب دەست خوەڤە ئینا.
قوتابی دلشێر عەلی ئەحمەد، سەرکەفتیێ ئێکێ یێ کۆلیژا ئاسمانی یا عیراقێ بۆ رۆژناما ئەڤرۆ ئاشکرا کر کو وی ل گەل 8 قوتابیێن دی یێن کورد بۆ دەمێ سێ سالان ل کۆلیژا ناڤبری د خواند و گۆت: ” بۆ دەمێ پتر ژ سال و نیڤا من ل وەلاتێ ئوردن بەردەوامی دا خواندنا خوە و دووڤدا مە بۆ دەمێ سێ سالان ل فرۆکخانا سپایکەر ل تکریت دخواند، بەلێ پشتی تیرۆرستێن داعش ھاتین ئەم بۆ ناسریێ ھاتینە ڤەگوھاستن”.
ناڤبری ئاماژە دا وێ چەندێ کو نوکە ڤرۆکەڤان ل ھەرێما کوردستانێ ھەنە، بەلێ ڤرۆکە نینن و گۆت: “ئەم دێ چاڤەرێ فرۆکان بین دا کو ئەم ب فرۆکێن خوە بەرەڤانیێ ژ ئاخا کوردستانێ بکەین، چونکی مە پێشمەرگێن قەھرەمان ھەنە و نوکە ئەم د بەرھەڤین ب فرۆکان ھێرشان ببەینە ل سەر تیرۆرستێن داعش”.
كێم نه‌ته‌وه داخوازيا هه‌رێمان دكه‌ن
ئەڤرۆ نیوز، سالار دۆسکی:
بەرپرسەکێ بزاڤا دیموکراتی یا ئاشووری ل دھۆکێ ئاشکراکر کو ب تنێ بۆ پاراستنا مافێن کێم نەتەوا ل عیراقێ، پێدڤی یە ھەرێم بۆ بھێنە چێکرن یان ببنە پارێزگەهـ.
فەریدی یەعقوب بەرپرسێ بزڤا دیموکراتی یا ئاشووری ل دھۆکێ بۆ ئەڤرۆ نیۆز گۆت: بۆ پاراستنا خەلکێ ئاشووری ل دەشتا مووسل و دەڤەرێ پێدڤی یە ھەرێمەکا سەربەخۆ بۆ پێکھاتێن دەڤەرێ بھێتە دروستکرن یان ببنە پارێزگەە، چونکە گەلەک یا بزحمەتە عیراقا بەرێ بزڤریت و پێکڤە ژیان ئێدی نەما.
ھێشتا گۆت: بەردەوام خێزانێن ئاشووری یێ ژ عیراقێ دەر دکەڤن و بەر ب دەرڤە دچن و ئەڤە وێ چەندێ دیار دکەت کو باوەری نەمایە ئەڤان جھان بژین.
گۆتژی: دبینم ئەڤە پشتی وێ چەندێ دێ ھێـتەکرن کو مووسل و ھەموو دەڤەر ژ دەستێ داعش بھێنە رزگارکرن و پاقژکرن.
پانزیخانە ناچنە پانزینا خوە
ئەڤرۆ نیوز، سالار دۆسکی:
سەرۆکێ لژنا پیشەسازی وسامانێن سرۆشتی ل جڤاتا پارێزگەھا دھۆکێ ئاشکراکر کو نوکە ژێدەرێ سەرەکی یێ پانزینێ بۆ ھەرێمێ و پارێزگەھێ ھەر ژێدەرێ نافخوەیە و ئێدی مەترسی ل سەر چێبوونا قەیرانێن پانزینێ نینە.
عەبدوسەمەد تێلی زێدەتر بۆ مالپەرێ ئەڤرۆ نیۆز گۆت: ژبەر تێکچوونا کاودانێن ئێمناھیێ ل باکورێ کوردستانێ و راگرتنا ھاتن و چوونێ ئەوان باژێران خەلکێ مە ھەست ب مەترسیێ دکەت، لێ بلا نەترسن پانزینا مە یا نافخویە و ژ دەرڤە ناھێت و ھندەک ژ ئیرانێ دھێت زێدەباری مە گەلەک یەدەک ھەیە، ب چو رەنگان قەیران پەیدا نابیت.
عەبدوسەمەد ھێشتا گۆت: مە رۆژانە پێدڤی ب نێزیکی ملیۆنەک 200 لترێن پانزینێ یە، لێ نوکە چونکە یا بەرفرەە و بازرگان ژی دھینن، رێڤەبەریا گازێ دیار دکەت کو گەلەک پانزینخانە ناھێنە بەھرا خوە چونکە ل پانزیخانا پانزین ھەیە.
ھێشتا گۆت: نوکە سەردەری ل گەل 95 پانزیخانا ل دھۆکێ دھێتەکرن و رۆژانە پشکنین ل پانزیخان دھێتەکرن ل سەر کوالێتیا پانزینێ.
گۆڕان دڤێت ببیتە چاکساز یان چەکساز؟
ئەڤرۆ نیوز:
بزاڤا گۆڕان ھەموو دەمان بانگەشەیا وێ چەندێ دکر کۆ پێدڤیە چاکسازی بھێنە کرن و ھێزا پێشمەرگەی ھەڤدو بگریت, لێ نھا ھندەک ژ ئەندامێن وێ ھزرەک بەربەڵاڤکریە کۆ پێدڤیە گۆڕان ژی ھێزا خوە ھەبیت و خودانێ وێ ھزرێ دبێژیت دەمێ ئەز بەحس ل یەکا 90 دکەم ب تنێ وەک نیشانە نەکو پرۆژەیە و نە ژی پێشنیازە .
