ئەڤرۆ نیوز:

ئەندامەکێ سەرکردایەتیا ئێکەتی نیشتمانی کوردستان راگەھاند، پێشنیارێن مە بۆ ئاساییکرنا رەوشا سیاسی ل ھەرێما کوردستانێ، ژلایێ پارتی و گۆڕان ڤە ھاتنە رەتکرن.
فەرید ئەسەسەرد ئەندامێ سەرکردایەتیا ئێکەتیێ گوت ژی” ئەو سێ پێشنیازێن ھەین بۆ دەربازکرنا قەیرانا سیاسی ل ھەرێما کوردستانێ و ئاساییکرنا پەیوەندیێن پارتی و گۆڕان، ژلایێ وان ھەردو حزبان ڤە ھاتینە رەتکرن”.
ئەسەسەردی بۆ رووداوێ گوت” مە بەرسڤا ھەرسێ پێشنیازێن خوە ژ پارتی گۆڕان وەرگرتن، بەلێ مخابن ھاتنە رەتکرن، ھەرچەندە ئەم د بزاڤێن خوە د سەرکەفتی نەبووین، بەلێ بێ ھیڤی ژی نەبووینە و ھێشتا مە ئومێدا ھەی رەوش چارە ببیت”.
گوت ژی” نوکە چو پێشنیازێن دی ل بەردەست نینن و بۆ پێشنیازێن نوو ژی، پێدڤی ب دەمێ زێدەترە، دناڤ خوەدا و بۆ دانوستاندنێ ل گەل لایەنێن دی”.
دھێتە زانین د دەمێ بۆری دا، ئێکەتی ل گەل ھەر ئێک ژ پارتی و گۆڕان کۆمببوو، ب مەرەما ئاساییکرنا پەیوەندیێن وان و دەربازکرنا رەوشا سیاسی یا ئالۆز ل ھەرێما کوردستانێ و سێ پێشنیاز ئاراستەکرن، بەلێ وەکو ئەو بەرپرسێ ئێکەتیێ گوتی ھەردو لایەنان ئەو پێشنیاز رەتکرن، ھەرچەندە ھەتا نوکە نە ئێکەتیێ، نە پارتی و گۆڕان، ناڤەرۆکا پێشنیازێن ئێکەتیێ ب فەرمی بەلاڤ نەکرینە.

ئەڤرۆ نيوز:
بڕیارە ئەڤرۆ 21/12/2015 جڤاتا وەزیرێن ھەرێما کوردستانێ کۆم ببیت و سەرۆکێ فەرمانگەھا ھەماھەنگی و دووڤچوونێ ل سەرۆکاتیا جڤاتا وەزیران ژی کارناما وێ کۆمبوونێ دیار دکەت و دبێژیت: “کۆمبوون دێ یا تایبەت بیت ب چاکسازیکرنێ و قەیرانا دارایی یا ھەرێما کوردستانێ ڤە”.
د. نوری عوسمان، سەرۆکێ فەرمانگەھا ھەماھەنگی و دووڤچوونێ ل سەرۆکاتیا جڤاتا وەزیران بۆ ئەڤرۆ دیار کر، د کۆمبوونا جڤاتا وەزیرێن ھەرێما کوردستانێ دا دێ بەحسی چاکسازیان و قەیرانا دارایی ل ھەرێمێ و چەوانیا چارەکرنا وێ ھێتە کرن، ھەروەسا ھنارتنا چەند نۆشدارەکان بۆ وەلاتێ ئەلمانیا و گۆت: “جڤاتا وەزیران لژنەک بۆ وان پرۆژێن چاکسازیێ یێن ھاتینە پێشکێشکرن پێکئینایە، ھەروەسا بەحس ل وان ئاریشان ژی ھێتە کرن، ئەوێن ژ ئەگەرێ قەیرانا دارایی بۆ وەلاتیان دروست بووین”.
ئاشکرا ژی کر، چەند پرۆژێن چاکسازیێ بۆ جڤاتا وەزیران ھاتینە بەرھەڤکرن، مینا یێ ھەردو پەرلەمانتارێن کوردستانێ (د. فەرسەت سۆفی و ئازاد گۆران)، ب دوور و درێژی دێ بەحسی چاکسازیێن حوکمەتا ھەرێمێ ھێتە کرن.
ل دووڤ پێزانینان ھەتا نوکە ب تنێ پرۆژێ ھەردو پەرلەمانتاران (د. فەرسەت سۆفی و ئازاد گۆران) ب فەرمی رادەستی جڤاتا وەزیران ھاتیە کرن و ھەردو پرۆژێن دە ژ بەر رەوشا سیاسی یا ھەرێما کوردستانێ جارێ ھاتینە ڕاگرتن.

ئەڤرۆ نيوز:
سەرۆکێ دەستەیا بلند یا بنگەھێ لالش ل دھۆکێ داخوازێ وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ دکەت کو قوتابیێن کوردێن ئێزدی بۆ زانکۆ و پەیمانگەھێن ھەرێمێ ب ھێنە ڤەگوھاستن، وەزیرێ خواندنا بلند و ڤەکۆلینێن زانستی ژی دیار کر، ئەو دێ ھەموو ئاسانکاریان بۆ وەرگرتنا قوتابیێن ئیزدی ل زانکۆ و پەیمانگەھێن ھەرێما کوردستانێ کەن.
شێخ شامۆ، سەرۆکێ دەستەیا بلند یا بنگەھێ لالش ل دھۆکێ ب مەرەما ڤەگوھاستنا دوھی 20/12/2015 سەرا وەزارەتا خواندنا بلند و ڤەکۆلینێن زانستی کر و داخواز ژێ کر قوتابیێن ئێزدی بۆ زانکۆ و پەیمانگەھێن ھەرێمێ بھێنە ڤەگۆھاستن، د ھەمبەردا دکتۆر یوسف گۆران، وەزیرێ خواندنا بلند و ڤەکۆلینێن زانستی یێ حوکمەتا ھەرێما کوردستانێ ڕاگەھاند، ئەو ب ھەموو شیانێن خوە دێ کار کەن بۆ خزمەتکرنا قوتابیێن کوردێن ئێزدی و گۆت: “ب چو رەنگەکی جوداھی د ناڤبەرا قوتابیێن ئیزدی و یێن دی ل زانکۆیێن ھەرێمێ ناھێتە کرن، تایبەت قوتابیێن دەڤەرا شنگال، باشیک و بەحزان و ھەموو دەڤەرێن دی و ل دووڤ مەرج و رێنمایان ل زانکۆ و پەیمانگەھێن ھەرێمێ دێ ھێنە وەرگرتن”.
وەزیری ئاشکرا کر، رەوشا کوردێن ئیزدی ل بەرچاڤ دێ ھێتە وەرگرتن، ئەڤە چەند سالە زانکۆ و پەیمانگەھێن ھەرێمێ دەرگەھێن خوە بەرامبەر قوتابیێن ئیزدی ڤەکرین و بێ جوداھی دھێنە وەرگرتن، تایبەت ئەو قوتابیێن ناڤێن وان ل زانکۆ و پەیمانگەھێن پارێزگەھێن دی یێن عیراقێ دەردکەڤن و گۆت: “ئەم ب ھەموو شیانێن خوە بزاڤان دکەین، ژ بەر رەوشائەمنی وان قوتابیان ڤەگوھێزینە زانکۆ و پەیمانگەھێن ھەرێمێ”.