ئەڤرۆ, عەبدولناسر زێباری :
عەدنان عوسمان خودانێ وێ ھزرێ بو رۆژناما ئەڤرۆ گۆت” ئەڤە بابەتەکە بۆ گەنگەشێ نە پێشنیازە و نە ژی پڕۆژەیە و ئەڤە بابەتەکە بو ھندێ کو دەرگەە ل سەر ھندێ ڤەبیت, ھەکە ھێزا پێشمەرگەی ھەڤدو نەگریت و پارتێن سیاسی بۆ ئێکلاکرنا ئاریشێن ناڤخوەیی ب کاربینن و ل وی دەمی مافێ گۆڕان نینە وان ژی ھێزەکا چەکدار ھەبیت” دیارکر ژی” دەمێ ئەز بەحسێ یەکا 90 دکەم تنێ وەک تشتەکێ رەمزی یە, چونکی یەکا 70 و 80 یێن ین کو سەر ب پارتی و ئێکەتیێ ڤەنە.
ئەندامێ پەرلەمانی ل خولا بۆری ژ بزاڤا گۆڕان خویا ژی کر” مەرەما من ئەوە کو لەز بھێتە کرن د ئێکگرتنا یەکەیێن 70 و 80 یێن پێشمەرگەی و جەماوەرێ کوردستانێ بزانیت کو مەترسی یا ل سەر گۆڕان ھەی و ھەکە حوکمەتێ و دام و دەزگەھان شیان نەبوون پارێزگاریێ ل پارتێن سیاسی بکەن، وی دەمی دێ نەچار بیت ھزر ژ پارێزگاریکرن ژ خوە ژی نەکەت”.
خەیاکر ژی” سیاسەتا گۆڕان ئەوە کو ھەموو ھێزا پێشمەرگەھی ئێک بگریت و چ ھێزێن تایبەت ب پارتێن سیاسی ڤە نەمینن و ھەموو ھێز ل بن سێبەرا وەزارەتا پێشمەرگەی بن و کارێ پارتایەتی دناڤا پێشمەرگەی و ئاسایشێ دا نەھێتە کرن”.
بسپورەکێ وارێ سیاسی ل دۆر ڤێ چەندێ دبێژیت” پارتێن سیاسی ژێدەرێ دیموکراسیێ نە, لەوڕا دیموکراسیەت یا ھەڤدژە ل گەل عەقلیەتا لەشکری و ھەبوونا ھێزا لەشکری یا حزبی و د سیستەمێن دێموکراسی دا پارتێن سیاسی میکانیزمێن سەرەکی نە بۆ بجە ئینانا پرۆژێن مەدەنی و خزمەتا گشتی ب ڕێیا ھەلبژارتنێن ساخلەم و پێدڤیە ھێزا لەشکری یا پروفیشنەل بیت و بێ لایەن بیت و ھەردەمێ ب لایەن کەفت، ھێز دێ بیتە سەدەما گوھۆرینا ئەرکێ وێ ھێزێ ژ ژێدەرێ سەقامگیریا وەڵاتی بۆ گەفکرنێ ل سەر گەشەپێدانا دیموکراسیەتێ و ئاشتیا کۆمەڵایەتی”.
زێرەڤان بەرواری گوت ژی”ھەرێما کوردستانێ پیدڤی ب چاکسازیێن جودا جودا یا ھەی و ژ ھەموویان گرنگتر ئێکگرتنا ھێزا پێشمەرگەی و گوھۆرینا عەقیدا لەشکری بۆ فەلسەفا نەتەوی و دوور ژ سانسورا پارتێن سیاسی، پێشمەرگە سمبۆلا نەتەوا کوردە و یا گرنگە ئەڤ سمبۆلە بھێتە پاراستن ژ ناکۆکیێن سیاسی و ھەبوونا دستووری و پاراستنا مافێن پارتێن سیاسی دێ پێشمەرگەی ژ ھەموو رولێن نەگەتیڤ ل پاشەڕوژێ پارێزیت”.
ره‌وشا سه‌قايێ سوبه‌هى
ئه‌ڤرۆ نیوز:
رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا سێشه‌مبى رێكه‌فتى 22ى كانوونا ئێكێ يا 2015 ئه‌سمانێ دهۆكێ دێ د ناڤبه‌را ساهياتى و ئه‌وره‌كێ كێم دا بيت و ل دانێ سپێدێ ئه‌گه‌رێ په‌يدابوونا مژه‌كا كێم يێ هه‌ى.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ هاتنا فشارێن بلندێن باكوورێ رۆژهه‌لاێ وه‌لاتێ توركيا بۆ سه‌ر هه‌رێما كوردستانێ دهێته پێشبينيكرن ئه‌سمانى دهۆكێ دناڤبه‌را ساهياتى و ئه‌وره‌كێ كێم دا بيت و ل دانێ سپێدێ ئه‌گه‌رێ په‌يدابوونا مژه‌كا كێم يێ هه‌ى.
پشكا پێشبينيان دايه زايه زانين كو دێ ئاراستێ باى ژى دێ باشوورێ رۆژئاڤا بيت ب ره‌نگه‌كى د ناڤبه‌را 5 هه‌تا 10 كم دا و ماوێ ديتنێ ژى 8 بۆ 10 كم بيت، پلێن گه‌رمێ ژى دێ د ناڤبه‌را 2 بۆ 15 پلان دا بيت.
نيشاندان
WP Facebook Auto Publish Powered By : XYZScripts.com